بِسمــهِـ تعَـالى
وعلى ارواحكم سلام مغلف بتواشيح الرحمةِ والمغفرة
.
.
أخواتي اعضاء منتدى عالم حواء
حبيت انقل لكم قصتي بحملي لعلها تفيد ممن عانـى من تكيس المبايض !
وخصوصاً ان وحده من الأعضاء رسلت لي رسالة مدري اذا عادي ترضى لي اصرح بأسمها ولا
كانت تسألني كيف صار حمل وايش التجارب اللي سويتها
ورسلت لها بس ان عدد مشاركاتي اقل من المسموح لإرسال الرسائل
فقلت اكتب موضوع كامل يمكن تقراه اللي رسلت لي والأعضاء الباقين
طبعاً انا مااقولكم اني مريت بتجارب كثيرة
لأني ولله الحمد بعد سنتين من زواجي بالضبط حملت رغم ان فيني تكيس مبايض
لذلك اقولكم اني بنقل قصتــي
انا في بداية زواجي كنت رايحه المستشفى على اساس ان فيني التهابات
وماكان في بالي سالفة حمل ولا ماحمل
بس الدكتوره شكلها مستعجله علي وسوت لي سونار ومن هالسونار عرفت اني فيني تكيس المبايض
وبدأت تعطيني منشطات وكلوميد ومادري ايش استمريت لمدة ثلاث شهور تقريباً وقطعت
لأنها قالت لي اذا مافد بتسوي لي اشعة الصبغه
رحت عند دكتوره ثانية قالت لي اي صحيح معاك تكيس وانها راح تسوي لي الصبغة
وبرضو رحت لهاالدكتورة كم مره وتركتها
< مادري ليش ماألتزم بمواعيد
والحت علي امي توديني مستشفى سمير عباس لأن معروف انه دكتور كبير ومشهور
وبرضوا رحت له مره او مرتين وقطعت
وقالي ان فعلاً فيني تكيس لكن بدري علي الكلوميد والمنشطات وحتى اشعة الصبغة هذي بدري عليها
وعطاني حبوب كلوفاج وقالي استمر عليها واذا ماصار حمل خلال ثلاث شهور او ست شهور نسيت والله
ان بيسوي لي شيء ثاني
واستمريت عليهــا انا لمدة ثلاث شهور
وطبعاً غير اني في البيت كنت اشرب البرقدوش وعصير الاناناس وكنت احط لي البخوور
< يقولون البخور ينزل الأوساخ واذا سبحت احاول اني ارش على نفسي ماي حار
المهم
وكل هذي الأشياء كنت اسويها وانا مؤمنـــة انها ماراح تنفعني في شيء اذا الله ماكتب لي الحمل
يعني لمجرررد الأخذ بالأسباب فقط وعن الحسافة لو اني كبرت وماحملت
وكنت دايماً افكر اني ابي اشتغل واشغل نفسي اكثر من الحمل
<< طبعاً مااقولكم اني ابد ماافكر ولا انقلق ولا ودي احمل بالعكس
بس انا قلت مابفكر كثير الا بعـد مايصير لي ثلاث سنين من زواجي
المهم
تعرفون الكلوفاج ينحف .. وانا اصلاً نحيفه مايبيلي تنحيف اكثر
يعني وزني 39 .. ابد ابد ماكنت افكر اني انحف
بس اني نحفت مع الشغل لأني اشتغلت بعدها ونحفت خلال عملي
وصار وزني 35
<< يقولون اللي فيها تكيس مبايض علاجها انها تنحف
بس انا ماكنت حاطه ببالي ان هالعلاج لي لأني مااحتاج نحافه اكثر
بس مادري يمكن حملت لاني نحفت اكثر وهذا اصلي انا مادري !!
المهم وصرت ماافكر بالحمل ودائما اروح واجي ودائماً تفكيري في الشغل
بس كنت احياناً اشرب البرقدوش وعصير الاناناس مثل ماقلت لكم
لأني يوم اني اشتغلت من كثر الشغل صرت انسى ابلع حبوبي
فتركت الكلوفاج يعني استمريت عليها تقررريباً شهرين او ثلاث ومع الشغل تركته
مرت الايام واانا اشتغل
الا قالت لي مرت خالي عن وحده تدهن ( تمرخ )
وقلت يالله اجرب شوراي
ورحت عندها لمدة ثلاث ايام ورى بعض ودهنتنـي
وبما اني كنت اشتغل ( اشتغل في مستوصف كـ موظفة إستقبال )
صرت انتهز الفرصه وادخل عند دكتورة النساء والولادة
واسوي سونار اشـوف البويضه وين واصله وشصاار فيها
واروح اعلم الممرخه عنه
يعني تقرررريبا جمعـت بين الطب الشعبي والحديث لوووول
وبعدها صار تنزل مني وانتوا بكرامه افرازات كثيرررررررره وجاااامده
يعني تخيلوا فجأه اشـوف شيء ابيض كبير نازل ومادري شنو
انا اول مره ارتعت بس تذكرت قلت يمكن من التدهين
وسألت دكتورة النساء وسوت لي تحليل
قالت لي فيكي التهابات رهيبَــــه
بس انا داخلي ماخفت كثير لأن قلت بالعكس هذا شيء زين
اكيد الاوساخ والاتهابات تنزل من اللي سوته الممرخه بس ماقلت للدكتوره لأنها يوم قلت لها ترى انا اروح عند ممرخه ضحكت علي قالت هالأيام كله يروحون للتمريخ
وعطتني الدكتوره اداوي للاتهابات استعملتها
وطبعاً كل هذا ماكان في جماع
< كل هذا كان في رمضان ويعني تقريباً رمضان كله ماصار جماع بسبب الاتهابات والأوساخ اللي نزلت
اذكر ان عطتني مطهر وتحاميل وحبوب
وطلعت من الشغل بعد ماصار لي 6 شهور على اساس بشتغل شيء ثاني
بس يوم اني طلعت وقعدت لمدة اسبووعيين تقررريباً في البيــت
خلال هالأسبوعين حملت
يعني ماادري هل صار الحمل بسبب النحافه اني نحفت اكثر
ولا الممرخه
ولا الدكتوره
ولا لأني كنت ادعي وانذر
وكلــه طبعاً بعـد الله سبحااانه
والحمدلله الحمدلله الحمدلله على كل حااااال
.
.
عناقيد أبجديات @aanakyd_abgdyat
عضوة جديدة
يلزم عليك تسجيل الدخول أولًا لكتابة تعليق.
ام فصولي وحماده
•
ماشاء الله الف مبروك
senen
•
الله يجزاك خير ويتمم عليك حملك ويقر عينك بشوفة
البيبي سليم معافى يارب
ماشاء الله عليك قلتي تجربتك بدون حركات التشويق
اللي يسونها بعض البنات الله يهديهم كأنهم يبون الناس
يترجونهم عشان يذكرون تجاربهم
الله يجعل هذا الشي بميزان حسناتك
البيبي سليم معافى يارب
ماشاء الله عليك قلتي تجربتك بدون حركات التشويق
اللي يسونها بعض البنات الله يهديهم كأنهم يبون الناس
يترجونهم عشان يذكرون تجاربهم
الله يجعل هذا الشي بميزان حسناتك
الصفحة الأخيرة