السلام عليكم صباحكم الله بالخير وكل عام وانتم بخير
من يوم ماحملت اقرأ قصص الولاده وخاطري اجرب وأقول متى يجي اليوم اللي اكتب قصة ولادتي من الحماس والحمدلله ربي حقق حلمي ويسر حملي وولادتي اكتب قصتي الاسطوريه من بداية حملي من الصفر
بالبدايه تأخرت الدوووووره <<من زمان ماقلت هالكلمه ههههه كانت منتظمه هالمرة تأخرت علي اسبوع واحس بأعراضها وابد ماحطيت بالي حمل
وبذاك اليوم الأغبر كنت مع صديقاتي وقالن اشربي قرفه حتى تنزل الدورة والحمدلله ماجازفت بس مشيت لين تكسرت رجولي اخر شي ايأست تنزل قلت مالي الا الرقص وهاتك يارقص رقص شرقي على غربي على مصري على دبكه لين طاحت رجولي وكمان مانزلت اخر شي قلت بسلامتها متى ماجت والنفسيه ززززززفت وتعبانه من الألم وزوجي يقول تخيلي انك حاااامل حتى هو مو متخيل اكون حامل وسافرت ثلاثه ايام وبالليل رجعت لبيتي وكنت ادعي طول الطريق اكون حامل بس ماحطيت بالي يكون بالشهر هذا ومن بكرة الصباح كان عندي تحليل الحمل شريته من زمان قلت ليش ماجربه وارتاح من التفكير وفعلا استخدمته وطلعت النتيجة خطين بسرررعه بس ماستوعبت قلت أكيد خرباااان ههههه وكان وقتها زوجي فيه ماراح للعمل ونفس كلمتي أكيد خربان <<قمه التحطيم قلت جيب واحد ثاني وطلع خطين قلت بس خربطت زدت العدد المفروض ثلاث نقط حطيت خمس وهو على أعصابه قلت اشترى واحد ثالث قال خلاص تأخرت اذا جيت من الشغل وماصبر راح وجاب جهاز بعشرين وحتى الصيدلي يوم رجعله زوجي ضحك قال مبروووك المدام حامل قال زوجي ليش قاله نفس اللي صار لزوجتي واستخدمته وطلع خطين وزوجي من الحماس واقف على باب الحمام ينتظر هههه والحمدلله كانت فررررحه لاتوصف الله لايحرم المتاخرت من هاللحضه
ومرت الشهور مافيه شي يذكر ودخلت الشهور الاخيرة وانا مافارق هالقسم وكل ماقريت عنوان قصه ولاده ادخل دغري المهم بالشهر الثامن رحت لموعدي وكانت الصدمة ان راس الجنين فوق واحتمال قيصري وقالت معاك لبدايه التاسع ان ماتعدل بتولدي عمليه لانك بكريه وفرصة ان الجنين يتعدل ضعيفه بعد الله
المهم ماخليت شي ماسويته حبيت لين سويت حفرة بالغرفه << ام المبالغه والركب ياعيني يالليل سووود<< للان ادور شي يخفيها هههه ورحت لموعدي وكانت صدمه اخرى الجنين صامد رغم المظاهرات والمحاولات :06:وتوكلت على الله على أني ميت خوووف على ان كثير من اهلي عملوها أمي مرتين واختي بس كنت خايفه من التجربه قدرالله وماشاءفعل ورحت لاهلي بدايه التاسع وكانت معاي الألم فضيعه بجنوبي وضهري واروح للمستشفى ويعطوني مسكنات مامننها فايده اخر شي قلت بس ابي اووووولد القهر ان ولادتي تكون بالأسبوع الثالث من التاسع كان محددين يوم ولادتي السبت وكتبت هنا وانصحتني وحده لاتروحين بدري بيمسكونك وبتطفشين طبعا ماصدقت خبر مااطيق المستشفياات قلت فرصه اخر يوم بالحمل وورائي نفاس اربعين يوم ابسوي كل شي ابنحرم منه بالاربعين ماخليت اسكريم ماشريته ولاغازيات بأنواعها ومن مطعم لمطعم اظاهر زدت اربعه كيلو كان ودي بهاليوم اكل كل شي ممنوع
المهم رحت الساعه عشره ودخلت الطوارى على اساس والمه على طول بدخلوني لغرفتي على بالي فندق هههه قالت الممرضة وينك ماجيتي من بدري الحين مافيه دكتور تعالي بكرة:angry2: ومن بكرة من صباح الله الخير وانا مرتزه بوجهها ومن الساعه تسعه لثنتين وانا انتظر اخر شي مليت وطلعت واتغديت بمطعم وفليت أبوها كل شي طلبته كأني بمجاعه ورجعت لمستشفى وطلعت مسويه ازمه بالمستشفى كل يسأل وينك حسيت نفسي مهمه وبالنهايه حطوني بسرير للانتظار تحت وقعدت ساعتين كأنها يومين رعب صراخ الحريم واو نسيت كل التعب شوي وأتفاعل معهن وآصارخ قعدت ابكي وطلعوني فوق على العصر وكانت معاي وحده بكره عمليتها كنت مرعوبه من العمليات والله يجزاها خير طمنتني وقالت أنا سويتها قبل وماتخوف وسهرنا ومن بكرة الصباح جوها السسترات وأسمعها تبكي طاااح قلبي قلت هذي اللي امس تطمني الله يسهل عليها
وقت الزيارة جاني أكتئاب من المستشفى وطلعت مثل الحراميه وأمي ماقصرت مسويه حلى وقهوه(هالنقطه ركزو عليها ابعدووووو عن القهوة عملت فيني عمايل) وخواتي مجتمعات ووناسه يوم شفتهم سويت مناحه بالبيت بكاء وجلست للمغرب بعدها رجعت لمستشفى على أعصابي قلت أكيد مسوين نداء علي ويبحثون عن الفتاة الهاربه والله مادرو عني بس احسن شي غيرت جو وتقهويت وفليتها واهم شي بكيت خواتي ههههه وبالليل جاني الدكتورة قال بكرة عمليتك تبغي كامل او موضعي رفضت وحاول يقنعني وأنها ماتخوف وأحسن واضراراها اقل بس رفضت أنا خلقه ميته رعب وانا مبنجه ونايمه كيف لو اشوفهم يشتغلون ويقصصون:06:
صمت من الساعه 12وكل شوي جايين مرة جهاز الضغط مره تخطيط القلب مانمت زين اصلا ماجاني نوم وغفيت شويا بعدين جتني ممرضه قالت شيلي مكان العمليه وعلالساعه 11 صباح من يوم الثلاثاء 27-7 جت ممرضه سعوديه وبتحط القسطره وأي مؤلمه وانا وياها حرب كل ماحاولت تحركت وطلعت اخر شي رفضت ووقعت على مسؤليتي وقالت بيحطونها بالعمليات لبست لبس العمليه وطلعو ملابس البيبي لحظتها حسيت بااحساس غريب فرحه مع خوف وبدت ساعه الصفر لارجوع الى الامام وحطوني بالسرير وعيوني للسقف واسمع اصوات حولي كنت ادعي مادري وش مصيري وفجأة حطوني بغرفه صغيرة ونقلوني بسرير ثاني ودخلت بغرفه او بالأصح مصلخ مرعبه كبييييييرة ولونها اخضر والممرضات بكل مكان كأني بحلم وحطوني على سرير وفوقي لمبه واجهزة عن يميني ويساري والنيرس سعوديات عسل تسولف وتطمني المهم دخل دكتور هندي فجأة وانا على حالي والله عزت علي نفسي يارب رحمتك هذا وانا بوعيي شافني كيف وانا مخدرة وحولي دكاترة ومتكشفه كل شي يارب رحمتك صديت عنه وقلت للمرضه هنديه عطيني شي أغطي وجهي قالت عادي هذا دكتور التخدير هههه كأنها تقول ليش تغطين دامه بيشوفك بعدين قلت ليش مو رجال وتغطيت بمهاد بنوتي كان فوق راسي حسيت براحه وجاء فوق راسي وقال افتحي فمك يتاكدون من الأسنان اذا فيها حشوات او تركيبه وكل ماحط الكمام الاسود بعدته ماودي أنام وجتني ممرضه سعوديه وقالت هذا بنج ماراح تحسين فيه كان تعاملهم مرة حلو صبرو علي
بعد ماحط الكمام من اول شفطه وانا بعالم ثاااااني وصحيييييت بعد العمليات مباشرة <<اثار القهوه قبل لاينقلوني من سرير العمليات صحيت وصارلي موقف الله لايعيده ويسامحهن اول ماصحيت مثل الحلم بين الصحوه والنومه كانت فيه ممرضتين هنديات واسألهم وين بنتي قالن مااااااتت حسبي الله عليهن وغفيت وارجع اصحى وأقول وين بنتي فيه موت الله ياخذهن وارجع أنام واصحى مفزوعه اقولهن بنتي وييين وجت ممرضه سعوديه وقالت موجوده الحين أجيبها قلت طيب ليش يقولون ماتت قالت لاااايقصدن انك موتينا بالعمليه تعبتينا ترقعها لهن وجابت بنوتي الله يجزاها خير واول ماشفت بنتي ياحياتي تهبل كاشخه بالوردي حبيتها من قلبي وحسيت انها صدق بنتي قطعه مني وهي ياقلبي عليها تناظر لي كأنها فاهمه ومسكت يدها تدنن صغنونه يارب تحفظها بعدها ارتحت ونمممت وصحيت وانا لسى بالغرفه حطوني بمكان ثاني كله اسرة صحيت وأشوف الحريم نايمات كأنهن جثث بدون شرشف او غطاء اما أنا رايقه مع الاسف واناااااادي بااعلى صوتي علي علي <<شيعيه الاخت يسألن النيرسات مين علي اقولهن زوجي ههههه بعدين اسألهن مين عليً<< تأثير البنج فهيت وبعدين حولت سععععععود سعوود مادري من وين مخترعه الاسماء ونمت وصحيت بمكان ثاني(مادري وش الحكمه من تغير الاسرة وبنفس الغرفه) وأقول لممرضه السعوديه جيبي بنتي ابشوفها وجابت بنت ثانيه وتقول هذي بنتك شكلها تشوف أنا مصحصحه قلت لا بنتي أحلى هههه ضحكت قالت حتى هذي اهلها يبونها واسولف واضحك معاها بكامل وعي وانادي الممرضات وأخربط بالكلام وينكم ليش رحتو تعالو لاتتركوني هههه مرة تخبيص بالكلام يطلع بدون تفكير وأخر شي جت الممرضة واهاوشها ليش رحتو وتركتيني قالت عندي عمليات ثانيه ومشغوله تعذر ياحبيلها وتقولي لاتكلمين كثير بتعطشين وماحولك احد سوالف وكل اللي حولي نايمات تمنيت أني مثلهن بس اظاهرالقهوة قللت مفعول البنج وطلعوني للغرفه الظهر وبنوتي معي مارتحت وتبكي حتى قبل لاتجي امي وانا تعبااانه يالله نفسي
واول ماطلعت وحده عطتني عطر الله يرزقها الزوج الصالح بمنديل وحطت على بنتي والله دعيتلها من قلب كنت حاسبه حسابي إبليس من ملابسي الي بالشنطه معطرتها بس ظليت بلبس العمليه لبكرة بصراحه كنت ابروح فيها السسترات ريحه عطراتهم من متر تشمينها تصك الراس ومن غير المنظفات والمطهرات بالغرفه ( كانت بغرفه ثانيه وحده حامل الله يهديهاريحه عطرها قووويه وتمشي بالأسياب والحريم كلموها بس راكبه راسها وتعطر غرفتها الحريم اللي معاها مسكينات يروحن للغرف الثانيه مسكينه حصلت دعاوي وهي على وشك ولاده)
المهم صحيت الليل وامي عندي ياقلبي عليها مانامت وتحمدلي بالسلامة وجابتلي البيبي وطلبت من النيرسات يغيرون الشراشف اول يوم بالعمليه تعب وقرف وطفشت من النوم على ظهري طول اليوم حسيت اخر شي بتفكك ظهري وانتظر متى يطلع الصبح ويشيلون القسطرةالله يكرمكم واتحرك على راحتي
بالفجر جت الممرضه وفكتها وقوموني ووووووواو مؤلمه القومه ثلاثه يقوموني عجزو على أني نحيفه بس ماقدرت ويوم وقفت نزل مني دم اننفجعت على بالي نزيف من العمليه ومشيت يالله امشي كأني اول مرة بحياتي امشي بعدين عادي
جلست بالمستشفى اربع ايام اول يوم صيام على المغذي ثاني يوم سوائل ثالث يوم اكل عادي رابع يوم ابي اطلع خلاص وطلعت على مسوؤليتي
مقتطفات
ذكرت قصتي بالتفصيل لأني قبل الولاده كنت بحاجه معلومات تفصيليه ولاحصلت أجابه شافيه
الممرضات السعوديات قمه بالتعامل والاخلاق وعسولات بس بعضهن تنقصهن الخبرة ويتقرفن(وحده معاي بالغرفه متلوثه عمليتها السبب الممرضه عطتها قبل العمليه الموس وقالت شيلي مكان العمليه وراحت ولاعلمتها وين بالضبط المسكينه شالت فوق العمليه وخاطو العمليه على الشعر وتلوثت
وانا جابت ممرضه تحاميل وقالت تعرفي تحطيهن او احطها وراحت بالعقل عمليه وتعبانه وابحطها وجت فلبينيه وحطتها
الحمدلله انتهت رحله تسعه شهور على خير وابودع هالقسم وانتقل لقسم التربيه الله يعينا وجبت توته حبيبة ماما <<يالله صرت ام والله كبرتي:p
هنا وعافية @hna_oaaafy
محررة برونزية
يلزم عليك تسجيل الدخول أولًا لكتابة تعليق.
ماشاء الله تبارك الله الحمد لله على سلامتك ومبروك ماجبتي تتربى بعزك....احداثك قصه مره تفرح ومره تبكي خخخخ ياقلبي عليك ....كم سنه وانت تنتظرين الحمل انتي وزوجك؟؟؟وسبحان الله على كل اللي سويتيه وثبته الله برحمك.
خوفتيني من الولاده خصوصا اني وضعي مايسر :44:الجنين نازل بالحوض وراسه عند عنق الرحم واعطوني مثبتات بس فيه ناس خوفوني قالوا وقت الولاده تقفل الرحم وتولد قيصري:44:ياااااااربي ارحم ضعفي وقلة حيلتي.
دعواتك ان الله يثبت جنيني وافرح بشوفه لاني كنت انتظره.
خوفتيني من الولاده خصوصا اني وضعي مايسر :44:الجنين نازل بالحوض وراسه عند عنق الرحم واعطوني مثبتات بس فيه ناس خوفوني قالوا وقت الولاده تقفل الرحم وتولد قيصري:44:ياااااااربي ارحم ضعفي وقلة حيلتي.
دعواتك ان الله يثبت جنيني وافرح بشوفه لاني كنت انتظره.
الصفحة الأخيرة
الصراحه اني عشت معاك الجو بقوووووه ماشالله عليك وصف دقيييق
والممرضات الهنديات قهرووووني ليش يفاولون ع البنت مالت عليهم
ولا وصف غرفة العمليااات << فيس مرعوووب
<<< ماتت من الرععععب
الله يسهل عمليتي والله اني خااايفه بس الله يسرها
بس ماذكرتي انتي ولدتي باي مستشفى ؟؟