قصة حقيقيه تبغا مساعدتكم

السلام عليكم ورحمة الله وبركاته

(اما بعد انا اجيب قصص واقعيه واطرحها لكم لمساعدتهم )

(وهم يشوفوها لان مايبغوا احد يعرفهم)

(مو قصتي)

مساء الخير ياحلوين بكتبلكم.. ((قصة وحده محتاره ومتردده وتبغا مساعدتكم )).

هذي وحده لنفترض اسمها ( ندى)عمرها ٢٣ متزوجة لها ثلاث سنين تزوجت هي كانت ماتبغا الزواج وتخاف منه من كثر ماتشوف امها وابوها مره يتهاوشون ومره يتراضون وخواتها حياتهم بس طبخ وتنظيف واطفال .
المهم انها انخطبت بالقوه من امها انه نصيب مايصير ترديه وبعدها بسنتين تزوجت ندى وكان اهم شيء عندها تعرف شخصيه زوجها وكيف أسلوبه ( تزوجت بدون شوفه ولا مراسله بعد الملكه بسبب ابوها مارضي وزوجها ماطلب)
المهم يوم ووا يوم تكتشف منه افظع الاخلاق واسلوبه سىء
وعصبي وسب وهواش هنا ندى كانت مصدومه مصدومه منه ومصدومه ان امهاوامه كذبوا عليها قالوا انه موعصبي
وجاء ذاك اليوم اللي حست فيه انها حامل وطلبت من زوجها تحليل طبعا زوجها مااهتم لها وقال تونا مقضين وخلص الراتب استني الشهر الجاي
استنت ندى وتقول اذا ربي كاتب لي خير في حملي يحفظه ليا واذا لا عوضني باحسن منه

وبنفس الاسبوع طلبت من زوجها انها تخرج يوم السبت كوفي في المول عشان تشوف اختها من اول ماتزوجت ماشفت اهلي كان وقتها لها سته شهور متزوجة قالها طيب وداها وقالها ساعتين وارجعلك ورجعلها وهتا تغير وجهه ١٨٠ درجة يهاوش وينكر انها قالتله على مكان الكوفي وهو موصلها والى ان رجعو البيت وهو ينافخ ويهاوش وزعل وندى متحمله وساكته الى ان وصل وقالها ماحتشوفي اهلك و غصبًا عنك تسمعي كلامي هنا ندى انفجرت وزعلت كانت بتضربه لكن اخذت المخدة وراحت نامت بالصاله وتصيح مقهوره من هو يقولها غصبًا عنك وقامت تتحسف انها حملت بسرعه وتدعي انه يطيح وماتبغى تحمل من زوجها المريض خافت على عيالها منه وخافت على نفسها منه قدام عيالها المستقبليين
ونامت صحيت على د*م عرفت انها اجهضت زعلت وقالتله ماصدقها ولا راعاها بتعبها

مدري كيف مشت الموضوع وسامحته !

المهم عاشت معاه بصراع نفسي مو مرتاحه معاه وبنفس الوقت خايفه من اهلها عارفه انهم ناراح يوقفوا معاها وبذات ان زوجها ابو وجهين وجه سيء لها ووجه جيد للناس
وهنا بدات تشك فيه وانه يكلم بنات ووراه بلاوي من فعايله واسلوبه مو اسلوب بني ادم طبيعي وفعلًا لقيت انه كان عنده بلاوي لليل ويتابع بنات
وفوق هذا ماراحت تشتكي لاهلها منه لانه مو عذر انها تتطلق منه بنظرهم

فكرت انها تستشير خواتها لكن شافت انه بلا سبب فكرهم قديم ونفس فكر امها وفكرت تحط قصتها لحسابات بدون محد يعرفها لكن ما عرفت من وين تبدأ لهم

تعايشت معاه وصار لما يسبها او يضربها ترجع له الضربه والسب ويسكت ويطلب مسامحتها وانه يحبها

وقبل فتره انمسك بتهمة التحسيس** وتقول احساسي انه فعلا محسسْ هو كاذب عليها انه واحد اتهمه وهو ماله فيها
تقول بس قلبي يقول انه كذاب من اسلوبه وافعاله تقوله شي اليوم يجي بكره وهو ناس

لكن اخر مره واللي خلاها تبغا مساعده تقول رحت معاه هو واهله سوق ودخلنا محل جزم صغير وامه تعبت وجلست على كرسي جاء واحد من الموظفين ومعاه سلم بيتعدا من الممر اللي فيه خالتي بيمر بدون ماينبها او يعطيها خبر انه بيتعدى شافه زوجها وقعد يهاوشه انه مايشوف امه ووو
وامه قامت تبعد عنه ومع عصبيه زوجها دف امه عن الرجال
تقول ندى انا قلبي عورني الدفه مو قويه بصباعه لكن قلبي عورني يعني خالتي ايش دخلها دف الموظف
ومن بعدها وانا كرهته اكثر .

انا لما قريت القصة انقهرت وتنزفزت ماعرفت شقول بصراحة

هي تبغا تقوله كلام ماينساه طول عمره لانها بتطلق منه
وتبغا تعطيه عظة وعبرة بس ماتبغا تتطلق خايفه انها ماتتزوج تاني وبنفس الوقت ماهمها اذا تطلقت واذا ماتزوجت تاني لكن همها تبغا ضنا من بعد ذيك السنه اللي حملت وطيحت ومن بعدها ماحملت واذا حملت تحمل بنفس ذاك الشهر ويطيح تقول يمكن دعوتها كانت مستجابه


ياليت تفيدوها يابنات🥰