قصة حملي +ولادتي +تجربتي مع أبرة الظهر

مرحبا حوائيات
بكتب لكم قصة ولادتي
بس في البدايه احب اقولكم ان الحمل يختلف من وحده لوحده . وحتى الولاده بعد . يعني موب شرط مثلا اني كنت حامل في بنت وان حملها تعبني معناها ان كل البنات سهل . وفيه من قالو لي ان حمل الأولاد صعب والعكس .
بداية حملي هلكت من الوحام .. نفسيتي صارت عدم واعتزلت الدنيا والناس .. وبعد الأربع شهور اكتشفت ان المشيمة نازله .. ولازم راحه وهالشي بالنسبة لي صعب مع وجود زوج وطفلين وبيت بدون شغاله .. لكن حاولت اني ارتاح .. في الشهر السابع الحمدالله قالو ان المشيمة ارتفعت لكن في بداية الشهر الثامن كنت جالسه وداخله عالم حواء . وكنت اقول للبنات ان معي مغص والله يستر .. بعد ساعه زاااااد الألم .اتصلت على زوجي ورحنا على طول لمستشفى المواساة في الجبيل . هالمستشفى الكئيب . ركبو التخطيط لقو طلق وجت بتكشف رفضت وقالت ليش قلت مايحتاج قالت انتي بتعلميني شغلي !!! استغربت اسلوبها الصراحه قلت لها لأني ماراح اولد عندكم . قالت للممرضه خل تطلع الحين وخل توقع ورقة اخلاء المسئوليه !!
قلت بيني وبين نفسي ابرك . طلعت وانا الألم مقطعني ورحت على طووووول للخبر لمستشفى بروكير وكشفت علي الدكتوره وقالت الرحم فاتح 1 سانتي .
ولازم تنويم .. تنومت واخذت مهدئات طلق والله لايوريكم التعب .. مهدئ الطلق متعب جدا .. وفوق هذا الكشف من تحت كل شوي .. المهم ان بعد يومين وقف الطلق وطلعت .. وجلست 3 ايام ورجع لي الطلق . ورحت لمانع الجبيل ونفس الشي طلق خفيف والرحم 1 سانتي .واعطوني بنادول . وجلست طول الشهر الثامن اعاني من هالطلق .. وكل شوي رايحه للمانع واشوف مدى قوة الطلق وطبعا مع كشف من تحت ..
ودخلت التاسع . ورحت لبروكير وطلبت من رنا تحريض ورفضت بحجة ان البيبي صغير . وانا خلاااااااص مستويه من الألم . ورجعت للبيت وكل ليله اصيح من هالطلق . وبعد اسبوع رحت للدكتور فادي في بروكير وطلب مني كشف من تحت علشان يشوف الرحم كم فاتح ويعمل لي تحريض لكني رفضت . صعبه اخلي دكتور يكشف علي مع اني كنت خلاص ابي أي شي علشان اولد .. رجعت للبيت وكل شوي اخذر من هالبنادول .. وبعد كم يوم كانو عندي اهل زوجي وانا جالسه معهم وماسكه نفسي من الألم . ولما طلعو . دخلت الحمام (الله يكرمكم) ويجيني شي زي ضربة السوط مع الظهر . واصرخ على زوجي واقوله يلا شغل السياره واخذ شنطتي .. وديت عيالي لأهل زوجي . ومشينا للخبر . وزوجي طول الطريق متوقع اني برجع معه كالعاده . ويقول هالمره اذا ماولدتي بخليك عندهم .. لأنه كان شايف معاناتي مع الطلق . ورحت لمستشفى سعد . ودخلت وشافو التخطيط وقالو طلق حامي . اول مره بحياتي انبسط من الطلق لأني كنت ابي اولد . وجت الدكتوره نيفين .. وكشفت قالت 2 سانتي . وتنومت عندهم . بقسم الولاده . وصرت امشي بهالممر . بس شكلي يقطع القلب . موب عارفه امشي خطوتين على بعض . وادخل للغرفه واحاول انام ماقدرت . جت الممرضه اعطتني ابرة بيثادين وريحتني حيل . بس لما صارت الساعه 6 جت نيفين ولقت ان هالأبره وقفت الطلق نهائيا . بس الرحم فاتح 4 سانتي
وقالت خلاص خروج .. انا هنا خلاااااااااااااص بغيت اقطع شعري من القهر .. قلت لاااااااااا انا جايه من الصناعيه صعبه اني ارجع .. قالت خلاص الحين بيجي الدكتور كمال الأتربي ويشوف .وجا كمال على 9 وقال خلاص بنعطيك طلق صناعي .. وطلبت منهم ابرة ظهر . ولما صارت الساعه 1 جت دكتوره تركيه والدكتوره ايمان .. تهبل هالدكتوره . وجابو معهم طاوله ولبس عمليات .. انا هنا بغيت اهون من الأبره . بس تصدقون حاولت اني مااشوف وش موجود على هالطاواله .. لأني سمعت ان شكل الأبره يخوف .. توكلت على الله واخذتها . لكن هالدكتوره دخلتها 3 مرات بظهري وكانت جدا جدا مؤلمه . عكس ماقالو لي
وبدى مفعولها . وفعلا ماحسيت بالطلق الصناعي ابد واتصلت على امي وقلت لها تحجز لها لأنها بالرياض ولما صارت الساعه 4 جت الدكتوره عملت لي تحريض لأن راس البيبي كان مرتفع وفكت لي المويه
وبعدها بساعه بديت احس بالراس ينزل . ولما فتح الرحم 8 سانتي رااااااااااااااااح مفعول الأبره !!ر وبديت اصرخ من الألم . وجا الدكتور زاد الجرعه بس مافيه فايده . وجت الدكتوره لواء ياحبي لها روعه هالدكتوره
وقالت الرحم 9 سانتي وانا خلاص ابي مسكن وتعطيني كمامه وارميها وتقولي الرحم 9 ونص وبعدها 10 يلا ادفعي وانا صرااااااااااااخ وتقولي لاتصارخين بس مااقدر . وتعبت بالدفع كثير وطلع راس البيبي ووقف لاهو اللي دخل ولاهو اللي طلع وانا القسم كله اهتز من صراخي واقولها اسحبيها تقولي لاصعبه ادفعي ولااقدر ادفع . وحاولت والحمدالله صرخت صرخه وطلعت البنت . وانا وقتها صوتي اختفى من الصراخ واقول للدكتوره خاب ظني بأبرة الظهر . حتى هي مستغربه
بس الحمدالله على كل حال . اهم شي اني ولدت بالسلامه والله يعيني على الأربعين .. سهر وعانيت من البواسير .. وفقر دم . والحمدالله ان شاء الله فتره وتعدي
وعقبال كل الحوامل يارب ..

الخلاصه يابنات .. جربت بروكير وجربت سعد
وانا انصحكم بسعد .. عنايه لأبعد الحدود . واي سؤال انا حاضره ..