هالقصه طبعا قصة حملي الاول بولدي الله يحفظه ويصلحهه ويهديه عمره الحين اربع سنوات واحتضنت يتيم بعده عمره سنتين والحين انا حامل بشهري السادس يارب لك الحمد ..
باقولكم كيف حملت ببكري ندلعه ملوكي.
من بداية زواجي تاخر حملي طبعا انا دخلت عش الزوجيه وانا حائض وخوفوني صديقاتي اني بحمل على طول ومن هالكلام فخذيت حبوب منع الحمل جينرا واستخدمتها ست اشهر وابو الشباب مايدري ياحرام كنت اعطيه الكرتونه ويروح يشتريه ولا يدري وشو له طبعا يوم يسالني اقول له فيتامينات
المهم لعبت الحبوب بحسبتي وصارت الدوره غير منتظمه.وبدات رحلة الشقاء.!!! وخربطت عندي الامور
من مستشفى لعياده لممرخه وكل ماقالو لي شي سويته واتبهدلت الي تزوجو معي صارو بطفلين وثالثه والي بعدي خلفو بعد وانا قاعده اترجى رحمة ربي..مااجلس مع احد الا اول سؤال ماشاء الله كم سنه لك متزوجه ليه ماحملتي للحين؟!!
كنت احس الحريم يخافون على عيالهم من هاالعقيم!!المهم صارت نفسيتي زيرو واشوف اللهفه بعيون زوجي كل ماخرجنا وشاف طفل يلعبه ويقول الله يحفظه لاهله طبعا عمره ماحسسني بس عيونه كانت تقول كل شي..الين هذاك اليوم.!! اتصلت علي انسانه كنت احسبها صديقه وطلعت........!
اتصلت الساعه 2الليل طبعا زوجي كان مستلم وانا بالبيت بروحي ورديت عليها قالت انتي نايمه قلت ايه على بالي بتقفل..بس كملت سالفتها..طبعا كنت اعرف وش كثر كانت هالانسانه تقارن زوجي بزوجها وكيف زوجي يجيب لي هدايا وكيف يدلعني ويعطيني مبالغ كبيره وهي زوجها لا وانا دايم اصبرها واقول مافي انسان كامل من كله لازم زوجك كويس في نواحي ثانيه وهي فعلا زوجها كان طيب بس ماتشوف طيبه لان عينها على الي عند غيرها المهم .سالتني عن موضوع معين كنا بنسويه سوا.. انا ربي يسر لي سويته وهي لا..وجنت البنت وصارت تقط خيط وخيط..قالت يالله على الاقل انا احمل واولد احسن من غيري..وترى لو وش كان رجلك يحبك تراه بيشوفك ناقصه لأنك ماقدرتي تحسسيه بانه أب..قلت لها يافلانه ترى الحشرات تحمل وتولد وهذا مو انجاز انتي مسويته وترى عيالك الي تعايريني فيهم ممكن الله ياخذهم منك بغمضة عين لاكن ماقول الاحسبي الله ونعم الوكيل فيك وقفلت!!!!
طار النوم من عيوني وصرت اصيح اتصلت على امي وقلت لها السالفه وبكينااااااااااااااا لين طابت روسنا ..:icon33:
كنت والله يابنات اشتري علبة اختبار الحمل بالكرتون اسوي تحليل قبل الدوره بيوم وبعده بيوم وبعده بخمس ايام ودفعنا ثروه بالمستشفايات ودقينا كل الابواب ولا دقينا باب الكريم طبعا كان رمضان هذيك الايام على الابواب والوالده قالت حاولو انكم تاخذون عمره برمضان وكتب الله لنا وسهلها وكنا يوم27بمكه نعتمر ورفعت يديني لسما ودعيت ودعيت ودعيت وألحيت على الله بالدعاء تنفخت رجولي من التعب وخرجت طبعا من الحرم وانا شفتي بيضا من العطش طبعا رحنا لمكه بالسياره وطول الطريق مانمت ووصلنا على الظهر وعلى طول دخلنا الحرم مالقينا فندق من الزحمه وعتمرنا وانا فطرت عشان كنت حيل مرهقه ..ويوم خرجنا من مكه اتصلت على الوالده قلت خلاص ياميمتي كل الي في قلبي غسله رب العالمين الحين والله لو ربي ماعطاني طفل ادري انه صرف عني بلاء يعني اكيد بيتعبني هالولد ياعاق او معاق..طبعا هالكلام كان بشهر رمضان رحت لاهلي بعده قعدت عندهم شهر وسافرت للرياض شهر 11وجتني الدوره واستمرت معي 15 يوم وصار الايام الاخيره ينزل علي دم اسود!!اعزكم الله
المهم قلت لابو الشباب ودني المستشفى نشوف وش موضوع هالدوره الي عيت تخلص..المهم قلي اوديك مستشفى الحرس الوطني الي حنا تابعين له وانا عيت قلت له زحمه ومواعيد ودني لمستشفى دله عاد مد بوزه وقال انتي تحبين الصرفيه على غير سنع المهم رحنا لدله وهو طول الطريق يبربر رحنا ولقيت رئيسة القسم وشرحت لها المشكله قلت لها عن الدم فقالت لي لازم نسوي لك اختبار حمل عاد انا عصبت كييييييييييييييييييف تسون اختبار حمل وانا اقولك عندي الدوره؟!!!!!!!!!!
رحت قلت لزوجي وعصب علي المهم رحت المختبر وسحبو مني الدم ورحت جلست عنده بانتظار النتيجه وهو داير وجهه عني ولا وده يطالعني من كثر ماهو معصب هو وده يذبحني وانا ودي اشنقه ..!!جت الممرضه معه الورقه واشرت لنا تعالوا عشان ندفع قيمة التحليل المهم عطته الورقه وهي تقول له مبروك ناظرني زوجي قال شفيها هاذي خبله تقولي مبروك على الورقه!! المهم خذيت منه الورقه واناظر والا مكتوب (بوزتف )يعني موجب قلت له فلان مكتوب بالورقه اني حامل!! قال احلفي قلت والله العظيم وماهو مصدقني رجعنا للدكتوره وريناها الورقه وهي ميته ضحك قالت شفتي عصبتي علينا وطلعتي حامل يعني لو عطيتك دواء وش كان صار .!والله لو شفتو وجه زوجي ذاك اليوم ماراح من بالي لليوم يعني ماتدرون شلون صاير بس ينااااظر ..قال للدكتوره بس كيف نتاكد ؟قالت لي اطلعي على السرير اسويلك تصوير تلفزوني ومن يوم حطو الجهاز الا نسمع دقات قلبه ..والله يابنات حسيت قلبي وقف وصرت اسمع دقات هالكائن الي بداخلي يووووووووووووووووووه وش هالسعاده الي عجز صدري يشيله ذيك الساعه جلس زوجي وغطا وجهه بشماغه وصار يبكي ويحمد الله والله الي برا الغرفه يسمع شهيقه. عطونا صوره صغيره كان عمره ست اسابيع ويوم جيت انزل من على السرير ينقز زوجي من محله ويمسك يدي ويقول بالراحه شوي شوي عاد انا بتشقق من الفرحه وصرفنا 1700ريال وهو يضحك.وصار طول الطريق يسندني وانا مدري من وين جاني تعب. المهم طلعت حامل باصير أم الله ياحلات هالكلمه انا أم طرقت ابواب الناس سنييييييييييييييييييين ولا فادوني وطرقت باب ربي وعطاني الي ابيه بظرف اسابيع ياربي اغفر غفلتي..ثلاث سنين وانا اتحمل الم المستشفيات ومصاريفه واتحمل كلام الناس والله اني كنت اشوف القطوه مع عيالها واقول حتى الحيوان عنده عيال وانا عجزت احمل استغفر الله يارب اغفر غفلتي وغباءي كنت دايم قدامي ومعاي وخليتك ورحت للي ماينفعوني..اشكر فضلك يارب طبعا الله عطاني ولد مثل القمر جبته بالشهر السابع ولادته سهله الحمد لله ولا تعبت في شي فيه استمر معي النزيف ثلاث شهور ووقف والحمد لله ولدت طبيعي. بانزل بعدين قصة ولادتي.الله يحفظ لي عيالي ويصلحهم ويهديهم مثل ماقلت انا عندي اثنين وحامل بالثالث..واحد ولد بطني الي هو ملوكي والثاني ولدي الي احتضنته من دار الايتام والثالث ببطني الحين الله يرزقنيه صحيح معافى ويجعله بار صالحا.:26:
عزي وعزوتي.مات! @aazy_oaazotymat
محررة برونزية
يلزم عليك تسجيل الدخول أولًا لكتابة تعليق.
الف الف الف مبروك والله يعيوني دمعت عليك الله يحفظهم لك من كل شر
اللهم ارزقني حملا سليما معافى من كل عاهه وبلاء اللهم امين
اللهم ارزقني ولدا تقيا ذكيا ليس في خلقة زيادة اونقصان عاجلا غير اجل اللهم امين اللهم استجب اللهم استجب اللهم استجب
وجميع المسلمين
وصل اللهم على محمد وال محمد
رب اني لماانزلت الي من خير فقير
لااله انت سبحانك اني كنت من الظالمين
اللهم ارزقني حملا سليما معافى من كل عاهه وبلاء اللهم امين
اللهم ارزقني ولدا تقيا ذكيا ليس في خلقة زيادة اونقصان عاجلا غير اجل اللهم امين اللهم استجب اللهم استجب اللهم استجب
وجميع المسلمين
وصل اللهم على محمد وال محمد
رب اني لماانزلت الي من خير فقير
لااله انت سبحانك اني كنت من الظالمين
الله يخليهم لك والله فرحت لك ويصلحهم لك وان شاء الله تولدين باالسلامة
ولاتطولين علينا بباقي القصة
ولاتطولين علينا بباقي القصة
الصفحة الأخيرة
http://forum.hawaaworld.com/showthread.php?t=2539036