قصة زواجي وموت طفلي وطلاقي .. للعظه والعبره لكل المغفلات امثالي

بسم الله الرحمن الرحيم
السلام عليكم ورحمة الله وبركاته
اللهم صل وسلم على حبيبنا ونبينا محمد وعلى آله وصحبه اجمعين
انا حبيت اكتب قصتي كامله للعظه والعبره وماعندي اي مانع لنقلها انا كتبتها ابيها توصل للبنات .. لاني اعرف كثير بنات مثلي وكثير بنات انخدعوا بشباب ابي انبهكم ابي اصحيكم لان اللي صار لي ما اتمنااه لألد اعدائي
انا كنت اكلم واحد مدة طويله .. ويشهد الله اني ماعرفت غيره رجال .. صحيح كنت اسولف مع شباب لكن لعب وعلى التويتر بس وعمره ما تعدى التويتر وكنت مقتنعه ان السالفه لعب وتسليه لكن هو الوحيد منهم اللي تطورت علاقتي معاه للبيبي ومن البيبي للواتساب ومن الواتساب للمكالمات بالصوت ومن المكالمات للخروج مع بعض بالاسواق اشوفه ويشوفني من بعيد وتطور الوضع صار يجي عند بيتنا واركب معاه ونتمشى بالسياره وعمرها العلاقه ما تطورت لجنس لاكثر من سنه واحنا كذا
حبيته من قلبي عشقته وكنت احسه حتى هو يحبني كثير مواقف صدرت منه اكدت حبه لي وثقت فيه اكثر من نفسي .. عرض علي نروح انا وهو لحالنا لمكان له رفضت قال لا تخافين انتي طول هالسنوات وانتي معاي ونروح ونجي لو ابي منك شي او باخذ شي كنت اخذته من زمان .. صدقته وهو فعلا صادق كثير مواقف كان قادر يتمكن مني بس ماعمره حاول ابدا
ورحت معاه .. ماراح اكذب واخذ دور المظلومه واقول لكم انه اغتصبني لا كل شي صار برضاي وصارت بينا علاقه كامله لاول مره وابدا ما كنت خايفه منه واثقه فيه ثقه عمياء وانه بيتزوجني .. ماراح ادخل بتفاصيل تخدش الحياء .. ابوه كشف علاقتنا واجبره يتزوجني هذا كلامه هو لي بعد ما تزوجنا يقول ابوي اجبرني اتزوجك ولا انا ماني بمهبول اتزوج وحده مثلك وكلها كم شهر واطلقك مما اتحمل اشوف وجهك و و و و ... قلب 180 درجه عن قبل الزواج كان يضربني وقاسي بشكل لا يوصف فيصل ثاني غير فيصل اللي اعرفه
تزوجته بعد شهر ونص من اللي صار بينا .. كنت مستبعده فكرة الحمل نهااااااائي لان دورتي مخربطه تجيني شهر وعشره لا .. بليلة زواجنا نام معاي بطريقه عنيفه وحصل نزيف لما رحنا للمستشفى طلعت حامل واحتاج مثبتات( ايوه من ذيك المره لان هذي اول مره يلمسني بالحلال وجاني نزيف ) يشهد الله اني تبت عن كل شي حتى سماع الاغاني بطلته تبت توبه نصوح وكنت ابكي خايفه من عقاب ربي خايفه من نار جهنم خايفه من تنور الزناه كان زوجي يشك فيني ويفتش جوالي واعذره .. اقول اكيد ماراح يثق فيني كان يقولي اجهضي واكثر من مره يضربني على بطني عشان اجهض لكن ربي ثبت الطفل باول الاشهر
لما وصلت للشهر السادس ولدت ولاده مبكره .. طحت بالحمام وكان زوجي عنيف بالفراش كانه يجازيني هذي الاسباب اللي خلتني اولد بدري
جبت ولد وعاش اسبوع واحد .. بهالاسبوع زوجي جلس معاي وقالي بنفتح صفحه جديده عشان هالولد كان حنون مره علي ومبسووط بولده بس جالس يتأمله بالحضانه ويطالع فيه راح وقضى له ملابس كثيره وسماه على ابوه وهو مبسوط
مات ولدي وعمره 7 ايام بس .. زوجي دفنه وصلى عليه وجاني قالي انا بطلقك ومالك قعده عندي .. يقول اللي بينا هالولد وراح خلاص خلي كل واحد فينا يبدا حياته من جديد اما انا وانتي ما ينفع نكمل مع بعض عشان اللي صار بينا وفعلا سافر وتركني اعاني من آلامي الجسديه بسبب ولادتي المبكره وبعمليه واعاني من فقد ضناي وحاله نفسيه سيئه شعور النفاس بدون طفل صعب .. ياليته مات وهو ببطني ولا شفته ولا لمسته ولا شميت ريحته اهون من انه يموت بعد ما المسه واحضنه وافرح فيه
الحمد لله انا راضيه بقضاء ربي يمكن هذا عقابي عشان الماضي يمكن ربي راحمني وببعذبني بالدنيا ويخفف عني من عذاب الاخره انا الحين مطلقه وعند امي وابوي ومافكر بالزواج نهااائي ابي اتفرغ لعبادة ربي والعمل لاخرتي اعيش مع امي وابوي ومايعرفون بالقصه ابدا ماحد يعرف فيها غيري انا وطليقي وابوه الله يجزاه بالجنه هو للي ستر علي لو لا الله ثم هو كان طليقي رماني وانا حامل و انكشفت وكان الكل عرف اني حملت من علاقه غير شرعيه والله العالم وش كان بيحصل لامي وابوي
والله اني الى الان بكل سجده وبقيام الليل والاوقات المستجابه ادعي لابو طليقي بطول العمر على طاعة ربي وبجنه عرض السماوات والارض ما نسيت فضله ابدا
ادعوا لي ربي يغفر لي ذنبي .. واتمنى للبنات العظه والعبره من اللي صار لي انا ماكتبت الا عشانكم تكفون لا تثقون فيهم مايبون مننا غير جسم وشهوه ومستعدين يمثلون عليكم فترة طويله الحب والرومانسيه بس عشان يحصلون على غايتهم