السلام عليكم ورحمة الله وبركاته
اول شي صلوا على الحبيب المصطفى
مره من المرات حصل خلاف بين عمار بن ياسر وخالد بن الوليد رضي الله عنهما فتهاوشوا
انا ما احب النسخ واللصق لذلك راح اكتب القصه باللهجه العامية
اولاً وقبل لا اذكر الهوشه حبيت اقرب لكم درجة خالد بن الوليد لعمار بن ياسر قبل الاسلام
خالد بن الوليد من عائلتة المخزومي وهم من اشراف قريش
ويصير ولد عم ابو جهل .. ولد عمه اللزم
وكان لهم عم اسمه ابا حذيفه وابو حذيفه كانت تشتغل عنده سميه ( ام عمار بن ياسر) رضي الله عنها
بعدين تزوجها ياسر العنسي اللي جاء من اليمن واعتقها ابو حذيفه وانجبوا عمار رضي الله عنهم فأصبحوا موالي عند بني مخزوم
واللي ماتعرف معنى موالي .. يعني اللي كان عبد وتم عتقه ولكن يفترض ان يكون مطيع لمن كان سيده واعتقه فيصير مثل المساعد لهم
نجي للقصة
هذا سلمكم الله قد صار خلاف بين عمار بن ياسر وخالد بن الوليد على مسألة معينه فتهاوشوا رضي الله عنهما
يوم انهم يتهاوشون كان الرسول صلى الله عليه وسلم جالس وحاضر السالفه
فقام عمار ورمى كلمه على خالد وهالكلمه اثارت عصبية خالد ..
( وكأنه يتذكر قبل الاسلام كيف كان عمار وامه رضي الله عنهما يخدمون عندهم
وكيف انه الحين واقف ويسبني .. وانتم تعرفون ان الشيطان اعوذ بالله منه يحب يوسوس لبني آدم )
فقام خالد رضي الله عنه والتفت للرسول صلى الله عليه وسلم ورمى كلمة قوية جداً بحق عمار لدرجة ان عمار بكى من قوتها
تدرون وش قال خالد
قال : يارسول الله .. اتدع هذا العبد يشتمني ! .. فوالله لولا انت ماشتمني >> ياكبرهااااااااااااااااا
يعني يارسول الله لو ان مافي اسلام وانت رسول ماكان تجرأ يشتمني وكان الى الحين يخدمنا صاغراً ( رضي الله عن عمار وعن خالد )
فبكى عمار .. من هالكلمه لقوتها
عمار الطيب المطيب كما قاله عنه رسول الله يتلقى هالكلمه
فالتفت عمار رضي الله عنه للرسول صلى الله عليه وسلم وهو يبكي وقال : الا تراه !
فغضب الرسول صلى الله عليه وسلم وبان على وجهه الغضب فالتفت لخالد وقال :
( من سب عمار سبه الله ) وفي روايه ( من عادى عمار عاداه الله )
يعني اللي يسب عمار الله يسبه واللي يعادي عمار الله يعاديه
الله يغضب لغضب عمار ويعادي من يعادي عمار >> اللهم اني احب عمار بن ياسر رضي الله عنه
يعني الحين انت ياخالد عدو لله >> تخيلوا موقف خالد رضي الله عنه وقتها .. وكيف كان وقع هالكلام عليه
غادر عمار المكان ولحق خالد به واعتذر اليه وشدد بالاعتذار لدرجة ان في احد الروايات من شدة رغبة خالد
في ان عمار يعفو عنه ويسامحه قام تمسك بثوب عمار يترجاه انه يعفو عنه
وعمار معرض عنه ورافض >> ياالله كيف الموقف عظيم
وتركه عمار وأقسم الا يكلمه ابداً >> تخيلوا شعور خالد وقتها رضي الله عنه .. اكيد كان موقفه عصيب
هنا ذهب الرسول صلى الله عليه وسلم الى عمار وقال
( ياعمار ان خالد سيف من سيوف الله على المشركين )
فرجع عمار لخالد وسامحه وهو يقول ( لقد هممت الا أكلمك ابدا )
يالله كم ديننا عظيم .. خالد يترجى عمار ويطلبه العفو ..
خالد بن الوليد رضي الله عنه اللي من اشراف قريش وعمار رضي الله عنه اللي قبل الاسلام كان خادم عندهم
كل الشي تغير بعد الاسلام ومافي احد احسن من احد الا بالتقوى
وحطوا خطين تحت عباره مافي احد احسن من احد الا بالتقوى
الحمدلله اللي انعم علينا بنعمة الاسلام
لو ان اي شخص مكان خالد كان قال هو اللي سبني اول وانا رديت عليه
وماكان فكر يعتذر ولو فكر بالاعتذار كان قال بأجلها لبكره حتى يهدى .. وكأنه ضامن انه بيعيش لبكره!
العجيب في القصه يابنات هو الراوي
تدرون من الراوي لهذه القصه .. اكيد بتقولون عمار .. عادتنا لمن احد يسبنا ونتهاوش مع احد نروح نعلم
بس الراوي لهذه القصه هو خالد رضي الله عنه حتى انه يوم قال القصه ما قال نص اللفظ اللي قاله لعمار
فقط قال ( وأغلظت له بالقول ) وحتى انه ماذكر ان عمار سبه >> شفتوا الادب في الحديث
حتى انه ختم حديثه رضي الله عنه بقول ( فما كان شي احب الي من رضى عمار )
لكن نص اللفظ اللي تلفظه خالد على عمار ذكره ابن عباس في حديثه وذكر ايضاً ان عمار سب خالد
يقولون ان قوله تعالى ( يأايها الذين امنوا اطيعوا الله واطيعوا الرسول واولي الامر منكم ) نزلت بسبب الخلاف بين خالد وعمار رضي الله عنهما والله اعلم .. فاللي تبغى تقرأ قصة الخلاف تبحث عن سبب نزول الاية
سبب ذكري للقصه لاني ارى اننا صرنا بزمن صارت الهوشات على قفى من يشيل البعض يذهب للاعتذار والبعض لا
مثلاً :
هذا اللي ناقص انا فلانه بنت فلان ال فلان اعتذر لها ... جعلها ماترضى حتى تقوم الساعه
وهذا مثال بسيط
كلنا يابنات اول ماسجلنا بالمنتدى كان في شروط واذا كنا موافقين على الشروط نضع علامة صح ونكمل التسجيل
وكان من بين هالشروط هذه العباره
البعض مطبق للشروط وسيرتهم مثل العطر الفواح بالمنتدى اما البعض عافانا الله واياكم
مثال بسيط لبعض الردود بالمنتدى
ولو كان تواجدنا وجه لوجه كان صار هواشنا هكذا
مرة من المرات استوقفني رد لاخت الله المستعان
كان في عضوه زعلانه من عضوه ثانيه لانها قذفتها وكتبت اسم العضوه
العضوه صاحبة السبه قرأت كلام البنت وقالت انا يمكن ماقلت لك يازانيه ولكن قلت لك يابنت المتعه
لحظه يابنات وخلوها نتوقف هنا شوي
على اي اساس الوحده تتلفظ على اختها المسلمه وتقول لها يابنت المتعه !
خلاص صاروا امهات البعض زانيات والعياذ بالله ..
امهاتنا المصليات المسميات اللي كل وحده فيهم كافيه خيرها وشرها
تنعتونهم بالزنى وصرنا احنا بنات زنى
اسألكم بالله جميعاً كل وحده دخلت موضوعي الان .. ايش الفرق بين كلمة زانيه وبين كلمة بنت متعه !
من متى صرنا نرمي الكلام القبيح لبعض .. عشان عضوه من طيبتها ما احسنت بردها
فاستنتجتي انها شيعيه !
القذف وخاصة قذف المحصنات ( كبيره من الكبائر ) ( كبيره من الكبائر) ( كبيره من الكبائر )
ولا تهون مشكله قذف وسب واهانة اخواتنا المسلمات في الله من الدول المجاورة
ولن ازيد على كلام أختي العضوه أنين الشوق في موضوعها (لكل مسلمة عربية تهان .. طبطي جراحك فـالجنة تستحق)
ولا ننسى العصبيه القبليه والفخر بالقبايل
ويا لابتي وياقبيلتي ياللي احسن وحده بالعالم ياللي القبايل الثانيه مايجون ربع افعال قبيلتنا> تكفين خلي القصايد لاهلها
وهاتك ياقصايد فخر على اساس كل قبيله كانت الفتوحات الاسلاميه على يدهم
ونعت البعض للاخر ب طرش بحر ومتخلفين حجاج
لو الفخر بالقبيله ينفع كان افاد ابو لهب وابو جهل وعتبه بن ربيعه وامية بن خلف فكل واحد منهم كان من اشراف قريش
لكن مايفيد الشخص الا حسناته واعماله الخيره واخلاقه الحسنه
شوفوا الصحابه عسى ما الواحد يغلط الا على طول يندم ويطلب العفو مهما كانت مكانته هذولا وهم اصحاب رسول الله
فمين احنا جنبهم عشان نتنافخ ونتفاخر على بعض ومانتنازل حتى نتعذر لبعض عند الخطأ >> البعض مو الكل
مافي احد معصوم من الخطأ .. كلنا نخطئ .. بس الجميل من يعترف بخطأ ويعتذر
وقفه
جتني رسائل على الخاص بخصوص رؤيتي عن حبيبي عُمر رضي الله عنه يسألوني عن الرؤيا
فاراح اذكرها هنا عشان تشوفونها ..السالفه وما فيها يا أحبتي
اني اعجبت بشخصية عُمر رضي الله عنه وصرت ابغى اشوفه .. فأختكم بالله صارت تدعي بكل وقت انها تشوفه بالمنام
وادعي وألح بالدعاء ابغى اشوفه .. بس اشوفه واكحل عيوني بشوفته
واستجاب ربي لي ولله الحمد والمنه وحلمت فيه واقف قدامي رضي الله عنه وانا أناظره ويناظرني
وبعدها صحوني اهلي .. الله يسامحهم كان انتظروا اسمع صوته على الاقل >> طرارة وتتشرط
بس والله يابنات يوم قمت جلست (مفهيه) وفي روايه أخرى ( فاغرة ) برهه من الوقت .. ماكنت مستوعبة اني شفته
بس والله هيبه رضي الله عنه وارضاه .. وبس
اسأل الله كما من علي برؤية عُمر في المنام انه مايحرمني ومن شاركت بموضوعي هذا ونشرت عطرها الفواح فيه
من رؤية حبيبنا المصطفى وصحابته ومجالستهم على سرر متقابلين
سبحان الله وبحمده
سبحان الله العظيم