قسوة الماضي و الحل فقدت الأمل

مساء الخير
خواتي انا والله داريه مافيه فايدة ابد من اللي بكتبه بس اعتبروني افضفض لان مااقدر افضفض لاحد
انا تربيت في عائلة ميسورة الحال ولكن لها قوانين صارمة ابوي عسكري نظامي
وامي اه يا امي كم تمنيت اعرف الحنان كم تمنيت اذوقه كم كنت استغرب اذا شفت وحده تضم امها لاني ماعرفته في بيتنا
امي كانت تقرا وتكتب وذكيه وتقريبا هي المسيطرة في البيت كان يهمها جدا التعليم والدروس والتفوق وكانت تقارن كثير لايجي احد احسن منكم جيبي درجات ممتاز لاتنزلين عنها وانا طفله في الابتدائي بالبدايه فعلا اسوي كل شي واتفوق وانجن لو تفوق احد وانافس وتعبت كله عشان امي تبغى كذا عشان ترضى
انا الكبيره في اخواني اخوي اللي بعدي نفس الوضع تفوق ولايسبقك احد
وكنا متفوقين وكل همنا الدراسه ساكنين بقاعده عسكريه الترفيه شي لايذكر والاجازات نادرا نسافر
وهمنا اذا بدت الراسه التفوق
وبديت مراهقه بديت اتعرف وابغى اضحك وانبسط مع البنات وبدت امي تشدد علي اذا كلمت صديقه لي تلفون باعلى صوت سكري السماعه
وانا احاول ارضيها لدرجة قالت مره ذوليك البنات لاتمشين معهم وازاعلهم عشانها وهم مافيهم شي
تبيني بس ادرس واستكرت الوضع انه صديقات وغيره
ودراستي زي وضعي تفوق في تفوق
رحت للجامعه بدت امي تشدد علي وتجفى كثير كثير كثير ماتتخيلون كيف كنت ادور الحب ادور الحنان ولا ألقاه حتى الصداقه ماتبني اسعد فيها
تزوجت وعندي اطفال ولازالت قسوة اهلي معي وصرامتهم وجفاء امي والحرمان اللي كنت عايشته مأثر فيني
٣٨ سنة واتوجع واتوقع فيني اكتئاب
صرت اذا زعلت من زوجي والا ضايقني والا انضغطت اتذكر الماضي والحرمان والرضاء اللي كنت اسويه والافعال ولا كان يعجبها شي
شخصيتي تأثرت جدا من قسوة امي صرت احس اني حتى في فتره وانا معهم كنت اذل نفسي كثيرر ووقتها ماكنت احسه ذل
بس الحين اتذكر فعلا كان اذلال لنفسي وشخصيتي تدمرت وقتها بسبب الحرمان والقسوة
واعاهد نفسي كل مامريت باكتئاب وتذكرت الالامي اني ما اخلي بنتي تذوق ماذقته
دعواتكم لي تعبت