قسوة الوالدين على البنت والتفرقة بين البنت والولد << مهم

السلام عليكم
اخواتي راح اعرض لكم مشكلتي ..
انا كنت موظفة في مدرسة اهلية الفصل الدراسي الاول لمدة 5 شهور و راتب المدارس الاهلية معروف قليل لكن مع ذلك ماكنت ابخل على اهلي بشيء وكنت مخصصة لهم ثلث راتبي اعطيه اهلي شهريا .. عكس اخواني ولا عمرهم اعطوا اهلي شيء على العكس دائما ياخذون من امي وابوي فلوس وامي وابوي يصرفون على اخواني حتى بعد وظيفتهم و زواجهم رغم انهم موظفين وظايف حكومية وراتبهم اضعاف راتبي ما شاء الله الله يزيدهم لكن مع ذلك مرفهين من اهلي ..
عكسي انا مهمشة في العائلة الريال محسوب عليا ولا يعطوني غير الامور الضرورية مثل المأكل والمشرب والملبس بس شيء اساسي بالحياة يعني فقط مثل السجينة
لكن انا بنت عمري 24 سنة فيه بعض الامور نحتاجها بس بنظر والدي امور غير مهمة .
المهم توقفت خدمتي في المدرسة واعطوني مستحقاتي مبلغ مستور الحمدلله قلت يسد حاجتي الى نهاية العام باذن الله بحكم اني اصبحت عاطلة لكن مع الاسف اهلي لمن عرفوا بالمبلغ طالبوني فيه وصاروا يحاسبوني على مستحقاتي من المدرسة ووالدي يقول ماتصرفين الريال الا بعلمي اذا وافقت اصرفي انا ما عندي مشكلة اعلم والدي بس والدي كبير بالعمر كل شيء عنده غير مهم يعني مثلا ميكاب قديم صار له سنوات عندي بغيره غير مهم جوال خربان بشتري غيره مو مهم
المهم عند والدي ( المأكل والمشرب والملبس ) ..
و امي اخذت من فلوسي من غير رضاي واعطته اخويا ..
كلمتها قلت لها يا امي لو انا موظفة وراتب ينزلي شهريا كان من عيوني اعطيكم وانا الوحيدة من عيالك اللي كنت اعطيكم من راتبي بس انا الان عاطلة ماعندي غير هذي المستحقات الاخيرة تبقت لي يادوب تسد حاجتي لنهاية السنة ، انتم ما تعطوني مثل اخواني خلوني اصرف على نفسي على الاقل ..
ماعرف ليش انا يعاملوني كذا هل لاني بنت ضعيفة يتحكمون فيها عكس الولد صار رجال مايعيبه شيء ؟
انا حتى الزواج متعقدة منه لان عشت حياة قاسية ومشاكل بالبيت منذ طفولتي الى اليوم عشان كذا صار عندي عقدة من الزواج ومن الرجال بشكل عام وكل ما يتقدم لي خطيب تجيني اوهام اخاف يسيء معاملته لي و ارفضهم ادعولي الله يفرج همي ويريح بالي ويرزقني الزوج الصالح اللي يرتاح له قلبي وبالي معه .
شكرا