السلام عليكم
اخواتي حبيت اضع هنا القصه كامله لجميع من يسال عن الاخت ياعيونه
هذه هي القصه دون اي تحريف
صباح الخير هذي الأجزاء الأولى اللي كتبتها قبل وأغلق الموضوع مع التكمله
الجزء الأول
السلااااام عليكم
اليوم سهرانه موااصله مانمت هذا حالي بكثيييير من الأيام
أحيانا أرتاح وانام وأحيانا أووووولع ويطير النوم والله غصب الإنسان يتذكر الماضي بالذات المؤلم ,,,صحيح يقل الألم لكن مستحيل تنسين,,المظلوووووووووم ماينسى,,,
بفضفض لكم يمكن تستفيدون شئ من قصتي,,
تزوجت بعد الثانوي وتطلقت بعد زواج مدته 3 اشهر
ومابي أذكر قصة طلاقي منه أوأسبابه لأني مابي أحد هنا يعرفني
ولأنه مثل ماتقولوا دخلنا بالمعروف وطلعنا بالمعروف مع أني أنظلمت فيه والعيب كان من الرجل
أما طلاقي الثاني فماأحد عرف بأسبابه أوقصتي معه,,
وعشت فيها ألم وقهرررر,,,
تقدم لي الكثير لكن ماحصل نصيب,,إلى أن جاء يوم وتقدم لي شاب مطلق بدون أطفال,,زوجته جلست عنده شهرين وطلقها,, فيه صلة قرابه بيننا لكن من بعيييييييييد,,,وكان حاضر زواجي
وأنا حاضره زواجه سبحان الله,,طبعا طليقته ماتقرب لنا أبدا
شاب وظيفته ممتازة متعلم مثقف على خلق طيب وسيم جدا
كنت خايفه من بعد طلاقي ورفضت قبله الكثيييير
لدرجة أهلي يقولون عني وسوستي
أهلي مدحوا الشاب طبعا قبل يتقدم رسمي جات أمه تشوفني
لأنها تعرفني بالإسم ماتعرف شكلي,,واللي دلتهم علي وحده تقرب لهم تعرفنا زين,,جلست مع أمه وسألتني كم سؤال تحقيق:hahaha:
أنا كنت طالعه لها بكل ثقه سبحان الله أذكر حتى شعري ماأستشورته ماأمداني ههههه
بسمي العريس ناصر وش رايكم عشان أفضفض بكل أريحيه
ناصر كان مستعجل مررره يبي الزواج بسرعه وقال أنه خسر بزواجه الاول وعنده ديووون ووو,,,وقررنا الزواج يكون عائلي في البيت,,انا ماكان همي حفلات وطقطقه,,أهم شئ أكون سعيده معه وسعيد معي ومرتاحين لبعض,,
عندنا مهر الثيب أقل بكثير من مهر البكر لكن ناصر قدم لي مهر أكثر من مهر البكر,,وتملكنا ,,طبعا شافني قبل الملكه
أخوي امسكه وقاله بدخلها تشوفها مع انه ماطلب
وشافني وسألني كم سؤال وانا على الصامت خخخخ
أنا من تقدم لي أحس براااااااااحه عجيبه له
وماتركت صلاة الإستخاره إلى ليلة زواجي
سبب طلاقه سألنا عنه قالوا ماأتفقوا ولاصار نصيب يكملون مع بعض
يوم الملكه كان من تجهيزاته القاتوه ووووو
أنا لبست الفستان ورجعت من المشغل بقمة السعاده وأخييرا الله عوضني
دخل ناصر يسلم علي ويلبسني الشبكه وأخته تصور فيديوا
لبسني و باقي الحلق سألني قال وهذا؟
قلت لا لا
وكنت خااايفه لأن طبعي انا خجوووله وهاديه
وأمه وأخته عندنا بالغرفه يضحكون
ومسك يدي عشان نقطع القاتوه وأنا أرتجف:06:
وتفاجأت فيه يبي يأكلني:o وبعدت وجهي عنه وهويقرب الملعقه
تمنيت الأرض تبلعني ههههه
طبعا ماأكلت خربت أجوائه,,, طلعوا اهله وتركونا لوحدنا
حديثه كان مطمئن مرررررره,,عن حياتنا ويوعدني يعوضني خير,,وسألني وين أبي شهر العسل داخل المملكه أوخارجها
ووصاني ماأخلي الملكه وارتباطنا يأثر على اختباراتي
لأن الإمتحانات ماكان باقي عليها شئ
المهم بعد ماخرج
دخلت أخته الصغيره عمرها 5 سنوات أو6
وواضح لسانها طوووويل,,,قالت ليش ماأكلتي من يده هذيك أكلت وأعطته بملعقتها خخخخخ تقصد طليقته
وقبل يطلعون كانت تسحب أبوها وتبكي تقول أدخل تعال شوف العروس حلوه وفستانها حلوو
أنا تعكر مزاجي من كلمة أخته بدأت الغيره تشتغل عندي هههه
بعد اسبوعين من ملكتنا زارنا ناصر وكان جايب لي هديه جهاز لاب توب والتغليف والكيس لوحده يكفي صراحه ذوووووق ذوووق
وأرسل لي رسالة جوال
والله أحبك حتى اشتريت لك اللاب قبل اشريه لنفسي
وكان زواجي بعد الإمتحانات بسرعه أخلص يوم الإثنين..وزواجي الأربعاء,,وكان يلح علي يقول مولازم تشرين وتتقضين إلا ملابس 5 أيام والباقي نشريه مع بعض وعلى حسابي
المهم أني ماتركت شئ إلا أشتريته الحمدلله إلا اشياء قليله مثل فساتين لوصارت عزايم أومناسبات لنا
ليلة زواجي أخذني من بيت ابوي كانت روووعه مع انه عائلي
عنده أخت أكبر منه متزوجه وعندها أطفال كانت تاخذ قطعة قاتوه تبي تأكلني قدامه قبل نطلع للفندق وأنا مستحيه وخايفه ولاأكلت
طلعت أنا وناصر رايحين للفندق يسولف وينكت
كان ذوووق في كل شئ واسلوبه حلو وطاير فيني
أذكر أول ماجلسنا بالغرفه حط لي فلم رعب ههههههه يقول عشان تكمل ليلتك لأنه يضحك على خوفي وخجلي
ماااااانسيت اول ليلة نمت بين يدينه وهو يحكي لي قصه بطه مدري أرنب:hahaha:
الصباح كان يأكلني وكل مايعطيني شئ أقول ماأحبه ماآكله
ويقول بسجل عندي كل اللي ماتحبينه عشان بعدين إذا قلتي أبيه أقولك لااااا نسيتي يوم الصباحيه ماتحبينه ههههه
قالي تبين نمر نسلم على أهلي قبل نسافر
سكت
قال مستحيه خلاص مولازم خلينا نسافر وننبسط مع بعض وبعدين لاحقين على اهلي وأهلك بيملون منا
وأتصل على أخوه يجيب له أغراض من البيت
وطلعنا للمناطق اللي انا أخترتها
ولاقصر يدخلني المجمعات ويشتري لي كل شئ ناقصني من ملابس وغيره حتى إذا شاف اي شئ حلو ساعه اوعطر ياخذه لي حتى لوقلت له لا عندي مومحتاجته,,ويلزم علي آخذ هدايا لأهلي,,
يمتدحني بكل شئ شكلي لبسي كل شئ
تعبت واستحيت أقوله شئ
ويقول انتي تعبانه واقول لا مافيني شئ
قال إذا مستحيه تقولين لي روحي بالغرفه وأرسلي رسالة على الجوال أوبلوتوث هههه
قلت لا لا مافيه شئ
طلع وأرسل أخته تتصل علي مواللي أكبر منه
وحده ثانيه أصغر منه وبرضو متزوجه عندها طفلين
وكانت تسألني ومع السوالف قلت لها تعب خفيف
ويوم سكرت منها رجع وأخذني للمستشفى وكان خايف علي وأقوله عادي تعب خفيف يمكن برد او لأن أكلي تلخبط الأيام اللي راحت
,,رجعنا من السفر,,كنت أسكن بجناح مع اهله غرفة نوم صالون مطبخ تحضيري ودورة مياة,, كل شئ بالجناح كان روووعه
أول ماوصلنا كان عندهم ضيوف عمته وبنتها تدرس آخر سنة جامعه
أبوه وأمه استقبلونا في الحوش احلا استقبال وطلعنا لجناحنا
وجات أخته الكبيرة ولثانيه هم 2 المتزوجات خلوني اسمي الكبيره أم فهد والثانيه أم روان,,وعندهم 4 صغار مومتزوجات
سلموا علينا ونزلوا,,,تسبحت وتزينت وحصلت ناصر معه فطاير وورق عنب ضحك قال سرقتهم من تحت لك أكلت عشانه ونزلت تحت عندهم بعد ماسوولي استدعاء هههه
المجلس كان مشحون كأننا في دائرة حكوميه اوماشابه ذلك
حسيت أنهم موقرابه كأنهم اغراب أومدري صراحه
بنت عمته حاطه رجل على رجل وغصب إلا توضح أنها تلف الأسواق وفاهمه بالماركات
وأم فهد تجاكرها
وعمتي ام ناصر موأقل منهم!!
وأسلوبهم بالكلام ماعجبني ولاكان عفوي
سمعت صوت ناصر بالصاله وطلعت عمته تسلم عليه
وسمعتها تقوله لاوالله بنروح لبيتنا
وهويلزم عليها بالعشى
وتقوم بنتها تلبس عباتها بسرعه وتطلع لصاله ولاعبرتني ولاقالت في امان الله,,وصراحه استغربت من جرأتها كيف طلعت لصاله حتى لومتغطيه ليش ماأنتظرت إلين ناصر يطلع
عطرها ريحته تصك بالراس واليدين الحلوه طالعه والكعب والعبايه ضيقه:p نفضت الأفكار من راسي قلت بلا غيره يابنت يمكن هذا طبعهم عادي عندهم خخخ
بعد ماراحت عمته تجمعوا خوات ناصر مع أبوهم وأنا لاصقه بناصر مستحيه من ابوه هههه وجايبين قاتوه ذبحوني في القاتوهات هههه وقطعها ناصر وعطاني اول قطعه قال اهم شئ زوجتي ماعلي منكم ,,وكانوا يضحكون لأنهم متعودين على مزحه
وأمه طايره من الفرحه وأبوه كذلك,,لكن شفت بعيون ام فهد الأخت الكبيره عدم رضى,,عيال خواته الصغار كانوا يجلسون عندي يعطيهم ناصر نظره وبسرعه يبتعدون,,
بعد ماطلعنا لغرفتنا سألت ناصر
عمتك دايم تزوركم؟
لا أساسا علاقتها مع أمي موزينه وأستغربت زيارتها
وجلس يسولف يقول أن بنتها يقولون تتضايق وترتاح لأمي كثير وتنام عندنا احيانا وأمي تشفق عليها لانها يتيمه وإلا عماتي عموما علاقتهم مع أهلي موش ولابد
قلت وين تنام فوق هنا (لأن غرف النوم كلها فوق عند جناحنا)
قال اي فوق مع خواتي!!!!
عمته ام البنت كانت متشببه يعني موكبيره ومهتمه بنفسها مررره قصير وبناطيل والشعر صبغه
مر شهر ماكانت عمتي أم ناصر تخليني ألمس شئ معها في المطبخ وغداي كان يوصل إلى باب غرفتي,,عمتي حرمه سنعه ماشاءالله تحب الطبخ وشغل البيت ومرتبه وبيتها حلووو مع ان كل أثاثه بسيط,,,وعرفت انها تمووووت في ولدها ناصر يمكن لأنه البكر تعامله غيييييير عن خواته واخوانه,,,وبرضو حسيتها تسمع لبنتها أم فهد بقووووه,,,وصراحه حبتني مررره وأنا حبيتها لدرجة أني كل مانزلت طحت في حضنها تصدقون ماسبق أن ضميت أمي كل يوم عمتي ام ناصر إذا شافتني تفتح يدينها وإذا ضمتني تحبني على خدي
حتى إذا كنت بطلع لأهلي أمر عليها وأقولها أني بطلع توصين شئ تضمني وأحيانا تقبل جبيني حتى ناصر صار يضحك يقول لأمه صارت حبيبتك خلاص طاح كرتي
إذا طلعت لمحل أو شئ ماترجع إلا وهي شاريه لي شئ ملابس بجايم قمصان,,وأنا ياناس أحبها إذا أطلعت من البيت ماأرتاح إلا إذا رجعت وسوالفها تجنن لدرجة مره سهرانه معها تحت
وناصر بالغرفه ومر الوقت ماحسيت ويوم طلعت لغرفتي لناصر ودخلت وسلمت قال بدري راجعه من استراحه انتي:hahaha:
اخته ام فهد تزورنا أقصد تجي أهلها من الأربعاء إلى الجمعه في الليل ثم ترجع لبيتها,,,واللي فهمته من عمتي ام ناصر
أن ام فهد مومرتاحه مع زوجها يعني مهملها إلا أنه بالمال والمصروف مايقصر وقالت لي عن مواقف ومشاكل كثيره من باب الفضفضه وأني أنا بنتها وتثق فيني ماأطلع سوالفها
وقالت لي عن علاقتها مع عمات ناصر وزوجة عمه ووووو
وفعلا كل اللي قالته انا تأكدت منه سمعته بالصدفه من وحده تقرب لهم,, على فكره ام فهد عمرها تقريبا 30 سنه وأم روان 27 سنه
خوات ناصر اللي معنا في البيت اللي عمرها 19 واللي 17 و14 و6 سنوات وعلاقتي معهم أكثر من ممتازة بالعكس متعلقين فيني مررره وأنا بعد أحبهم ونتساعد بالدراسه ونسهر مع بعض وناكل مع بعض وندخل المطبخ مع بعض,,وكل وحده لها مشاكل واسرار أول مايطلع ناصر من عندي تجي وحده تطق الباب وتجلس شوي تفضفض وتطلع,,,لدرجة ان وحده منهم إذا دخلت وشافتني أكوي تنورة للجامعه تاخذها وتجهزها لي غصب عني,,شافوني أجهز شماغ ناصر أخذوه غصب يساعدوني في كل شئ,,
وناصر حاط لي نظام نرجع من الدوامات نتغدا مع بعض في جناحنا ثم نجلس مع بعض نسولف واشوف مذاكرتي وبعد المغرب نتقهوى مع اهله وبعد العشاء يطلع ساعه
خلال هذي الساعه اجهز اي شئ ناكله خفيف في غرفتنا وأجهز ملابسه اللي بيلبسها لدوام وملابسي وأتسبح وأزين الغرفه
يرجع نتعشى مع بعض وننام,,أحيانا نطلع نتعشى برا اوياخذني لمجمع ويشري لي أي شئ ملابس عطورات ماكياج
يفاجأني بهدايا الجوال أي شئ ينزل يروح يجيبه لي
حياتنا كانت هدوووء رومانسيه حب مرت الشهور ولاحظت زيارات عمته وزوجة عمه كثرت,,صرت اتضايق منهم مررره
والسبب انهم يجون يهمشوني ولايعبروني بكلمه وأنا أجلس عشان عمتي وسوالف وضحك ويناظرون بكل اللي جالسات وأنا لا صفر على الشمال وإذا سمعوا صوت ناصر تسابقوا له وضحك وسوالف أقصد عماته ,,,وعمته تحاول تضايقني بأي شئ وبنتها وبنت عمه يدققون فيني بكل شئ من راسي إلى قدمي وحسيت ان هالتدقيق لمضايقتي لاأكثر ولاأقل,,,وعادي أعديها وأنساها من أول مايطلعون وأشوف ناصر وانا ناسيه كل اللي حصل
لاحظت ان ام فهد إذا جات الأربعاء تجلس مع ناصر في الملحق
وأبقى انا مع البقيه في المجلس ولااقدر أروح للملحق لأني اخاف ان واحد من العيال يدخل علي أو أحصله بطريقي
الجزء الثاني
اعذروني ماقدرت اسوي تعديل بالرد الأول
بنات وشو العنوان؟
قصتــي>>>> ماقلت مشكلتي أو غيره
أنا ماخدعتكم أنتي داخله من الأساس عارفه أنها قصة يعني ممكن تطول مومشكلة أوموضوع سطرين أوثلاثه
ولاانتظرت حل منك,,لأني ذكرت في بداية الأسطر بفضفض>>>ركزوا عليهااا
وقلت يمكن أحد يستفيد من هالفضفضه لأني ناويه أذكر أخطائي في حياتي لعل غيري ينتبه منها
واللي في النهايه بتواسيني أوتطرح حلول كثر الله خيرها ,,ماتبون تردون الله يجزاكم ووالديكم الجنة
أما اللي قالت روايات ومدري ايش!!
فأنتي ياأختي تكذبيييني يعني تتهميني بالكذب
والله لايسامحك ولايحللك وحقي آخذه منك إذا وقفنا أمام الله,,سبحان الله كلن يشوف الناس بعين طبعه, على فكره ياأخواتي ترى الكذب يؤدي للفقر فأنتبهووووا منه,,ومتأكده أن اللي قالوا كذا وغيرهم مثل اللي تقول قصتك مانبيها متأكده انهم أول ناس بيكملون قراءة القصه خخخخ
المهم أكمل لكم
ناصر صار إذا رجع من الملحق يجلس معنا وهوسرحان وينظر لي نظرات غريبه أقصد يناظر فيني ويفهي ويروح بعالم مدري عنه
وإذا مديت له قهوه يرد: لا بس
ليش
مابي
أنا زوجته وأعرررف أن مزاجه متلخبط
أما أخته فما تدخل المجلس على طول,, أسمعها تطرد بزارينها,,
كنت مهمومه نفسي أعرف وش فيه ,,إذا سألته يقول مافيه شئ,,دائما" أقوله نفسي مره تجي تاخذني من الجامعه ويسألني ليش طيب
قلت كذا أحس اني بنبسط ههه
قال طيب أنا ماأطلع من دوامي ومع الزحمات إلا العصر تكوني أنتي في البيت وإلا كان حققت أمنيتك
,,, هو من النوع اللي يحب الكشخه وكان كل فتره ياخذني لسوق ونشري ملابس حتى بجايم البيت كان يشتري لي مجموعه والقديم نتخلص منه
والمفارش كذلك أقوله نغسلها يقول طيب
لكن يجيب معها جديد ويتخلص من اللي قبل
فكنت أهتم بنفسي وعطوراتي بزياده لأني أعرف طبعه,,
مره كنا نايمين بعد العصر وصحيت قبل المغرب
دخلت الحمام وانتم بكرامه وأخذت معي ملابسي وكحل ووو لأنه نايم ماحبيت أزعجه بالنور
وطاحت مني علبة الظل ههههه والأرضيه صارت أحمر على أزرق كللل الألوان وأغسل الحمام وأنا دايخه فيني النوم ولانظف ولانظفته زين
رحت أصحيه وسولفت معه شوي على السرير قلت له أن علبة الظل أنكسرت وقام يضحك قال أبشري بالعوض روحي ألبسي عباتك على بال ماأصحصح
وكان اليوم الثاني عندنا عشى لأن ناصر عازم اهل أبوه على العشى بمناسبة خروج أخوه من المستشفى
قلت له بلبس جلابيه فخمه حلوة بس أحسها طويله
قال ألبسيها أشوفها عليك ونشوف وش تحتاج ونمر المشغل
طلعنا وحطينا الجلابيه عند الخياط ورحنا لسوق وشريت الظل وكان يلح علي اشري أي شئ,, وجلس يفتح من المناكير ويحط على اظافيري ونضحك,,طلعنا وقلت له من زمان ماتعشينا برا
قال لا لا صديقي ينتظرني عنده موضوع بجلس مع الشباب ساعه وبعد بكره أعوضك
واتصلت صديقتي تسألني عن طريقه مكرونة البشاميل هههه وجلست أشرح لها وأقولها الله يعين اللي بياخذك ,,وهي تقول أكيد ابوالشباب عندك تعرضين مواهبك قدامه ضحكنا شوي وسكرت منها
وتفاجأت انه واقف قدام مطعم
قلت ليش
قال بجيب لك عشى وأرجعك للبيت
قلت مولازم مومشتهيه وباكل أي شئ خفيف
أشر لي بيده ونزل,,رجعنا للبيت بعد ماأخذت الجلابيه قلت خلاص بنزل وأنت توكل على الله بس لاتتأخر
قال لا بنزل معك أوصلك للغرفه
نزل ومعه العشى وطلعنا فوق وشفت أخته أم 6 سنوات جايه طايره ناظرت فينا وراحت
كنت بالفتره الأخيره أشوفها تشتغل مراقبه
المهم دخلنا للغرفه وبعدين طلع
جلست أتعشى وأرتب كتبي وأغراضي وتسبحت ولبست,, هومن أول زواجنا كان يقول إذا طلعت في هذي الساعه ورتبتي أغراضك وشغلك تلبسين ملابس نوم وإضاءة الغرفه تكون خافته لأنه اساسا حاط للجناح نوعين من الإضاءة,,فكنت مطبقه كلامه أتسبح واتزين وأجهز له عشى خفيف وأطفي الإضاءه البيضا وكان كل فتره نشري مجموعة عطر لوشن وووو من محلات مختلفه له ولي
وكنت مرتاحه معه بالفراش وهوكذلك مرتاح وسعيد ولامره حسيت انه متضايق أوناقصه شئ لأنه من النوع اللي يقولها في وجهك عادي عنده
حتى مره كنا رايحين لأهلي في أول شهر لزواجنا
وفي الطريق يقول لي الفراش ياعمري النص بالنص لك مثل مالي,,أي شئ تبينه تقولين والله ياعمري انا احب كذا وكذا ..فيه شئ مايعجبك قولي والله ياناصر انا صراحه مابي كذا لاتستحين مني أنا زوجك
فكنت مهتمه فيه حتى يوم أرجع من الجامعه صرت أجهز غداي في جناحي لأن عمتي تجهز الغدا الظهر وأنا وناصر نتغدا بعد العصر فما كان يعجبنا..
أحط له أكثر من طبق أكون مجهزة الأغراض من الليل وأدخل أتسبح وألبس وأتعطر وأشغل مكيف الغرفه وأجهز له الحمام,,يوصل بعدي بنص ساعه يكون كل شئ جاهز,,العشى أهله مايحبون الطبخ وأحيانا عمتي إذا قلت لها بسوي عشى ترضى وأحيانا تقول لاوأنا أمك مولازم كان بتسوين سوي لك أنتي وزوجك بس
رجع ذيك الليلة وعادي ,,جاء اليوم الثاني العزيمه
ونزلت بعد العصر وسويت سلطه وساعدت عمتي بتجهيز الصواني وأواني القهوة والشاي والحلا
ودخلت عمته علينا في المطبخ وسلمت عليها بكل حب لأن هذا طبعي خاصة مع اللي أحسهم يكنون لي الكره أضحك وأسلم زين ولاكأني دريت عنكم وعن حركاتكم,,كملت شغلي وهي تناظر فيني وتتفحصني وكنت لابسه ملابس عاديه ورافعه شعري وبدون مكياج كامل بس كحل وروج
خلصت بسرعه وطلعت فوق وحصلت ناصر نايم صحيته لبس ونزل وجلست أتسبح وألبس ووو
وأحس أني مختنقه حتى الحلق بالعافيه لبسته يدي ترتجف وأحس بغثيان وخوف مدري يمكن لأني منضغطه نفسيا" منهم ولاأبيهم,,جات أخت ناصر اللي عمرها 19 وتاخذ رأيي بلبسها وشعرها وحطيت لها عطر من عندي وأكسسوار من عندي وقالت خواتي نزلوا يسلمون وأنا أستحي بنتظرك أنزل معك قلت أوكي بس بصلي العشاء..صليت ونزلنا حسيت أني بدوخ من نظراتهم لأني أنا أساسا والله خجوله وأستحي وطلعاتي عند أهلي قليله وعائلة ناصر ماشاءالله جريئين وبزياده فيه وقاحه وعداءات بينهم,,عمتي ترفض احد يساعدها وكانت تصب وكل شئ تقربه لي دايم تحرجني بإهتمامها وتحلف علي بالحلا كأني ضيفه هههه
سمعت ناصر ينادي ياااولد
وأنا مفهيه أنتظر احد يقوم له ههههه
قالت عمتي روحي,,وأروح له ويناظر فيني أحلا أحلا وش ذا الكشخه,,جلست أضحك قلت وش تبي
قال بس كذا طفشان سوالف الشيبان ماصخه هههه
قال تعالي نطلع فوق نسولف
قلت خيييييير الحين الناس وش بيقولون عنا بلافضايح ,,قال خلاص تعالي نجلس على الدرج ههه ..وأجلس معه ولاتكلم بشئ وكل مايمر أحد من الصغار يعلق عليهم وأنا ميته ضحك,,
وتجي أخته أم فهد شكلها فقدتني
وتحط يدها على خصرها قالت الحمدلله والشكر أنتم صاحين؟
وأنا وقفت بسرعه خبله ههههه
وناصر ضحك قال وش فيك
قالت خير تارك الرجال وجالس مع المدام على السلم
ولافتح فمه بحرف وراح لأبوه وانا سكت ورحت للمطبخ قهرتني بس مدري ليش خفت منها ولارديت
رجعت أجلس مع الحريم ثم طلعت وعطيت الصغار بسكويتات ورجعت للحريم وسمعتهم يسألون من عطى الصغار,, قالوا أنها أنا
قالت عمتي ام ناصر بنت كرييييم
لأن أبوي معروف بكرمه عند الجماعه
قالت عمة ناصر الأولى تقولين زوجة كريم
ويضج المجلس بنقاش زوجة كريم واللي تقول لا لا أولى بنت كريم
وأنا إذا ماأرتحت لأحد مستحيل أتجاوب معه بالسوالف + أن اسلوبهم وشخصياتهم غير عني
طلعت من عندهم ورحت أوزع السلطه وجاء ناصر ويضحك ويقول لاتكثرين الليمون
قلت طيب خلاص
ويكرر كلامه وهومبتسم
وأمه وعمته عندنا بالمطبخ وتجي عمته وتجلس تناقشه عن الماركات والعطورات حسيت أنها تبي بأي طريقه تصده عني أثناء وقوفنا بالمطبخ مدري كذا حسيت أنها ماتبي تشوفه يضحك معي
قلت في نفسي الظاهر من كرهي لهم بديت أوسوس
راحوا من عندنا
وطلعنا للغرفه عطاني ظهره ونام
وجلس شهر كامل يعطيني ظهره وينام وانا ساكته مافتحت فمي بكلمه ولاعاد يطلعني ولاشئ,,قلت يمكن تعبان اوفيه شئ
بعد هذا الشهر سألته إذا مزعله شئ قال لا بس لاتكثرين أسئله لأن نفسيتي تعبانه..طيب ليش تعبانه,, مدري كذا من الله,,وأمه تسألني عنه لأنها لاحظت قلت مدري عنه,,وجابت لي مويه مقري فيها قالت خليه يشرب منها بدون مايدري انها مني وفعلا عطيته,, بعد هذا الشهر بدا يتغير ويرجع مثل قبل,,ومره وأنا جالسه في النقل أطقطق بجوالي
كانوا البنات لاصقين في الشباك وينادون بعض
ويصارخون ويعلقون يالبييييه ياحلوه من ذا المزيون
وأنا ماناظرت,,رجع السواق ونادى علي قال أهل ناصر أنزلوا وألتفت مع الشباك إلا هو واقف وأتغطى بسرعه بغيت أطيح من الفرحه ههه
قالوا البنات آسفين مادرينا أنه زوجك
ووحده قالت يصلح تكشخين فيه بالأسواق
نزلت وأنا مبسوطه بجيته ورحنا لسيارة قلت وش عندك غريبه وووو,,,قال هاه انبسطتي
قلت أكيييد أطلع وأحصل حبيبي قدامي
قال اليوم شفت رسالتك (أنا كنت كاتبه رساله بورقه أوصيه على نفسه وأنه ماينسى يصلي الفجر لأنه كان تعبان ولاصحى لوقت الصلاة وحطيتها عند عطوراته لأن أكيد بيشوفها قبل يطلع) وقال شفتها واشتقت آخذك من الجامعه وأستأذنت من العمل وطلعت بدري وهذا أنا عندك
المغرب قال ولد خالتي بالمستشفى وزوجته بتجي وتجلس عندنا
كانت جايه من ديره ثانيه وحبوووبه وتتكلم في الجيم ههه شلونج شخبارج وخشت مزاااجي بقووووة لأنها عسوووله,,ومره كنت في المطبخ ودخلت عندي قالت انتي بنت ناس طيبه وايد وعلى النيه أنتبهي على ريلج,,,قلت من ايش؟؟
قالت أخته يالخبلا جالسه تحفر براسه كره لج
سكت ولارديت عليها
قالت تكفين أسألج بالله ماتطلعين هالكلام لأحد والله لولا غلاتج مانبهتج
قلت لاتطمني موانا اللي تنقل كلام
قالت أنتي شلون تسمحين لها تستفرد بريلج لساعات في الملحق شلوووون فهميني؟؟؟
قلت وش فيك هذي أخته وبعدين تبيني أدرعم عليهم ولودخل أحد من أخوانه من برا وش يكون موقفي
وإذا طيح وجهي وإذا ناصر قال وش تبين وش جايبك للملحق وش أسوي
قالت صدق انج طيبه والله لوأنا لأطبق الدنيا عليه
يابنت أفهمي هاي جالسه تحرض ريلج عليج سوسه ياكافي
أنا سكت وأنصدمت
قالت تبين تتأكدين روحي تنصتي عليهم وأطربي أذانيج بنغماتها
قلت خلاص يانوف يكفي
وطلعت لغرفتي وأنا مولعه نار من الكلام
ورحت للجامعه وقلت لصديقتي
قالت لا لا انتبهي هذي بتخرب حياتك وبتفتن بينكم لاتخربين بيتك بيدك
قلت مااقدر فيني نار ودي أمرمطهم ودي اواجه ناصر
قالت اسمعيني ولاكأنك سمعتي شئ ترى انتي اللي بتندمين
وكنت أنا معصبه وتناظر فيني صديقتي
قالت ياخوفي ان بيتك بينخرب بسبة هالنوف
جلست أفكر بناصر وأتذكر أسلوبه
تغيييييييير معي مرررره
قبل ياخذني لأي مكان الحين يقول لا
حتى زوجة عمي مرضت وقلت له بزورها ورفض قال أخوانك يودونك لها شوفي أختي ام فهد زوجها مايوديها حنا نوديها
جاته سفريه قبل فتره وكان بياخذني ومتحمس وفجأة غير كلامه وتركني عند أهلي وسافر لحاله
كان الأربعاء والخميس يسهر معي
وصار يسهر تحت في الملحق
وإذا قلت له تعال عندي يقول ليش مارحتي لأهلك!!
أختي أم فهد تقضي الخميس عندنا المفروض تسوين مثلها !!!
الجزء الثالث
مثل ماقلت لكم تغير مررره..وإذا قلت له ليش متغير ياناصر ,,يصرف وإلا يرد بدون مايناظر فيني (الحمدلله ماتغيرت):09:,,,,,
انا بطيبتي معهم ماتغيرت أبتسم في وجيههم وآخذ واعطي معهم أقصد أهله ونوف حبوبه وأنا حسيت ان معدنها طيب,,لاحظت أن اهل ناصر مايخلوني مع نوف لوحدنا أبدا كأنهم خايفين أني أسولف معها على انفراد
حتى يوم أكون بالمطبخ وتدخل نوف عندي ألاحظ وحده من الصغار اما بنات أم فهد وإلا خوات ناصر
تدخل وتسوي نفسها تاخذ أي شئ ولاتطلع إلا إلين أطلع انا من المطبخ أو نوف تطلع وعلى العموم جلساتي معهم كانت ساعه باليوم فقط أو ساعتين
انا بطبعي ماحب أطلب من أي وحده رقمها أبدا
حتى بنات خالتي عمي...مهما كانت قريبه مني طبع فيني مايتغير..فما طلبت من نوف رقمها لكن بعد ماسافرت بديت أتضايق وتنتابني رغبه أكلمها وأناقشها أكثر بالموضوع وبنفس الوقت اشتاق لها مررره ذيك الحرمه رهيبه وطيوبه..حتى اليوم اللي يمر بسعاده مع زوجي ماأحط راسي بنام وإلا وأنا أفكر بكلام نوف لأني فعلا أشوف بنظرات ام فهد حقد أوغيره مدري..
مره كنت مع عمتي ام ناصر بالمطبخ قلت لها عمتي معك رقم نوف قالت ايه قلت ياحليلها والله مشتاقه لها عطيني رقمها ,,صرفت الموضوع عيني عينك وأنا ماحبيت أحرجها,,,ومره كل اللي في البيت طالعين ونزلت حصلت أخت ناصر اللي عمرها 17 سنه وجلست عندها نطالع التلفزيون واسمع مسجات توصلها وتضحك ,,قلت وش عندك؟..قالت هذي نوف ياحليلها
قلت وش رايك تعطيني رقمها نستهبل عليها من جوالي :22:
قالت قدااام هههههه,,وتنقلني الرقم وجاري الحفظ ههه
وأرسل لها كم رساله ونموت ضحك انا واخت ناصر عليها بالنهايه اعترفت لها اني انا زوجة ناصر
وأرسلت لي رسالة ترحيبيه,,طلعت لغرفتي وكنت متأكده ان اخت ناصر بتعلم أمها وخواتها باللي حصل
..ناصر بدا عليه يتغير من ناحيتي أحس كأن أحد يضغط عليه لأنه بنفس اليوم يعاملني كذا معامله بعدة أوجه
صرت أمر بضغط نفسي..لدرجة أنه ينزل من عندي راضي ويطلع لي زعلان وكأني ذابحه له أحد
وأحيانا أحسه ماعاد يشوف أي شئ اسويه له
لوأفرش له سفرة من إلى ..أظل في عينه مقصره وأن الزوجات يطبخون أكثر من كذا
وأموت قهر من حركته تخيلوا أيام الأسبوع عسل على عسل ومن يجي الأربعاء في الليل ينقلب لشخص ثاني يسفهني ويدور أي شئ يزعل عليه عشان مايجلس عندي
ولاحصل شئ يزعل عليه زعل من نفسه أويسوي نفسه متضايق ومهموم وطااقه فيه الدنيا ومخنوق
صار يقولي ترى بالليل بسهر تحت بالملحق
قلت ليش ان شاءالله اول كنت تسهر عندي ,,قال أهلي يعيبون علي يقولون بنت فلان حاجرته عندها!,,أي أهل أمه وأبوه ينامون بدري ويفرحون إذا شافونا مرتاحين مع بعض..
هويقصد أم فهد اللي تسهر تحت تشتغل مراقبه
زوجها يتركها عند أهلها إلى الجمعه وهي تستلمنا
مره تضاااايقت يوم جاء ينزل وتغرقت عيوني بالدموع ولافتحت فمي بكلمه وقف قدامي قبل جبيني قال معليش اعذريني ونزل,,اليوم الثاني تسألني أم فهد مع ضحكه أحسها سخريه تقول ناصر يسهر تحت إلى الفجر وانتي وش تسوين لحالك ليش ماتسهرين معي أنا وخواتي تحت؟
ضحكت قلت يووووه اسكتي انا ماأفضى أستغل الفرصه أن ناصر موعندي واسوي بحوث وخرابيط للجامعه وأكمل دفاتر وأحاول أخلص بسرعه عشان أسهر على النت عاد أنا إذا فتحت اللاب ماحس بالوقت هههه..
حسيت أنها انصدمت أحسها انسانه مريضه تحب تشوف الناس متضايقين..وانا انسانه طيبه وصوتي هادئ وياما رمت علي كلام وانا ماعرف أرد وإذا راح الموقف قلت ياليتني قلت وقلت ماعرف إلا أني أبين أني مبسوطه ومومتضايقه عشان أغيضها هذا طبعي ماحب افرح الناس بأحزاني,,
شكيت لصديقتي قالت إذا جاء الأربعاء شيلي دفاترك وحطي رجلك لبيت أهلك ولاترجعين إلا الجمعه إذا طست ام فهد لبيتها وريحي راسك من الغثى..سويت هالحركه بأحد الأسابيع
ودق علي ناصر قال أنا عازم ولد خالتي جاي من منطقه ثانيه تبين أجي آخذك للبيت تحضرين العشى
قلت أنت محتاجني بشئ
قال لا العشى من برا ولافيه شئ بس إذا ودك تعشين مع أهلي
قلت لا انا بروح مع اهلي لجدتي
وبعد مارجعت الجمعه أنصدمت ان اهل عمه وعماته ووو حاضرين
قلت ليش ياناصر ماقلت لي ان فيه حريم
قال والله حتى انا تفاجأت أنهم جايين لأن أم فهد عزمتهم وإلا العشى بس لـ 3 شباب
انحرق قلبي ذاك اليوم واذكر اني شكيت لأمي قالت ليش مقهورة يعني بناتهم بيطبون على زوجك
قلت مدري بس انا مومرتاحه للوضع لأني انسانه وأحس مستحيل هالإحساس يجي من فراغ
انا من بداية زواجي عودت ناصر ماأنام إلا إذا كان عندي حتى يوم يكون سهران عندي بالجناح أحط راسي عنده في الصاله ويقول روحي لسرير نامي أقول لا مابي انام لحالي بنتظرك ..وبسرعه يخلص أشغاله عشاني..فحتى يوم يسهر تحت نفس الطريقه أنتظره
ومره دقيت عليه الساعه 2 قلت ناصر فيني النوم تعال عندي وإذا نمت أرجع للملحق قال طيب
يوم جاء مارجع تحت وسهرنا مع بعض إلى الساعه 9 الصباح ولاصحينا إلا بعد الظهر الساعة 2 ولاحسينا لافي المنبه ولابالآذان..أول مانزلت حسيت أم فهد مقهووورة قالت وش فيه ناصر قلت له الباارح تعال ابيك قال بروح فوق وبنزل بعد شوي ولانزل
قلت جلس معاي
قالت وش هالنوم رحت أنزل كراتين من السطح أنا وعيالي ونرميها على باب غرفتكم ولاطرى عليكم تصحون واشوف نور الغرفه من تحت الباب طافي!!
قلت أيه والله حتى الظهر ماحسينا فيه
وأول مادخل ناصر قالت له بصوت عالي تعال تعال هناك نتقهوى بالملحق!!!!!!!!
وناصر بسرعه راح معها..
وجلست انا مع عمي وعمتي والبنات
قلت له مره وش عندك تجلس معها في الملحق وش هالأسرار اللي ماتبونا نسمعها
وعطاني ذيك النظره قال اختي الكبيره وبحسبة أمي حاسدتها على كم ساعه تقضيها معي
قلت لاوالله موحاسدتها بس استغربت
من قال بحسبة أمي غسلت يدي منه لأني تأكدت انه يسمع كلامها بقوووة ويصغي لها
وبيوم صارت مشكلة بين أم فهد واختها اللي عمرها 19 سنه بيطلعون لمخيم مع خالاتهم وتهاوشوا على موضوع تافه وتلاسنوا مع بعض وعمتي ام ناصر وقفت مع ام فهد لأنها الكبيره وعيب على الثانيه تغلط على اختها الكبيره وجلست الصغيره في البيت زعلانه..انا كنت بجناحي وموعارفه عن شئ وقالي ناصر ان اهله طالعين مخيم وطلع وقال انه بيرجع بعد ساعه
أول ماطلع من عندي طقت البنت الباب وفتحت لها وطاحت في حضني تبكي هديتها وجلستها عندي
قالت اخاف يجي ناصر
قلت وإذا جاء عادي ماعليك منه
قالت لا مابي أضيق عليك وزوجك عندك
قلت لاتخافين إذا جاء بستأذنه أنزل تحت معك أو نروح لغرفتك
وتجلس تبكي وتشكي من أختها ام فهد ووقفت امها ضدها
قلت ماعليه حبيبتي هذي اختك الكبيره وش تسوين تحمليها..قالت انا ماغلطت عليها بشئ كبير وتبكي
قلت ادري ماغلطتي يمكن هي عندها ضغوط أوشئ خلاص وسعي صدرك
ومسحت دموعها بأصابعي لأني والله أحبها هي وخواتها اللي عندي في البيت مثل خواتي.. أنا مرره متعلقه بخواتي ويوم تزوجت حسيت ان خوات ناصر اللي معي في البيت هم خواتي ..وبرضو هم بادلوني نفس الحب والإحترام...يوم مسحت دموعها بكت ودخل ناصر وأنا حاضنتها وأهديها قال أووووه فلم هندي وطلع تركنا
ضحكنا من حركته قالت والله انك خساره عند اخوي تستاهلين واحد احسن منه
قلت وانا مابي إلا اخوك وبعدين ليش خساره حرام عليك قالت عصبي مررره
قلت عصبي مع اللي يعانده
قالت انتي طيبه مره وتدورين للكل اعذار تدافعين عن اختي ام فهد وهي تكرهك تدرين انها جالسه تحرض ناصر عليك
قلت إذا هويسمع لها فالخطأ منه مومنها>>>كنت أقولها كذا مجامله وإلا من داخلي مقهووورة وابيها تكمل
قالت تدرين إذا تكلمنا بالطبخ وقال فلانه سوت لي
تمد أم فهد لسانها وتقول سوت لي!! ماسوت شئ ترى الحريم يسوون أكثر وتجلس تألف له مجلدات عن نفسها وهي كذابه وتدرين مره سمعتها تعبي راسه انك مفشلتنا عند الناس لأن شعرك طويل واسود وتراها مقهورة والله أنها جالسه تهتم في شعرها تبيه يطول وأكثر من وحده تمدح شعرك عندها >>>أول ماقالت كذا تذكرت ناصر جالس له فتره يحن ويزن يبيني أقص شعري واصبغه مع ان شرطه كان بالعروس ان شعرها اسود طويل
وكان شعري معجبه مره وفجأه تغير مزاجه
طلعت من عندي البنت وجلست أبكي من القهر مقهورة من زوجي وتصرفاته أخذت جوالي دقيت على نوف
وبعد السلام سألتني وش فيك
ناصر تغير
قلت لج هاي السوسه تعبي راسه عليج ماصدقتيني وريلج للأسف ضعيف وتسحب السوالف منه وانا مره احرجتها قلت لها مسرع الريال توه معرس أمداه يحش بعروسه على فكره هاي واصله معه حتى لسوالف عن الفراش تبي توصله أنج ولاشئ وانه أنظلم وأنه ماعاش حياته يوم اختارج عروس له بس وكلي أمرج لله سبحانه وأدعي علييييييج بالدعاء
سكرت منها وانا تعبانه نفسيا" مررره
أذكر ذيك الليلة جلست أتأمل في ناصر وهويسألني وش فيك خاطرك ماش الليلة متضايقه
قلت انت تحبني وراضي عني؟
ضحك قال بالله هذا سؤال أكيد أحبك وراضي عنك تمام الرضى..
في يوم خميس كنت صايمه قال لي لاتسوين فطور ترى فطورك علي
جهزت لي قهوة وحلا بجناحي وأول ماأذن كان ناصر عندي مبتسم ويقول بسرعه بسرعه أدعي لي
قلت طيب طيب ههه
نزل يصلي المغرب ورجع كان واضح معصب قال انا بطلع ولاتنتظريني جهزي لك فطور
بعدين قال وين شماغي اللي كان هنا
قلت غسلته وفيه غيره
وصرخ علي قال ذابحتك النظافه ليش ماسألتيني قبل تغسلينه كنت بلبسه ووو
وطلع من عندي وجلست أبكي وبعد نص ساعه دقيت عليه
قال نعم وش فيك تبكين؟,,قلت ناصر انا موزعلانه عشان فطور لأن المطبخ مليان من كل شئ الحمدلله
وانا صادقه هوكل شهر يدخلني بنده ناخذ كل اللي نحتاجه واي شئ ابيه أطبخه بجناحي,,قلت انا زعلانه من اسلوبك وصراخك اللي ماكان له داعي وانت يارجال تحط خطوط حمراء لحياتنا مايتعداها أحد لا من أهلك ولاغيرهم يارجال ودني اهلي لأنك انسان تنزل من عندي راضي ومبسوط وترجع لي بوجه ثاني,,قال من تقصدين,,قلت ماغيرها اختك,,سكر الخط
وبعد دقايق دخل عندي انتي وانتي ماتستحين تطولين لسانك علي ماتحترميني ويصارخ وانا ساكته
دخلت أمه قالت خير وش فيك على بنيتي
قال هذي انسانه مريضه صايمه الهانم وعشان ماجبت لها فطور قالت انت تنزل راضي وتطلع لي بوجه ثاني
قلت لاياعمتي موكذا الموضوع
قال تكذبيني
قالت عمتي خلاص تعوذوا من الشيطان
طلع ناصر وأنا كنت أبكي
قالت وش فيكم وش اللي مضايقك ليش قلتي يرجع بوجه ثاني
قلت ينزل ياعمتي راضي ومبسوط معي ويرجع لي زعلان وكأني غلطانه بحقه ومن غيرها ام فهد اكيد تحرضه
قالت لاام فهد تحب اخوها ووووو وانتي تعوذي من الشيطان يمكن الرجال متضايق من شئ وناصر ولدي واعرفه يعصب شوي ويهجد
ونزلت من عندي وبعد دقايق إلا وام فهد داخله ومدرعمه ولسانها مايفرق عن لسان ناصر إذا عصب وصوتها يلعلع انتي ماتستحين تبين تفرقين بيني وبين اخوي وتحرضين أمي علي
وامها كانت تسحبها وتمسك راسه وتقول فشلتينا مع بنت الناس واختها اللي عمرها 19 دخلت ووقفت بيني وبينها وتكلمت على ام فهد قالت ايييييه انتي اللي تحرضين ناصر عليها لاتنكرين
قالت ام فهد شفتي يمه هذي الحـ..هي اللي تعبي راسها علينا
ويتماسكون وأمهم تحاول تفرقهم أنا خلاص رجليني كانت تصافق في بعض أول مره أشوف هوشات كذا
وتجلس عمتي تبكي ويطلعون من غرفتي وام فهد تقول والله ياحبيبتي موذنبي إذا زوجك ماحبك وإلا أنتي ماقدرتي تحتوينه
جلست أبكي منهاره من كلامها حسيتها اهانتني بمجرد دخولها علي وصراخها ومنهاره لأني شفت عمتي ام ناصر تبكي
دقيت على ناصر وانا معصصصصبه قلت أنت ويييينك
قال بسم الله وش فيك
قلت تعال ودني اهلي أنا أكرهك أكرهك وبكيت
قال وأنا أحبك
وسكرت الخط وجمعت ملابسي وكتب الجامعه
ودخل ناصر قال أفا على وين
قلت ناصر خلاص أرجوك انا واصله حدي
جلس على السرير قال تعوذي من الشيطان يابنت الحلال لاتفشلينا مع أهلك
وأنا ساكته ماأرد عليه
قال وش فيه حظي طايح
قلت أختك اهانتني وكله منك
قال وانا وش دخلني تبيني أروح لاختي أجلدها أقول ليش على زوجتي أنتم حريم وبينكم ليش ماأهنتيها يوم اهانتك اللي تطول لسانها عليك طولي لسانك عليها ولك علي ماأجي أحاسبك,,ويحب راسي ويعتذر وأوعدك اللي صار مايتكرر ومدري ايش واليوم الثاني يجيب لي تعليقه ذهب لكن جلوسي موبسبب اعتذاره جلست لأني فكرت في أبوي كان تعبان وماراح يتحمل مشاكلي وبيعوره قلبه علي لوحس أني مومرتاحه
بعد اللي صار بأسبوع قالي ناصر أننا بنسافر لشرقيه
مع اهله واهل عمه وعماته,,كنت عارفه انه من تخطيط ام فهد لأن السفره واااضح تخطيط حريم
قلت لا مابي أروح وماله داعي وبعدين نروح لحالنا
لكن أصر على السفر قال أمي وخواتي بيروحون مع أخوي الصغير لازم أمشي معه بنكون أنا وأنتي بسيارة وهم ورانا وأهل عمي مع أخوهم(صديقه) وعماتي وبناتهم مع سواق برضو معنا,,قال اتمنى تروحين معي لأني مابي احراج معهم بيسألوني زوجتك وين وليش ماجات معك
جلست اسبوع ماأنام شايله هم السفره لأني ماأحب هالناس مابي أروح وأن جلست بحترق لحالي
أنا بالعافيه أتحملهم ساعتين كيف سفره نطلع مع بعض ونجلس مع بعض,,جلست أدعي بكل وقت أن الله يصبرني ويرحمني,,
الجزء الرابع والأخير
صديقتي عندها أخت اكبر منها متزوجه وعندها اطفال وكانت تحضر الدكتوراه انسانه طيبه واحيانا إذا اتصلت على صديقتي واختها موجوده ترد الأخت وتسولف معي حتى ايام اللي قبل زواجي عطيتها مبلغ وشرت لي اشياء على ذوقها ,,ومره كنت جالسه بالجامعه أفكر وتجي صديقتي وتضربني بالدفتر قلت حرام عليك خوفتيني قالت بس بس وربي التفكير بيلعب فيك وشعرك بينقلب ابيض,,قلت والله طالعة لي شعره بيضا ,,قالت أحلفي ههه قلت والله قالت اعوذبالله كرهتيني بالزواج هههه قلت لا مومن الزواج الشعره ذي فيني من قبل زواجي الأول جلسنا نضحك قالت لي وسعي صدرك وش رايك تروحين معي انا وأختي لسوووق ومنها تشرين لك ملابس لسفرتكم
قلت لاا لا لا تذكريني ههه قالت ياخوافه قوي قلبك ,,قلت الله يعين والسوق بقول لناصر إذا وافق كان بها
قلت لناصر قال ماله داعي انا أوديك ونروح مع بعض,,قلت لا موبس عشان أشري انا ودي أطلع معهم وأغير جو وبعدين كلها ساعتين وأناأعرفهم من زمان وابي عبايه وماعرف أختار الأقمشه الحلوه ابي اشاورها وأجلس أزن على راسه إلين وافق
واليوم الثاني أتفقنا معهم ونزلني عند البوابه اللي وعدت صديقتي واختها عندهم
أدري بتستغربون إذا قلت لكم أني احتاج أكون مع أخت صديقتي أحس بحنانها علي أويمكن لأن ماعندي اخت كبيره وأحس براحه وأطمئنان إذا سولفت معي وأسمعت لي ونصحتني أوأختارت لي شئ أشريه
دخلت المجمع وسلمت عليهم ورحنا نفرفر فيه وشرينا الأغراض اللي نبي وأخذنا عيالها للألعاب وبعدين تعشينا وكنت أسولف لأخت صديقتي وصديقتي تعلق ونضحك والله عشت ليلة رهيييبه معهم وقالت لي أخت صديقتي انتي طيبه مره ومومتعوده على لكاعة الحريم لازم يافلانه تقوين شخصيتك عليهم وزوجك امسكيه وتكلمي معه كلام جامد وكل ماقالت لي شئ قلت استحي اخاف وتحط يدها على وجهي تقول مااالت عليك هههه
رجعنا للبيت سألني ناصر في الطريق قال أحسن الطلعه معي في السوق وإلا معهم قلت لا معك
وأقول في قلبي وش جاب لجاب ههههه
وكل يوم أتصل على أمي أشكي لها من حزني على ذا السفر
وعصبت مني قالت خلاص لاتروحين تعالي عندنا وريحي راسك
قلت لا لا بروح
قالت خلاص أجل لاعاد تشكين
ويجي يوم السفر كأن أحد ميت لي مالي خلق حتى ألبس عباتي ونروح لسيارة وأشوف أم فهد وعيالها يركبون مع عمتي أم ناصر ويجي واحد من عيالها قال خالي ناصر بروح معكم ,,قال لاياشيخ روح مع أمك يالله مابي بزارين معي,,ونمشي وننتظر عماته واهل عمه عند محطه يوم شفت سيارتهم حسيت بإختناق وكتمت مشينا وفي الطريق أحيانا ناصر يفتح الشباك ويتكلم مع ولد عمه قلت ناصر فيه شئ اسمه جوال
قال وانتي وش حاشرك فيني انا والرجال
قلت خلاص ولاشئ
قال والله العظيم حاله
وفي الطريق وقفوا عند محطه قلت ناصر موكأننا مثل حلقة لطاش ماطاش مسافرين مع بعض
قال موأنتي تقولين ماأتابع هالمسلسل
قلت ايوالله ماأتابعه بس الحلقه قديمه قبل سنين
قال ايه مررره ضحكتيني أجل تشبهينا في طاش
قلت أمزح معاك وش فيك مومتقبل مزحي اليوم
سفهني ونزل للبقالة شوي إلا تنزل ام فهد وبنت عمتها ذيك المزيونه أم عبايه ضيقه يدخلون البقاله :eek:
وأولع أحس راسي بينفجر ويدق ناصر قال تبون شئ معين
قلت لا مابي شئ
قال أحسن
وشوي ويرجع ناصر قال يالله جبت لك العصير اللي تحبين قلت شكرا ناصر قال عفوا فلانه
وضحكنا قلت ناصر بالله شفت ام فهد واللي معها نازلين عيب عليهم المحطه مليانه رجال ليش ماقالوا للعيال يجيبون لهم اللي يبون قال وش دخلك فيهم بكيفهم
قلت يعني عادي عندك طيب بنزل>>>طبعا أكذب علييه
قال أنزلي وشوفي وش بسوي فيك
قلت وش بتسوي يعني تتركني وتمشي
قال لابقص رجلينك
واسكت ونكمل طريقنا وكان مشغل شريط قصه وقصيده قال وش فيك مكتمه
قلت لامكتمه ولاشئ
قال أجل تفكرين
قلت لاماافكر معك
قال إذا صدق معي قولي وش آخر قصه سمعناها
وقلت له القصه
قال شاطره فزتي بجالكسي ويعطيني جالكسي
قلت ناصر انا مومرتاحه ماودي اني سافرت
قال لاحول ولاقوة إلا بالله موقلت لك إذا ماتبين أجلسي أنتي اللي رحتي
وبعدين ليش وش المشكله انتي تستحين وإلا وش سالفتك عادي خليك اجتماعيه اضحكي وسولفي وخووشي مع الناس قلت موعن أستحي أوموأجتماعيه بس ماارتاح لهم واحس انهم مايحبوني ولاأنا أحبهم
قال خلاص تحملي كلها اسبوع أو5 ايام وبعدين معك صديقاتك فلانه وفلانه >>>يعدد اسامي خواته اللي ماتزوجوا
قلت معهم بنات عمهم احشر نفسي معهم وأترك الحريم قال عادي هم متقاربين معك بالعمر ماعليك من أحد
وإلا أقولك أجلسي مع أمي ألصقي فيها وش رايك ههههه
قلت ليش تضحك قال وش اسوي لك مشكلتك صعبه مررره وإلا أقولك تجين تجلسين عندي وأحطك وراي وأجلس أسولف مع الشباب ههههههه
قلت طيب ياناصر تضحك علي ويجلس يضحك قال والله انك تووحفه
وأول مادخلنا الشرقيه ويوفق ولد عمه قال ياناصر وش رايك ناخذ شقتين عند بعض الحريم في وحده وحنا في وحده
قال أوكي أول مامشينا قلت لاياناصر حرام عليك اساسا ماآخذ راحتي معهم وانت ماتاخذ راحتك لابالغرفه ولادوراة مياه وبعدين الشقه ماندخلها إلا في الليل تعبانين بنكون طول اليوم برا وش الفايده تجتمعون مع بعض ماله داعي
قال صادقه والله ,,نزل ناصر وولد عمه لشقق ورجعوا ياخذون الأغراض ونزلنا معهم أول ماطلعنا فوق قال ناصر
أدخلوا يمه هذي شقتكم قالت وانت ؟,,قال انا أخذت لي شقه انا واهلي,,حسيت بإنتصار جلست أتخيل شكل ام فهد
كنا نطلع للبحر أومنتزه والله ساحبين علي أم فهد تاخذ بنات عمتها وبنات عمها وتلف عني وأنا صرت أوقف عند اخت ناصر اللي عمرها 19 ونمسك يدين بعض ونمشي معهم بس شعور مؤلم أنك تكونين مع مجموعه اغلبهم تحسين انهم مايبونك حاولت أسولف أدخل معهم مايعطوني وجه واحيانا اجلس مع عمتي وزوجة عمهم وانبسط معهم سوالف وضحك واحيانا أتمشى مع خوات ناصر الصغار وبنت أم فهد بنتها صغيره وحبوبه عكس أمها وترسل لي صديقتي رساله مره وحنا جالسين عند البحر وأرسل لها قالت أم فهد من ترسلين له؟
ضحكت قلت صديقتي قالت صديقتك وإلا مهند!!! وبعدين قالت وش رايكم بنات نسبح مافيه أحد عندنا وليل قالت عمتي أم ناصر أسبحوا كلكم إلا فلانه(تقصدني) زوجها موصيني عليها وضحكوا البنات قالت أم فهد ماعليك من امي أسبحي وإذا بغيتي تغرقين يجي مهند ينقذك
وكنت أفكر أقول بنفسي وش سالفة مهند هذا ههههه
أثاريها تقصد مسلسل تركي
قلت لا مستحيل أسبح ماعرف بعدين دق علي ناصر ورحت أمشي معه بعد ماسحب علي كم يوم ماكنت أشوفه إلا الفجر في الشقه إذا رجعنا من برا واحيانا نرجع بدري لشقه ويروح يسهر مع عيال عمه والحريم في الشقه الثانيه وانا أجلس لحالي بشقتي تدق علي عمتي واعتذر منها أني بنام
رحت أمشي معه قلت له أم فهد تقول اسبحي وإذا بغيتي تغرقين يجي مهند ينقذك وأنفجر من الضحك قلت الله ياناصر من زمان ماضحكت كذا ,,قال البركه فيك صايره بس تحنين وتبكبكين وتشكين
قلت ماأشكي من فراغ قال اللي تحب زوجها تصبر
قلت ايه طيب
قال طيب ودك تسبحين قلت خيييير صاحي أنت كيف اسبح هنا قال ناخذ شاليه وتاخذين راحتك ,,قلت مع الشلة اللي هنا لاتكفى بلاشاليه بلا هم
وجلس يضحك قال لهذي الدرجه مهبلين فيك ,,قلت أكثر مماتتصور وجلس يضحك
قال بالله وش آخر موقف هبل فيك,,قلت شفت هذيك بنت عمتك يوم تاخذ الإيسكريم تصارخ واااااو يقالي دلوعه وتسمعكم صوتها وهي وحشش وكنت أقلدها وهي تصارخ ,,وناصر أنفجر ضحك قال ياحليلك يافلانه لهذي الدرجه تغارين علي قلت مرررره,,قال أجل لوتزوجت عليك وش تسوين,,قلت أموت,,قال لاإله إلا الله وهويضحك
قال لاتخافين تبقين القمر وغيرك نجوم,,قلت وش تقصد يعني بتزوج,,قال الحمدلله صاحيه أنتي وين أحطها فيه انا يالله أشيل نفسي وأشيلك ريحي نفسك ماأسويها
مشينا مسافه طويله وحنا ساكتين قلت خلاص تعبت والله مافيني أرجع
واتصل على أخوه يجيب السيارة ورحنا قال بتصل على صديقي مدح لي مطعم هندي وش رايك قلت أوكي واتصل عليه وعطاه الوصف ورحنا له وكانت أول مره نتعشى انا وهو بدون الشلة
وتتصل أم فهد قال لا تنتظروني بالعشى انا وأهلي نتعشى مع بعض
اليوم الثاني شفت ام فهد نفسها شينه علي بزياده ومعصبه وتضرب عيالها على أتفه أمر وقاموا البنات يتمشون وتناظر فيني أخت ناصر اللي غمرها 19 قالت تعالي ياحلوه وتسحبني مع يدي وأروح أمشي معهم وضحك وسوالف والله مدري وش يقولون اسمع بس همس وأسولف مع اللي معي بدون مايسمعون وتسألني انبسطتي البارح يوم طلعتي مع ناصر؟ ضحكت قلت ايه الحمدلله وتسولف لي عن صديقاتها وأنا منسجمه معها,,واسمع ام فهد رفعت صوتها وتناظر فيني تقول أييييييييه مرررره
مدري وش تقصد!!,,رجعوا وجلست انا وناصر قال بنجلس يومين قلت لا خلاص محاضراتي راحت علي يوم واحد ونرجع ,,في هذا اليوم جلسنا بشاليه ومسح هذا اليوم كل التوتر اللي كان فيني
ورجعنا اليوم اللي بعده دخلنا الرياض بعد المغرب ووقف أخذ له كوفي واتصلت أمي تبي تسولف لي بملكة بنت خالتي قلت لها تتصل بعد نص ساعه أكون في البيت سكرت من أمي ومشينا
وسمعت صوت كفرات سيارة جايه ورانا بسررعه وبلتفت أشوفها وأصدمت فينا من ورى وضربت اللي قدامي وكنت أحس السيارة طايره فوق وافكر ابي أقول شئ وسبحان الله نسيت صحيت شفت رجال واقف عندي يتكلم واناظر بناصر جالس مايتحرك وتجي حرمه مع الرجال قالت فيك شئ وأنزل أبكي قلت زوجي مات وتضمني قالت بسم الله عليك لاوالله مامات قال الرجال اللي معها والله حي بس مغمى عليه وقال للحرمه ركبيها معك وركبتني في سيارتهم قلت انا مافيني شئ بس زوجي شكله مات وكنت ابكي قال الرجال أحلف لك بالله أنه حي لاتخافين والحرمه تقولي أنتي تنزفين وكنت أرتجف أذكر انها كانت ماسكه يديني وتقرا علي وكنت أحيانا أحس فيهم وأحيانا أفقد الوعي صحيت وانا على السرير بالطوارئ وماعندي إلا ممرضه وأسمع صوت أخوي خلف الستاره يتكلم اول ماسمعت صوته جلست أبكي أحس أني من سنوااااات ماسمعته ولاشفته ويدخل ابوي يحب راسي ويبكي قلت أنا مافيني شئ بس ناصر وينه
قال والله مافيه شئ ريحي نفسك ويدخلون أخواني وعلموني أن رجله مكسوره ودخل غرفة العمليات
طلعت لبيت أهلي وعرفت أني كنت حامل وسقطت وكان ظهري وجسمي عموما كله يألمني كأني مضروبه ضرب موطبيعي وطلع ناصر بعد اسبوعين ورحت لبيتي وجلس ناصر شهرين مايتحرك من رجله وأحيانا في الليل يبكي من ألمها وكنت أبكي معه وإذا خلصنا بكي يضحك يقول وش فيك إذا جلست أعيط تعيطي معاي
شهرين وهويتألم وأنا أتألم معه وأخته تجي تجلس ساعه تقهوى وتاكل من الحلا
وتروح ماتدري عنه,,
اخته اللي عمرها 19 كانت دايم بمشاكل مع أم فهد دايم مناقر وهواش لأن البنت كانت تطول لسانها وترد عليها وام فهد ماتبي أحد يجادلها أحيانا البنت تتلقف وتدخل إذا شافت أم فهد تضرب عيالها
ومره قالت لي تذكرين يوم ناصر بيسافر انتداب لـ ...وكان بياخذك معه وغير رايه تراها قالت له لاتاخذها بعدين الناس تحسدك ويقولون مايقدر يفارقها ,,قلت حسيبها الله
بعد هالشهرين مره من المرات طلعنا لملاهي الروضه وكانت عمتي بتلتقي مع جارتها قديما" وأمي وخواتي بيجون أنا خواتي وحده عمرها 18 والثانيه 13 ورحنا نتمشى انا وخواتي وخوات ناصر وثنتين من بنات جيرانهم وجلسنا قدام بعض نسولف قالت بنت جيرانهم لي أنتي أمك مصريه فيكم عرق مصري وضحكت أنا وأختي وحسيت ان البنت أنحرجت قلت لا لا سوريه قالت صدق ؟,,وضحكنا مره ثانيه قالت أختي تلعب عليك أمي سعوديه ولافينا عرق لامصري ولاسوري وضحكوا البنات ,,قالت لي صدق ماأحد قبلي سألكم هالسؤال؟,,قلت ايه انا أول مادخلت جامعه سألتني صديقتي نفس سؤالك وجلسنا نضحك شوي وغيرنا الموضوع رجعنا للبيت مع ناصر وقالت وحده من خواته ناصر بنت الجيران تسأل فلانه تقول أمك مصريه قالت ام فهد هههه ايه أكيد شافت عدسات اختك وطول الطريق وهي تكرر هالعباره وأناساكته وناصر يضحك آخر شئ قلت لها ترى أختي مثلي مانعترف بالعدسات قالت بسم الله عليك ماشفتي عيون أختك على كبرها وتكرر سالفة العدسات وكل مانجتمع تعيد السالفه وهي تضحك بصوت عالي غثتني وحلفت ماعاد أطلع معها لمكان,,ومره رحت لأهلي وهوكان معصب وكان له فتره متغير معي وأحسه دايم متضايق
قلت له وش فيك ياناصر قال اناطفشان وانا وانا,,قلت انت اللي تجيب لنفسك المتاعب ونجلس نتجادل وهورافع صوته ويرد بعصبيه ويقول أنه بيسافر لخاله بمنطقه ثانيه قلت لاماتروح ماله داعي وإلا بروح معك ويقول أحسن عشان نرتاح من بعض!! ونتجادل آخر شئ قال انا مومرتاح معك بالفراش
وأنفجرت بكي,,قال خلاص اناآسف ماكنت أقصد انا مرتاح معك بس مدري وش فيني
وأجلس أبكي ولارديت عليه
قال خلاص يافلانه والله آسف وبعدين وش اللي يبكيك مافيه شئ يزعل لأن أنتي مالك دخل بالموضوع انا نفسيا تعبان!!!
ويوقف عند محل قال مسحي دموعك ماأقدر أخليك تنزلين عند أهلك وأنتي كذا بتخوفينهم عليك
وأمسح دموعي قال ردي علي
واسكت ويوديني لأهلي ويطلع ألف ريال ويحطها في شنطتي قال يمكن تحتاجينها يمكن تطلعون لسوق أومنتره وأنزل لأهلي وأدخل غرفتي وارسل له رساله (حتى أنا مومرتاحه معك بالفراش وأضغط على نفسي وأجامل عشان خاطرك) أدري رسالتي كانت أكبر غلط بس كنت مقهوره ومجروحه منه لأني عارفه انه مرتاح بس خلاص حسيته يدور أي شئ لأن براسه شئ وأبي أجرحه مثل ماجرحني
ولاأتصل ولاأرسل وتركني أسبوع عند أهلي واتصل علي وسلم وسأل عن الحال وكنت أرد وأسأله عن حاله كلامنا كان هادئ وبارد مافيه إلا الحزن وقالي بمرك الأسبوع الثاني وأناراجع من السفر وقال أمي معي لأنها رايحه تزور ناس هناك قال يوم الأربعاء تجهزي أوكي ؟,,قلت ان شاءالله
وكنت مرررره متضايقه ومخنوقه من كلامه مدري كلامه كبير وإلا انا حساسه لدرجة أني ماكنت متخيله كيف بكمل حياتي معه وكيف بنام معه أحس أني كرهته وبنفس الوقت ماقدر أصر على الطلاق لأني كل ماأتذكر ان هذا طلاقي الثاني اصبر نفسي
أرسل لي رسالة أنا مشتاقلك مووووت وأحبك وبنفتح صفحه جديده مع بعض
فرحت ورحت بدون تفكير أتجهز أرجع معه وشريت لي ملابس ورحت قصيت شعري مدرجات على طوله وصبغته بني غزالي وأتذكر مره قبل زواجنا كان يقول انا أكره الحنه على البنت وعععع وكنت أقوله النقش يعني الرسمه غير ويقول مدري يمكن,,وحطيت رسمه على رجولي وعلى كتفي
وبعد ماقصيت شعري وصبغته صراااحه غييير قلت لومن زمان قصيته أحسن مع أنه كان حلو
ويمرني الأربعاء في
حواء ثقيف @hoaaa_thkyf
محررة ذهبية
هذا الموضوع مغلق.
رمش وأهداب
•
مشكوووووووووره وفرتي علي أدور التكمله
الصفحة الأخيرة