قصة حملي بعد زواجي ب ٨ سنوات

يابنات مساء الخير
ابكتب قصة حملي بعد ٨ سنوات زواج يمكن اطوووووووول بس سامحوني
وابغى كل وحده منكم تحط قصة حملها بولدها او بنتها الاولى يالله
انا تزوجت في عام ٢٠٠٩ جلست انا وزوجي لين ٢٠١١ وانا ماحملت من بداية ٢٠١٢ وسالفة حملي صارت قضية رأي عام مافي وحده اقابلها الا وتعطيني طريقتها في الحمل والا خلطة تساعد على الحمل اشغلوني صرت ماودي اجتمع مع الناس بسبب الموضوع وكل ماكلم زوجي نروح نكشف يقول الاشياء ذي ادويتها وطلباتها غالية وانا اسدد تكاليف الزواج اذا خلصنا وماحملتي نشوف فعلا مع نهاية ٢٠١٤ خلصت ديون زوجي وبدأ الوضع يصير احسن في عام ٢٠١٥ سوينا تحاليل طلعت انا ماعندي اي مشكلة حتى دورتي منتظمة من سنين كل يوم ٢٠ ميلادي تجي هو كان عنده مشكلة في العدد كان بس مليون واقل شيء للحمل ٢٠ مليون شاف دكتور قاله وزنك عااااااااااالي جدا وكل الادوية مابتشتغل الا اذا نحفت نقص ٤٥ كيلو على الاقل ومرني غير كذا لاشوفك
المشكلة الرقم كبير وزوجي يخفف يومين ويدمرها في الثالث بدأ ينقص بشويش في شهر ٦ سنة ٢٠١٦ لقيته نزل ٤٨ كيلو عن الوزن اللي شافه الدكتور قلت له راجع الطبيب راجع واخذ الادوية وقاله تاثيرها مابين الثلاثة شهور الى السنه بدا فيها بعد ثلاثة شهور كان في تحسن بس بسيط المهم استمر على الادوية
في ٢٠ فبراير ٢٠١٧ كنت متوقعة الدورة عادي ماجات ولا فيني اي من علاماتها لاحبوب بالوجه ولاغثيان المهم مره يوم ٢١و ٢٢ و في ٢٣ صادف يوم الخميس وهذا اليوم يروح زوجي جمعة مع اصدقاءه المهم فاضية بالبيت وافكر ليش تاخرت الدورة قلت لنفسي معقولة اكون حامل وفعلا طلعت مشي للشارع العام فيه صيدلية قلت ابغى تحليل حمل طلع لي نوعين يقول هذا في الصباح عشان الهرمون قوي وهذا احسن وفي اي وقت اخذت الثاني وقلت اخليه في الصباح وهو ممتاز فالنتيجة تطلع احسن ( كونان 😂😂 ) صباح الجمعة سويته طلع خط واضح وخط ماهو واضح ولا هو مختفي وسط طلعت من الحمام وانا افكر معقول 🤔 المشكلة انه يوم جمعة ومافي مستشفيات كلها طواري انتظرت السبت وناديت ولد اختي قلت له وزوجي يسمع يوديني السوق مر علي وخليته يحطني في مستوصف قريب وقلت له الموضوع سر لو احد سالك قول اني في السوق ساعة اذا ماكلمتك تعال
دخلت وطلبت تحليل حمل وسويته وقالت الممرضة نص ساعه بالفعل جلست العب بالجوال بعد ٣٥ دقيقة انتبهت ورحت قلت ابغى نتيجة التحليل قابلتني مصرية اعطيتها معلوماتي وسالتي تحليل ايش قلت حمل طبعت النتيجة قالت مبروك انتي حامل 😭😭😭😭
بغيت ادوخ مسكتني ورشتني مويه يالله صحصحت واستوعبت وطلعت فرحانة بتجنن بس مابيت لزوجي قلت لازم اسوي فيه مفاجأة
اذن العصر وقلت لزوجي ابغى كارفور ناخذ اغراض وداني وبديت ادور وهو يسأل تبغين زيت ملح معلبات وانا اقول لا المهم وصلنا لقسم حفائظ الاطفال
طلعت من الشنطة ورقة وقلم ووقفت عند بامبرز وكتبت بالورقة بامبرز ٢٠ ريال (الاسعار تقريبية ) والنوع الفخم الابيض ب ٢٢ ريال زوجي يطالع ولا هو فاهم مشيت عند بيبي جوي لقيتها ٢٧ وكتبتها سالني زوجي يقول ليه تسوين كذا بتسوقين للنهدي ويضحك وانا مارد عليه واكمل لهيجيز والاقيها ٤٣ ريال واكتبها شوي صرت اكلم نفسي قدامه وش احسن بيبي جوي والا هيجيز
رفع صوته يقول يابنت ليه تسجيل اسعار الاغراض وانا مارد زعل ومسكني من يدي يقول ليه ماتردين ليه تسجلين اسعار الحفايظ على ورقة
طالعت فيه شووووي وقلت له عشان انا حامل ومشيت بسررررعه هو وقف وانا ماطالع فيه شوي احس واحد وراي يجري وشد العباية قال وش قلتي ( بصوت عالي ) قلت ارخي صوتك انا حاااااامل
طالع في وحده من الرفوف وصارت عيونه تدمع ( رحمته وفرحت لفرحته ) شوي قلت يالله امش قال وقفي ماقدر احس ارجولي ماتشيليني وكان يوم مانساه مدى حياتي