قصة حملي و ولادتي كاملة ..

مرحبا بنات كيفكم ؟؟




هاي أول مشاركة الي بالمنتدى حبيت اكتبلكم قصة حملي ولادتي , طبعا راح أطول شوي فأعذروني ..



حملت بعد 3 أشهر من الزواج , كنت مبسوطة كتير , مضى اول 4 شهور كأنهم 4 سنين , كان اصعب شي علي وجع راسي و لوعة المعدة القوية .. المهم انتو بتعرفو انو بالرابع بينعرف جنس البيبي , و اهلي و اهل زوجي كانو نفسهم يعرفو شو اللي في بطني , لانو اول حفيد للجهتين , يعني اللي بخليهم اجداد ..



سافرنا عالاردن للترفيه.. و من هناك رحت عدكتور و كان شاطر كتير , و حكالنا انو اللي ببطني ولد ..



رحت عالمول عشان اشتري ملابس للبيبي وانا احساسي انو اللي ببطني بنت مو ولد ..
والله كل الملابس و اللفات و كل شي اشتريتو كان لونهم وردي الا لبستين ولادي بس عشان ما اظلمو ..



رجعنا من السفر و بعد شهر و شوي رحت عالدكتورة و أكدتلي أنو اللي ببطني بنت و هي مبينة 100% ..



بالشهور الوسطى كنت مرتاحة بالحمل و ما كان شي مزعجني الا الحرقة .. أما بالشهور الأخيرة فكبر بطني و بين و كنت متضايقة من راس البيبي لانو كان لفوق يعني تحت القفص الصدري ..




باخر الشهر التاسع رحت عند الدكتورة و كانت حاطة اني لازم اعمل فحص داخلي و بس عملت حكتلي مفتوح نص سانتي بعد اسبوع تعالي , طبعا انا ما كنت احس بأي ألم ..




في يوم الاحد صحيت من النوم الساعة 8 الصبح , لاني كنت متضايقة و بطني كان يألمني وجع بسيييط جدا .. و اتوقعت انو يكون من التعب لانو قبلها بيوم عزلت البيت و نظفتو بشكل كااااااامل ..




اتصلت بامي و قلتلها اني متضايقة و بطني بيوجع قالتلي يمكن الطلق , طبعا ما صدقت .. انا بعرف انو الطلق منتظم بس كان الوجع اللي يجي و يروح في بطني مو منتظم ..




المهم مضى اليوم وانا اتوجع في بطني بألم بسيط بس مو مثل اول يعني اقوى شوي و كل مرة الاحظ انو يقترب .. يعني اول مرة كل نص ساعة و مرة كل ربع ساعة مو منتظم بس بعيد عن بعض , بس بالليل صار اقرب يعني كل 10 دقايق تقريبا ,, طبعا صار الالم مرة ينتظم و مرة يتأخر هاد كان الساعة 10 بالليل .. بس اجا زوجي من برة قلتلو فصار يعد معي .. و لاحظت انو صار ينتظم يعني صار يجي عند كل 10 دقايق تقريبا ..




مرت الساعات و صارت الساعة وحدة بالليل و انا ما اكلت لقمتين عبعضهم , طبعا انا ما كنت خايفة لانو ما كان حد قايلي عن مصايب و هوايل الولادة ..



بس صارت الساعة 2 الليل قلت لزوجي يروح ينام و انا كنتت قاعدة الف و ادور العب مع بسبوستنا " قطتنا "



و عال2 و نص رحت تسبحت و سشورت شعراتي و تمكيجت مكياج خفيف و نظفت نفسي لانو صار الوجع ييجي كل 7 دقايق ..




صحيت زوجي و قلتلو طبعا كانت الساعة 4 الصبح تقريبا .. كان اذان الصبح قرب يأذن فاتصل بامه و قاللها عن الوجع فحكتلو خليها تجهز حالها و الاغراض عشان نروح عالمستشفى بعد الاذان ..




انا ما كنت اتوجع يعني كان وجع خفيييييف ما بضايق عشان هيك انا ما كنت خايفة و اصلا ما كنت متوقعة اني اولد ..




اتصلت مع اهلي قلتلهم اني بروح عالمستشفى أبوي و امي قعدو يوصو و يطمنو و انا اقولهم اني مش عارفة ليش بيوخدوني اصلا انا ما رح اولد اليوم .. وهم قالولي انهم راح يلحقوني عالمستشفى بس يطلعو اخواني الصغار عالمدرسة ..



المهم اجت حماتي , سوالي زوجي حليب مع عسل شربت شوي و ركبنا بالسيارة و رحنا عالمستشفى ..



وصلنا عالمستشفى الخاص و كانت الساعة 5 الصبح تقريبا , دخلت غرفة التعذيب عفوا قصدي غرفة الفحص , و فحصو التوسع فقالولي 2 و نص سانتي مفتوح الرحم ..




و انا مبسوطة و مو مصدقة اني بولد , سألت الممرضات متى بولد قالولي الظهر بتكوني جايبة البيبي .. المهم اجو ممرضتين والله قليل انهم يتسمو ملائكة الرحمة .. ما في اطيب منهم حكولي يلا الحين بنحطلك ابرة بالوريد بتعرفو للاحتياط مشان العملية , وانا اتدلع و اقول ما بدي بخاف و زوجي يا حرام يهدي و يدلع يلا شطورة عشاني هههه ..



ما كنت اتوجع لهاللحظة كنت بوجع خفيف جدا , مع انهم حطو الة عالبطن و شافو التخطيط انو الطلق كويس يعني مو حامي و لا هو خفيف .. جابولي روب المستشفى البسو , شفت انو مكشوف من ورا فتحججت اني بردانة فخلوني ما اخلع كل ملابسي , يعني ضليت لابسة تحت الروب بلوزة طويلة شوي عالاقل مغطية المناطق من ورا ههههه ..



بعدها عطتني الدكتورة حقنة شرجية , لما شفت الابرة خفت بس هي طمتني و طبعا ما حسيت فيها .. و بعدها رحت عالحمام و اصلا انا مو ماكلة من قبل يوم يعني عالفاضي بس شي خفيف " اكرمكم الله " ..



و اجت الممرضتين و قالولي انو مناوبتهم خلصت و لازم يروحو و الله لا يوريكم مين اجو بدالهم ممرضتين الله يسامحهم بتقدرو تحطوهم مدربات تعذيب نفسي ..



طبعا بتتسائلو كيف يعني ممرضات و مش كويسات فأنا بقولكم كيف , اولا لا ابتسامة و لا رأفة و لا تعاطف و لا شي حلو ..



المهم اجت اول وحدة و شافتلي التوسع والله حسيت ايدها بتخزقني وجعتني كتير و قالتلي ما نزلت مية الراس فأنا قلتلها لا فراحت و جابت شي طويل و رفييع مثل غلظ القلم بس طويل و قالتلي يلا افتحي رجولك ..

انا خفت و صرت اقولها ما بدي شو بدك تعملي راحت صرخت علي و قالت افتحييي مش راح تموتي ,
اول ما دخلتها و طلعتها نزل علي الماي و كانت الماي قليلة مو مثل ما بعرف انها كثيرة بس ما كنت حاسة بوجع لحد الحين ..

انا كنت اضل اقوم اروح برة عند زوجي هههههه و اقولو خلاص روحني زهقت .. اجت الممرضة التانية شافتني طار مخها قالتلي ليش قايمة و الها نفس تقاتل ,, ولما رجعت قالتلي يلا بحطلك المغذي بالابرة بتوصلهم يعني , انا من الخوف كل ما تيجي بقوللها بروح عالحمام و اصلا انا ما كنت بروح بس عشان اهرب منها هههه واخر شي حطتلي المغذي .. و طبعا الرحم فاتح 4 و مش حاسة بوجع قوي يعني وجع عااادي خفيف متل وجع الدورة يعني ...

اجت الممرضة و شافتني و قالت بعطيكي دوا عشان تولدي بسرعة ,, كانت الساعة 7 الصبح .. انا وافقت و دقتني الابرة و انا مش عارفة انو هاد هو الطلق الصناعي اللي كنت بموت من وجعو ....

ما مر 5 دقايق الا الوجع صار متل الموت و الله اني شفت الموت بعيوني و انا اتوجع اتحرك عالسرير من كتر الوجع و بس تشوفني الممرضة تيجي تصرخ و تقولي انتي مو صغيرة شو بتسوي اتسطحي ,, ولله انا ما كنت قادرة ابكي من الوجع بس انادي عأمي اللي ما وصلت و عزوجي اللي كان بغرفة الانتظار .. :icon33:

كانت حماتي معي تقرأ ايات و انا ابعدها و اقولها من الوجع ابعدي عني ما تقرأي ,, كان الشباك مسكر كنت حاسة اني بنخنق قلت للممرضة لما اجت افتحي الشباك و الله مو قادرة اتنفس .. عملت حالها ما سمعتني و راحت .. و انا كنت عطشانة كمان كنت اتمنى نقطة ماي تبل ريقي بس لا حياة لمن ينادي ..:angry2:

بس قوي الوجع صرت اصرخ و اقول خلااااص ما بدي اولد روحوني خلااااص ما بدي البيبي ,,, والله مهما اقول و اشرح مش راح اقدر اوصل القليل من الوجع اللي حسيتو بعد اكم دقيقة حسيت انو بدأ الراس ينزل ,, فأجت الممرضة و قالتلي يلا قومي عغرفة التوليد مشي و انا مو قادرة امشي من الوجع فصرخت علي بصوت عالي وانا من الخوف قمت امشي للغرفة وانا ميتة من الوجع ...

وصلت دكتورتي عالغرفة و ما قدرت انام عالسرير من كتر الوجع والدكتتورة تهدي في و تحاول تساعدني.. المهم من الوجع المغذي طلع من ايدي اكتر من مرة و بردو يرجعو و من السرعة حطوه غلط و انا اتعذب و حكتلي الدكتورة يلا البيبي بموت اذا ما ساعدتيني ,,, طبعا دخل زوجي معي عغرفة الولادة ووقف عند راسي و مسك ايدي و انا مو قادرة ادفع من كتر الوجع ,,,وزوجي الله يخليلي اياه يمسكني و يحاول يهديني وهو الدمعة مبينة بعينو ... و بعد خمس دقايق من الوجع ما قدرت ادفع فجابت الدكتورة مخدر و دقتني و جرحتني جرح كبير عشان تطلع البيبي..

و بعد نصساعة تقريبا من المعاناة بغرفة الولادة و بعد ما جرحتني الدكتورة تزلت بنتي تعبااااااانة و جسمها ازررق بعدها سمعت واااااااء واااااااء ,,,,
انا كنت بنام من الراحة بس الدكتورة قالت لا لسة باقي الخلاصة يعني المشيمة طبعا ما دفعت ولا شي من التعب ,, بس هي طلعتها بطريقتها ,,,
و اخدو بنتي عطول حطوها بالحضانة و الدكتورة خيطتلي الجرح كنت ميتة من الوجع والله اني حاسة بالخيوط بس متحملة ..

لما طلعوني شفت امي و ابوي و حماتي ينتظروني طبعا طلعوني عكرسي متحرك ,, لحد الغرفة و تسطحت عالتخت و كانت الساعة 9 الصبح .....:11retcher

طبعا جابو بنتي بعد ساعة تقريبا و كانت جعانة بس انا ما كنت بوعيي من التعب فما رضعتها و كنت تعبانة لدرجة اني ما شفتها لحتى الساعة صارت 4 العصر ..

المهم جبت بنت سميتها حـــلا ...:04:

ما قدرت ارضعها 4 ايام من كتر التعب و بعدها نشف الحليب و ما رضعتها بالمرة مني ,,,,,
بالنسبة لدورة النفاس اجتني بس اسبوع ,, و بعدها قليييييييل جدا لحد اسبوعين بس ...
الخيوط ضلت علي لحتى اليوم الاربعين رحت شلت اخر قطبة و حطيت لولب .....

و توتة توتة خلصت الحتوتة ...
و اسفة عالاطالة