بسم الله الرحمن الرحيم
القصه منقوله أخواتي
قال تعالى:
(لله ملك السماوات والأرض يخلق مايشاء*يهب لمن يشاء إناثا ويهب لمن يشاء الذكور أو يزوجهم ذكرانا وإناثا ويجعل من يشاء عقيما إنه عليم قدير)
اللهم لك الحمد كما ينبغى لجلال وجهك وعظيم سلطانك
ايوة انا العاقر العقيمة !!!!!!
ازيكوا يا بنات
يا رب تكونوا بالف خير وصحة يا رب دايما
مش عارفة ده مكان الموضوع الصح ولا ايه
فيه ناس هنا كتير منكم يعرفونى وناس يعرفونى معرفة شخصية من سنين
انا كنت متجوزة وفضلت اكتر من 7 سنين مبخلفش واتطلقت لاسباب ملهاش اى علاقة بالخلفة
بدون اى اسباب لدرجة ان دكتور مرة قالى روحى يا بنتى انتى سليمة والدكاترة هايعلموا عليكى شغل
طبعا مش هاقدر اوصف فى ال 7 سنين دول شوفت ايه
كرهت اخرج بره باب البيت كرهت اشوف حد من السؤال الغبى ايه لسه؟
ما تشدى حيلك
انتى سايبة نفسك كده ليه العمر بيجرى هاتفضلى كده
روحتى عملتى اشعة كذا ولا تحاليل كذا ؟
جربى الحقن المجهرى
واللى تختلف معاكى فى اى حاجة واغلبه خلافات شغل تيجى تقولك فى وشك اصل انتى لو كويسة كنتى خلفتى لكن انتى مبتخلفيش
واحدة ست كبيرة كانت قريبة جوزى السابق بسبب حاجة بربع جنيه والله العظيم وقفت فى نص الشارع تقولى يا عاقر
ياللى مبتخلفيش المهم انها عندها 65 سنة ومتجوزتش ومع كده عمرى ما فكرت اعايرها ردا على كلمتها اللى اتقالت كذا مرة وعمرى ما نسيتها
ايوة انا العاقر العقيمة !!!!!!
انا بقيت بعبع التجمعات
من ضمن النكت ناس قرايبى معزومين عندى فى بيتى وبياكلوا على سفرتى بشيل ابنها عشان تاخد راحتها
بصت لاختها اختها جت تجرى شدته من ايدى وقعدت بيه بعيد وانا واقفة اصلهم ليها حق دلوقتى كنت هابلعه
صاحبتى اللى اكلت وشربت معاها حملت بعد عذاب حوشت مبلغ عشان اجيبلها هدوم للبيبى
قبل ولادتها باسبوع سالتها عن نوع البيبى وهيا كانت عاملة فور دى وعارفة من الشهر الرابع قالتلى معرفش دى باين بنت
ومديانى ضهرها وانا معرفشوطبعا طول الحمل بتشتكى ليا مر الشكوى لدرجة كنت بفكر اجيب حد ينضفلها شقتها واعملها اكلها بكميات عشان متقومش
وطلعت كدابة ولله الحمد جابت ولد وقالت للناس فى ضهرى امال اقولها تحسدنى دى مبتخلفش
ايوة انا العاقر العقيمة !!!!!!
دول واحد على مليون من المواقف
انفصلت وابتديت اعيش حياتى من اول وجديد بس المطلقة فى بلدنا خطافة رجالة وبنى ادمة متتعرفش
اول ناس بيحاولوا يكلموكى ازواج معارفك
ولما تشتميه وتمسحى بيه الارض يخاف ويجرى يحكى لمراته قبلك وانتى عشان متخربيش على حد تغيرى حاجتك وتبعدى بس تلاقى مراته تديلك انتى دش يا خطافة الرجالة توريها المحادثة وانك شتمتيه وبهدلتيه تقولك جوزى معندوش فيس اساسا تى طيب يا ستى عند الله تجتمع الخصوم فوضت امرى لله
كل يوم الساعة 3 ونص قبل الفجر اصلى واشتكى لربنا واشهده على كل اللى زعلنى
بعد طلاقى الكل اتخلى عنى ولله الحمد محدش همه عشرة ولا عيش ولا ملح ولا اى حاجة من ده كله
بقيت ابص من بره على الدنيا الاقيها تافهة اوى وسطحية بس كنت واثقة فى ربنا
لغاية ما حطيت كل همى فى شغلى وابتدى شغلى يكبر ولله الحمد
وانا ابتدى يجيلى عرسان
زوجة تانية ينطرد بره قبل ما يكمل الاسطوانة ومراتى فيها وعليها ومش مرتاح
مطلق وانا مراتى كانت وفيها بفى ردى اهدى شوية على نفسك محدش بيخرب بيته الا بسبب قهرى بره يلا
ارمل عشان تربى ولادى
كل دول كانوا بيسالوا عنى جارتى كتر خيرها بتقولهم انى مبخلفش فانا لقطة بالنسبالهم اللى عايز يتدلع واللى عايز مربية وخدامة ببلاش واللى عايز يحرق قلب مراته
ومكنتش اعرف لغاية ما جالى واحد عايزنى زوجة تانية ورفضت حتى اسمعه قالى احمدى ربنا مش كفاية الناس عارفة انك مبتخلفيش وعديتى التلاتين احمدى ربنا انتى لاقية
ايوة انا العاقر العقيمة !!!!!!
لغاية يوم
قابلت شاب عرض عليا ياخد شغل منى بعد ما اخده تانى يوم كان عندنا فى بيتنا بيخطبنى
مسبقش حتى وخطب مش اتجوز
يوميها بس عرفت ان ربنا ورانى الغلب ده كله عشان شيالى الاحسن
طبعا انا عاملة دولاب مليان اشعات وتحليل تثبت انى سليمة روحت اجيبهموله بعد الخطوبة مرضيش حتى يفتح الشنطة
مش بس كده شاركنى فى شغلى وكبر الشغل الحمد لله رب العالمين
طيب وبعدين يعنى من الهرى ده
اتجوزت من 6 شهور وحملت من اول يوم تخيلوا بس ربنا ما ارادش يكمل الشهر اللى بعده حملت تانى بس عشان تعرفوا انه لا بالرقدة فى السرير ولا الكلام ده
اللى ليه عمر هايعيش غصب عن الكل
الشهر اللى بعده عملت اكل عزومتين ل 30 نفر
مسحت شقتى
مسحت شقة امى
خرجت وشلت بلاوى زرقا
وجيت فى يوم ضرسى ورم جدا ووشى بقى شبه المخدة
روحت اخد الحشيش بتاعى ههههههههههههه الكاتافاست بابا اصر اعمل اختبار حمل احتياطى
عملته ورمبصتش عليه رميته بس بعمله اسكت بابا المسكن بره والميه اهى هاخرج اخده
بشيله ارميه فى الزبالة الاقى فيه خطين
انا عمرى ما شوفتهم حتى حملى الاولانى عرفت وانا بسقط
ايوة انا العاقر العقيمة !!!!!!
اول مرة اشوف خطين تقال كده
مخدتش دوا
مروحتش لدكتور
دعاء 10 سنين استجاب دلوقتى
ذل الناس ومعايرتهم ليا بسبب حاجة مش فى ايدى خلص
بقيت مسكاه ومش مصدقة
روحت للدكتورة وشافته باالسونار حاجة صغيرة اوى اوى شبه البيضة الصغيرة
سبحانك يا رب
انا بكتبلكم وهو بيتحرك اهو جوايا دلوقتى انا دلوقتى حامل فى الخامس
يا رب وحدك عالم بيا انا وكل اللى زيى ويا ريت الناس تتقى الله فينا شوية اتقوا الله محدش ضامن جوزاه عشان تفضلوا تعايروا كل مطلقة وكل واحدة اتاخر جوازها مش شطارة منك تتجوزى ولا تجوزى بنتك
الخلفة مفيهاش شطارة اتقوا الله فينا
متخليش واحدة تدعى عليكى مقهورة من كلمة دبحتيها بيها ومشيتى فرحانة انك عايرتيها باللى ربنا ابتلاها بيه
ومتعرفيش الخير فين يمكن هيا احسن منك فى عيشتها هيا ربنا هايعوضها وانتى عايشة ذليلة مع جوزك لاسباب كتير
ادعولى يا بنات بولادة سهلة وطفل جميل سليم صالح
زيا رب يديكوا كلكم ان شاء الله
كتبت موضوعى ده امل لكل واحدة كانت فى مكانى متزهقيش خليكى مع الله وقت الرزق محدش يعرفه بس هاتلاقيه جالك فى وقته الصح ان شاء الله
احبكم فى الله
فاطمه ع1 @fatmh_aa1
عضوة
قصة إمرأة مصرية حقيقيه لم تنجب تطلقت عانت ثم رزقهاالله بالوظيفه و الزوج الطيب والحمل!
2
2K
يلزم عليك تسجيل الدخول أولًا لكتابة تعليق.
ماانتبهت ياغاليه انها منققوله الله يتم لها ع خير ويسسسعدها ويسسسعدك
ربي لاتذرني فردا وانت خير الوارثين
ربي لاتذرني فردا وانت خير الوارثين
الصفحة الأخيرة
سبحان الله صبرتي ياغاليه وربي عوووضك الله يكتبلك الاجر ان شاءالله
والحمدلله الرزق بيد ربنا موبيد الناس دعوووواتك حبيبتي لي بالحمل السليم المعافى