قصة بنت عمتي وابوها الشهيد اسكت ولا اتدخل

السلام عليكم بنات 
مساء الخير حابة استشيركم بموضوع ياريت تساعدوني لانه الموضوع انساني 
ببدء من البداية بتكلم بالتفصيل عشان تفهمو الوضع زين 
بنت عمتي عمرها 30ماتزوجت بسبب امها قاسية وماتبيها تتزوج عشان تخدمها عندها 4 اخوة 3عيال وبنت متزوجة عمرها 31المهم اخوها الكبير متزوج وزوجته قوية وموسهلة ابد نفس شخصية عمتي وعمتي طاير عقلها فيها وبنت عمتي الكبيرة بعد نفس امها وهذيك المسكينة زي الخدامة تخدم عيالهم واخوه الوسط هو الزين حنون عليها يشتغل ويعطيها مصروف بالسر يساعدها بشغل البيت لانهم يتركوها تشتغل ويطلعو يجي هو يساعدها حتى الملابس يكوي معها وابوها انسان رائع بمعنى الكلمة حنون طيب يحن عليها ويدافع عنها بس عمتي مسيطرة ع البيت ومرة تحدى عمتي هو وابوي وقالو بنزوج البنت غصب عنك تصدقون تصلت بالعريس وقالتله بنتي ماتجيب عيال وبنتي وبنتي يعني مايقدر لزوجته هي متعلقة بأبوها مرة وماتشوف غيره بالدنيا هي راضية وتقول الله يطول عمر ابوي ومابي شي من دنيتي المشكلة بدت من رمضان استشهد اخوها الحنون وبغت تنجن انهبلت بس دعت ربها يلهمها الصبر كانت تتكلم معي وتبكي كل شوي تقول اخوي الحنون مات وما امداها تجاوزت الصدمه استشهد ابوها بأول ايام عيد الاضحى  وهالمرة تجننت رسمي ماعاد لها سيرة غير ابوها يابنات اشوف خلفياتها بالوتس صورة ابوها وكلام يقطع القلب تقول اللي عنده اب غير احسها مو قادرة تنسى انا قريبه منها ماكلمتها عشان الصور احاول ما افتح الموضوع بس البنت احسها تدمرت ابيكم تنصحوني صح اني اسكت واخليها براحتها تطلع اللي بقلبها ولا اكلمها واصبرها واقولها شيلي الصور حرام تعذب الميت بكثر البكا واصبرها ولا اخليها ولا افتح معها سيرة كأني ما قاعده انتبه انا احس نفسي ما اتحمل مواقف زي كذا خصوصا اما عارفه علاقتها بابوها كيف 

بنات رجاء الموضوع مو متحمل تجريح