قبل لاتردين بأي موضوع.. تعاااالي عندي سالفة 

بسم الله الرحمن الرحيم..

والصلاة والسلام على سيدنا محمد وعلى آله وصحبه أجمعين..

أهلين بنوتات .. وحريم.. وكبار .. وصغار

أخباركم إن شاء الله تمام..

أنا عندي مويضيع صغير..

ودي أتكلم وإياكم فيه..

طبعا موضوعي ماأدري كيف أبدا فيه..

طبعا كلكم تعرفون وش طبيعة أغلب المواضيع في قسم حياة أسرية سعيدة وقسم الحياة الاجتماعية..

أغلبها شكاوي ومشاكل وهموم واستشارات..
الله يفرج على كل مهموم وحزين ومظلوم..
مو هنا المشكلة طبعا..

المشكلة هنا واللي موضوعي مرتكز عليها..
 
هي 

الردود..


ردود بعض العضواات..

وأنا من هذا المنطلق ماأسيئ لأي عضوة أو اتبلى على أحد..

لكن أسدي النصيحة فقط..


الردود وماأدراك مالردود..

مشكلة بعض العضوات إن ردودها تحريضية وبدل ماتحل المشكلة أو تهدي الوضع تزيد الطين بلة..

يعني كيف..

وحدة مثلاً كاتبة مشكلتها مع خواتها و و و ...
تجيك هالعضوة وترد:
اسفهيهم ولاتكلمينهم .. اللي مايبيك لاتبيه 

و و و 
ونست إنها تحرض أخت على أختها..
وتدعو إلى قطيعة الرحم..

وقبل كم يوم كانت وحدة حاطة مشكلتها مع زوجها أسأل الله أن يفرج لها ويسخره لها..
ومن ضمن السالفة ذكرت أمها..

ويجونك بعض العضوات وردودهم تقههههر 
أمك ليش تخلت عنك.. واسمحيلي أهلك رموك له..وأمك قهرني تصرفها
وماأدري ايش ومن هالكلام..
يغني أنتم أحن عليها من أمها..
البنت الحين بتشيل بخاطرها على أمها وأنتم السبب..
مهما كان الأم أبخص بظروف حياتهم ومصلحة بنتها..
يعني ياخواتي انتبهي من هالإشياء وتورعي عنها.. تخيلي ناس يحرضون بنتك عليك .. او يحرضون أختك عليك..

وبرضه لاتنسون إن بعض العضوات تضع من الحبة قبة وتكتب موضوع تافه وتحط عليه شوية ملح وبهارات عشان يتفاعلون لها الناس..ويتعاطفون مع سالفتها..

يعني تجيك وحدة كاتبة أهل زوجي سووا فيني وقالوا لزوجي و و و .. 
وحنا هاك ياتعاطف وردود وحسبي الله عليهم وناس ماعندهم احساس واسفهيهم ولاتروحين لهم وفيهم ومافيهم يعني بإختصار نخليهم في الحظيظ..

لكن احنا ماندري هي كيف تعاملهم .. وإيش سببت لهم من مشاكل .. وإيش طريقة تعامل زوجها مع أهله بعد زواجه

يعني هي بتقول المشكلة اللس صارت لها فقط وتسكت عن المشاكل اللي صارت منها طبعا..

يعني أنا ابقول لكم موقف صار معي..

مرة وحدة من قريباتي قعدت تشكي أهل زوجها وخوات زوجها وبصراحة حييييل تشكي منهم ومن تصرفاتهم.. وأنا بصراحة رحمتها.. لكن يوم سحبتها شوي بالكلام..

اكتشفت شي

وهو إنها

من تزوجت وهي تبي تسيطر على الرجل بشكل كامل .. وقالتها بالحرف الواحد ..
فلاااااان لي أنا بسسسسس..

يعني نست أو تناست أن له أم ربته وله خوات من لحمه ودمه ويحتاجونه..

بصراحة استحقرتها مرررة..

يعني ماألوم أهله لو كرهوها وشالوا بخواطرهم عليها لأنها فاهمة ان الزواج صك تملك..

يعني ياحوائيات ياجميلات..

مو كل من كتب فعلا مظلوم.. ومو كل مشكلة تكون جت من العدم .. يعني لابد لها مسبقات

يعني راعوا هالشي وانتبهوا بردودكم..
لاتحرضون زوجة على زوجها.. ولا بنت على أمها.. ولا أخت على أختها .. ولا مرت ولد على أم زوجها.. ولا سلفة على سلفتها..

ماتدرون من فيهم الظالم ومن المظلوم..

ومرات بعض البنات وقت ماتكون معصبة تجي وتفتح لها موضوع وتقعد تكتب وتسب وتكب حرتها في الموضوع..حتى لو السالفة تافهة.. تعرفون حالات الغضب.. الانسان يطق بما لايعي.. وبس تقعد لها كم ساعة تروق وتهدي وتنسى اللي صار لها.. وترجع تفتح عالم حواء وتلقى بعض الردود على موضوعها..وترجع تشيش مرة ثانية..وتفكر بالانتقام..

طبعاً هالشي مايخلينا ننكر بعض المواضيع اللي تلمسين من خلاله وقعات الظلم والابتلاء..
وأيضاً ماننكر جهود بعض الاخوات وردودها اللي مثل العسل على القلب..وتحطها على الجرح ويبرى..
وبعض الاخوات اللي لاتأخذهم في الحق لومة لائم.. يعني يقولون كلمة الحق سواء لك أو عليك..

وأسأل الله التوفيق للجميع..

أتمنى اللي بقلبي وصلكم بصورة مفهومة..

وأعتذر عن الإطالة..

ودعواتكم لأخوي بأن يرزقه الله الزوجة الصالحة.. تفركشت خطبته بدون سبب.. والله المستعان..