السلام عليكم ورحمة الله وبركاته
كيف حالكم اخواتي؟؟ حبيت اكتب لكم قصتي مع الاجهاض للفائدة والتحذير عشان مايصير لكم مثل اللي صار لي
بالبداية كنت حامل وسويت سونار بشهر ونص فيه نبض والجنين تمام مافيه مشاكل طبعا اخذت ادوية خاصة
اسبرين وابر هيبرين ودفستون وابر تثبيت وفوليك اسيد بعد مادخلت الرابع بديت احس بطلق وضيق تنفس بعد
اسبوع نزل معي دم ورحت سويت سونار قالوا ميت من اسبوعين طبعا انصدمت وبكيت وبعدها هديت وحمدت الله
وقالت لي الطبيبة غريبة الجنين كبير وكان طبيعي وقالت خلاص دام معك دم خليه ينزل من نفسه رجعت البيت
واكلت رشاد وشربت قرفة بس الدم كان قليل والطلق خفيف وانا قد سقطت قبل عادي ينزل بالبيت ويكون صغير
ومايصير معي نزيف مثل الدورة وتوقعت هذا نفس الشي وبعد اسبوع رحت لطبيبة ثانية قالت كبيير بس قالت
عادي ينزل بالبيت وعطتني حبوب وضربتني ابرة قالت تنزل الجنين وقالت بكره بعد اضربي ثانية وطلعت بعدها
جاني طلق كاني بالتاسع مره قوي وحسيت كاني بولد قعد الطلق تقريبا اربع ساعات بعدها راح ومانزل دم كثير
ومن بكرة ضربت ابره بعد بعدها بدء طلق قوي وزاد الدم وصار يجي طلق وبعدها ينزل دم كثييير وصرت اغير الفوطة
كل ثلاث دقايق وبديت افكر وش السالفة كان بي نزيف مااستوعبت الوضع اول مره يصير لي كذا وبديت افكر اروح
المستشفى بس بعييد عنا والدم بدا يزيد وجاني طلق قوي رحت الحمام الله يكرمكم ونزل شي كبير وحسيت
كأني اولد طبعا ماشفته نزل بالبرج وماشفت وشو بس قلت يمكن المشيمة لان الطلق بدا يزود وبديت ادوخ
واستفرغ وصرت مااقدر اقوم ادوخ قلت لزوجي يالله بروح المستشفى وقلت له يروح المستوصف يجيب الدكتور
يحط لي مغذي لاني مقدر اقوم راح لبيت الطبيب قال له زوجتي تعبانة نبي مغذي رفض قال اليوم اجازة روح
المستشفى لانه كان يوم خميس رجع وقال لي رفض انا انهرت وجلست ابكي حسيت اني بمووت والمستشفى
بعيد قلت شلون اروح المستشفى وانا كذا مقدر اتحرك ولبسي كله دم والنزيف يزيد صار زوجي بس يدور عندي
وبناتي يصيحون وش فيها امي؟ جيت بغير ملابسي وماقدرت قلت لزوجي جب عبايتي ويالله لبستها ومسكني
زوجي من ورا وصار يسحبني وانا يالله امشي ولو يتركني اطيح وحطيت تحتي منشفه كبيرة لاني انزف وكلي دم
وبعدها ركبني السيارة ورجع اخذ بناتي ومشينا وكل الخط بي طلق وغرقت بالدم ووصلت المستشفى حطوني
بعربية ونقلوني للسرير وحطوا لي مغذي وجت الطبيبة تهدني وانا اصييح وشرحت لهم وش صار وسووا لي
سونار قالوا فيه قطع بالرحم لازم عملية تنظيف قلت مايخالف اهم شي يوقف النزيف وبعدها خدروني وعقب
ماصحيت كان ضغطي مره منخفظ وقالوا نزفتي كثير وصار عندك هبوط بالضغط وانيميا وحطوا لي مغذي بكل
يديني وبعدها حطوا لي كيسين دم ونمت عندهم وبد ضطي يتحسن ومن بكرا سووا لي تحليل دم قالوا نشوف
اذا للحين نسبة الدم نازله بتجلسين واذا تحسن دمك نطلع وبعدها قالوا خلاص خروج والحمد لله عدت على خير
ولي اسبوع من سويت العملية للحين ادوخ واحس عظامتي متفككة كأني والده, طبعا سألتهم عن الجنين كم
عمره قالوا الجنين نازل مالقينا جنين بس مشيمة وقطع طلع الجنين نازل بالحمام
وقالت الدكتورة انت داخله ع الرابع المشيمة كبيرة والقطع
كبيرة واضح الجنين كبير قلت طيب النزيف من الابرة والحبوب قالت لا احتمال لان الجنين كبير ونزل وفيه بواقي
مانزلت وصار بك نزيف ,مع ان كل الطبيبتين اللي رحت لهم قالوا كبير مانصحوني بعملية مدري ليه ؟؟
يعني لو قالوا كبير سوي عملية اريح كان ماصار اللي صار حتى انا كنت اشوفه كبير بالسونار بس مافكرت اني بولد
ولادة,,وانصح اي وحده يصير عمر الجنين ثلاث شهور او شهرين ونص ويموت وماينزل تسوي عملية تنظيف
عشان ماتتبهذل مثلي والله يعوضني خير منه ويأجرني على تعبي
ام روان * @am_roan_28
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
شكرا على النصيحه