قالت يقول المطلقه مستعمله فضله غيرنا ماناخذها الله لايوفقهم وش ذنبي

يسعد صباحكم يابنات حواء
انا مثل مانتم عارفين مطلقه تقريبا لي 6 سنوات يجيني خطاب لاكن ارفض كلهم معددين
كثييير اصغر مني تزوجو وخلفوا وانا مثل مانا انا مطلقه بدون اطفال طبعا ومعي شهاده جامعيه ولا يعيبيني اي شي لاخلقا ولا اخلاقا واشوف المدح لي ولا اشوف احد يتقدم لي بس شاطرين بالمدح حتى اني ماني خيار لعيالهم ولا كان لمحوا لي لو تلميح
طقت روحي من عيشتي اللي انا عايشتها احس بفراغ كبير ، الحمدلله ماتجيني اي مضايقات وعايشه بهدوء ولا احد يتمسخر علي بس انا هو انا بنفس المكان من ٦ سنوات
فيه صديقه لي زوجها اجتماعي وله زملاء مطلقين كثار وقلت هذي اللي بتفيديني بسؤالي اللي مشغل بالي قلت حاولي تسالين زوجك وحلفتهاوقلت بـ امانه معك اسالي زوجك يسال زملاءه المطلقين بدون ماتحسسينه اني انا اللي ابي اجابه عن نظرتهم للمطلقه
المهم جتني وتناقشنا وقلت امانه تكونين صريحه معي وش قال زوجك بالضبط
قالت باقولك وش قال بس اوعديني ماتزعلين عشان تخفضين سقف توقعاتك بالزواج تقول قالها نصا ان زملائي يقولون ماناخذ وحده مستعمله ، مانبي فضله غيرنا مع انهم مطلقين الله لايبارك فيهم ولا بنظرتهم كرهت حياتي بعد هالكلام وش هالاستحقار اذ انا انبليت بزواج فاشل وكان السبب منه انه مخدرات وسكار وخرابيط والكل الكل عارف بهالشي ليه يناظرون لي هالنظره
اللحين عرفت ليه طول هالـ ٦ سنوات ماحد تقدم لي مطلق طيب انا وش ذنبي اتاثر بادمان طليقي باقي العمر
انا من تطلقت اكون صريحه معكم ماحضر مناسبات الا نادر
لكن هين انا عندي شي ياثر عليهم الحمدلله دخلت نادي رياضي وصار جسمي توب وعندنا بالعيد مناسبات كثيره وناويه اشتري فستان ضيق يبين معالم جسمي والله لاخليهم بالغصب بالرضا يجون يزحفون لي ويخطبوني انا اعرف ان الجسم البرايفكت نقطه ضعف الحريم وشلون الرجال
انا اقول هالشي ومستحيه من نفسي احس ان كرامتي انهانت وبالارض من تفكيري بلفت الانتباه واني ادور على زوج
الحمدلله انكم ماتعرفوني والله استحي اقول هالكلام حتى بيني وبين نفسي لاتلومومني والله ان العمر راح الان ثلاثينيه بس تعبت خلاص من حقي اتزوج واجيب عيال حالي حال كل انثى
هل اللي باسويه شي غلط او لا وش نصيحتكم لي عسى من ترد ربي مايرد دعوتها وتشق سبع السموات وتستجاب