برد111 @brd111

محررة فضية

قبل عشر سنين كيف كانت حياتك

اهلين بنات كيف حالكم ؟

حبيت اسولف معكم عن موضوع عشان اوسع صدري بردودكم وتعليقاتكم ونسترجع ذكرياتنا مع بعض ونرجع الماضي شوي ونفضفض معليش ابغى اقرا ردودكم كيف حياتكم بستمتع فيها ابي كل وحده قبل اكثر من عشر سنين كيف حياتها
والي مايعجبها المووضوع مو لازم ترد واللي ترد رد قوي بعفط وجهها خخخ
طبعا انا انسآانه اعشق المآضي احب اتذكر الماضي احيانا اذا ضاق صدري من شي اجلس اتذكر شي ماضي مر علي حلو واحيانا افتح اليوتيوب على برامج ومسلسلات وافلام كرتون وغيرها او اشوف ملابسي او صور او رسايل وكتب كلها تذكرني بمراحل حياتي اللي راحت ايييييييييه دنيا
احيانا ابكي اتمنى ترجع الايام اللي راحت واحيانا ابتسم وافرح لاني عندي ذكريات حلوه اتذكرها
طبعا اكيد بعد انك بعد الزواج تغيرت حالتك وتذكرين العزوبيه عند اهلك يازينها بس من ايام :06: واحيانا تتذكرين الايام قبل الزواج او بعدها تتذكرين كيف كانت الحياه احلى قبل النت والجوالات اللي دمرت العالم

اكيد مع مرور السنوات بتتذكرين وتقولين ياحلوها ذيك الايام واساسا انتي كنتي بذيك الايام كانت حياتك عاديه بس اذا راحت السنين تتمنين ترجع

اللحين كل شي تغير طبعا انا بتكلم عن نفسي وعايلتي واقاربي كذا يعني اللي بسن العشرينات او الثلاثينات مادري عاد عنكم انتم زينا او لا و لاتحسبوني عجوز خخخخخخخخخخخ انا من مواليد الثمانينات وعمري بالعشرينات يعني يمكن الللي كبار بالسن امهاتكم وجداتكم ذكرياتهم غير هم يعتبرون ذكرياتنا اللحين وع لكن حنا بالعكس نشوف اننا قبل زينين بس اللحين لا :hahaha: احيانا امي وجداتي يضحكون علينا اذا تذكرنا شي ماضي يقولون اصلا مامداكم تطلعون على الدنيا عشان تقولون ماضي وماضيكم من زينه يعني انهم ماكانوا كذا كانوا احسن حياه رغم الفقر وانها ماتطوروا المهم واننا المفروض مايصير لنا ماضي الا بعد سنين بس حنا حسينا بالدنيا انها تغيرت عن قبل صحيح كنا اطفال ومراهقات بس وربي انها حلوه كان حياتنا تغيرنا فجأه وفيه شي اتذكره وانا صغيره عمري 10 11 او ايام المتوسط والثانوي يعني
كل مرحله ولها ذكرياتها الحلوه بس انا حسيت 2002 الناس تغيرت صحيح قبل 2002 كان فيه جوالات ونت وقنوات لكن مو كل الناس عندهم وكان مع الناس جوال عادي وبين الناس رسايل عاديه بس وقبل قبل الالفيه عاد ماكان فيه جوالات والا نادر انا اذكر لما كنت بالمتوسطه المديره معها جوالل صغينون مادري وشو كنا نستغرب نحس انها واااااو هههه والقنوات اغلب الناس عندهم الاولى والثانيه وبس بعدها طلعت الرياضيه وكانوا اول يخبون الدشوش عن بعض فشيله اللي عنده دش هههههه مايخاف الله اللحين كل بيت مايخلى وعادي عندهم طبعا مو كلهم والحمدلله في قنوات اسلاميه

وقبل الناس يجتمعون مافيه شي يشغلهم يسولفون مع بعض وبناتهم مراهقاتهم معهم مافيه احد صاد بغرفته ههههههههه مايدرون عنه لاهين بالجوالات والنت

طبعا انا ماراح اتكلم عن مراهقتي وش سويت لاني لو بكتب يبي مجلد عن مغامراتي وحركاتي وسبق كتبت من ضمن مواضيعي
لكني بتكلم عموما عن العايله كلها
المهم

كانوا الناس يجتمعون على غداء وعشاء وفطور اذا فقدوا احد ماياكلون لين يجي
طبعا سهر مافيه الى 2 بالليل اخر حد لهم

يصحون الصباح 10 يفطرون مع بعض ومافيه قنوات الا الاولى والثانيه الصباح وش يجي ياسلام اول شي الدندنه شاشه خضرا وفيه الملك فهد وجنبه علم وبعدها سارعي للمجد والعليا وبعدها اذاعه قران وبعدها فيلم كرتون خفايف يعني بباي وبنك بنثر والثلاثه المهابيل هههه وبعدها عاد فيلم كرتون قريه التوت وزورو ترى هذا ايام كان عمري 13 14 اتذكرها احلى ايام عمري المهم لما يأذن العصر طبعا عايشين على التلفزيون يااولى ياثانيه افتح الثانيه فيلم ياباني او امريكي لازم كل عصر يجي وبعدها طق طق الجيران نروح نفتح للجيران تجي معها حلاو بقر او حلاو توفي قرطاسته ياحمرا ياصفرا اللي تلعبون فيها تشوفون الناس حمرا او صفرا خخخخخخخخخ اتمنى فهمتوا علي يازينه وتدخل ام الجيران تجلس بالحوش عند جدتي وسواليف وامي تصلح كيك وبسبوسه ماكان الناس يصلحون حلى وحركات نادر حدنا بسبوسه وكيك وفشار ابيض نفرح به واللحين تكرم النعمه
كانت جلستنا العصر يجتمعون كل الجيران عندنا واذا اذن المغرب راحوا وبعد المغرب يجي مسلسل بدوي لازم نكمل باقي الشاهي والفصفص وتعطينا امي فشار مرامي
يخلص على طول القناه الثانيه الانجليزيه فيلم فرنسي اذكر احب اتابعه وبعدها وقت فراغ ماعندنا شي نقوم انا واختي نلبس من ملابس امي ونستهبل نلعب حريم ونتمكيج ونلعب بباقي الشاهي او نروح نسوي دعايات عند المرايه هههههههههه بمعجون او شي لين يروح الوقت

والساعه 9 وقت فيلم ابو سياره حمرا اسميه واذا خلص اقوم اتعشى بدري طبعا ورانا مدارس اوووووووف امي يلا حطيني السفره اقوم طبعا خواتي ينامون وابقى انا يقالي راعيه سهر والمواعين تطيح بتسبدي اخلص بسرعه وعلى طول التلفزيون امي تبي تشوف مسلسل بالاولى وانا ابي الثانيه وهوشه ههههه المشكله ماعندنا الاتلفزيوني واحد عند ابوي بغرفته ينتظر المصارعه الحرررررررره وتذكرون ايام مسلسل القصر باالاولى ونفس الوقت على الثانيه يجي فيلم water وانواع التقطيع تلقينها لقطه عاديه ويقطعونها وانواع القهر هههههههه لو تجي وحده لابسه كت او مطلعه بطنها قطعوها
مايطلبه المشاهدون كل اربعاء يجي التلفزيون كان عندي شي اللحين مااحب اشوف شي كثرت القنوات وصار كل شي بايخ فيه ومساخه وقله ادب

المهم اهلي ينامون 12 طافين كلهم الا انا اقاوم عشان مسلسل دروب الشك تذكرونه ههههه احيانا تروح علي نومه واذا صحيت الصبح معصبه ماشفته ومااتذكر كان يعيدونه وانقهررررررر حتى ابوي صار يهددني بالتلفزيون اذا زعلوا علي شالوه واقعد بها انا عايشه عليه بس بين اهلي مع بعض يعني الله الهادي

اللحين كلن لاهي بشي وبغرفته مسكر على روحه محد يجلس مع احد ولا احد يزور احد واذا اجتمعوا كل وحده بيدها بلاي بيري وايفون وطقته تتكلمين على جداران احيانا عادي وماينامون الا الفجر ولا يصحون الا المغرب

عاد ايام رمضان قسم بالله لها طعم اللحين يجي رمضان ويروح مانحس فيه برررق رمضان هالسنه مابينه وبين رمضان العام شي مو زي اول نحس فيه وننتظره بشوق لاننا نحس ان السنوات طويله شوي

ورمضان اذكر كان شتاء نصحى الظهر لانه صيام يقالنا نطول بالنوم للظهر اجلس اتابع الطبخ واعلم امي عن طبخه وكذا وبعدها يجي بابا فرحان واذا اذن العصر ماادري انا اساعد امي او اتابع الفوازير ههههههههه ياربي زحمه كل شي يجي العصر نجتمع على الفطور كلنا ووناسه اللحين طبعا يمكن وانتي ببيت اهلك او عند اهل زوجك تلقينهم مايجتمعون مع بعض لابد يصير شخص مابعد صحى نايم يحطون التمره بفمه وهو نايم لانهم يسهرون يتسحرون وماينامون للظهر ومحد يساعد احد
والفطور يمكن محد ياكله بس اربع وعشرين ساعه تلفزيون تلقيب بالقنوات ع الاقل قبل كنا صح نشوف برامج بس خلاص وقت الصلاه مافيه شي مو زي اللحين الله يهدي الجميع و وقت التراويح التلفزيون مافيه شي لا بالاولى ولا الثانيه مافيه شي يلهي نروح نصلي وتنادينا جدتي نلعب معها كيرم لاقيه احد تلعب عليه لانها تدري انها بتغلبنا وتفرح نلعب معها الله يذكرها بالخير

والعيد يووووه نشتري ملابس من قلب وفرحه العيد ياسلام وطرطعنا بالنهار واليل عيدنا يطول اللحين تحسون اننا نشتري ونلبس وحنا مالنا خلق مانصدق بس يخلص العيد

نفوسنا شينه على بعض محد يتقبل من احد شي

ماقول الا الله يرحم الحال وربي ابكي واتمنى ارجع لو يوم بس واتمنى اني اصغر من عمري احس ماكنت اشيل هم وعايشه حياتي ومبسوطه يوم كبرت كل شي تغير :06:

يامامي الساعه 11 ماحسيت بالوقت واااااو المووضوع وش طوله مادري وش كتبت انا ههههههههههههههه السموعه و اعذروني ماعندي وقت اعدل المووضوع اذا فيه لخبطه وخرابيط بعدلها انا راجعه بعد شويات اشوف تعليقاتكم وتفاعلكم لاتطنشون

عن اذنكم

اترك لكم المايك

.....

11K

يلزم عليك تسجيل الدخول أولًا لكتابة تعليق.

تسجيل دخول

نخلة مثمره • 12 سنة

عمري 32 قبل 10 سنوات كنت طالبه والحين موظفه الحمدالله كانت حياة بساطه ياسلام

صعب اتجاهلك** • 12 سنة

ياااااااااااااااااااااااااي محلاها من ذكريات صااادقه والله نفسسسس ايامنا
كأنك كنتي عاااااااايشه معنا ههههههههههههههههههههههههههه
ولا درووووب الشششششك شي ثاني هههههههههههههههههههههههه

برد111 • 12 سنة

نخلة مثمره :

عمري 32 قبل 10 سنوات كنت طالبه والحين موظفه الحمدالله كانت حياة بساطه ياسلام

عمري 32 ...

رد مختصر انا ابي اذا انتي فاضيه تقولين حياتك بالتفصيل

زوجة ناصر • 12 سنة

يوووووووووووووووووووووووووه موضوعك رووووووووعه وانا من عشاق الاولين ..

ذكرتيني بالقناة الاولى ياهي شي عندنا فعلا هي الوحيد المتنفس لنا هههههههههههههه العصر شي مقدس عندي لازم امي تسوي بطاطس مقلي وترسل اخوي يجيب ببسي ومايطلع البسكوت الا العصر مع افلام كرتون اتذكر مدينه النخيل .واموت على الدعايات بس متسدحين انا واخوي نعد الدعات كم وحده والله اذكر يوصلن لثلاثين دعايه .

ويازين الاربعاء مقدس عندي نروح لبيت جداني ولعب ولعب لجت الساعه عشره تلقينا كلن نايم بكنبه وامهاتنتا يالله قوموا نبي نروح هههههههه اااااااااااااه ذكرتيني باحلى ايام عمري ..

ولا يازين جلست الفطور مع بعض والغداء والعشاء روعه الجمعه الحين مافيه احد بس امي وابوي الي تصفى عليهم هههههههه كلنا متزوجات واخواني كلن لاهي بعمره الله المستعان دايم اقول ياااااااااااااااااااااااااااااااااااليت يرجع الزمان احب عاد ايام رمضان حكايه لحاله .. مشكوره هيضتي مشاعري الصراحه بالصميم

$om\retal$

om\retal • 12 سنة

انا قبل عشر سنين كنت عند اهلي بصف اولى متوسط ذكرياااااات لاتنسى