صباح الخير
معليش اسمحولي يابنات اللي راسلوني عالخاص يسئلون عن أحوالي ؟؟
توني أرد لأني كنت مشغوله ولهيت عن المنتدى شوي
والسبب؟؟
تذكرون يوم أقولكم جاني نزيف وش أسوي؟؟؟؟؟؟؟؟؟؟؟
بعدها ماعاد دخلت
الحمدلله على كل حال
ولدت ولاده مبكره في شهري السادس
وجبت ولد توفى بعد 12 ساعه من ولادته
اللهم اجعله شفيعا لي ولوالده يوم القيامه يارب العالمين.....
من بداية حملي وأنا تعبانه
نزيف ونزيف ونزيف ونزيف.............الخ
لين خلص الدم بجسمي
من أول شهر أنزف
تعبت نفسيا وجسديا الله يعظم الأجر يارب
وجلست اخر شهر قبل ولادتي
شهر كامل ينزل معي موية الجنين
متخيلين الوضع 6 شهور تعبانه....
ثاني شهر انفصلت المشيمه
ثالث أو رابع شهر انفتح عنق الرحم
نهاية الرابع وبداية الخامس
عرفت بمصير ولدي..........الكلى متعطله عنده والمويه قليله
بعدين......مافيه مويه نهائيا ....
قصتي......
بداية حملي جلست شهر تقريبا ما اعرف اني حامل
جاني نزيف خفيف والام زي الدوره
وقلت خلاص هذي الدوره
مع اني مستغربتها غير عن الدوره العاديه بس مافكرت كثير
وجلست ما أدري عن وضعي لين شفت الام مب طبيعيه وطولت معاي
صدري وظهري وشعور غريب أول مره أحس فيه
وسبحان الله خالتي شكت وقالت لي حللي تحليل بيت قلت وش أحلل وأنا الدوره جايتني
بس مدري وش اللي خلاني أطاوعها سبحان الله
وحللت ..........
المفاجأه حامل
طبعا استانست كثير وكلن استانس عشاني
وجلست أخطط لكل شي بالبيبي وش أسميه
بنت والا ولد
وأفكار تروح وتجي :frown:
ووبدا الوحام الحمدلله ماكان متعب
بس الحرقان ذبحني :ohmy:
ويازين الوحام عند اللي شفته :frown:
وكلن علمته أني حامل من أول مادريت :frown:
من فرحتي والله
مرأسبوعين واروح لمستوصف خاص وأفتح برنامج متابعة حمل
وبديت مع الدكتوره بعد كم يوم من أول زياره وأنا أصلي سبحان الله
وأنا ساجده نزفت :frown:
وبدت رحلة المعاناة المشيمه منفصله جزئيا
زوجي كان مسافر بعثه برا
كنت عند أهلي ومرتاحه مره
وعطوني مثبتات وكل شوي أخذ ابر تثبيت
وحالتي حاله
مرت 3 شهور وأنا والنزيف مانتفارق
يوقف كم يوم ويرجع
لين خلصت 3 ودخلت ال4 <<والله نسيت متى المهم بهالفتره تقريبا :44:
ويجيني نزيف قوي لونه بني
رحت عالمستوصف وطلع عنق الرحم مفتوح
لازم ربط لعنق الرحم
يالله معاناة جديده
وحددوا لي موعد
بعد أسبوعين للربط
ارتحت بهالأسبوعين مره الأسبوع الثاني قبل الموعد بكم يوم وقف النزيف وحسيت اني طيبه
رحت الموعد سويت الأشعه
الحمدلله يارب
المشيمه ارتفعت .......عنق الرحم تقفل
يالله يافرحتنا بهذاك اليوم أنا وزوجي وأهلنا كلهم استانسواعشاني
وعشت فتره بسيطه وأنا طيبه وحملي طيب
وبيوم من الايام الصباح وأنا نايمه
حسيت بشي
قمت من السرير
الا وأنا أنزف
نزيف مو طبيعي
قوي قوي قوي
غيرت الكوتكس 3 مرات بكم دقيقه
أدق على زوجي ويالله عالمستشفى
رحت الطواريء وسوو لي أشعه
ومسكوني وجتني دكتوره وقالت لي الخبر اللي قتلني بذيك اللحظه
الجنين متعطله كلاه ....ومويته قليله.....واحتمال كبير يكون متشوه
يالله كلماتها كانت قويه علي ...ردت فعلي كانت السكوت
دخلوني غرفه لحالي وكل شوي يدخل علي دكتور
علموني بحالة ولدي
وأنا ساكته ودموعي تنزل بصمت .:frown:
شي صعب
ما أحد يتخيله
قالوا لي مستحيل يعيش
واذا عاش راح يكون تعبان
ومتشوه......
والمطلوب
قالوا لازم أنزله
وشلون أنزله
هذا ولدي ما أقتله بنفسي......
مستحيل أخليكم تقربون منه ...
عطوني موعد بعد أسبوع
قالوا لي فكري واستخيري....
بدون تفكير بحتفظ فيه ...
هذا فرحتي مابي أنزله
أنا الحين بالخامس
مايجوز أنزله
الجنين فيه نبض ويتحرك وكل يوم تزيد حركته
الجنين تكون وتجاوز120 يوم
مابي أنزله يسمى اجهاض......
رحت المستشفى وعطيتهم قراري بحتفظ فيه واللي يصير يصير
عطوني موعد نهاية هالشهربتاريخ 25-3 ولادة مبكره
بس ربي كتب اني أولد بداية الشهر
والمويات بدت تنزل معاي قعدت 3 أسابيع تقريبا
تاريخ7-3 يوم الأحد
الساعه 12 بالليل جاني نزيف
ونزلت قطع دم
معاي خفت
رتبت أغراضي وبيتي
والفجر رحت العسكري عالطواريء
حسيت أني بولد
كشفوا علي
اه يالكشف الداخلي تعذبت منه أكرهه :frown:
وتنويم قالوا
رحت الغرفه وأنا مدري وش مصيري
أمي ماتدري أني بالمستشفى
علمت أختي بس
جلست أنزف يوم الأحد كله
وكل شوي يدخلون عندي دكاتره
وكشف داخلي :icon33:
يوم الأثنين بعد صلاة الفجر
حسيت فيه ألم بظهري
بس جاني شوي وراح
جتني الدكتوره الساعه 7 وقالت خلاص بنعطيك طلق صناعي
أنا قلت لا تكفين مابيه
أبي عمليه << على كيفي يعني
قالت لا مافيه عمليه الجنين صغير وانتي بكريه اذا سوينا لك عمليه بتصير كل ولادتك عمليات
وشق بطن والبيبي صغير حجمه لأنه ماكبر ولا تغذى زين ماكان يجيه لادم ولامويه
وقامت تقول لي عن سلبيات العمليه
وقلت خلاص عطوني طلق صناعي بس مابي اليوم
ابي بعد يومين
وبعد اصرار مني ودمعتين وافقت ويوم طلعت مني ابتسمت
ارتحت شوي عارفه ان البيبي بيموت بس حسيت براحه أبي أهرب من الولاده والطلق
طلعت أمشي بالسيب وأسمع صراخ الحريم
يمه بدا الخوف مره ثانيه
رجعت غرفتي وقفلت باب الجناح
وقفلت باب الغرفه
وصكيت اللمبات قلت بنام أريح شوي
فزيت الساعه 9 على الام بظهري خفيفه لين جت الساعه 12 بدت تقوى وصارت منتظمه ورا بض بين طلقه والثانيه كم دقيقه بس وأنادي النيرس وأصرخ قللها نادي دكتورتي وللأسف ماكانت فيه رايحه لغرفة العمليات عندها ولاده
وتجيني قابله جنوب أفريقيه
وتكشف علي والرحم مفتوح2ونص
وحطو جهاز الطلق طلع فيه طلق وتجي النيرس وتعطيني لبس المستشفى
كنت لابسه بجامتي مابي لبس المستشفى
ويالله غررفة الولاده
وشو ولادة؟؟
لا أنا قلت لدكتورتي بعد يومين وهي وافقت ؟
بس ماحد عطاني وجه وسبحان الله زوجي دق بالوقت اللي أصرخ فيه من الألم
ورديت عليه ماعلمته اني بروح الولاده قلت تعبانه فيني النوم بنام وبكلمك اذا صحيت
ورحت للولاده
طبعا تعبت بالولاده تعب بس الحمدلله تكفير ذنوب
أقل مايقال عنها
سكره من سكرات الموت
طلبت ابرة الظهر وماعطوني اياها
والحمدلله دعيت بالوقت اللي ان شاء الله ربي يستجيب لي
يوم طلع البيبي ما صاح غمضت عيوني مابي اشوفه
على طول كانوا مجهزين القزازه اللي بيحطونه فيها
ودخلوا الغرف دكاتره اخصائيين تشوه أجنه وراحوا للبيبي
أنا بعدها دخت ونمت وصحوني على غرفتي وماشفت البيبي
سئلت الدكتوره وش جبت قالت ولد
دقيت على زوجي وعلمته اني ولدت وانصدم مني انا قايله له بعد يومين وجا على طول الله لايحرمني منه
دقيت على أختي وقلتلها علمي أمي أني ولدت
سبحان الله ماقدرت أكلمها يمكن عشانها ماتدري اني بالمستشفى
الله لايحرمني من أمي يارب ويشفيها ويعافيها
وقت الولاده ما أفكر الا فيها
صدق الجنه تحت أقدام الأمهات
جا زوجي وراح شاف الولد وقابل الدكتور الخاص بتشوه الأطفال
وصوره بالجوال قلتله ورني صورته وشفته
أول ما طلع زوجي للبيت انتهت الزياره
وانادي النيرس قلت جيبي العربيه وديني الحضانه
ورحت شفت ولدي
كان صغير مره
لونه أسود مره
مايتحرك
رمش بعيونه مرتين
وحرك رجله مره
وبس
جلست عنده أقرا عليه حوالي ساعه الا ربع
رجعت غرفتي ونمت تقريبا كانت الساعه 11 بالليل
قمت مفزوعه الساعه 2ونص جاني شي مدري وشو
رحت لبست عباتي ومشيت بنفسي لين الحضانه
يوم دخلت القسم صدقوني قعدت اسرع من خطواتي
لين وصلت الغرفه حقت العنايه الفائقه
رحت لقزازة ولدي
فاضيه
سكت ماتحركت الممرضات جو عندي حوالي 4
قلت وين البيبي
قالوا لي مات
طبعا مهما اوصف لكم موقفي ماراح تتخيلونه
صدق اني أدري انه بيموت من قبل أولده
وعارفه انه لو بيعيش بيكون تعبان
لأنه مافيه كلى نهائيا
بس صحت صياح ....الممرضات صاحوا معاي
حسيت كل فترة حملي مرت بين عيوني بلحظه
تذكرت حركته ببطني
تذكرت تعبي من أول شهر
فرحتي بالحمل اللي جا بعد سنه من زواجي
كنت أقول شكله ولد لأنه شقي
ماكنت عارفه انه ولد الا يوم ولدته
الحمدلله يارب اللهم اجرني في مصيبتي واخلفني خيرا منها
سوينا تحاليل لي ولزوجي وللبيبي وراح تطلع النتايج نهاية الأسبوع
وبعرف وش السبب
أنا كنت أشرب مضاد وأنا ما أدري أني حامل احتمال منه السبب...
دعواتكم الحين باقي لي اسبوعين واخلص نفاس
الحمدلله نفسيتي طيبه وأموري زينه
والله يحفظ أمي اللي تتعب عشاني
الله يرزقني برها....
اختصرت لكم الكثير عشان ما أطفشكم
لحد يتشرط ويقول أبي بنت والا أبي ولد<< أنا كنت أبي بنت
بس خلاص توبه أقول أبي بنت أهم شي الله يرزقني بالطفل السليم المعافى يارب
اللي يجي من الله حياه الله..
المهم الصحه والعافيه...
والحمدلله عندي بنت أخت توسع صدري
مع أنها ماتحبني :boom:
ولدت بمستشفى العسكري بالرياض
الحمدلله ربي سخرلي دكتورات وممرضات طيبات
الدكتورات السعوديات قمه بالرحمه والطيب عسى ربي يوفقهم
وكنت بغرفه لحالي
وعنايتهم زينه
بس اللي معهم بيبي يجلس مع أمه ماياخذونه الممرضات
وهذا شي ماحبيته فيهم
فرح 99 @frh_99
عضوة نشيطة
يلزم عليك تسجيل الدخول أولًا لكتابة تعليق.
يااارب يجبر قلبك ويعوضك عاجلا غير آجل وتخرجين من نفاسك على خير وعافيه و يزرقك الذريه الصالحهيااارب يجبر قلبك ويعوضك عاجلا غير آجل وتخرجين من نفاسك على خير وعافيه و يزرقك الذريه الصالحه
الصفحة الأخيرة
وتخرجين من نفاسك على خير وعافيه و يزرقك الذريه الصالحه