قالولي حامل لكن...

السلام عليكم ورحمة الله وبركاتهحبيباتي انا مريت بقصه مؤلمه الشهر الماضي وكنت دائما ابحث عن اجابات لتساؤلاتي في النت وابحث عن حلول للمشاكل التي تعرضت لها.....
فوجدت.... 🌹
ان اجمل الاجابات كانت من منتداكم..... 🌹
واجمل الدعوات كانت من منتداكم..... 🌹
واحسست بروح الاخوه بينكم التي نفتقدها هذه الايام بكثره واحببت ان انظم لهذه الكوكبه الرائعه
وحبيت اشارككم بقصتي للفائده وطلبا" منكم الدعاء لي بمافيه الخير والصلاح
الشهر الماضي قررت انا وزوجي نجيب لنا بيبي يجدد حياتنا مع العلم ان عندي اولاد من قبل ولله الحمد.... وصارو كبار الحين لكن زوجي يحب الاطفال مره مره وانا الان في 43 من العمر وباقي لي فرصه في الانجاب
كانت وسيلة منع الحمل دائما بالعزل فقررنا نبطل العزل ولاول مره من عشر سنين تركنا العزل وصار التزيل جوا....... المهم خلال هذا الشهر كنت اراقب نفسي بحكم خبرتي بالحمل من قبل واعراضه وكنت احس بالم حول السره واحس بنغزات في صدري ولا حسيت بالام واعراض الدوره... ومن العجله رحت وسويت تحليل الكلور 😷 وطلع لونه كرمل مثل ماقالو البنات المجربات وتأملت خير
انتظرت الين قبل الدوره بيوم وسويت تحليل بول طلع سلبي 🤗
قلت ماهي مشكله انا استعجلت على نفسي وبخلي الين تعدي الدوره بيومين واسوي تحليل ثاني..
وبالفعل تأخرت الدوره وفرحت بشكل موطبيعي واخذت تحليل بول وسويته مره ثانيه طلع سلبي كمان.... احترت لان انا بالعاده الدوره منتظمه عندي ماحصل وتأخرت ولا مره من عرفتها الا اذا كان فيه حمل
قلت خلاص بنتظر يومين يمكن تنزل.... ولا نزلت
روحت لدكتورتي وخبرتها اش صار معي وانو الدوره متأخره قالت خلاص نسوي لك تحليل دم هو ادق وافضل.... سويت تحليل دم طلع سلبي.... يعني مافيه حمل
طمنتني الدكتوره قالت عادي تلاقينك كنتي متوتره ونفسيتك اثرت ع الدوره واخرتها والحين مدام تأكدتي ان مافيه حمل اكيد راح تنزل انتظري عليها اسبوع وتعاليني اذا مانزلت.... انتظرت اسبوع ولانزلت............
هنا بدأ الخوف عندي لان عمرها ماصارت معي وبدل ما افكر في الحمل بديت افكر في سبب تأخيرها.... المهم مارجعت لنفس الدكتوره لانها كانت بمستوصف مو مستشفى كبير قلت بروح اتطمن على نفسي واكشف بمكان ثاني.... المهم رحت لدكتوره ثانيه واعطيتها قصتي قالت بسويلك تحليل رقمي (هرموني) هو ادق شي ولو فيه حمل بيطلع وكمان باي اسبوع انتي
وسويت التحليل وكانت النتيجه اليوم الثاني لما رجعت البيت جلست احسب لو انا حامل باي اسبوع بكون فلقيت اني المفروض اكون بالاسبوع الرابع او الخامس وعدا اليوم عليه كأنه شهر لان النتيجه ياحمل وفرحه ويادوره متأخره ..... .... المهم رحت اخذت التحليل وطلع الهرمون مرتفع عدديا طلع 1050 قالت مبروك انتي حامل.... والله بكيت من الفرحه لاني مرتين اسوي تحليل دم عادي ويطلع سلبي..... صرفت لي فوليك اسد واعطتني موعد بعد اسبوع وارجع البيت انا وزوجي بنطير من الفرح مع ان عيالنا مالين علينا البيت اللهم لك الحمد لكن رغبتنا نجيب اخو او اخت لهم كانت كبيره .... المهم اعطتني موعد بعد اسبوع عشان تشيك ع الرحم بالسونار وتشوف وضع الحمل تلفزيونيا وعشت بها الاسبوع في فرحه احسب موعد الولاده واجلس افكر كيف ارتب اموري بعد هذا الخبر وكنت فرحانه فرحانه من جد
طبعا خلال هل الاسبوع ماحسيت باعراض حمل كبيره بس نغزات في الحلمات وبطني منتفخ واتعب اذا مشيت فتره طويله
كنت خلال هذا الاسبوع اذا تذكرت اني حامل اسجد لله شكر انو من علينا بهذا الحمل في هذا العمر
المهم رحت للموعد تقريبا بيكون الاسبوع السادس من الحمل سوت ليه اشعه تلفزيونيه والمصيبه جاتني هنا....... الدكتوره تلف بالجهاز ماشافت شي تلف يمين يسار مافيه اي حمل ولا حنين ولا كيس حمل 😨
تتخيلون الصدمه قلت يمكن باقي صغير قالت على الاقل نشوف ولو نقطه في الرحم.. رحمك فاضي مافيه ولاشي 😢
قلت طيب ونتيجة التحليل فيه حمل قالت انا مستغربه زيك لكن لازم نعيد تحليل الدم الهرموني اذا ارتفع كان بها واذا لا نشوف اش المشكله عندك
رحت البيت تعبانه مصدومه وخايفه حاسه ان فيني شي لا قدر الله
كانت نتيجة التحليل اليوم الي بعده وكان باقي عندي امل حتى الدكتوره كانت متأمله لان الهرمون كان مرتفع قبل اسبوع
المهم اخذت نتيجة التحليل اليوم الثاني لقيت نسبة الهرمون قليله جدا جدا 0.3...... يعني مافيه حمل استغربت الدكتوره ولا عرفت تتصرف وحولتني على استشاري وصلنا عنده كلنا حيره وتعب وخوف من هذا الوضع المشكله ان ماعندي اي افرازات اونزول دم اوي اي شي
قال الاستشاري نعتذر منكم لكن ظروري نعيد الاختبار من جديد وانا ودكتور مسؤل عن مختبر الدم بنسويه بانفسنا وراح نسويه لكم مجانا عشان نشوف اش المشكله
عدت التحليل وطلعوه لي في نفس اليوم وكان سلبي ايضا
سألت الدكتور اش الي صار ليه كذا قال انتي ماعندك حمل اساسا وانتيجه الي اخذتيها انها ايجابيه الاسبوع الماضي كانت بالخطأ وراح نحاسب المتسبب 😐
وقالي الحمدلله كنا خايفين ان عندك حمل خارج الرحم لكن الحمدلله مافيه شي وكررو اعتذارهم لنا.... ورجعوني ع الدكتوره عشان تتابع معي سبب التأخير في الدوره
رحت للدكتوره واعطتني حبوب دوفاستون حبتين في اليوم لمدة خمس ايام وبعدها قالت راح تنزل الدوره
وهذا انا باقي لي يومين ع الحبوب والله كريم
دعواتكم لي ان ربي يعوضني خير ويرزقني وكل من تتمنى الاطفال