قصة اجهاضي المتعبة بالتفصيل + اقوى حبوب منع حمل ومتا استخدمهم

السلام عليكم ..
اخباركم حبايبي ..
ذكرت لكم قبل كم يوم ان الجنين نبضه واقف وماكنت عارفة شسوي
رحت لقوى الامن لانهم حق عمل زوجي وقالو اذا مانزل الجنين تعالي بعد عشر ايام ننزله ورحت لدكتورة خاصه وقالت عشر ايام كثير روحي اي مستشفا ينزلون لك الجنين وماكان قدامي الا اليمامة
ورحت لمستشفا اليمامة ودخلت الطواري الساعه تسع فالليل ودخلوني التنويم الساعه ثلاث الفجر بعد محاولات مني بإقناع الدكتورة .. لأنها مو مقتنعه بحالتي ..مدري ليه كل المستشفيات يهربون من التنويم يبون الوحدة تسقط ببيتها الظاهر ..
المهم ظليت يومين منومة والله محد درا عني يجون الدكاترة يسألون متا نزفتي وكم مرة حملتي وكم مرة سقطتي ويروحون
بس هذي شغلتهم ..
المهم باليوم الثالث الصباح الساعه ست ويجيني ذاك المغص اللي ذبحني زي وجع الطلق بالضبط بالبداية كل عشر دقايق وبعدها كل خمس دقايق وبعدها كل كل دقيقة .. وزاد الوضع هذا الساعه وحدة الظهر والله جلست اصارخ ومحد جا ودقيت ع زوجي وانا ابكي قلت له تعال خذني لخاص تعبت ويسمعني ابكي وقال طيب انا جاي والله محد درا عني .. المهم سكرت السماعه وفجأة ينزل مني شي حسيت شي سايل نزل ومعه شي كبير واصوت للمرضه وقالت الدكتورة شوي وتجي لاتتحركين خليك بوضعك المهم جت الدكتورة وشافت وقالت هذا الجنين نزل
اصبري ساعتين اذا مانزلت البقايا اللي برحمك ناخذك لعملية التنظيف وشالو من تحتي اللي نزل لاني مو قادرة اشيل حالي ومتقرفه ..
وجاني مغص مرة ثانية وجلست ابكي منه ذبحني حوالي عشرين دقيقة وهو معي
وبعدها نزلت قطعه ثانية كبييييرة اكبر من الجنين وناديت الممرضة وجات وشافت وقالت ذي المشيمة ..
وبعدها ارتحت راح المغص وبطني صغرت الحمدلك يارب وجت الدكتورة وشافت وقالت ماتحتاجين عملية تنظيف
المهم قلت متا اطلع ..طبعا وقتها العصر ..وقالت بكرا قلت ليه قالت نسوي اشاعه وقلت لها ليه مو اليوم قالت راح دكتور الاشاعه قلت بقلبي ياسلام يبوني انتظر واتنقع عندهم .. تخيلو يابنات اي شي ابيه منهم يتمططون بالساعات

واتصلت ع زوجي وقلت تعال اعمل لي خروج من المستشفا وجا كلم الدكتورة وقالت له لا مانطلعها
وقلت لها ليه اظل عشان اشاعه يعني لو فيه عملية تنظيف اوكي انتظر لكن الحمدلله كل شي نزل ..
المهم ظليت راكبة راسي ليما وافقت الدكتورة وكتبت لي ادوية وزوجي كمل اجراءات الخروج
وخرجت الحمدلله
طبعا لما طلعت من المستشفا احس جتني عقدة ماحب اسمع صراخ اتذكر صراخي وماحب اشوف دم وماحب اشوف اي شي يذكرني بالمستشفى اكره جوها

الحين جالسة اكلمكم وانا فبيتي الحمدلله
وقدامي دفاية اعشاب ومرتاحة عالآخر

وسؤال لكم حبايبي الله يخليكم متا استخدم حبوب منع الحمل وعطوني اقوا حبوب لأن مابي احمل ابي ارتاح
الله يعيننا يالحريم شفنا بلاوي ..
حمل ووحام وولادة وتربيه وصخام
يارب يسر لنا وارحمنا وارزقنا بر ابنائنا
يارب تعين كل ربة منزل على مسؤلياتها وتقويها
توكلوا على الله ياأخوات فهو خير وكيل
والسلام عليكم ..