قصة حلوة كثير بتنفع الآنسات إللي ما تزوجوا

السلام عليكم ورحمة الله وبركاته ،،،

هذي قصة حقيقة حصلت لوحدة أنا أعرفها شخصيا .
هذي البنت عادية ، جمالها عادي ، بشرتها حنطاوية ، طولها عادي وجسمها مليان شوي ، وجهها مليان بثور وشعر ( عافانا الله ) .
والبنت هذي مسكينة كانت تتحاشى إنها إتخالط الناس أو تروح أعراس أو حتى تتعالج من المشاكل إللي في وجهها .
كملت هذي البنت 28 سنة وهي واثقة إنها ماراح تتزوج ، حتى الكل كان يعايرها وأولهم أهلها بأنها عانس وبأنها ما بتتزوج .
المهم البنت هذي كل يوم في الليل تبكي وتتألم ، بس في نفسها إتقول إن هذا الشي مقدر ومكتوب ، وان الله سبحانه وتعالى له حكمة في كل الأمور .
راحت هذي البنت العمرة وظلت تدعي ربها إنه يرزقها بولد الحلال إللي يستر عليها وكانت إتلح في الدعاء .
ورجعت البلاد ، وقدمت أوراقها علشان تتوظف ، طبعا في أماكن يشترطون فيها إن البنت إتكون حلوة وأنيقة ، المهم كانوا يرفضونها في كل مكان .
سارت البنت هذي واتوظفت في شركة خاصة يديرها واحد من أغنى أغنياء البلد ، وكان هذا الرجل عنده ولد معاق في رجله ويده ، وحاول إنه يعالجه لكن ما فاد .
المهم البنت هذي إستلمت الوظيفة واشتغلت وكملت تقريبا سنة ، وكان هذا الرجل معجب في أخلاقها وصفاتها ونسى شكلها ، المهم كان عنده إن الوحدة إتكون أمينة ومخلصة في شغلها والبنت هذي كانت شعلة من النشاط في عملها ، حتى إنها كانت تقترح واتقدم أفكار في كيفية تطوير العمل في الشركة هذي .
وفي خلال السنة إللي إشتغلت فيها زادت أرباح الشركة هذي بفضل الله سبحانه وتعالى وبفضل ذكاء البنت هذي .
هذا الرجل تم يفكر فيها وعرض عليها الزواج ، طبعا استغربت البنت هذي من طلب الرجل لأنه غني كثير وهي على قد حالها ، في البداية رفضت ، ولكنها بعد مدة قبلت بعرضه ووافقت على الزواج بعد ما شافت الحاحه المستمر على الزواج منها .
وعمل لها عرس في أفخم فندق في دبي وسكنها في فيلا كبيرة وهي قامت برعاية ولده كأنه ولدها .
والبنت إتعالجت من البثور ومن الشعر إللي في وجهها وصارت جميلة وأنيقة وايد بعد ما الله سبحانه وتعالى رزقها ووسع عليها .
سبحان الله يوم الإنسان يصبر ، الله سبحانه وتعالى يرزقه ويوسع في رزقه .
يمكن إتقولون إن هذي قصة مب حقيقة ، بس صدقوني هي حصلت .