قصة العزيمه

نمت وقمت وباقي الردود ايش دعوه يانسوان سالفه شاركتكم فيها من شي شفته مايدخل العقل اول شي الحرمه ماهي فقيره اعرفها انا من جاراتها القداما وبيتها شقه تمليك مو اجار وأول مره ادخل عليها ولا ادري بحجمها والعزيمه أصلا لنا
اللي صار نمت وقمت وصليت الفجر وافتح الواتس الا صاحبة العزيمه مرسلتلي اللي سار اليوم شي ماكنت مخططه له اعتذر ومدري فين اودي وجهي منكم
بنتي حطتني بموقف لا احسد عليه أرسلت عسى خير وماحصل الا الخير بس ايش فيه قالت بدق وكلمتني قالت ياختي كنت اشتغل بالمطبخ وجوالي بيد بنتي اقولها هاتي الجوال تقول شويه هاتي تقول طيب تقول معنده تقول انا معطيتها إياه مكافئه لانها ساعدتني وجيت برسل على قروب الجيران الجدد حياكم الله العشى عندي اليوم عازمه جيراني القداما وحبيت نجتمع ونتعشى ومجهزه على ذا الأساس ومرسلتها صوتي بعد تقول وبنتي عندي الاتبي الجوال تقول اعطيتها وهي رايحه تقولي أرسلها على القروب قلت لها ايوه ارسليها يوه ما أرسلتها احسب اني ماضغطت ارسال من رجة بنتي وراحت بنتي وساعه كذا وطفى الجوال وحطيته بالشاحن وجيت افتحه الساعه 5 الا كم رسايل رهيب اثاري بنتي حولت الرساله على قروب الدوام وقروب سلفاتي تقول جلست انطط مكاني مدريي ايش انا فيه واللي ترسل تعتذر واللي تقول بشوف زوجي واللي تقول ابشري تقول والله حول 30 رساله تقول حطيت نفسي بموقف وامسك ببنتي واضربها اضربها تقولي انتي قلتي ارسليها على القروبات تقول قلت مالي الا اتصرف تقولي كلمت زوجي على العشى قال هي نص ذبيحه مافي غيرها حجزتها قلتيلي عددكم 11ولابزيد واتخاصم معاه واصيح قلت خلها دجاج وكثر قال دفعت لحق المندي نص القيمه هي بالحجز وعربون عطيته 200 تقول
ولامعي كاش اوصي على محل ثاني تقول ويأذن المغرب ودخلوا علي سلفاتي وانا بموت قهر وزوجي عشان الكلام اللي قلته له وتشادينا يبي يعاندني قاعد بالصاله تقول أقوله ادخل جوه قال والله ما اتحرك من هنا وبشوف المباراة هنا وكلمه زياده انتي والحريم برى تقول وامشي امسح دموعي هو انا بالمصيبه اللي سوتها بنتي والا بذا العله تقول اصلي المغرب وادعي يارب مايجون عاد لو جو اللي بالقروبات كلهم يبيلككم صالة افراح
قلتلها اول مره اختنق في مكان كذا كنت بنفجر أقول بنفسي ليش كذا ولا احنا قادرين نتنفس ولا قادرين نتكلم سجنتينا لو علمتيني والله عادي كان ماجينا كان وصيت سواقي بعشى زياده ليش ما استعنتي في اعين واعاون قالت لا انتم الجيران القداما كلمتكم بنفسي والعزيمه أصلا لكم بجمعكم مع جاراتي الجدد قلتلها الصدق ماعرفتي تتصرفي ليش استحيتي كان ارسلتي اعتذارقالت بقلبي طلعوا الناس ماتعشوا قلت
طلعت منك رحت ماك وتعشينا وماسار شي بس وانا بالمطعم نزلت موضوع بعالم حوا حشيتك فيه حش فطست ضحك قالت بالله بتسير قصتي وسالفتي سالفه اشوفه يامعفنه اللحين يمكن يوسع صدري على اللي سار لي قلت لا بنزل كمالة قصتك بعدواللي سار لك وعلى فكره احنا ماقصرنا جابوا الحضور حلا وفطاير وجبت انا بس انحط وانأككل وبعضه تقول ماحضرته ماعندي صحون تفريغ وملاعق كفايه
تقولي تخيلي ولاحبه رز بقت انا اكلت لقمتين وقمت وغسلت وطلعت قالت الأمهات محد تعشى كلهم يلقمون أطفالهم وطلعوا وبقوا سلفاتي وابكي عندهم ابكي ابكي ويواسوني تقول علاقتنا رسميه بس قاموا يحضنوني وتركت البيت زي ماهو والمطبخ ورحت سريري منسدحه افكر باللي سار هوحلم والاعلم وموقف زوجي تقول هو ماتخيل انه بيسير كذا ويعاند فيني وسلامتكم وهديتها وقلت عادي قالت امون عليكم انتم جاراتي وبتنتهي السالفه بس صديقات الدوام بتسير سيرتي بألسنتهم وسلفاتي مدري فين اودي وجهي منهم وعلمتها قلتلها حشيتك حش بالمنتدى وعشانك بنزل كمالة سالفتك قالت لو تشوفين الواتس عندي اللي توي افتحها من امس اللي يقولون ودنا حضرنا وماتيسرت الضروف وبقلبي أقول زين ماحضرتم وهاذي السالفه تقولي والله ارسلولي من الحضور الله يهديك ماعلمتينا انه عازمه هذا العدد واللي تتشكرني وبين الكلام تدقني بوجود زوجي تقول مدري اضحك والا ابكي وبس هذي قصة العزيمه والعذر والسموحه ام احمد على الحش اللي جاك