كيف ح ـالكم جميعا ؟ ان شالله الجميع قوود
حبيت احكي لكم موقف صعب حصل لي انا وعيلتي اليوم
الســاعه 12 بالليــل
هااليوم مستحيل انساه لأنو كان يوم غييييييير
بس قبل احكي لكم ايش صار بحكي لكم ايش حلمت من اسبوع
لأنو الي صار لنا اليوم شفتو في الحلم سبحان الله
حلمت انو كان في نار قدام بيتنا نار قويه وانفجارات وكدا الموهم حكيتو لأهلي
شوفو ايش صار اليوم
كنت جالسه ع النت وولدي اياد نايم وبابا كان في غرفتو
واختي الكبيره مع ولدها في شقتها
وماماتي خرجت مع اخويا و اختي حامل ماشالله وهذا شهرها راحو الحرم عشان يطوفو
دق جرس البيت وصار اللي يدق جرس بيتنا يدق الباب لدرجة انو شويا ويكسرو
وبابا انسان كبير في السن مريض رجلو مبتوره ومايقدر يمشي
فنادالي وقلي الحقي شوفي ايش في؟؟؟ خرجت ولقيت رجااااااال كتير ورا باب بيتنا يصرخو
ويقولو لنا اطلعو الباص الي واقف قدام بيتكم بينحرق وفي سياره تانيه بتنحرق مع الباص
وولد الجيران يقولي هاتي مفتاح سيارة ابوكي ابعدها لاتنحرق
طالعت لقيت النار شاعله لفوق واصوات انفجارات ودخان اسود
صرت اصيح بأعلى صووتي واجري اعطيتو مفتاح السياره وفكيت باب الشارع
وجريت على بابا وقلت له لازم نخرج في حريقه برا كبيره
وبابا مايقدر يمشي فصار يزحف ع الأرض وانا صرت ابكي زي الأطفال مني عارفه ايش اعمل
ومن حسن الحض اخويا وماما واختي وصلو
فدخلت ماما تصرخ واخويا يقولو لنا اطلعو وفجأه ( انقفلت الكهرباء ) وصرت اصرخ في الظلام
والدخان الأسود خنقني
وصرت ادور على ولدي مني عارفه اوصل له في الظلام وانا امشي في البيت صرت اتخبط في الدولاب
واطيح في الأرض واتصقعت لمن قلت بس
حسست لقيت جوالي نورتو واخدت ولدي من الغرفه
وخرجت وماما تخبط على اختي الباب واختي مره موسامعتها
كانت فاكه طيور الجنه لولدها ورافعه الصوووت
الموهم فتحت الباب وخرجت وجاه اخويا شال بابا وطبعا صارت النار تزيد
والدخان يدخل علينا عماني معد خلاني اشوف وجاه اخويا اخد ولدي مني
وانا صرت اصرخ زي المجانين موعارفه ايش اعمل وكيف اخرج كدا الشارع وسط الرجال من دون عبايه
بس الحاجه حواجه وانا في ظرف صعب طلعت وغطوني بشرشف وصرت اصرخ وابكي في الشارع
ادور على ولدي ولقيتو مع ولد الجيران الحمدلله ماسكو بعدين اختي اخدتو منو
الموهم خرجنا كلنا من البيت شافوني حريم الجيران وجهي وشعري ورجولي كلو باين
ماقصرو الله يستر عليهم صبو فوق راسي كاسة مويا بارده لأنهم شافوني
بس اصرخ زي المجانين ولبسوني عبايه وطلعت
وصارت النار تحرق في شجر البيت حقنا
وصار البانزين يصب والنار تزيد تولع وتجري ورانا في الشارع واحنا نجري حفايا محنا لابسين حاجه
واحنا ساكنين في طلعه صرنا نجري وننزل من الطلعه وانا ماسكه ولدي بقلبي ونجري
والنار تجري ورانا لأنو البنزين خرج من السياره والنار تزيد
صارو الجيران يجرو ويطفو بطفايات الحريق الي عندهم في بيوتهم
والنار موراضيه تنطفي
جات الشرطه وجات سيارات المطافي وطفو الحريقه
بعدينا جوه اخواني ورحنا بيت اخويا
ووصلتنا اخبار انو الباص الي انحرق ( بفعل فاعل ) حسبي الله ونعمه الوكيل يتلقيه في دنيتو قبل اخرته
طبعا اول حاجه سجدت لله انو ربي كتب لنا عمر جديد اناوولدي واهلي
تاني حاجه اني شفت هدا الي صار في حلم
وغلطتي اني حكيت الحلم وهدا تاني حلم احكيه للناس يتحقق
عشان كدا انا بنصحكم نصيحه خدوها عضه وعبره مني ازا حلمتو حلم موحلو لتحكو لأحد
وفي حديث عن الرسول عليه افضل الصلاة والسلام ( فيما معناه )
انو الرؤيا السوء من الشيطان فمن رأى رؤيا فكره منها
شيئا فلينفث عن يساره وليتعوذبالله ولايخبر بها احدا
تالت حاجه واحب انبهكم بيها نصيحـــــــــــــــــــــــــــــه
الصدقه ثم الصدقه ثم الصدقه فهي تدفع البــلاء والإستوداع عند الله الذي لاتضيع ودائعه
امي لمن كانت في الحرم اتصدقت لنا واستودعتنا عند الله كولنا
عشان كدا ربي حفظنا لأنها طلبت الله رب الكون والي مايرد احد يطلبه
دايما الإنسان في كل مكان يستودع نفسه واهله عشان الله يحفظه
ورابع حاجه بقولكم هيا عني انا
اليوم بس
عرفت معنى الأمومه
مدري كيف اوصف لكم شعوري لمن الكهرباء طفت وصرت ادور على ولدي
ولمن خرجت الشارع وسط الناس اصرخ وادور على ولدي
سبحان الله ماعرفت بقيمة امي الي لمن جربت
وندمت على كل لحضه زعلت فيها امي وادركت كيف الأم تحب اولادها وتلم عليهم وتخاف عليهم
مسكينه ماما وقت الحريقه تبكي وتصرخ ودخلت البيت مع انو المفروض تنجى بنفسها
وماتدخل عشان لاتنحرق جوات البيت
دخلت عشان تلم علينا وتاخدنا ماطاوعها قلبها
واللهي يااعضاء اني بكتب لك القصه وانا دموعي على خدي
انصدمت من الي صار واحس اني اتعلقت بماما وبابا واخواني الله يحفظهم واخواتي
وولدي الله يخلي لنا ويخلي لكم
وعرفت حاجه كمان انو الموت مايعرف يجي على فجأه
واحنا لازم نكون مستعدين له ونكون عاملين شي لأخرتنا
انا كل شويا اتخيل انو اليوم كان ح يتصلى عليه الصبح
بس اجلس ابكي مااتخيل اني اموت محروقه وربي الله لايكتبها على مسلم
اهم شي الحمدلله على سلامتي وسلامة عيلتي ^_^
ربي يخليكم لبعض ويخلي لك ولدك ووالدينك يا قلبي