ياشين هالضيقه اللي لي تخاويني ,,
وياكرهي للشوق يومه ضابط دوره !!
سحايب الحزن غطت كل مافيني ,,
ونسايم الوصل صارت عني محضوره !!
أهيم في عالم همومه تغطيني ,,
أصبحت تحت الألم بأمره وشوره !!
آلام قلبي سببها خل جافيني ,,
ولا أدري وشهو خطاي او وشي عذوره !!
لا قلبي اللي رضى يسلى ويسليني ,,
ولا عقلي اللي سمح لي أرقب حضوره !!
مابين عقلي وقلبي من يدليني ,,
وأنا على الشوق والحرمان مجبوره !!
أحترت بين الوصل والثقل كاويني ,,
وإن قلت أبوصل منعني الثقل بغروره !!
كانك قصدت الجفا لجلك تربيني ,,
محسوبتك رابيه في العز وقصوره !!
أصلي سعودي فاخر به مدى سنيني ,,
بنت الأصل والفصل والطيب وجذوره !!
ياجعل تسلم يدين اللي مربيني ,,
أبوي ذخر الرجال ومشعل ٍ نوره !!
أروح له فدوه من راسي لرجليني ,,
ولو يطلب العين أقوله / تم وبشوره !!
والحين أبختار عقلي بثقلي وش زيني ,,
وإذا زعل يشرب من الصد وبحوره !!
إن قال قلبي الوصل . قلت : لاتعنيني ,,
ولا تقول دقي,,,مكالماتي محضوره !!
الصفحة الأخيرة
قصيده مميزه00000
انامل مبدعه00000
ابيات موزونه00000
معاني دقيقه00000
موهبه متدفقه000-
ابيات كلها اصاله0000
فالها ان شاء الله الجائزه0000
ولا هانوا البقيه