انا متزوجه من 4 سنين.. اول سنه ماحملت بعدين حملت ولما وصلت الاسبوع20 جاتني التهابات واعطتني الدكتوره تحاميل بعود ادخلها وحطيتها الفجر وصحيت الظهر الم ودم ولما رحت قالوا الجنين بالرحم وجلست 3 ايام بكشك الولاده رجل الجنين تدخل وتطلع وطلق والم فضيع وكانوا رافضين اي تدخل خايفين يسحبوه ويتقطع لانه ضعيف وبعد ثلاث ايام بالعزل كنت ابكي ابغى ماما وكانوا رافضين اشوف اي احد بالعزل تعبت نفسيا اكثر من جسديا واول حمل ونزل وتوفى ماشفته اصلا..
ثاني حمل رحت بسوي ربط رفضوا انه مااحتاج وكل شي سليم وصلت للاسبوع 24 جاني الم فجاه قوي.. ولما رحت قالت خلاص ولاده الرحم مفتوح والجنين نازل وقال الدكتور نشوف بعد ساعتين نحاول بقطنه نطلعه على فوق ونسوي ربط بس وقتها ماكملت ساعتين ونزل وبقيت المشيمة جوه وسويت عمليه تنظيف..
. الحمل الثالث حملت وسويت ربط بالاسبوع12 ولما وصلت للاسبوع26 رحت الحمام لقيت خيط بلاستيك نازل من تحت ورحت نفس المستشفى اللي سويت فيها الربط رفضت تكشف عليه قالت مافيكي شي روحي البيت واذا نزل شي جيبه بمنديل وتستهبل انه مافي ربط يتفك فالبيت. ورحت مستشفى ثانيه استنيت بالطواري اكثر من 4ساعات لين جاه دوري، لما كشفت قالت الربط مفتوح والرحم مفتوح بس مانقدر نستقبلك ماعندنا سرير بالحضانه وملفك مهو عندنا روحي للمستشفى اللي سوتلك الربط وانا رفضت اني اطلع من المستشفى وارسلوا خطابات انه لازم اروح مستشفى ثانيه عشان الحضانه بعدين وحده من المستشفيات قررت تسقبلني وجهزوا الإسعاف عشان ينقلوني وطلبت منهم قبل مااروح يكشفو عليه طلع الرحم مفتوح 6سانتي والربط لسى ماتفك كله ولو رحت وانا كذا يمكن ينفجر الرحم بالطريق وبسرعة نقلوني لقسم فتح الربط.. الله يسامحها الدكتوره نادت كم وحده من الممرضات المتدربات وتعلمهم كيف يفتحوا الربط وانا وضعي جدا سيئ وفتحت الربط بعده بساعة او اقل ولدت وكان اول مره اسمع صوت بكى طفلي بكيت من الفرحه كان محد مبسوط فالدنيا غيري وولدت وجبت عبدالرحمن .
الجزء الثاني..
جبته بالاسبوع26 وكان وزنه 850جرام وضعه كان زي باقي الخدج الاكسجين مضطرب ينزل ويطلع حجمه صغير الأعضاء الداخليه لسى ماتكملت.. اول مره شفته بالحضانه مني مصدقة انه ولدي اخيرا شفت ضناي قبل ما اموت بكيت وطلبت منهم اني امسكه بس رفضوا لانه حجمه صغير ماعنده مناعه.. كنت فرحانه فيه خليت كل اهلي يجوا يشوفوه وصحباتي من فرحتي فيه، ،
اول اسبوع كان وضعه مستقر وتخفف الاكسجين اقل شي وسار يتنفس شبه طبيعي وبدأنا نعطيه حليب كل يوم ملي ويوم من الايام جيت لقيت بطنه منفوخ وجسمه منفوخ فرحت احسب زاد وزنه وقرب يطلع، بس للاسف طلع انه عنده التهاب الأمعاء الناخر وقرروا عمليه باسرع وقت..
سوا العمليه قص جزء من الأمعاء مع صمام الأمعاء وفتحوا فتحه فالبطن يخرج منها الفضلات كنت اتعب مره وابكي لما اشوفهم يغيروله وينظفوه وقال الدكتور يجلس على هذا الحال لين 4او6شهور..
بعد مااجتزنا العمليه هذه والحمدلله رجع وضعه الصحي تمام ومستقر وبدا يتعدل الاكسجين ورجعت ضحكتلي الدنيا.. ويوم رحت ازوره زي كل يوم مالقيت ولدي بسريره السرير فاضي سرت مااشوف اللي قدامي دموع تنزل اقولهم فين ولدي قالوا نقلناه قسم العزل جاه التهاب بالدم..
كانت الزياره وقتها ممنوعه بس كنت اروح وممنوع امسكه كنت اشوفه من وراء القزاز واقرأ عليه الاذكار كل يوم واحصنه وارجع البيت
كان وضعه جدا سيئ نقص بالصفايح الدمويه نقص بالدم نقلوله مرتين دم حلقوا شعره ابر فالراس والرجل كل جسمه اجهزه..
لما كمل شهر بالتمام بالمستشفى.. دق الدكتور قال بنسوي عمليه مستعجلة نفتح فتحه بالرقبه عشان الأدوية لانه الجسم منفوخ من التهاب الدم ومايوصل الدوا للعروق وتم التوقيع على العمليه وسووها له الصباح..
رحت الظهر اطمن عليه..
الجزء الثالث والاخير..
رفضوا ادخل اشوفه لكن دخلت بالقوة لبست لبس معقم ودخلت ومسكت يده وقريت عليه كان جسمه اصفر مره باين انه تعبان، وانا عنده دق جرس الاجهزه انه وضعه خطير، جاه الدكتور وطلعني برا بس كنت اشوفهم من ورا الشباك القزاز توقف القلب عنده وجلس ينعش قلبه.. انا قلبي وقف معاه وفجأة رجعت دقات القلب من 10 الين 90 نزلت دموعي من الفرح قلت الحمدلله ردت روحه.. قلي الدكتور وضعه مو مطمن بس روحي البيت واذا سار شي ندق عليكم بس رفضت قلت مني رايحه وبعد ربع ساعه بدات دقات القلب تنزل شوي شوي وانا اطالع لين وصلت ل20 وجاه الدكتور وجلس يضغط على قلبه بقوه لين رجعت الدقات قال ضغط الدم مره نازل وتجمعوا الدكاترة واعطوه ابر أكثر من 20 ابره وانا اشوفه قدام عيني جابوه اجهزه أشعة كبيره ويصوروا القلب والرئه ورجع القلب لوضعه الطبيعي مرت ربع ساععه ثانيه وأذن العصر جلست ادعي يارب اكتبلي الخير يارب لاتوجعني فيه يارب إذا لاتحملني مالا طاقه لي به وارضيني بقدرك،،
بعدين رجع للمره الثالثه دق الجرس جات دكتورة مصريه الله يسامحها بس جلست تحاول تنعش قلبه ونادت طالبات تدريب تعلمهم كيف ينعشوا قالت وحده فيهم يادكتوره هذا صغير اخاف اعور صدره وانا اضغط بقوه، قالت بصوت عالي عادي دا بيودع، وانا قدامها واسمعها وقتها خلاص عرفت انه ولدي بيموت وفعلاً وقف القلب وخرجوا كل اللي بالغرفةوطفت الانور وقالت الله يعوضك،
وقتها مادري ايش ربي نزل عليه سكينة مابكيت بس طلعت من المستشفى ودقيت على اختي اقولها هي تبكي وانا اقولها لاتبكي هذا ابتلاء من الله والحمدلله لو عاش كان جلس طول عمره على انبوب التغذيه وماقدر ياكل لانه الصمام حق الأمعاء مستأصل.. وقال الدكتور توقف دقات القلب آثرت ع المخ لو عاش بيعيش متخلف..
الحمدلله يارب ربي رحمه ورحمني ولا اشوفه يتعذب قدامي.
واشكر الله انه اطعمني طٌعم فرحني فيه شهر كنت اسعد وحده فالدنيا..
الحمدلله لن يصيبنا إلا ماكتب الله لنا.. ولا يكلف الله نفسا إلا وسعاها.. وما ابتلا الله مؤمناً بشي إلا وهو متاكد بانه يستطيع ان يتحمله.. الحمدلله حتى يبلغ الحمد منتهاه..
والآن من وفاته 9شهور تقريبا الشهر اللي فات تأخرت الدوره وتوقعت اني حامل وسويت تحليل بول فالبيت طلع خطين ولما رحت سويت تحليل دم مافي حمل وطلع عندي تكيسات فالرحم..
وكمان خايفه انه التجربه تتعاد وماينجح الربط وافقد ضنا كمان :(
واتمنى ربي يرزقني هذا الشهر بالحمل التام يارب
اتمنى من اي وحده تقرأها تدعيلي بالذريه الصالحه المعافى عاجلاً غير اجل، وهذه قصتي.
لا تيأسي الامل موجود
تعالجي و انّ شاء اللَّـه تحملي حمل سليم وتنجبي طفل معافى سليم يعوضك وتعطيه كل حناانك
♡ ♡ ♡