قبل يناديها يمه والحين مايبي يشوفها

السلام عليكم ورحمة الله وبركاته 
المشكله تقريبا صارلها شهرين بالضبط 
كان زوجي جدا يحترم امي وابوي 
وكان يقدرهم جدا وخصوصا امي كان لها معزه خاصه له 
وهي نفس الشي ومازالت تحبه 
اللي حصل يا اخوات انه زوجي كان كل ماحصلت مشكله بيني وبينه يدق على امي يتشكى
وامي كانت تسمع الشكاويه عني بس كانت
تقول شكاوي زوجك عاديه ويقدر يحلها بيناتكم ليش
كل ماحصلت مشكله بسيطه دق علي علمني
وانتي بالمقابل يابنتي تحملتي منه كثير سفر الوحده بشهر
مرتين واحنا ساكتين وماعمرنا دقينا على امه نتشكى 
قلت الامي انتم السبب تعطونه وجه وتجاملونه وماتقولون له
ان مشكلتك يافلان بسيطه وتقدر تحلها مع زوجتك 
كل اللي تسونه ان شاءالله بنكلمها راح نعقلها 
وهي اساسا كلها مشاكل بسيطه وبايخه وحتى انتي يمه قلتيها بلسانك
قالت امي صعبه بكون ضده لانه زوجك من النوع اللي يامع ياضد
فلو صرت ضد زوجك ومعك انتي راح يحسبني انا اللي مخربتك
نوعية زوجك اعرفها وخابزتها وعاجنتها يابنيتي خليني اسلك له احسن 
من انه اكون ضده ويكرهني
ومره حصلت مشكله بيني وبين زوجي بايخه جدا جدا 
ودق على امي بيتشكى مني
وامي هنا انفجرت بسبب سخافة الحكايه اللي هو داق بسببها
قالت انت ياولدي تدور الزله على بنتي وصراحه انا مااشوف البنت غلطت ابد وانا مرره شرهه عليك لانك تدق تتشكى على اسباب سخيفه ياليت ياولدي تحلون مشاكلكم بأنفسكم
وسكرت امي
هنا زوجي انهبل
راح قال اها امك مخربتك وامك هي السبب انا يوم شكيتلها زبدتلي وماعطتني وجه عرفت الحين من مخربك علي 
قلت الامي الحكايه امي عصبت منه وقالت راح ادق على ام زوجك اتفاهم معها
ام زوجك انسانه واعيه وفاهمه راح تكلم ولدها وتعقله
وتخليه يبطل شكاوي على الفاضي والمليان
وكلمت ام زوجي وقالتلها انتم ناس اجاويد وطيبين ومافي مثلكم
بس صراحه ابنك فلان يتشكى من بنتنا على الفاضي والمليان
وعلى اسباب بايخه جدا ياليت تكلمينه وتخبريه
انا مابيه يدق علي يتشكى ولا على ابوها وخلاص يا ام فلان طفح الكيل
هنا ام زوجي انفجرت على امي وقالت وش فيها اذا اتشكى وماهو من الرقي انك تقولين لي خلي ولدك لا يدق علي ولا على ابونا وانا عيالي كلهم يهبلون ومربيتهم افضل تربيه ومااشوف فيها شي اذا دق عليك يتشكى هذا من محبته لكي ولانه يرتاحلك
قالت امي بس على اشياء سخيفه ويهدد يقول انا مليت مابيها كل مره يدق يقول مابيها 
هذي كلمة تنقال يا ام فلان 
قالت ام زوجي عادي طول عمره زوجي يسمعني اياها واغلب الرجال اذا عصبو قالوها
قالت امي طيب زوجك يدق على اهلك يقولهم مليت من بنتكم قالت ام زوجي لا زوجي ماعمره دق على اهلي يتشكى مني بصراحه, بس انا ولدي اعرفه طيب وابن حلال ومافيه مثله وعن اذنك يا ام فلانه ابونا جا 
قالت امي لحظه لحظه لايكون زعلتي ترى ياوخيتي حنا خوات ومابيننا شي قالت ام زوجي حصل خير وسكرت 
بعدها دقت ام زوجي على ولدها وقالتله اللي قالته امي 
انجن زوجي ودق على ابوي يتشكى وابوي هداه قالي ابوي بغيت انفجر عليه بس تصبرت خفت اهدم بيتك يابنتي
وقال زوجي الابوي هجد زوجتك دقت على امي وانها تقول لا تخلي ولدك يدق علينا وش هاالاسلوب هذا والله عيب تدق  على الوالده وماحترمتني ولا احترمت امي
وابوي هداه وراح فهم السالفه من امي وقالي ابوي صراحه انا اشوف ان زوجك وامه بالغو جدا بس انا راح اخلي امك تحل الموضوع عشان ماتكبر الحكاية
رجعت امي تدق على ام زوجي تقولها لايكون زعلتي او فهمتيني غلط بس ام زوجي ماردت 
وزوجي الحين مايطيق يسمع سيرة امي خلاص كرهها
قبل المغرب امي جايه تمرني مع السواق بنطلع وبالصدفه زوجي جاي من النادي
دخل البيت وماسلم على امي وامي كانت بالسياره
استغربت توقعته نسى السالفه
وكل فتره يدق على ابوي يسلم وبعدها امي يسلم عليها الحين بس ابوي يدق عليه
امي ساحب عليها
طبعا انا تاركته
وامي تقول زوجك كان مايسميني الا يمه وعشاني قلت كلمتين الحق زعل علي وكرهني وحتى امه زعلت
ليش الناس كذا الهدرجة ماتتحمل شي 
وانا ضايق صدري عشان امي ارحمها حسيتها متحسفه انها داقه مع انها ماغلطت
اما زوجي مادراء عن امي