احلى قيرل ! @ahl_kyrl_1
عضوة نشيطة
قصة زواجي وطلاقي وهمي وحزني والامي وصدمتي اللي الى هاللحظه مافقت منها ..
السلام عليكم ورحمة الله وبركاته ..
بنات انا اليوم متضايقه وودي افضفض واسولف واحكي لكل الناس قصة طلاقي
لاني كاتمتها بصدري ولايدري عنها(( تفاصيلها)) حتى اقاربي واللي حولي ..
ماعدى المقربين ..(( اهله واهلي )).. والباقي يدرون انه طلقني بسبب عدم قبوله لي بعد 3 سنين زواج
ياليت تتسع صدوركم لقصتي اللي فاضيه تقراها كلها وتقولي بكل صراحه رايها وردها
واللي مشغوله وماعندها وقت تحاول تقراها وقت ثاني عشان تعرف سالفتي كلها وتقولي وش رايها
لاني بحكي كل شي من البدايه للنهايه ..
وابيكم تعيشون الجو وكنكم حولي وجنبي ..
انا كنت احب ولد خالتي من ايام الطفوله حب بريء على حب حقيقي وصادق
كنت احبه حب صادق رغم طفولتي وصغر سني وكنت اكبر ويكبر معي هالحب
وكنت استحي منه حيا مو طبيعي .. غير عن اخوانه وعن باقي عيال اقاربنا ..
وكبرت وكل اقاربنا صاروا يدرون ويعلقون علي دايم .. راح نايف .. وجا نايف ..
وسوا نايف .. ودرا بعد فتره من كلام الناس وتعليقاتهم اني احبه ..........
المهم بعد فتره كبرنا وتغطيت عنه وصرت اسمع تعليقات من بعيد لبعيد
انه يمدح فيني ويعلق ويقول مالك يانايف الا ساره ( اللي هي اناااا:() >>>>> يتكلم عن نفسه
قدام امه وخواته وصارت خالتي تعلق دايم وتقول خلاص اجل بنخطب لك اياهاوهو يضحك عادي
وللمعلوميه كان من شباب هاليومين لاصلاة بوقتها ويعشق الاغاني ويعزف عود بس للامانه ماكان راعي
بنات ولاسفريات نهاااااااااااااااااائيا
وفجأْه صار يصلي وكسر العووود:oوقصر الثوب واعفا اللحيه والتزم بشكل حقيقي وصاادق
وتقدم لي وكنت بأْولى ثانوي (( وقبل لايتقدم سأْل امه قال شوفوا اذا هي موافقه علي لاني التزمت واخاف انها غيرت فيني رايها)
وقلت ابيه ولاغيرت رايي ولاشي ..
وشبكوني له سنه كااااااامله وتملكت وباقي على اختبارات ثاني ثانوي النهائيه 3 اياااام
وزواجي في اول الاجازه الصيفيه ..
واهداني جوال ورقم باسمه في يوم ملكتنا وكلمني بعدها بيوم
وكان واضح انه اول مره يكلم بنت ومايدري وش يقول
بس كان محترم وهادي ومؤدب الله يذكره بالخير
وكل صباح يكلمني يتطمن ويشوف انا ذاكرت زين والا لا وكان يقولي عن الادعيه ويعلمني اياها
وفي الليله نفسها يتطمن انا جاوبت او لا
واستمرينا على هالحال الين جا يوم زواجي ومر سرييييع لاانزفيت ولاشي جتني الكوفيره وزينتني
وجلست ودخلوا يسلمون اقااااربنا ومو كلهم بعد وبعض صديقاتي ماشفتهم حتى لانه شوي وقالوا نايف بيدخل
ودخل وحط يده على راسي وقال اللهم اعطني من خيرها واكفني شرها>>>>> يطبق السنه الله يذكره بالخير
ومرت ايامن حلوه حلوه حلوه ماشاء الله تبارك الله كنت مرتاحه وحتى هو كنت احسه مرتاح سافرنا لمدن المملكه وانبسطنا وقتها كثيير
ورجعنا بعد 3 اسابيع من زواجنا للرياض ولشقتنا ..
بس كنت مااعرف كثير في المسؤوليه >>> جاهل بكل ماتحمله الكلمه من معنى
يعني اجمع المواعين واغسلها ثالث يوم .. مااطبخ كثير .. وزي كذا يعني
مهنا زود في البيت بس البس واكشخ واجلس احتريه لاني اشتاق له لين طلع لدوامه وافقده كثير في الشقه
لاني للاسف مافهمت المعنى الحقيقي للزواج ((((( في البدايه ))))))
وخلصت الاجازه الصيفيه وبدت الدراسه وطبعا كنت ادرس اخر سنه ثالث ثانوي
وسجلت في مدرسة اخته وصديقة عمري ..
ودرست اسبوعين وبدت علي علامات الوحاااااااااااااااااااام
وبغيت اموت في البدايه وتركت المدرسه وحولت منازل ومن هنا بدت المشاكل الحقيقيه
بيني وبينه
كنت بس ابي اناااااااااااااااااام شي مو طبيعي وربي احس اني دااايخه واب انام وبس
طول اليوم ناااااايمه في الشهور الاولى
وبديت اتحسن شوي في الاشهر الوسطى وبديت ارتب في بيتي الى حد ما واكنس وادخن البيت واطبخ بين فتره
وفتره ..
بس للاسف دخلنا في مشاكل ثانيه وهي من ناحية التزامه وعدم التزامي
يبيني البس قفازات وضيق ممنوع ويبيني اقوم الليل معه ويبيني مااتكلم في المحلات
ولااقول بكم هذا ولاافتح فمي بكلمه .. ولايبي رجليني تطلع
مع اني كنت البس عباية راس ولاالبس بناطيل الااذا كانت البلوزه طويله تحت الركبه
عقدني في البدايه واتعبني معه
مره اوافق
ومره ارفض لاني احس لبسي مافيه اي شي ولله الحمد
ويتهمني اني عااااصيه ولااسمع الكلام
ومرت الايام على هالحال يوم نصفى ونصير عسل ويوم انواع الطقااااااااااق والهواااااااش
وولدت بالسلاااااامه وجبت بنوتي الاولى والاخيره منه
وطلعت من النفاس ورجعنا وصارت بينا مشكله كبيره ورفعت صوتي وانا اصيح واصارخ وهو مطنش مايرد (( ليته كان يرد ليته كان يقول شي )) لانه باسلوبه هذا يهبل فيني ويقهرني ويزيدني
جتني ايام صرت فيها اشبه بالمجنونه مسؤولية بيت وزوج وطفله رضيعه وحبوب منع حمل
جابت لي الجنون اهلكتني اتعبت نفسيتي في البدايه
صرت مااتحمل شي وهو ماقدر هالشي او يجهل الله واعلم
ورسبت في الثانويه العامه وانا رايحه اختبر الاختبارت النهائيه حقت الفصل الثاني وانا نفاااااااس
بجروحي وخيوطي يعني كنت امر بضغوط مايعلمها الا الله
المهم بعد هالمشكله رحت لاهلي وجا وعلمهم كل شي عني واني ماكنت اغسل ومايلقا كاس نظيف ومايلقى
ملابس نظيفه وانه وانه وانه وخلوها عندكم تتعلم شهرين ثلاثه:22:
ورجعت له بعد شهرين وكنت في هالفتره اتصل مايرد وارسل مايرد
ورجعت حياتنا تتحسن شوي شوي بس المشاكل مستمره للاسف بسبب التزااامه
وعدم التزامي ومع هذا كنت احاول ارضيه عبايتي هو اللي ينزل يفصلها لي
لبسي في اغلب الاحيان اشاوره
بس برضو ماكفاه كان يبيني دااااااعيه في يوم وليله
وكان دوامه مزعج جدا لانه كان يقعد بالساعات يقول لازم احلل راتبي
وكنت اقوله ميخالف بس حط لي شي يسليني مثل النت خلني اتعرف على الجيرااااااان
اي شي .. وركب لي اسبوعين وشاله بعد ماشاف فيه اغنيتين محفوظه في الجهاز انحفظت تلقائيا بعد ماسمعتها:(فصل السلك حق المودم وطلعه برا البيت ولاعاد جابه ابد
وراااااااااافض يقول مااحب ادخل النت في بيتي يقول سبحان الله مستحيل ارتاح وفي بيتي نت
ولااحبك تختلطين كثير بالجيران وشوله
وجا ذاك اليوم وصارت مشكله كبيره ورفعت صوتي وهزأْته وعصبت لاني كنت ابكي بحرقه وضيقة صدر وهو يضحك بنته ويلعبهاواناكنت بطبعي حنونه وطيبه ومرحه ووسيعة صدر بس عصبيه
المهم قال كنت اصارخ وجلست بنتي تصيح وهو شايلها وقلت ودني اهلي وانا اصارخ واصيح
قال خلاص روحي لاهلك خلي احد يجي ياخذك وطلع هو من البيت وخلاني لحالي ودقيت على اخوي
وضفيت اغراضي وطلعت انا وبنيتي
وسمعت بعدها بكم يوم ان نايف يستخير الله في الطلااااااااااااااااااااااااااااااااااااق
وان احنا مانصلح لبعض وانه هو ماارتاح ابد وانه انا طويلة لسان
وبعدها بشهر صارت الطامه الكبرى اللي كنت خايفه منها
نايف سلم الشقه واتصل في امي وقال روحو خذو اغراااااضكم ولعل الله يحدث بعد ذلك امرا
وسلام عليكم
اااه يابنات شعور لايوصف الكل عتب علي انا الكل لامني انا
انا اللي ماريحته انا اللي مافهمته انا وانا وانا وانا استاهل اللي يصير لي
تعبت وانا اتكلم واقولهم انه كيف كان ضاغط علي وكيف كنت متحمله وساكته
ويردون هو ملتزم كان تحملتي واحكي عن الدوام وكيف اعاني من الفراغ ويقولون هذا دوامه وش يسوي يعني
خلوه ملاك وانا الجانيه الغلطانه الناس واهلي
ورحنا وجبنا اغراضي من الشقه اااااااااااااااااااااااااااااااااه كنت امشي بدون احساس ومو مستوعبه شي
بس اللي عرفه اني لجأت الى الله ودعيت بشكل مو طبيعي والحيت ان الله يرده ردا جميلا ومايطلقني
وكنت اتصل ومايرد وارسل مسجات كلها حب وشوق واذكره ببنتنا وللاسف ماكان يرد نهااااااااااائيا
وكلموه خوالي وامي انه مايستعجل ويطلق اهم شي مااايستعجل
وكان جاي في ذاك اليوم وجايب لبنته حليب وحفايظ وانتو بكرامه ..مثل كل مره وطلب انه يكلم الوالده في الملحق
وكلمها وقال انا برجعها بس اوعدوني تتغير وتسمع كلامي
وفرحت الوالده من كل قلبها لانها كانت تقدر ولد اختها وتحبه بشكل مو طبيعي ولاكانت تبينا نفترق
نهاااااااائيا تتناديني وكنت ادعي في الظلام في اخر ساعه من يوم الجمعه ودخلت علي وولعت
النور وقالت نايف يبي يقابلك واشهق واقوم اضمها وانا اصييييييييييييييييييييييييييح
وراح يصلي وجا بعد الصلاة وقابلته وتكلمنا وتكلمنا واتفقنا وعلمني انه ناوي يطلق وراح المحكمه ووراني
ورقه موعد للطلاق
وكان الموعد انه يطلقني يوم الاحد وهو جا يرجعني يوم الجمعه ..
ووعدني انه يبدا من بكره يدور شقه ونبدا حياة جديده فيها
وبدا فعلا يدور وكان بهالفتره يحلف انه مشتاق لي موووت ولازم يشوفني
ويقعد معي لحالنا وقلت ابشر قال لا ابيك تطلعين نروح ناخذ شقه مفروشه
ونقعد فيها 5 و6 ساعات .. في البدايه قلت صعبه
قدام اهلي واخواني وجدتي وخدامتنا احسها احراااااااج وفشيله قسم بالله
وفي الاخير وافقت عشان مايزعل وانا مو راضيه وربي
وكنت اطلع مرتين بالاسبوع واخلي بنتي عند امي
انواع الاحراجات اللي تعرضت لها قسم بالله اذا رجعت والنظرات من اخواني واهلي يستغربون وش هالطلعه وليش مانتقابل في البييت بس يسكتون
و مايسأْلون
وكل هذا تحملته لعيونه
ولقا شقه وأْثثها بفلوس ابوووووووووووه ورجعت وانا احمد الله اني رجعت لزوجي وبيتي وراح يلتم شملنا وبنيتنا
بديت حياة جديده معه معاملتي تحسنت اكثر من اول صرت مااقول الا سم ولبيه وقليييل مااتنرفز واعصب
كل شي سويته ابي ارضيه
قمصان نوم .. شموووع .. اكلات يحبها .. اجهز ملابسه وادخن الدولاب لانه يحب ريحة الدخون .. ونعاله الله يكرمكم وبوكه وجواله حتى مفاتيح سيارته وكل شي اجهزه قبل لايصحى للدوام ..
وبنتي ارتبها واجهزها وانظفها ..
عيوني اغطيها مع اني مااشوف كويس .. مااتكلم في المحلات .. ادلك رجوله بشكل شبه يومي لانه كانت تعوره
بسبب حادث تعرض له من زمان .. الحفه بنفسي .. انواع الروائح اللي تفتح النفس وفواحات
ماادري يابنات بس احس اني تغيرت كثير وقتها وحسيت بالمسؤوليه وبديت احب بيتي وزوجي اكثر واكثر
بس للاسف ..
حسيت ان الرجااااااااااااااال متغير ور صااااااد ومايطالعني زين ومايحب يحط عينه بعيني
بنات قسم بالله تغير
قسم بالله احط يدي على يده واقوله وش فيك ياروحي
ويدف يدي ويقول تكفين لاتلمسيني تكفيييييييييييييين
يطلع الفجر ويرجع العشاء وياحسرة قليبك يااساره
لانت ولاجيران وباب الشقه مقفل ولاثابت
اااااااااه سجن يابنات موت بطيء ووقتها ماقلت شي
مو مستوعبه بديت احس باليأْس
حد تعبت الرجال صاد ومايطالعني زين
يجي ياكل ويناااااااااااااااااااااااااااااااااااااااااام ويصحى ويطلع لصلاة الفجر ويرجع
العشاء وياكل ويناااام اقسم بالله هذا نظامه لمدة شهر تقريبا
واذا بغا شي واحتاجني بفراشه عادي يعاملني طبيعي بدون كره وبدون حب
وياخذ اللي يبي ويرجع زي اول مايطالعني زيين ولايبي يسولف معي ولاشي
سأْلته وبكيت ومت من البكا وكان يصرفني ويسكتني الين جا ذاك اليوم
ودخل وصارحني وقال انتي ياساره ماناقصك الا واحد يحبك
قلت وانت ؟؟؟؟؟؟؟؟؟
ماتحبني .؟؟؟؟؟؟
قال ماقدرت احبك ابد ابد قلت وكلامك وحبك لي بداية زواجنا وينه
قال مدري احس اني مااقدر اكمل معك :angry2:
قلت ليه تاخذ هالشقه وترجعني ليه تعشمني ليه ؟
قال احاول عشان مااظلمك
بس الظاهر اني ماقدرت احبك ابد وانو مافي بينا نصيب
رحت لغرفتي وانهرت على سجادتي وانا اصلي وادعي من كل قلبي بحرقه ان ربي يصبرني
وهو طلع من الشقه ...!!
واتصل بعدها بساعتين وقال يلا يابنت الناس خلينا نتوكل على الله وننفصل الحياة صعبه
واحنا مع بعض انا ماقدرت اسعدك ولاراح اقدر اسعدك
الى متى وانتي محشوره في كاس !!
وانا محشور في بياله !!
خلينا نطلع ونشوف الدنيا وكل واحد يشوف حياته !!!!!!!!
قلت بس ؟
قال ايه حرام يضيع عمرك وعمري عالفاضي ..
قلت خلاص صار اللي تبيه ..
قال شلون يعني
قلت انا موافقه اننا نتطلق ..
قال الله يعوضك انتي تستاهلين كل خير
وسامحيني وحلليني
قلت مسامحتك ومحللتك ولافي قلبي عليك شي
قال الله يجزاك خير ..
وقفلت
وقمت اضف اغراضي وشنطي وانا مستغربه كيف ربي نزل علي هالثبات بنات قسم بالله
مانزلت مني دمعه وقتها حسيت اني قويه وصابره
رجع وجلس عند الباب يطالعني بحزن وانا اضف اغراضي وامشي من عنده
وباس راسي وبست يده
قال سامحيني
قلت مسامحتك ..
ومشيت وهو يطالع فيني بحزن غريب يابنات وقال اهنيك على ثباتك وايمانك بالقضاء والقدر وانا اقول الحمدلله وش بيدي
وركب اغراضي ولبست عبايتي وباس راسي عند باب الشقه مره ثانيه!!
وقتها دمعت عيوني
حسيت اني في حلم .. حسيت اني مو مستوعبه شي
حسيت اني مسكينه بجد !! ورحمته بنفس الوقت ..
وطول الطريق يتكلم في بنتنا وانه راح يسوي وماراح يخليها محتاجه لشي
وانا ساكته وقبل لاانزل قال في امان الله قلت في امان الله قال وش بتقولين لاهلك
قلت بقول اننا اتفقنا على الطلاق .. وان مافي بيننا نصيب .. قال الله يعوضك قلت امين ويعوضك
ونزل معي الاغراض وباس راسي للمره الثالثه عند باب الشارع .. >>> لاحول ولاقوة الا بالله
وراااااااح ..
دخلت وكنت معطيه امي خبر ولقيت الوضع هادي واهلي كلهم دارين وساكتين ولايبون يبينون لي شي
وانا اسولف عادي وكل شوي اقول اللهم اجرني في مصيبتي واخلف لي خيرا منها ..
وبعد ثلاث ايام بالضبط
رحت لغرفتي ومسكت جوالي ولقيت 3 مكالماااااااااااااااااااااات لم يرد عليها
منه .. تخيلو ..
انهبلت قعدت اخبط براسي واطالع مره ثانيه
ياربي وش يبي وش ناوي فيني هالرجال
وارجع اتصل ويرد ..
وصوته هاادي وعادي
قلت السلام وقال وعليكم السلام
وشلونكم قلت بخير قال فاضيه قلت وش صاير وش بغيت
قال اسمعيني
انا جبت سياره كبيره عشان افضي الشقه واجيب لك باقي اغراضك واسلمها
قلت طيب وبعدين
قال وحسيت ان ودي ارجعك انتي وبنتي واني ابيك ولاودي اطلقك !!!
وانا ولاكلمه
وكمل كلامه ..
وقال بعدها حسيت اني مو طبيعي واتصلت بشيخ وقرا علي بالجوال ايات وقالي انت معيوووون غمض عيونك
وبتشوف ناس هم اللي ناظلينك وشفت ناس من ضمنهم امك واثنين من اخوانك :09:
قلت اسمع عاد
انا مالي شغل والله معيون والا لا رح كلم ناس كبار وتفاهم معهم لاني مااقدر اعطيك اي جواب الحين لاني
احس الوضع فيه ان ..
قالي بكيفك انتي حره ماراح اغصبك ترجعين تبين ترجعين ارجعي ماتبين بسلامتك بس انا
حبيت ابين لك وش حسيت فيه بس .. وبكيفك ترى !!!!!!!!!!!!!!!!!!
وكلم اخته بالموضوع وكلمتني
وشرحت لي كل شي وقالت لاتتضايقين انه قال انه شاف امك
يمكن امك من حبها لك حسدتكم غصب عنها مو بكيفها
قلت انا شاكه بكل شي وماعدت اضمنه ولااثق فيه !!!!!!!!
قالت والله ياساره هو ملتزم ويخاف الله وماراح يكذب عليك بشي والا يتبلى امك لاقدر الله !
وانتي فكري زين بالموضوع ..
وعلمت امي بس ماقلت انه يقول شفت امك لانهم حرجوني هو واخته
يقولون لاتجرحين خالتي بشي (( اللي هي امي )) اخت امهم..
وبعد فتره جاااااااااااا وكلم ابوي وقاله انا مااشوف غير ساره
والله لو يحطون الحريم قدامي مااشوف الا هي
شي غصب عني ياخالي .. انا احبها
احبها والله احبها
تخيلوا قال هالكلام لابوي ..
وكلمني مبسوووووووط قال كلمت ابوك الحمدلله الحمدلله يااارب !!
الله لايحرمني منك .. ياسوسو !!!!!!!
قالها بنبره غريبه ماعمري سمعتها
بس حسيت بصدقه وقتها مدري ليش
وجا وجاب لي 3000 ريال يقول رد لكرامتك عند الناس ولو اعطيك روحي ماتكفي
ويمسك وجهي بيده ويقول انا احبك اقسم بالله احبك احبك
وهو خانقته العبره ..
وكان معزوم نفس اليوم في بيت عمه وقالي والله ماودي اروح ودي اقعد معك
قسم بالله ماودي اوخر عنك ..
وكل شوي يمدح في عيوني ووجهي وملامحي
وحسيت انه يحبني حب مب طبيعي وقتها ..
وكنت اشوف الصدق بعيونه خصوصا انه ماعمره كذب ولايعرف يكذب
ورجعناااااااااااااااااااااااااااااا
وكلن يبااااااااااااارك ويدعي
ومن رجعت وهو يعاملني بشكل رسمي عادي يضمني وعادي ينام معي
بس بشكل رسمي
بعدها بشهر بدا يصد ولايطالع فيني وينام بالصاله ويقول ودي اموت وارتاح
ودي اروح في دبابه وتنفجر واخلص !!!!!!
ودي ادفنك انتي وبنتك في حفره
وقتها بدت الامور تستاء وبديت اقوله طلقني خلاص وهو يقول اصبري اصبري
وجا ذاك اليوم وقال يلا بس روحي غيري جو وخليني استخير وانتي استخير وانتي اطلبي الخيره المباركه
وطلعت وهي الطلعه
جلست شهر لااتصال ولاسؤال ولااي شي واتصل فيه ابوي وكان واصل حده ومعصب من تصرفاته
وتهاوش هو وياه ومرمط به وشرشحه على لعبه واستهتاره فيني وقال طليقي انا رايح المحكمه
ومطلق ومواعديني اخر الشهر بالورقه
وارسل اغراضي في كراتين وملابسي وكل شي
وابوي عصب تهاوش مع خالتي امه >>>> وللامانه مالها ذنب بطلاقنا نهااائيا بس ابوي
وقتها ماكان يشوف ..
الله يعوضه فيني خير .. ويجبر مصابه ومصابي والمسلمين اجمعين ..
وجتني الورقه
29.. 6 .. 1430
وانتهى كل شي ..
كل شي
وهو الان خاطب وزواجه بعد عيد الاضحى مباشره ..!
اللهم اجرني في مصيبتي واخلف لي خيرا منها
899
80K
يلزم عليك تسجيل الدخول أولًا لكتابة تعليق.
روح الغلا
•
الله يعوضك خير ياقلبي لاتيأسي من رحمة الرحمن وعليك بالدعاء وكثرة الاستغفار
ياااااااااااااااااااااااااربي الله يعينك ياختي
انا في البداية وانا اقرأ قصتك قلت ان انتيي السبب
بس بنهاية القصة انقلب كل شي وصار زوجك يتصرف تصرفات غريبة
الله يعوضك ياختي
ويرزقك
والله احزنتني قصتك
الله يسر امورك ويفتحهاا بوجهك
انا في البداية وانا اقرأ قصتك قلت ان انتيي السبب
بس بنهاية القصة انقلب كل شي وصار زوجك يتصرف تصرفات غريبة
الله يعوضك ياختي
ويرزقك
والله احزنتني قصتك
الله يسر امورك ويفتحهاا بوجهك
لا حول ولاقوة إلا بالله العلي العظيم
الله يصبرك اختي والله يعوضك يارب
بس لا تحزني لان الله معاج ولج اجر كبير على صبرج
الله يوفقج يارب توكلي على الله
الله يصبرك اختي والله يعوضك يارب
بس لا تحزني لان الله معاج ولج اجر كبير على صبرج
الله يوفقج يارب توكلي على الله
الصفحة الأخيرة