حبيت اكتب لكم قصة ولادتي ببنتي حبيبتي
بعد 9 اصقاطات
يعني تعتبر هي الحمل رقم 10 لي بس ربي حفظها لي الله يكفيها من كل شر
انا متزوجه من 9 سنوات
واحمل واسقط
خلال 9 سنوات حملت 9 مرات وكلهم اصقاطات مابين الشهر الثاني والرابع
يعني ماعمري فرحت بحمل او حسيت بحركة جنين
رحت المستشفى ابغى اعالج الاسقاط وسو لي تحاليل شامله واكتشفت اني حامل يعني حملت قبل لا اعالج حالة الاسقاط
حملت ببنتي وانا كنت ما ابغى الحمل وخايفه اسقط مثل الحملات السابقه وفيني خووف
بكيت وحزنت لمن عرفت اني حامل
اول شهر طنشت ماراجعت المستشفى الشهر الثاني راجعت وقالو لي فيه كيس بس بدون جنين ولا نبض
رحت البيت رجعت بعد اسبوعين وبان الجنين والنبض
رحت سحبتها الى بداية الشهر الرابع
صورت وطلع الجنين كامل ويتحرك كانت تحرك ايدينها يالبي قلبها انا فررررررررررحت بس كان فيني خووف
كنت استخدم حمض الفوليك واسبرين اطفال فقط بالشهور الاولى
اعطوني مثبتات كنت ما اخذها عشان لو وقف النبض ينزل بسهوله ما اخذ طلق صناعي
دخلت الرابع حولوني على الفيتامينات ماكنت اتقبلها وارجعها
انا وحمت الى بعد الولاده يعني وحمي كان طول فترت الحمل الحمد لله
طبعا بعد ماشفت بنتي تحرك ايديها فرحت وخفت لا تلحق السابقين
دخلت الخامس وراجعت قال الدكتور هذذي بنت فرحت مررررررررررررررره فيها
سرت احس بحركتها وبطير من الفرحه
طبعا كل شهر اراجع مره وحده
كان عندي نقص شديد بالفيتامينات لاسباب صحيه
نقص بالدم وضعف عام بالجسم
نزلت بفترت حملي 22 كيلو
المهم
دخلت التاسع وانا كلي فرحه خلاص دخلت التاسع اخيرا تحقق حلمي اني احمل ويتم الى 9 شهور
كنت اراجع عند الدكتور بالثامن ويقولي في التاسع تسيرين تراجعين كل اسبوع
رحت له الاسبوع الاول من التاسع وقالي وزن النونو 3 كيلو وفررحت
قالي الاسبوع الجاي تعالي
ولا رحت له
بعد اسبوعين يعني بالاسبوع الثالث من التاسع رحت الطوارئ الساعه 5 العصرواقلهم فيني طلق يعني اكذب عليهم هههه هبلا احسبهم مابيعرفون
وبسرعه يسحبوني بالسرير على قسم الولاده ويوم فتحو الباب اقول لزوجي يلا انتبه لنفسك وادعلي
كذبت الكذبه وصدقتها
كنت اقكر اني بولد
عقلي مررره مدري وين راح مع الحمل
وزوجي جالس برا ينظر يبشرونه
ويصور عشان لا طلعت بالسلامه يوريني الصوره مكان الانتظار يارربي خخخخ
وزوجي يعرف ان مافيني طلق ههههههههههه
دخلوني قسم الولاده طبعا كل وحده غرفه الحالها
دخلوني اول غرفه كانت فاضيه وبسرعه يجون لي 4 ممرضات 3 فلبينيات ووحده هنديه
ويقولو فيه الم اقول ايووه
ويعيدونها فيه الم اقول ايووووووووه
ويطالعون بوجهي باين اني كذابه
قالو ينزل لك مويه قلت شووي بس
وبرضو فوق روسهم علامات تعجب
طبعا الغرفه ما يحتاج اوصفها
جدران الغرفه كلها كيشاني اخضر غاامق وفيها دواليب استيل
يممه تخرع كاني في مغسلة اموات
وفيها مجلى كبيير مدري وش الحكمه منه
انا بس شفت الغرفه وجالسه اسمع وحده تصييييييييييييييييييييح بكل صوتها وتون وتدعي
مقابل المستشفى ملاهي اسمع صراخ اللي تولد من الالم وصراخ اللي بالملاهي من البسطه
ناس تصرخ الم وناس تصرخ بسطه
حسيت بخووف
حطو لي الحزام حق النبض وقياس الطلق
ويططالعون فيني وراحو الفلبينيات بقالي الهنديه
قالت لي انتي كذاب مافي طلق
قلت الا فيه الم قالت لا كذاب شوفي الطلق صفر
انا حسيت طاح وجهي
قلت الا فيه مصره
قفلت النور وتطالع فيني تقول اسمعي صوت اللي تصيح اذا انتي في طلق وولاده تسوين مثلها تصيحين
وتصك الباب عليه وتروح
تخيلو جو الغرفه مقفله النور والباب وحاطين لي جهاز التخطيط والطلق ولا تتحركين يقولون واسمع الصياح والدعاء والممرضات يهدونها
شوي حسيت جسمي كله عرق والدنيا تدور فيني والسمع بديت افقده
واصيح سستتتتتتتر واصيح اصيح اصيح
وجو بسرعه اشفيه ودخت ههههههههههههه
فوقوني رشو علي مويه وصحيت
ركبو لي ابرة مغذي وحطولي محلول
وشوي الدكتور طالع مسرع ويصرخ فيني انتي فين ماجيتي تراجعين ليه ليه كذا
خفت اقوله اش فيه يقول جيبو جهاز السونار بسرعه
انا خفت
ويسوي لي سونار ويخاصمني يقولي الجنين كان بيروح فيها انتي مهمله
وليش تخافين
انتي ماعندك طلق اصلا
قلت الجنين فيه شي قالي نبضات قلبه صارت سريعه من خوفك
وبعدين تحسف علي انه هزئني
ويمسك يدي ويجلسني قالي لا تخافين عادي بس ليه تقولين فيني طلق وانتي مافيك
انا بكيت قلت طفشت ماولدت تعبت ظهري يعورني النونو طفشني برفساته
وقومني من السرير هو بنفسه وحطني بعربيه ووداني غرفه الانتظار ماقبل الولاده مافيها الا انا
ويهديني ويجلسلي السرير
مررررره قمه في التعامل الدكتور هذا الله يوفقه
وقال جيبو لها اكل جابو لي اكل واكلت وكانت الساعه 8
وحطو لي التخطيط ونمت الى الساعه 12 هههههه فيني طلق خخخخ
صحيت 12 على الدكتور يسئل عني قلت كويسه وراح
ولسى الحرمه تصيح اللي دخلت الساعه 5 وهي تصيح
الساعه 1 ونص اسمعه يقولها يلا ادفعي وهي تدفع وتصيح وانا هنا سرت عادي تعودت على صياحها ماسرت اخاف
قال لهم جيبو الجفت
واسمع صوت مثل الحديد مثل صوت المقص مدري كيف وهي تصرخ قالها الجنين ضعفت نبضات قلبه
وقعي عمليه
وسحبوها بالسرير ونزلوها وانا ابكي عليها وخايفه وادعي لها واتخيل نفسي مثلها
الساعه 2 طلع لي الدكتور وقالي يلا بنطلعك تنويم وهدي حالك وبكره بمرك
بطلعوني تنويم الساعه 3 ونمت الى الساعه 10 صحيت على زوجي جايني
وجلسنا نسولف جانا الدكتور وقالي خروج حالتك مستقره وخرجنا العشاء
ورحت البيت وكل يوم اهلي واخواتي والناس ماولدتي ماولدتي
زوجي يدخل كل يوم من الشغل ماولدتي متى تولدين
مافيه طلق ولا شي
خلصت التاسع واروح لدكتور قالي بنعطيك مهله اسبوع لو مافيه طلق حنعطيك صناعي
واروح اورجع له قالي انتي لازم تولدي قيصريه
انا انهبلت قلت انت تقول صناعي قالي تبغين تجربين صناعي يلا
قلت لا قيصريه
والدكتور متحملني
قالي خلاص بكره يناسبك قلت لا بعد شوي قالي الى متى يعني؟؟
قلت شوي قالي لا بكره
يلا تنويم اليوم والساعه 12 تصومين
قلت طيب ابغى بنج نصفي
ضحك ويطالع في زوجي ويطالع فيني قالي انتي سمعتي صراخ اللي تطلق ودختي تبغين اشتغل ببطنك وانتي تتفرقي عليا
قلت يعني ايش قال بنج كامل
قلت لا ابغى نصفي
قالي خلاص نصفي براحتك
قلت لالا خلاص كامل ههههههه
طفش مني بس كان يتحملني
واطلع تنويم وقالي العمليه الساعه 8 ونص
واتعشاء واكلم اختي واقلها بكره عمليتي قالت عادي لا تخافين والله اسهل من الطبيعي
وجات الممرضه تبغى تدخل ابرة المغذي بيدي وانا ادوخ عليها هي وزوجي مرتين وبعد ساعه ونص من محاولات ركبت
ونمت الى الساعه 5 صحيت على الممرضات جايبين ملابس العمليه وقبوع وسروالهم الشاش وفوط وموس
قالو يلا بنشيل شعر بطنك
حسيت انهم خلاص يسحبوني بالسرير وبيدخلوني غرفة العمليات
وشالو شعر بطني
وانتظر صاحيه مره اخاف واجلس انتفض لين تصك اسناني ببعض ومره اقول عادي وشفيني انا كذا
الى الساعه 9 جو الممرضات قلت وين مانزلتوني قالو شوي
وتجي دكتوره قلت لها يلا وين العمليه قالت فيه حاله خطره ومدري ايه شوي الساعه 10 ونص ننزلك
وتجي 10 ونص مافيه مانزلت
جات 11 و12 و1 وانا طرطعت
واناديهم قالو يلا شوي
جو الساعه 1 ونص وسحبوني بسريري حق الغرفه ونزلوني قسم الولاده مو العمليات
حطوني بنفس الغرفه الي كذبت فيها اقول فيني طلق هههه
وحطو جهاز الطلق والتخطيط
ونمت الى الساعه 2 ونص وجاء الدكتور قالي ها مستعده قلت ايوه
ويمسح على راسي قالي لا تخافين
وسحبوني وغطيت راسي بالشرشف وطلعوني ويسحبوني بالسيب طبعا ما اشوف الى ارجول الناس اللي جالس فوق الكرسي والي يمشي وانا اهني لهم واقول حظهم
وشوي زوجي يناديني عند الاصنصير وافتح الشرشف ودموعي تصب يقولي لا تخافين عادي والدكتور طمني يقولي فيه 3 قبلك قيصريات وطيبين وعادي
انا ابغى اقله اسكت وش عليك ماهي في بطنك
ويركبوني الاصنصير ويدخلوني قسم العمليات
قسم العمليات وما ادراك ماقسم العمليات
المفروض يسمونه قسم الرعب والتخويف ههههههه
انا بس فتحو باب القسم طلع هوا باااااااااارد مثل الثلج وريحت البنج تفكك الراس
ويدفوني ويركنون سريري على جنب جدار ويروحون
انا هنا جلست واشوف فيه ممرضات ودكاتره يروحون ويجون
واجلس واصيحح
اقول ما ابغى ما ابغى
بطلت ما ابغى انا خايفه واصيح بصوتي كله ههههههه
لاتلوموني
ترا مو اول عمليه لي تعتبر هذي العمليه رقم 7 في حياتي
بس لاني سويت عمليه في الرحم قبل 4 سنوات كانت قمة الالم
يعني خفت تكون هذي مثلها
والممرضات يقولون مداام اش فيه كوف مافيه كوف حبيبي
وانا اقول الا انا خووف ههه
ويجون 2 دكاتره مصريين مدام اش فيك واقلهم ما ابغى خايفه طلعوني ويقولون هدي صلي على النبي
وشوي جاني الدكتور الباشا دكتوري اللي بيسوي لي العمليه
اش فيك ها ليه تسوين كذا واقوله يادكتور خايفه خلاص بطلت طلعوني
قالي استغفري واقري قران يعني ماتبغين تولدي طلق صناعي ولا طبيعي ولا قيصري حيخرج البيبي ازاي
الا انا انتفض ولوني صاير اصفر وطرررراخ دخت
صحيت على كثير دكاتره حولي ويسئلوني هاه كيف اقولهم احسن شوي
حطو لي مغذي وشوي احس جسمي يطير واحس عيوني تغمض وتفتح
ويجي دكتوري ويقرا علي ويهديني ويمسح على راسي
سحبوني على غرفة العمليات
يمممممممه
كاني اول مره ادخلها
وفيه كثييير دكاتره
دكتور الباطنيه ودكتور اطفال و2 دكتور للنساء ووحده دكتوره لنساء و2 دكاتره بنج
وكلهم يعرفوني بنفسهم وخايفين علي
لان حالتي شوي معقده لان عندي عمليه قص الامعاء خايفين لو فتحو بطني
وفتحو لي قران بغرفة العمليات من كثر الخوف
ويجي دكتور البنج الاول ويمسك كمام اسود كبيير وريحت يده برتقال شكله كان يتفكه بعد الغداء هههههه
وانا اصيح ما اقدر انسدح على ظهري ابغى انط من السرير من الالم اللي بظهري وهم مسدحيني ويتكلمون يعملهم الدكتور بحالتي
اخر شي ربطو رجولي وايديه
قالي عندك تقاير بحالت وانا اقول جلسوني ما اقدر انسدح
وشوي قالي دكتور البنج يلا اشفطني اكسجين هذا كويس عشان البيبي
وانا عارفه انه بنج
ويقول لدكتور اللي بجنبي اليمين اديها 5 مل
شكله البنج
جاب ابره كبيره ويضغطها بابرة المغذي واحس يدي بدت تنمل ويوصل التنمل راسي والدكتور الثاني يقولي اشفطي واشفط وغمضت وانا اسمعهم اسمعه يقول لدكتور يلا شوف شغلك دي نامت
بعدها ماحسيت الا وهم يصحوني ويضربوني على خدي بشويش ويقولي دكتور البنج الحمد لله على السلامه
مبررروك جبتي بنت امووره
وانا فرحاانه
وسحبو شي من فمي ونقلني على سريري اللي نزلوني فيه وودوني غرفة الافاقه
وكل شوي اصحا ابغى افتح ما اقدر وانام
احس بحراره في بطني
شي مايذكر
واحرك ارجولي
وارفع ظهري شوي ماقدرت
جات الممرضه وتمسح عيوني بقطن مببل بمويه لان حاطين فيها مثل الفازلين مادري ليش
واسئلهم عن النونو يقولون كويس كويس
شوي تجي تشيك على
وتكتب بورق معاها
وشوي جاني دكتوري والحمد لله على السلامه مبروك جبتي بنت امووره
جاني دكتور البنج يقولي انتي اردنيه اقوله لا قالي جبتي بنوته امووره
واقلهم دخلو زوجي ابغاه
وجو 2 ممرضات قالو لي ارفعي ظهرك اقول ما اقدر قالو لا تقدرين
وارفعه لاني اقدر عادي فيه الم بسييط
وغيرو المفرش اللي تحتي
شوي زوجي دخل ويبوسني على راسي ويقولي الحمد لله على السلامه ومبررروك جبتي بنت قمووره
وانا قلت له مبررروك عليك
واسئله اقول كويسه مافيها شي
قال كويسه بس بالحضانه لان حالتها خاصه جايه بعد 9 اصقاطات يبغون يتطمنون عليها
وطلعوني غرفتي على العشاء
وزوجي يوريني صورة بنتنا في الجوال مصورها ياعمررري عليها
وقالي نزلت لها الملابس اللي تقولين يلبسوها
وعاد الجوال ماوقف اهلي واهل زوجي بياركون وعماني وعماتي
جاتني اختي وفرحت فيها جابت لي حلاوى وعروسه لنونو
وتحظني وانا فرحاانه واقولها الحمد لله انا طيبه ما احس بالم كثير
واقلها انزلي شوفي النونو
نزلت ورفضو يقولون بس ماما وبابا يشوفونها هذي حاله خاصه
وجات وورتني صورتها صورتها الممرضه
وراحت
جاء زوجي ويشمر اكمامه ويقولي يلا بقومك تمشين
انا هنا صعقت اقوله لااااااااااا
يقولي الا مو بكيفك
وشوي جات الممرضه اعطتني ابره مسكنه
وراحت ربع ساعه وجات اعطتني تحميله قالت عشان تقومين الحمام وتمشين وكمان تطلع الغازات
ودقائق جاء مفعول التحميله
واقول لزوجي يلا
جات الممرضه وسحبتني هي وزوجي
وجلست
وقلت وخرو انا بقوم والحالي وامشي الى الحمام
وغسلت وغيرت واطلع امشي شوي بالغرفه وارجع على السرير
واقلهم جيبو النونو يرفضون
جاء الصبح الساعه 10 ونزلت شفتها يااعمري عليها بغيت انجن
اشيلها
بستها ورجعوها الحضانه
العصر نزلت رضعتها
هذي صورتها ماشاء الله تبارك الله يوم نزلت ارضعها بالعصر
وكل ساعتين انزل اشوفها
وامشي كثيير ما انسدحت
وثالث يوم طلعت من المستشفى وكان اول يوم رمضان وسافرت لاهلي بالسياره
والحمد لله قضيت فتره النفاس عندهم وكانت من احلى ايام عمري
وهذي قصت ولادتي الجميله
والله يابنات انها سهله العمليه
بس انا خوفي من جو غرفة العمليات مرره فضيع
هذي صورة غرفتتي
وهذي صوره من شباك الغرفه
المستشفى 100 %100 خدمه ونظافه وتعامل واكلهم حلو
اللي تبغى اسم الدكتور وباي مستشفى ترسلي على الخاص
اخر شي ادعو لبنتي ان ربي يحميها ويخليها لي وحفظها من كل شر