قصة امي جعلها بالجنه

مساء الخير ي بنات
شفت كثير بالمنتدى يشكون الله يكون بعونهم وهالشي خلاني استرجع الماضي وكيف امي عاشت وهي اميه ماتقدر تشكي ولاشي عسى الله يعوضها بالجنه
بقولهاا باختصار امي كانت متعلقه باابوها حيل وماتحب أمها كثير لانها تفضل الأولاد ع البنات حتى لو غلطانين المهم
زوجو امي بدل يعني هي واخوها تزوج اخ واخته فهمتو !!
جابت ولد وبنتين اخوها وزوجته ماتوفقو تطلقو قالت جدتي اجل لازم تتطلقين تخييلو بسس هي قبلها كانت متمشكله معاه وبترجع له بس وقفت لها جدتي تقول ليه اخته تركت ولدي
المهم امي عاشت مع خوالي وعيالها معاها كان ابوها واقف معاها توفى ابوها سندها راح وقالو لازم تتزوجين واصرو عليها وتزوجت وجاء أبو العيال واخذهم تقول امي كاني بمسلسل يسحبونهم من يديني ابوهم وعمتهم وعمتهم الحين عقيم ومتوفي زوجهاا ربماا ذا عقاب ع فعلها الشنيع
الزبده اخذوهم وتزوجت امي ابوي وجابت ثلاث بنات فجاءه ابوي يصيح زي البزر يقول مجبور اطلقك!! طبعا هي زوجه ثانيه وخواتي من أبوي كل شي سووها فيها وحسبي الله ونعم الوكيل فيهم حتى لو قريتو وعرفتوني الله لايسامحكم ع فعايلكم
لدرجه اني أتذكر وحده كانت بعمر 18 تلحقني تتفل بوجهي وانا كنت 3او 4 بس الى يومكم ذا مانسيت الموقف
المهم تطلقت امي ورجعت لخوالي جلست عند خالي الصغيير أنواع العذاب النفسي من المواقف ابوي كان مدللنا والعاب الدنيا اخذتهم قدام عيونا وبالزباله كان عمري 6 واختي4 والثانيه2
وولدها يبوول فوق راسي !! تضحك تقول بوله حلو المهم راحت الأيام بحلووهاا ومرها والحمدلله اني صغيره وقتها
هالحياه طلعتني انسانه قويه عاقله فاهمه طيبه ياربي لك الحمد
المهم مرت خالي ماتبينا طلعنا لخالي الثاني وصرنا فوق سكنت معانا جدتي
كنت بثاني متوسط جانا اخوي من امي قال يمه توظفت بطلعك ببيت لحالك ياللللللله يابنات أتذكر وجتني الصيحه تكفون ادعو له ادعو له بكل شي حلو
خلاص انتهى الحصاار جانا بدر ع اسمه وطلعنا لبيت طلعنا للحريه اول مانقدر نركض مرت خالي كل شوي تقول راسي يوجعني من أصوات البنات واسطوانة الغاز امي تشيلها عشان ماتطلع صوت عليها فواتير الكهرب يعطون امي القيمه الأعلى وتسسدد فوق ذا المصروف للعايله كلناا 1000 ريال فقققققط
طلعنااا لبيت اول شي سوته اختي الصغيره بوقت النزايل طرد عيال خوالي من بيتها ههههههه أطفال حست بالأمان
المهم تزوجنا حنا يالبنات ورا بعض ماشاءالله وحنا صغار امي مرتاحه عندها خدامه وسواق وجدتي عايشه عندها وخواتي كل يوم يتجمعون عندهاا
اخوي ساكن فوق ادعو لهم بالبيت الملك
ونهاية المطاف امي الحين مريضة سكر وضغط وديسك وخشونة ركبه
وبيتها كل العالم تتجمع فيه حريم خوالي اللي مايبونها بكل مناسبه غصب جايين يعني صار بيت العايله اللهم لك الحمد خوالي كل صباح عندهاا جدتي اللي كانت تفضل العيال مااهتم فيها غير بنتها اللي هي امي
هاذي الاحداث بتكمل 35 سنه
لاتقنطون يابنات والله والله والله انا مرريت بغرابيل بس الحمدلله كلنا اتزوجنا رجال عوضو عن كل اليتيم اللي صار لناا
تعبت وانا اكتب وماابي اطولها عليكم دعواتكم لاامي ولي ولخواتي واخوي