قصة أم جنى

السلام عليكم ورحمة الله وبركاته
رجعت أكتب لكم بعد فتره وسامحوني إذا تأخرت للي طلبو مني أكتب إيش صار معي..
اللي مايعرفو قصتي أنا اللي حبيت واحد سنين طويله وتزوجته بعد صبر وإنتظار حتى وافقو أهلي لأنه مو من قبيلتنا وتم الزواج شهر واحد وللأسف يوم زواجنا صارت مشاكل بين اخواني وأقاربه وماانتهت لحد ماجاء اليوم اللي سحبني ابوي واخواني من بيتي واجهضت جنين ماكمل الشهر وطلقوني منه بعد ماهددوه انهم بيذبحوني خاف علي وطلقني تعذبت وبالأخير زوجوني انسان عذبني وشكاك وله علاقات مع بنات لدرجة انه جاب وحده للبيت وكنت ساكته بالبدايه ومن تشجيع بنات حواء الله يجزاهم الخير قدرت ارفع قضيه عليه ومع انه كان من سابع المستحيلات اني اتطلق بس إرادة الله فوق كل شي زوجي خاف انه تثبت عليه الزنا لأني هددته وراح طلق والحمدالله خلصت من عذابي معه عذاب الشك والإهانات كل دقيقه وتذكيري بعلاقتي مع زوجي القديم واللي صار معاي كل هذا انتهى.. تقريبآ زواجي من الثاني كان 4 سنوات وماعندي أطفال منه
وبفضل الله حصلت شيخ يشتغل بالمحكمه وهو اللي ساعدني بموضوع الطلاق وقال بيساعدني ارجع لزوجي الأول
وجاء مع زوجي الأول عند أبوي وتكلمو بموضوع رجوعي له ابوي رفض بس هذا الشيخ أثر كلامه في أبوي وبالأخير وافق وفرحت بعد سنين من العذاب مع انه ابوي حاول يعقدها وطلب مبلغ كبير بس وافق حبيبي كل هذا عشان نرجع لبعض..
ابوي اعطاهم لحد بعد عيد الأضحى منها تكون العده خلصت ومنها حتى يكون المبلغ جاهز..
طبعآ حبيبي بعد نهاية زواجنا تغير كثير وتعب ولاتزوج مع انه اهله أصرو عليه بس كان رافض احتفظ بكل ذكرى في بيتنا..مانساني ولاأنا نسيته بيوم..كنا نتعذب كل يوم من بعدنا عن بعض
ابوي قال بيعطيني شي بسيط من المبلغ وانا ماطلبت شي أبدآ قلت ابيه هو وبس ..
كان يتواصل مع أمي وأنا اتعذب نفسي بس اكلمه مره وحده بس منعت نفسي خفت يصير شي ويفرقنا وماتتم فرحتنا وبعدها نرجع نتعذب
بعد عيد الأضحى كنت متحمسه وخايفه أحد يخرب فرحتنا كنت أصلي وأدعي انه نرجع لبعض..
أخوي عصب وتكلم بس أبوي وقف له وقال له اصلا هذي بتعتبر مطلقه مرتين وماخلفت من بياخذها سمعت كلامهم وتضايقت بس كنت مبسوطه ابي اخوي يشيل فكرة رفضه لرجوعي ومن كلام أبوي وبفضل الله اقتنع أخوي وفرحت كثييييييير..
جاء عندنا ومعاه الشيخ وكمان المؤذون يالله كنت مواصله مانمت عيوني منفخه من البكي خايفه وجالسه أرجف جلسو وقت طويل وانا على اعصابي وجالسه أدعي وأرجف وامي تحاول تهديني والله ماقدرت حتى أجلس كل وقتي واقفه وأبكي أطول نص ساعه مرت علي لحد ماجاء أخوي وقالي ألبسي الشيخ بيدخل وزاد رجفان قلبي وزادت الدموع ولما دخل الشيخ قال انتي موافقه على فلان واجلس أبكي وقال سمي يابنتي بسم الله وسميت ورجع سألني وقلت له موافقه ورجع سألني مره ثالثه يمكن خاف اني مجبوره..
وقعت والا يقولي مبروك وامي تبارك لي وتسلم علي وتبكي من فرحتها وانا مصدومه واسأل امي اذا صدق او كذب والله كنت خايفه انه يطلع حلم بالأخير واروح اسجد لله وابكي وأحمد الله وأشكره ويجي أبوي ويبارك لي واخواني مع انهم كانو معصبين بس طنشت وقلت اهم شي رجعت له..
بعد ماطلع من البيت الا يتصل على جوال أمي وتقولي ردي قلت خايفه والله العظيم خايفه قالت خلاص الحين صار زوجك حرام ينتظر من زمان يكلمك..
ومسكت الجوال وقفل وانصدمت والا يرجع يتصل مره ثانيه وفرحت بس رديت الوو الا يقولي ياهلا بكل دنيتي والله تو الروح رجعت لي بعد هالسنين كلمته بالسااااعات كأنها أول مره صرت انام واصحى على صوته وعلى رسايله قال لي ماأبيكي تتذكري اي شي ولاسألني عن زوجي الثاني قال اعتبرينا رجعنا نحب بعض ولامرينا بكل هالحزن..
كنت مبسوطه بس بنفس الوقت خايفه يمكن لأنه ماتعودت تكمل فرحتي ..ابوي اعطاني 6 الاف من اللي اعطاه حبيبي ماطلبته أكثر لأني ماصدقت يوافق اعطيت امي الفين و4 الاف خليتها ملابس وعطور ولنفسي بس مااخذت لاذهب ولاشي ماعدا اكسسوارات بسيطه تصدقت بكل ملابسي القديمه وماحبيت البس ولاشي منهم عشان ماأتذكر شي من الماضي
بعد اسبوعين صار الزواج حفله بسيطه ببيت أهلي رحت للكوافيرا لبست فستان زواج اهدتني اياه صديقه لي حتى ألبسه..
كنت مبسووووطه وكأني ملكت هالدنيا قال لي ابوي الساعه 10 تروحي معه كنت على أعصابي متى يجي ابي اشوفه ابي احس انه مو حلم ابي افرح خلاص تعبت والله من الحزن..
ودخل اخوي قال يلا ينتظرك بالسياره ولبست العبايه فوق الفستان وكنت مرتبكه مره ومو قادره اشوف حاطه الطرحه على وجهي الا امي ماسكه ايدي وفتحت الباب ودخلت وماشفته أبدآ بس كنت اسمع صوته وامي تبارك له وهو يرد عليها وتقول الله يوفقكم ولايفرقكم وهو يقول آمين يارب وقفلت الباب وانا عيوني لتحت وماسكه الطرحه ماابيه يشوفني الا بالبيت ههههههههههههه
ومسك إيدي وقال لي مبروك واخيرآ وانا ساكته وارجف ولاحتى رديت عليه..
قالي بس تكفين هذي المره لاترسليني للمطعم وبعدها ضحكت وهو يضحك..
طبعآ سالفة المطعم لما عرفت اني حامل قلت له يروح للمطعم يجيب أكل..
وكنت أجهز حتى اسوي له مفأجأه وجاء وقتها ابوي واخواني واخذوني بالقوه الله يسامحهم..
المهم دخلنا البيت وتعشينا وجلسنا نتكلم لحد الصباح ونضحك نسيت كل همي فجأه..
ولما كان بيصير بيننا لقاء اعذروني على كلامي انقلبت فرحتي لحزن وبكاء ...
ماقدرت جلست أبكي وخايفه تذكرت زوجي الثاني لما كان يضربني ويغتصبني والله أغلب الأوقات..ويسمعني الإهانات..
هو جلس يهديني ويقول خلاص ياقلبي لاتخافي ولاتتضايقي بعدين نجرب اصلا انا ابي استمتع بشوفتك ابي انبسط انك رجعتي لي
وعدى 3 ايام وانا مع كل ضحكه حاسه بحزن لأنه حتى ماتكلم بالموضوع
وبنفس الليله حاولنا ورجعت لنفس حالتي مو قادره اتقبله وابكي وارجف..
وقال لي انا مسوي شي مضايقك قولي حبيبي قلت له لا والله مو بإيدي ماأدري ايش يصير
مازعل مني وماعصب بس كنت شايفه بعيونه حزن وقال لي انا ماراح اقرب الا اذا حسيتك مرتاحه..
ومر اسبوع كنا نضحك ونقرب من بعض بس مايصير لقاء ونطلع برى وننام جنب بعض
وبيوم رحت لبست قميص جيت عنده وطبعآ انبسط قبل مايصير شي رجعت لنفس الحاله.. ورجع يهديني وقال لي مو مشكله بنتظر
والحين مرت أيام وماصار بيننا شي أحيانا اقول لنفسي اكيد صرت مريضه نفسيآ ولازم أتعالج
رجعت دموعي لي وكأنه كان احساسي بمحله انه ماراح تتم فرحتي هو متضايق وزعله يخفيه عني حتى مايضايقني جالس يسعدني بكل شي وانا مو قادره اقدم له ابسط حقوقه..
ماأدري ايش الحل لما يقرب اتذكر زوجي القديم على طول مو قادره أنساه بهذا الشي تعبت والله خلاص ابي افرح ابي يكون عندي طفل كبرت بالعمر وهو كبر وطبعه يحب الأطفال راحت سنين عمرنا انتظار وعذاب أبي أسعده بطفل أبي تجينا بنت ونسميها جنى مثل مااتفقنا زمااان ابي ننسى كل شي وللحين الماضي يلاحقني..
اعذروني عالإطاله وأرجع أشكر كل وحده نصحتني من بداية ماكنت أكتب موضوعي وكل وحده شجعتني وكل وحده حزنت وفرحت معاي أسأل الله أن لايريكم مكروه في قريب او حبيب ويسعدكم دنيآ وأخره
إدعولي وانصحوني بدون تجريح أسألكم بالله لأنه اللي فيني كافيني