قصة زواج زوجي ومعاناتي ودي اتطلق منه من القهر والحسرة اااه ياااقلبي / الموضوع قديم

مشتت هالايام بحلوها وبمرها خلفت خلالها طفلين اخرين

بعدها تحسن راتبه لكن مازال متمسك بهالشقة الخربة وموراضي يسكننا بشقة افضل لكني سكتت وصبرت

تمينا على هالحال تسع سنوات والسنة الماضية طلب نقله للديرة ونقلنا وسكننا ببيت ازفت من الاولاني هاجرينه اصحابه من سنتين بلعت الهم وصبرت على امل يبني لنا بيت ملك

كان يوعدني انه راح يبني اول ما يجمع المبلغ

انا قلت له انا ما ابغى فيلا او قصر انا ابغى منزل يحتوي على مطبخ كبير بدال هالمطبخ مترين في مترين تعبت منه
وابغى اربع غرف ومخزن وبس وحوش للعيال يلعبون فيه

كان يقول لي اكيد راح ابني البيت في خلال ثلاثة شهور يكون جاهز بس هيهات

لكن بالفترة الاخيرة يبدو انه فكر بالزواج بشكل فعلي وكان يروح مع اخوية من الرضاع برى البيت ويتشاورون بالخفاء علشان يتوسط له عند اخت مرته ا واهلها الين تمت الموافقة وتممو الموضوع بالخفاء وانا اضحك معاهم واطبخ لهم وازين الحلا والقهوة وانا ياغافلين لكم الله حسبي الله ونعم الوكيل ومن يومها وانا في كرب وهم وعذاب

مقتطفات من حياتي معه

*انا فيني طبع اني عصبية شوي بس اذا زعلته على طول ارجع واعتذر منه وتمشي امورنا تمام حتى يقول انتي كلك على بعضك حلوة وتعجبيني لولا العصبية اللي فيك لكن حسناتك معايه تغطي على عيوبك وتغطي على عصبيتك

*وكمان فيني طبع الغيرة الشديييييدة ركزو على كلمة شديدة يعني غيرتي تفوق الوصف مو غيرة حرمة طبيعية ابدا

اغار حتى من قريباته وهذا شي غصب عني وربي من حبي له

*كان يقول لي مستحيل احب وحدة غيرك او استبدلك بوحدة ثانية قلت له اذا حبيت انك تتزوج علي في يوم من الايام فانت بطريق وانا بطريق لابتشوف وجهي ولابتسمع صوتي وراح اطلب الطلاق

*كان احيانا اذا مروووق يقول يابنت الحلال انا ما افكر بهالامور هذا الشيطان يوسوس لك مستحيل افكر بغيرك
واذا كان زعلان يقول من حقي اتزوج وهذا شرع الله وراح ترجعين لبيتك غصبا عنك ونشوف من اللي كلامه راح يمشي

كنت اقول له اوكيه من حقك تتزوج بس انا تنسى شكلي وصوتي وراح انفصل عنك لاني ما اقدر استحمل هالشي

مو اعتراض على شرع الله

لا وربي حاشا لله بس انا كذا طبيعتي ما اقدر استحمل اني اشوفه مع غيري ابد ابدا وربي شي فوق طاقتي الى الان مو قادرة افيق من الصدمة

انا ما شوف بهالدنيا غيرك ومستحيل افكر بغيرك وانا وثقت فيه وصدقته

المهم مرت السنوات بس صار بالاونة الاخيرة يفتعل المشاكل ويركز ع العيوب فتصير خلافات اكبر من الاول بس نفس الشي ارجع اعتذر منه واستسمح منه وهكذا الى ان لاحظته يلمح بالزواج الثاني ادركت ساعتها انه خلاص نوى ع لزواج كنت ساعتها اتمنى الارض تنشق وتبلعني سألته خلاص يلابوفلان قررت الزواج بالبداية سكت وما صرح بشي وقال مو وقته تعرفين ومو شغلك

قلت له اوكيه مادام هذا قرارك فروح الله يسهل عليك ويسهل علي وانت بطريق وانا بطريق لاني ماراح استحمل هالشي

واخذت ملابسي ورحت بيت اهلي وكان عندي امل انه مو حقيقي هالاحساس وانه مجرد شك لكن للاسف طلع ناوي بحق وحقيق ع الزواج
يا بنات انا الحين من يوم زواجه وانا ببيت اهلي ما رضيت اكلمه او اشوفه من القهر والتعب النفسي والمر والحسرة اللي اعانيها

الحين انا ما اكلمه ولا اخرج له بس بيننا رسايل بالجوال كلها مشاحنات هو يبيني ارجع لبيتي ويوم عندي ويوم عندها

وانا رافضة تماما اني ارجع لاني مستحييييل اقدر اصبر هذا شي فووووق طاقتي وقلت له مادام انك تزوجت اجل خلاص اغسل ايدك من رجوعي

بنات ابغاه يطلقني وهو رافض يقول بترجعين بيتك اهلا وسهلا

ما تبغين طلاق ماني مطلق اجلسي ببيت اهلك لين تشبعين ويقول انه مبسوط مع زوجته ولافكر فيني ااااه يالقهر وربي احسه غبني بهالزواج صح انه شرع الله بس يوم شافني صابرة معه وانسانة غيورة واني راح اطلب الطلاق في حين زواجه ليه ماراعى مشاعري ليه ما صبر عليه مثل ما انا صابرة معاه مضحية بعمري وكل شي علشانه لييييه ياناس انا بموووت من القهر والحسرة

بنات ارجوكم تدعون لي بالصبر وان ربي يعوضني خير ارجوكم انا خلاااااص احس نفسي بانهاااار خلاص

احس اني قد قريت قصتك انتي كتبتيها هنا والا في منتدى ثاني

المهم ادعي ربي انه يجعل زواجه برد وسلام وتقربي من ربي اكثر صدقيني بتحسي براحه وطالبيه بالعدل ولاتسكتي عن حقوقك


الله يفرجها عليك ويرده لك ردا جميلا..

الله يصلح الحال ويعينك ويصبرك هذا مكتوب عليك

الله يعينك
لاكن لاتتهورين وتطلبين الطلاق فكري بعيالك
ونصيحه فكري ترجعين بشروطك وشروط تعوضك عن الماضي يعني اشرطي بيت جديد غير البيت الي تقولين يجيب الهم ويرجع لك ذهبك يعني يعوضك عن الي حرمك منه
والله يصبرك ويسخره لك
اذا مارضي يطلقك فهذا دليل انه يحبك لاكن في احد لعب براسه عشان يتزوج

حبيبتي همس النسيم
ايوة كتبتها بمملكة بلقيس وحبيت اكتبها هنا علشان اشوف المزيد من الحلول

لاني وربي مو قادرة ارجع له وهو معاه غيري وحتى علشان اولادي هالامر متعبني كثيييير

موقاااادرة هذا شي فوووق طاقتي وربي