انا قريت قصة جميلة جداا قشعرت بدني وحبيت ان انقلها لكم لكي كلنا نستفيد منها باذن الله واسال الله ان ربنا يهدينا الي طريق الحق ويثبتنا عليه اجمعين
هذة القصة شبيه بقصتي فعلا سبحان الله :)
طبعا القصة جميلة جداا ورعة واسال الله ان يثبت اختنا صاحبة القصة ياااااارب
بسم الله الرحمان الرحيم
السلام عليكم ورحمة الله وبركاته ..
**** ((( أحببت أن يكون هذا هو موضوعي رقم: (100) ))) ****
أخواتي الحبيبات :
كل واحدة فينا التزمت ليها مراحل وليها قصة
وفي الآونة الأخيرة كثر الحديث عن النقاب بفضل الله هنا في المنتدى
ومنهم كان موضوع الدكتورة أميرة اللي بيدعو إنك تحكي حكايتك مع النقاب
أنا كان نفسي أحكي حكايتي هناك .. بس المشكلة إن أنا مش بدايتي النقاب .. أنا كان ليا مراحل كتير قبل ما أوصل .. وكنت حاسة اني هكتب كتير لو كتبت هناك
وفي نفس الوقت ..
قصتي اللي هحكيهالكوا دلوقتي إن شاء الله مش هتفيد بس في النقاب .. بل ممكن تفيد أي واحدة عايزة تلتزم لأن مراحلها مختلفة ..
الغرض من كتابة القصة:
التحدث بنعمة الله التي منّ بها عليّ (( الهداية ))
وحب الخير لأخواتي أن يهديهن الله
ولعلّ هذه القصة تكون سببا في هداية أحد أو تثبيته .
والقصة واقعية وحقيقية كاملا على لساني "واقع الأيام" - شيرين- ، وكل ما سيرد بها حدث بالفعل ..
نبدأ وبالله التوفيق:
======================
للأسف يا جماعة أنا ولدت ونشأت في وسط الحجاب مش سهل فيه أو مش ممكن يتقبلوه بسهولة ده فضلا عن النقاب
وعندنا في العائلة بعض المراكز الحساسة اللي النقاب ممكن يضر بشغلهم أو يسبب لهم مشاكل
العائلة بأكملها لا يوجد فيها منتقبات
وبها حديثو عهد بالحجاب
كان لي خالة منتقبة وخلعت النقاب
وكان لي عمة منتقبة وخلعت النقاب
وكلا منهما لها ظروفها ومبرراتها ..
وهما الاتنين كانوا بيمثلوا نقطة قوية تخلي الجميع يعارضني في أي شيء بعمله
لأنهم كانوا ملتزمين نوعا ما ..
فكانوا بيعارضوني ويقولولي:
هتبقي احسن من خالتك وعمتك اللي ملتزمين اهو بس قلعوا النقاب بعدين ؟
نشأتي ..
أنا البنت الوحيدة في وسط ولدين
بعد ما مامتي كانت نفسها في بنت جدا
طبيعي زي أي أم عايزة تخلي بنتها دي محصلتش وتشيكها
لأنها بنتها الوحيدة
وبرضو أغلب الأهل معندهمش وعي ديني او ما يدركوش ان ده مش في مصلحة بنتها انها تعودها من وهي صغيرة على لبس مكشوف أو كده
يعني ممكن تشيكها زي ما هي عايزة بس من غير ما تعودها على كده
لأنها هتطلع صعب عليها تغير اللبس ده إلا أن يشاء الله غير ذلك
وبرضو كانت واخدة بالها من أكلي جدا يعني الأكل بحساب
ده غير الرياضات المختلفة اللي اشتركت لي فيها وطبعا صعب اليومين دول مثلا السباحة وانتي محجبة .. إلخ
وكل لعبة تتطلب نوع خاص من اللبس .. لا يلائم ولا يناسب المحجبات إطلاقا .
دي كلها حاجات كانت بتمثل لي عائق نوعا ما في ارتداء الحجاب
وكمان العائلة عندنا كان ليها عامل ضغط ومعترضين على حاجة زي دي .
(( وأنا بقول الكلام ده عشان تدخلوا معايا في المود وتحسوا بالمعاناة اللي عانيتها عشان اتحجب او انتقب بعد كل الكلام ده .. ))
بس مع كل الحاجات دي ..
الحمد لله أهلي عملوا خير ودخلوني مدرسة إسلامية خاصة ..
وده كان يمكن أحسن حاجة حصلت ..
لأن مع كل ده كان في اهتمام جامد في مدرستنا بالدين
والنشأة الدينية
والقرآن والحجاب
وكانت مدرسة القرآن بتاعتنا بتعمل لنا درس أثناء وقت الصلاة
وكانت بتكلمنا على الحجاب وبر الوالدين والقرآن وكل حاجة تقريبا .
المهم
اتفقنا أنا واصحابي مرة في أولى إعدادي إننا نلبس الحجاب
في رمضان بس ! ( وده من جهلنا )
وشوية لبسوه وشوية ما لبسهوش
وكتير قلعوه علطول أول ما رمضان خلص
بس انا مكنتش عايزة اقلعه
وفضلت لابساه لبعد رمضان
اصلا حكاية اني البسه في رمضان دي لا بابايا ولا مامتي كانوا موافقين عليها
بس وافقوا على مضض وعلى اساس اني هقلعه بعد رمضان
لما اصريت عليه
كانت النتيجة:
انهم قلعهوني بالعافية طبعا !!
( وهما كانوا من وجهة نظرهم اني لسه صغيرة يعني أولى اعدادي لا رحت ولا جيت .. واني لما اكبر شوية ابقى اتحجب )
فضلت كده لحد تالتة إعدادي
لبسته وأصريت
وقلت مش هقلعه
حاولوا معايا
مفيش
والحمد لله ربنا ثبتني
كنا رايحين المصيف وقتها
وطبعا انا بموت في السباحة ..
قالولي:
هتعومي بإيه ؟
قلتلهم:
نجيب مايوه شرعي وأروح بيه في وقت السيدات
قالولي:
مش هنلاقي على مقاسك
قلتلهم:
ندخل أول محل
لو ما لقيناش مقاسي فيه
مش عايزة خالص وانا مش هنزل
وافقوا لأنهم كانوا واثقين اننا مش هنلاقي
وبأقدار الله ..
أول محل ندخله وأول مايوه شرعي اخترناه جه على مقاسي .
طبعا بالنسبة للرياضة اللي كنت بلعبها كلها وقفت
لأن كان ابتدى كابتن السباحة عايز ياخدني في الأولمبيات ومسابقات عالمية
وطبعا كان هيبقى صعب الحجاب مع السباحة
عشان كده حاولت اقناع أهلي بضرورة ايقافها
بس ما بررتهاش بالحجاب طبعا
جبت لهم مبررات تانية وقتها
ووافقوا الحمد لله .
حجابي في البداية ما ينفعش كان يطلق عليه حجاب
كان حجاب نص كم
بنطلونات جينز على بديهات على حتة ايشارب صغنون مأزعر كده
وكمان ده كان مش عاجب أهلي ومضايقيني فيه
نسيت أقوللكوا طبعا على تعليقات العائلة الكريمة !
واني بقى شكلي عامل زي الشغالات وووو
ومامتي لما كنا نروح نجيب لبس
متعودة بتقول للبنت اللي واقفة هاتيلي الحاجات اللي على مقاسها
وهي تجيب لنا واحنا نختار
فبتقول للبنت :
هاتيلي الحاجات اللي على مقاسها
ففوجئت انها جايبة لها حاجات وحشة جدا
ومامتي فسرتها:
انها جابت لنا حاجات وحشة لأنها رخيصة لأني شكلي الدادة مش بنتها !!
قلتلها: دادة دادة يا ستي
هو يعني احنا احسن من الدادات في إيه ؟
ما كلنا بني آدمين .
وفضلت الحمد لله وجابت لي هدوم عادي وربنا ثبتي الحمد لله ..
ابتديت بعد الحجاب بجينز وبديهات اتعرض لمعاكسات مش ظريفة
وطبعا مضايقات الولاد لا تخفى على البنات ..
وأنا كان عندي مبدأ من وأنا صغيرة وأهلي مربييني عليه اني مكلمش ولد أبدا كصحوبية او كده .. مفيش الكلام ده ..
وهنا عايزة أقول موقف حصل برضو ..
كنا في الدرس ومعانا ولاد .. وكل البنات اللي معانا بيكلموا الولاد عادي
إلا أنا مبكلمهمش ولا ليا علاقة بيهم
فطبعا ازاي وازاي يعني؟
ابتدوا الولاد عايزين يكلموني
ما ادتهمش وش وكنت هقلب الترابيزة عليهم
خافوا
وسكتوا فترة
لأفاجىء بعد كده .. إن ولد منهم راح كلم أخويا الكبير وبيقول له:
خلي أختك تبطل تعقيد بقى .. ما كلنا اصحاب وفي الدرس وكده
هي مش بتتكلم معانا ليه ؟
لأفاجىء بالمفاجاءة الأكبر
أخويا جاي يقوللي:
ما تبطلي تعقيد يا شيرين .. هما هياكلوكي ؟
ما تتكلمي معاهم وكده عادي
قلتله: لا يا حبيبي .. اتكلم انت معاهم
عيب لما تبقى اخويا الكبير وييجي ولاد يقولولك عايزين نكلم اختك
ده بدل ما تديهم قلمين على وشهم
جاي تقوللي بطلي تعقيد؟؟
بعد موقف حصل لي مع صديقتي ..
وانها حاولت تنصحني إني أعدل حجابي عشان ده ما ينفعش حجاب
وان مش حتة الايشارب دي هي اللي تعني حجاب
راجعت نفسي ولقيت اني لازم اغير لبسي فعلا
وعارفة اني قدامها هواجه عواصف من اهلي
قررت اني هلبس جيبات
وإذا بي أفاجىء إني معنديش غير جيبة واحدة
بلغت القرار لأهلي اني هلبس جيبات خلاص مفيش بنطلونات
طيب واللبس اللي لسه جايبينه ؟
طب ولبسك القديم؟
هيروح فين كل ده ؟
قلتلهم هبقى البسه في البيت ان شاء الله
لكن نزول ببنطلونات تاني مش نازلة ..!
حاولوا يقنعوني ..
طب البسي على البنطلون حاجات طويلة
قلتلهم:
أسفة
قالولي:
طيب واحنا مش هنجيب جيبات دلوقتي
قلتلهم:
تمام .. مفيش مشاكل .. أنا عندي جيبة واحدة
هلبسها .
قالولي:
هتفضلي بجيبة واحدة طول الصيف ؟
قلتلهم:
أيوا .. معنديش مشاكل .. هفضل بجيبة واحدة وهي جينز ويليق عليها اي حاجة ..
ومش انا اللي هيتقال عليا حاجة
خلوا الناس تقول بقى انكوا ماعكوش فلوس تجيبولي لبس
ويا عيني بنتكوا الوحيدة المسكينة بتلبس جيبة واحدة طول الصيف ^_^
طبعا أُسقط في يدهم
يوم - يومين
اسبوع - اسبوعين
ولقيت مامتي بتقوللي تعالي ننزل نجيب جيبات بدل ما تفضحينا
قلتلها: شكرا يا مامتي
واستمريت على الجيبات الحمد لله وعليها حاجات واسعة من فوق ..
في بداية دخولي للجامعة
نزلنا جبنا لبس جيبات بقى وكده لبس كتير عشان دخول الجامعة ..
بس كان وقتها ابتدت تنزل موضة الحاجات الكت وتحتيه بديهات كارينا التي تكشف أكتر ما تستر
وابتديت أنزل الكلية بيهم وطبعا بدأت المضايقات
وفي نظري ده كان لبسي محتشم
لأن فعلا الجيبات كانت واسعة جدا
بس بصراحة بديهات كارينا دي
كنت حاسة اني مش لابسة أصلا
فضلت أسبوعين كده
وبعدين ابتدى يدخل رمضان ..
حاولت اقنع أهلي إني عايزة ألبس عبايات
ما وافقوش طبعااااااااا
وقالولي مفيش عبايات على مقاسك
نزلت مرة أنا وصاحبتي
شفت في فاترينة عباية حلوة أوي
حوشت فلوسها
وخلاص نازلة اجيبها
لقطوني وانا نازلة
رايحة فين ؟
نازلة اجيب عباية !
منين ؟
حوشت !
وهوب في لحظة .. أخدوا الفلوس مني
وقالولي مفيش عبايات
قلت أنا بقى طيب ما بدهاش
هما مش موافقين على العبايات ؟؟
أنا هلبس اسدال مرة واحدة ..
واللي شجعتني على كده برضو وخلت الموضوع يلف في دماغي أكتر واحدة صاحبتي جزاها الله خيرا قالتلي ان ده مش حجاب شرعي
واني لو مت وانا كده هقابل ربنا ازاي؟
وفعلا ..
على أد الفلوس اللي كانت معايا في الوقت ده
اديت لواحدة صاحبتي تجيبلي اسدال على قد الفلوس
أي نعم كان رديء .. بس دي الفلوس اللي كانت معايا
المهم جابتهولي
وشلته في الدولاب
دخل رمضان ..
حاولت اقنعهم اني هلبسه ؟؟
اتبهدلت طبعا
وكان هيتاخد مني
ولحقته على آخر لحظة
قلتلهم طيب هلبسه انزل اصلي بيه التراويح بس
وافقوا على مضض
وابتدوا يتعودوا على شكله ..
وكل ما الاقيهم مبسوطين بيه
أقوللهم:
حلو ؟ ينفع البسه علطول بقى ؟
يقولولي:
وبعدين معاكي ؟ انتي قلتي التراويح بس .
فضلت كده طول شهر رمضان
ومكنتش بنزل الكلية
فكان ده اللبس الوحيد اللي بنزل بيه
وكنت سعيدة جدا
أوشك رمضان على الانتهاء
وهرجع انزل الكلية
بلبسي المؤرف اللي مبحبوش
قعدت أدعي ربنا اني مش عايزة ارجع لللبس ده تاني
رحت لمامتي
وحاولت اتكلم معاها بالراحة اني مش هلبس غير الاسدال
يهديكي
يرضيكي
ابدا
وقامت الدنيا على دماغي ولم تقعد
وفين باباكي يشوفله حل معاكي
وجاء أبي الحبيب وبهدلني معاها
وادوني كلام في العضم إيه ؟
رغم ان عمرهم ما عملوا كده معايا
وقالولي مفيش نزول بالاسدال ..
وكان أحد نقط اعتراضهم اننا ما بقالناش شهر جايبين لبس جديد اد كده .. هرمي كل ده والبس اسدال؟
وكان اليوم الذي يليه هو اليوم الحاسم ..
صحيت الصبح
لبست لبسي العادي
مش قادرة اتخنقت
لبست الاسدال وطلعت بيه
قامت الدنيا عليا تاني
وايه اللي انتي لابساه ده
وخشي غيري
ووووو
ما رضتش
وقلت مش هنزل غير بيه
أمي مريضة ولو اتعرضت لضغط جامد أو زعل شديد بتبقى معرضة ان يحصل لها جلطة في نفس الوقت - بعد الشر -
ابتدت تيجي لأمي اعراض الجلطة
جبت لها الاسبو سيد بتاع السيولة بسرعة
زقتني ههههههه
مش مهم .. المهم اخدته
وقعدت برضو تضغط عليا بموضوع انها تعبانة
وبابايا يقوللي شايفة هتعملي ايه في مامتك ؟
وجاء ردي حاسما:
ده قضاء وقدر ..
لو امي مكتوب لها يجيلها جلطة بعد الشر هييجي
مش أنا اللي هكون السبب
ده أمر مقدر ومكتوب
لو سمحتوا أنا مش هنزل غير باللبس ده .. لأن ده الحجاب الشرعي
واللي أنا لابساه ده مش حجاب اصلا
قالولي ..
طول ما انتي باللبس ده مفيش نزول
قلتلهم ..
طيب
شالوا مني الكمبيوتر
والموبايل كانوا عايزين ياخدوه
وضربوني بس مش ضرب ضرب يعني
ودي كانت حاجة كبيرة جدا لأن أهلي عمرهم ما مدوا ايدهم عليا
فضلت قاعدة في البيت يومين تقريبا
وتالت يوم شافوني مصرة
ومامتي خايفة على المحاضرات اللي بتضيع مني
قالتلي اتفضلي انزلي باللي انتي عايزاه بس انا مش راضية عنك ولا ابوكي كمان
وهو قاللي ابلغك لأنه مش بيكلمك
فرحت جدااااااااااااا
ورحت بستها وقلتلها بجد ؟؟
مش راضية عندي عشان بلبس الحجاب الشرعي ؟
وبابايا زعلان مني ليه ؟
قالتلي امشي بقى عشان تلحقي المحاضرات بتاعتك
لبسته ونزلت فعلا الحمد لله
كانت مشاعر غريبة بالخوف والحذر والهيبة
اصحابي طبعا في منهم اللي شجعني جامد وكانوا فرحانين بيا
وهما دول اللي اصحابي لحد دلوقتي .. صحبة صالحة ربنا يبارك فيهم
وفي اللي قاللي:
ايه البيائة دي !!!
وفي اللي قالولي:
كان لبسك الأول اشيك .. ايه اللي انتي لابساه ده
وحش اوي بصراحة يا شيرين
قلتلهم:
شكرا .. محدش طلب رأيكوا اصلا
وطبعا معارضات العائلة الكريمة والتعليقات السخيفة ..
خال ليا قاللي:
انتي عاملة زي البطريق بالبتاع ده !!
وخال تاني قاللي:
انتي بقيتي شيعة ولا ايه ؟
وخالة قالتلي:
ايه يا بنتي اللي عملتيه في نفسك ده ؟
وعمة قالتلي:
يا شيرين انتي لسه صغيرة .. ليه حكمتي نفسك باللبس ده ؟
وابن عمتي الصغير قاللي:
انتي كده لابسة خيمة ممكن تعملي كامبينج في أي مكان
المهم بس يكون معاكي العدة
" يقصد يعني انصب خيمة والخيمة دي هتبقى الاسدال اللي انا لابساه "
وكان جوابي عليهم كلهم واحدا:
معلش .. ادعولي ربنا يهديني ^_^
وأهلي طبعا قعدوا اسبوع كامل محدش بيكلمني وبيعاملوني كالمنبوذة في البيت
حسسوني اني رحت اتجوزت عرفي من وراهم !!
اخواتي كمان مش بيكلموني وكإني عاملة عملة ..
بس الحمد لله رب العالمين
بعد الاسبوع ده ما عدى
أهلي كلموني عادي وصالحوني
ورجعولي الكمبيوتر وفوقيه بوسة كمان
وقالولي
انهم بس مش موافقين على الاسدال لأن بيشوفوا بنات لابسينه وبيعملوا بيه حاجات مش كويسة
فقلتلهم
طيب ما الحجاب الناس بتلبسه وبتعمل بيه حاجات مش كويسة
المفروض تبقى النظرة مش للأشخاص
للزي نفسه .. وهو في حد ذاته معليهوش اي اعتراض .
ووافقوا
وقلت لهم:
انهم لو عايزيني اروح معاهم اي مكان
يبقى ما يخلوش حد من العائلة عندنا يتريأ عليا ولا يتكلم على الاسدال
وعدوني وقالولي حاضر
وفعلا
لما اتجمعت العائلة بعديها
وابتدى خالي لسه هيعلق
بابايا ومامتي قالولهم بأسلوب حازم:
هي لبسته خلاص يا جماعة ومحدش له دعوة بيها
الكل سكت الحمد لله ومحدش فتح معايا موضوع الاسدال ده تاني .
ابتدينا بقى ..
خلصت السنة دي على خير الحمد لله
وكنت خلاص نفسي البس النقاب ..
نسيت أقوللكوا إني في 3 ثانوي مكنتش بذاكر
ومامتي كانت عايزة تخليني أذاكر بأي طريقة
قلتلها : ممكن اذاكر على شرط
قالتلي : ايه ؟
قلتلها : لو وعدتيني اني لو جبت 90% فما فوق .. تقنعي بابي وتخلوني البس النقاب
وافقت
قلتلها: لا مش هينفع كلام كده
تكتبي ورقة وتمضي عليها
وفعلا مضيت أمي على ورقة إني لو جبت 90% أو اكتر هلبس النقاب
وجاء يوم النتيجة ..
جبت 89.5%
نزلت عليا كالصاعقة !!
ومامتي فرحانة بقى .. تقوللي: شفتي؟ اصل ربنا مش عايزك تلبسيه
قلتلها : يا سلام !!
المهم نكمل ..
فضلت السنة دي بقى لابسة الاسدال الحمد لله
واخدنا الاجازة وقعدت في البيت مش بنزل الا للضرورة
وفكرة النقاب في دماغي جداااااااا
ومقتنعة إنه فرض أصلا
ومش بنزل عشان ما اخدش ذنوب اني مش لابساه
ولما كنت بنزل كنت بخبي وشي بالملحفة .. بحيث ما اخليهوش باين اوي
أكتر من 5 شهور في البيت
وأفوجىء إن الكلية على وشك البدء
وهضطر انزل واكشف وجهي
كنت هتجنن
لأن كده كل اللي عملته طول الخمس شهور هيروح على مفيش
قعدت أفكر وكنت بكلم اصحابي طبعا واسألهم اعمل ايه
كنت مترددة وخايفة جدا
وخايفة اعمل مشاكل مع اهلي
وعارفة انهم مش موافقين طبعا
واني صعب اجيب سيرة النقاب
اصحابي شجعوني جامد ..
وقالولي اني كده هدخل في خوف محرم
يعني الخوف اقسام
والخوف اللي يمنع الانسان انه يعمل طاعة يبقى خوف محرم .
واني لازم ما اخافش غير من ربنا
وهما مش هيقدروا يضروني بحاجة الا ربنا كاتبها عليا
وان ربنا هو اللي يملك الضر والنفع لأي حد
وقوله سبحانه:
{ إنما ذلكم الشيطان يخوف أولياءه فلا تخافوهم وخافونِ إن كنتم مؤمنين}
فحاولت استجمع شجاعتي وبقيت ادعي ربنا كتير
خصوصا قيام الليل
والله فعلا صدق من قال: سهام الليل لا تخطىء .
وقررت بقى
جيت ادور على النقاب اللي كانت جايباه
مالقيتوش
وكان خلاص فاضل يوم واليوم اللي بعده كلية
واهلي اصلا مش قايلالهم حاجة على الموضوع ده
كلمت واحدة صاحبتي تقابلني في مكان وتجيب لي نقاب معااها
وقد كان الحمد لله وجابتلي جوانتي كمان
وقالتلي: حظك .. ده النقاب ده شاريينه من السعودية وكنا ناسيينه خالص وبكيسه اهو مقفول .. الحمد لله
طبعا يا جماعة موضوع النقاب ده كان غير مسموح الكلام فيه او اني اجيب سيرته أصلا في البيت بأي حال من الاحوال
ولما كنت بجيب السيرة كان بيقلب باقي اليوم خناقة
فاتفقت برضو مع صديقة ليا على خطة اننا نعمل ضغط عن طريق كارت قوة
واللي هو كان الكلية
شوفوا اللي حصل ..
أولا .. ده كان بداية دخول رمضان ..
نزلت اليوم اللي قبل الكلية ده صليت التراويح بيه
يعني وانا في الاسانسير لبست النقاب
لحد المسجد
وقلعته في المسجد
ووانا راجعة لبسته وقلعته في الاسانسير
مين شافني بقى ؟؟
عمتو
وقالتلي:
ايه ده ؟ انتي لبستي النقاب؟
( وفاكرة ان اهلي عارفين )
قلتلها:
الله يكرمك يا عمتو انا مش قايلة لحد
بس ان شاء الله بكرة هيعرفوا
ارجوكِ ما تقوليش لحد هما ميعرفوش
قالتلي:
حاضر .. بس هما كده مش هيزعلوا ؟
قلتلها:
لا متخافيش
وبعدين مجتش من يوم
أنا هقوللهم بكرة ان شاء الله .
قالتلي :
ماشي
(وفعلا التزمت بوعدها وما قالتش)
عمتو وخالة بابايا لحسن الحظ كانوا بايتين معانا اول يوم رمضان
وكان تاني يوم المواجهة الكبرى
وانا عارفة اني كنت هتهزأ واتبهدل
كمان هتبهدل قدامهم ؟؟
قلت معلش بقى اهو كله في سبيل الله
طول الليل منمتش
خايفة ومترقبة
صحينا الصبح
المفروض ان اهلي هما اللي هيوصلوني
كانت خطتي اني هستعمل حضوري في الكلية كارت قوة زي ما قلتلكوا
إزاي؟
اني هلبس النقاب وانا نازلة
ولو اعترضوا هيبقى حل من اتنين :
يا إما هيقولولي ما تنزليش ..
وده جميل لأني مبحبش الكلية وبموت في قعدة البيت
يا إما هيقولولي انزلي بيه ..
وخلاص كده ابقى عملت اللي انا عايزاه
قعدت ادعي ربنا
وخايفة في نفس الوقت على مامتي عشان مرضها
ومحضرة الاسبو سيد بتاعها معايا
لبسنا الصبح وعمتو وخالة بابايا نايمين ..
وانا لبست كل حاجة
الملحفة والجوانتي وكله كله ما عدا النقاب سايباه للآخر
وقلبي بيدق بشدة
وعمالة أقرأ قرآن
لحد ما لقيتهم قربوا ينزلوا
رحت طالعة الصالة برة
ولبست النقاب
ورفعته
ووقفت اصلي الضحى
نزل بابايا يسخن العربية ويستنانا تحت
ومامتي واقفة على الباب : يلا يا شيرين .. هو في صلاة دلوقتي ؟
خلصت صلاة ..
ومامتي واقفة على الباب ولابسة النضارة الشمس
وشافت النقاب وهو مرفوع
وهي مش فاهمة ده ايه
رحت بكل بساطة نزلته على وشي
وقلتلها يلا
رفعت النضارة الشمس وقالتلي:
ايه ده ؟
استني هنا
ايه اللي انتي لابساه ده ؟
قلتلها:
ده نقاب !
قالتلي:
هو احنا مش قلنا مفيش نقاب؟
وكان اخرك الاسدال ووافقنا عليه ؟
قلتلها:
ما انتوا اصلا ما وافقتوش على الاسدال ولا موافقين عليه لحد دلوقتي
قالتلي:
تقومي لابسة نقاب؟
قلتلها:
بصي يا مامتي معلش بس انا مقتنعة انه فرض واني لما بنزل الشارع والناس تشوف وشي باخد ذنوب
وانا كبيرة وانا اللي هتحاسب عن نفسي مش انتوا اللي هتتحاسبوا عني .
قالتلي:
اقلعي البتاع ده بلاش كلام فاضي يلا هنتأخر
قلتلها:
أسفة .. بس مش هقلعه معلش .
وقفت مذهولة .. وقالتلي طب انزلي ابوكي يشوف معاكي صرفة في البتاع ده ..
ركبنا الاسانسير وخدت كلام اد كده منها في الاسانسير وسكتّ
ركبت العربية قبلي ..
وقالت لبابايا:
شفت بنتك عملت ايه ؟
بتحطنا قدام الأمر الواقع
لبست النقاب وبتقوللك انا شايفة انه فرض وخلاص كده
شايف عشان سكتنالها على الاسدال عملت ايه ؟
دي بتكسر كلامك
إلخ إلخ
نظر أبي لي نظرة واحدة .. صارمة
وقال لي : هو احنا يا شيرين مش قلنا مفيش نقاب؟
قلتله: هو انا غلطت طيب اني بستر نفسي؟
انتوا محسسيني انكوا لاقتوني نازلة بميكرو جيب ولا حاجة !
قاللي : طيب عموما براحتك بس ما تتكلميش معايا
ومفيش دروس دين هتروحيها
وما تجيش تطلبي مني حاجة بعد كده
ووووو
سكتّ خالص ما نطقتش
مامتي طبعا فضلت طول الطريق نص ساعة بحالها تزعق
وتقسم عليا هو بابايا هههه
وانا بصراحة ساكتة
لأني قلت مش هعمل طاعة بمعصية
مش معقولة البس النقاب واقعد ارد على اهلي بقى
حرام ..
وطبعا فضلوا فترة معترضين
وبيعاملوني كالمنبوذة زي أيام الإسدال
وحاولوا يجيبوا لي ناس يقنعوني اني اقلعه
بس الحمد لله ربنا ثبتي
وبرضو مفيش اسبوع وكانوا بيكلموني عادي
والحمد لله بابايا بقى يكلمني عادي
وبعديها علطول رحت درس الدين اللي بروحه
وعادي بقى كأي منتقبة بقابل اللي بيقابلوه المنتقبات من عقبات
وكلام الناس اللي ملوش لازمة
و
و
و
أسأل الله الهداية لنا أجمعين .
آسفة جدا على الإطالة
بس والله انا كده مختصرة جدا
وفي تفاصيل كتير ما قلتهاش
بس تعبت بجد بقالي كتير قاعدة بكتب ..
أرجو إني اكون حكيتها بأسلوب مش ممل
ولو حد له تعليقات يتفضل
وأرجو إنها تكون سبب في هداية أو تثبيت حد
وآخر دعوانا أن الحمد لله رب العالمين الذي وفقني وثبتني وهداني
وما كنا لنهتدي لولا أن هدانا الله
اللهم لك الحمد .. اللهم لك الحمد ..
فعلا قصة جميلة يارب تكون عجبتكم ياااااااااارب :)
ادعولي انا كمان بالهداية والثبات
لان القصة شبيه جداا بقصتي انا ولو كنت حكتبها مكنتش حتطلع قصة حلوة كدة بس انا لسة ف المرحلة العبايات ههههههههه
يارب يثبتني يارب ويقربني اكثر من ذالك رشدا