مدري من وين ابدا صراحه ...
في رمضان قبل العام سافرت لاهلي عشان العيد قبل العيد بايام اشترالي اخوي جوال هديه
هو اصغر مني بثمان سنوات المهم عيدنا وخلصنا ورجعت بيتي
وفي بدايت شهر صفر كانت اخت زوجي مخطوبه وملكتها اخر الشهر وكنت اروح معها نستعد للملكه
وحجزنا الاستراحه والعشاء والفستان وكل شي
في يوم 12_2كان باقي الكوشه رحت انا وياها لمجمع الاندلس وحجزنا الكوشه واشترت شويت اغراض
وجلسنا انا وياها نسولف وبعدين طلعت جوالي ودقيت على زوجي يجي ياخذنا
وتركت الجوال عالطاوله ومشيت نسيته <<هدية اخوي
ورجعت البيت نومت بناتي وغسلت الغسيل ورتبت البيت وجيت انا واجلس ادور الجوال بالشنطه مالقيته
واروح لجارتي ادق من عندها اول مره دق والمره الثانيه تقفل عرفت انه خلاص ما بيرجع
عالساعه 3دخلت الغرف بنام وغفيت شوي الا جوال زوجي يدق رقم اهلي
اعطاني الجوال ما رديت فيني نوم ودق مره ثانيه ولا رديت والمره الثالثه رديت الا اخوي الصغير يقول ليش ما تجين
عندنا قلت فيكم شي قال لا بس لازم تجين قلت طيب
سكرت السماعه واحاول انام ما قدرت قلبي مقبوض وارجع ادق عليهم ردت امي صوتها تبكي
قلت لها ايش فيكم قالت تعبانه قلت لها امانه فيكم شي
قالت عبد العزيز سوا حادث انا جلست ابكي واخذ الجوال اخوي منها قال مافيه شي بس انكتم شوي وحطوله
اكسجين وبيرجع بعد شوي قلبي ما ارتاح رجعت ادق على اخواني كلهم محد يرد علي
دقيت على اخو زوجي <<اقرب صديق له
قلت بالله دق على اي احد من اخوياه واسال عنه وكيف الحين قال طيب
ولا رد لي ..
شوي الا اخوي اللي اصغر مني بسنتين يدق علي
قال الو ...
بس ولا تكلم هو يبكي وانا احسبه يضحك واقوله ايش فيك
جلس يشاهق ويبكي بصوت انا صرت اصرخ مثل الجنونه ما احس بنفسي
ويطلع زوجي من الغرفه <<يحسبني ابكي عالجوال
يقول خلاص يابنت الحلال انا اجيب لك غيره
وبعدين اخذ الجوال من يدي واسمعه يقول الله يرحمه
وجارتي مسكينه تدق مره عالتلفون ومره الجرس وفتح له وعلمتها وصحيت بناتي مشينا على طول
وصلت بيت اهلي مليان ناس
واخاواني سافرو يجيبون جثة اخوي
متوفي في حفر الباطن صادم جمل
عمره 21سنه الله يرحمه ويغفرله وتوفى يوم 12_2_1431هـ
الحين كمل سنه بس كل يوم ابكي عليه كانه توه متوفي ما قدرت انساه وانسى ضحكته
الله يرحمه ويغفرله ويسكنه فسيح جناته
هذا طريق حفر الباطن بالله ياناس هالشي معقول؟؟
مالكم الا الدعاء والتصدق على نيته
وكل متذكرتيه ادعي له