قصة سبع سنين من عمري💔

الأسرة والمجتمع

حسيت ان حياتي فيها قصه قلت اكتبها لكم يمكن يكون منها فايده لأي وحده منكم مع ترددي طبعا علشان ردات الفعل لبعض العضوات لكن من منا لا يخطيء
وخير الخطائين التوابين
نبدأ بسم الله
بعد تخرجي من الجامعه كنت دايم جالسه قدام التلفزيون لان وقت الفراغ كبير وماعندي شي اسويه وكنت مدمنه على قنوات الأغاني وانا اقلب بين المحطات لقيت محطه كانت جديده وجلست أتفرج كان بطرف الشاشة تجي حروف متفرقه استغربت وجلست أحلل هال حروف وهي رسايل من الناس يرسلونها للمحطه
مسكت الجوال قلت يمكن تكون ارقام واضغط الحرف يطلع لي الرقم وبكذا طلع لي رقم جوال مع ان الشاشة سريعه لكن قدرت القط الرقم لان حروفه متشابهه
دقيت لقيته رن خفت وقفلت قام نفس الرقم دق علي هو يدق وانا أقفل ويدق واقفل كذا مره اخر شي قلت بس بسمع الصوت الا وطلع رجال واقفل ويدق وارجع افتح واسمع اخر شي قالي لا تتكلمين بس اسمعي وجلس يتكلم ويسولف وانا اسمع واضحك وانبسطت لقيت لي شي يسليني!!
اخر شي تكلمت وكان الكلام يالله يطلع بس تجرأت وتكلمت وكنت اول مره أكلم شخص غريب !!
كان الشخص هذا شخص مميز صوته كان جميل جداً وأسلوبه لقيت نفسي فجاه ابي أكلمه وانتظر اتصاله واخلص كل اشغالي واتفرغ وكان يدق كل يوم وبنفس الوقت أهملت التلفزيون وكل شي وصار هو بس شغلي الشاغل وقالي ترا انا مزيون وعندي غمازات بعد وإذا تبين أرسلك صورتي وأرسلها انهبلت عليه اكثثثثررر
قالي يوم قابليني وجلس يقنع فيني وانا متردده اخر شي وافقت وقلت له بس نص ساعه وكذا بعد ما قابلته حسيت اني سويت شي غلط وظميري كان يانبني وخايفه بعدها بكم يوم قلت لازم أكلمه وأقوله اني خلاص مراح استمر معاه وأرسلت له وقلتله ودق وكان مستغرب وليش بس انا كنت مصره قالي خلاااص دربك خضر
ارتحت شوي حسيت هم وانزاح وقفلت بعدها تلفوني وكنت أفتحه قبل انام وألقى انه دق بس ماكنت أرد ولقيته يرسل رسائل حب وغزل وكنت متردده وأفكر ارجع أكلمه!!
انا قبلها من اول دخولي للجامعه كنت احس بالم في جسمي وكان متعبني ومآثر علي بس كنت أطنشه لآني مالقيت له علاج بالمستشفى بس مرات كنت انهار وافقد صبري واجلس ابكي وارجع اطنش وكنت على هالحاااال
لين شفت حلم غريب عجيب من غرابته رحت اسال وأدور له تفسير الين عرفت تفسيره اني مصابه بمرض روحي وبديت ابحث في العين والمس وأعراضها ولقيت شيخ عطاني مويه وزيت وقالي أقرئ البقره وبدأت اعراض تظهر لي كنت لما أدهن جسمي وأنام احس رجلي تتحرك لا إراديا وقلت خلاص انا فيني مس
ومره صحيت من النوم وكانياسمع شخص يصرخ بداخلي وكأنه يتعذب ولما فتحت عيوني سكتت !!
وكنت مرعوبه جداً ماني متخيله ان فيه شيطان بجسمي وطبعا صاحبي كان يدق وانا اطنش انا بايش وهو بايش اخر شي أرسلت له قلت انا تعبانه واتعالج من حسد وترا هذي اخر رساله مني لآني بكسر الشريحة !! قام ارسلي احبك احبك احبك احبك قريت الرسالهوطلعت الشريحة كسرتها ورميتها وانقطعت أخباره
وجلست مداومه ًع الرقيه والبقرة وزيت ومويه ومحو بس كل همي الجني يطلع ومدري هو طلع والا لا بس الم جسمي مستمر وطولت يمكن تسع شهور وانا اتعالج لين طفشت طبعا كان في بالي اني ماخفيت لآني كنت لما اسمع البقره احس ودي ابكي وكذا وفقدت العزيمة ورجعت اطنش وكان طيف صاحبي يزورني من يوم للثاني وكنت احس بحنين له وأتذكر تفاصيل وجهه وحسيت اني مره احبه وكيف تركته وجلست ألوم في نفسي والمحرك طبعا هو دافع الحب
شريت رقم وقمت ارسله رسائل شوق ويدق ولا أرد وكان ودي أرد بس لآني تركته وكسرت شريحتي احس مالي وجه ويمكن زعلان مني ويمكن يفشلني ويقول ماعاد ابيك وجلست يمكن سنه ونص من تركته وانا لسى في بالي وخياله مايفارقني لدرجة اني كنت ابكي عليه دايم واحس اني ضيعته من يدي!!
وعزمت قراري اني أكلمه خلاص قلت لمتى لا اني نسيته ولا رجعت أكلمه ان رجع كان بها وإذا مارجع خلاص وقتها بفقد الأمل وانساااه!!
ودقيت عليه اخيرا وكلمته وعرفني علطول سألني عن اخباري وقالي سنه ونص !!وحاسبها بالشهر قالي اني تركتيني الشهر الفلاني وقام يعد الشهور قلت اني كنت باكلم من زمان بس ترددت وخفت قالي الشريحة كسرتيها والا لا؟ قلت لا قال الا كسرتيها وكان بأسلوبه عتتتتب وسكتت
فجاه غير نبرته وقام يسولف وكذا وانا فرحت مره حسيته سامحني وقالي او عديني ماتتركيني أبد مهما صار وقلتله اوعدك
<<مصدقه حالي الأيام اللي بعدها كنت مبسوطة ونفسيتي تحسنت مره كنت أتذكر الجني واتنكد شوي وارجع اطنش قلت اهم شي حبيبي رجع لي وطزز بالباقي وقابلته مرتين المره الاخيره حسيت فيه شي متغير حتى انه باسني على جبيني ومشى اليوم الثاني انتظر اتصال ماتصل أرسل مايرد صرت انا اللي ادق وهو مايرد وجلست فتره مادق طبعا من تطنيشه لي وعدم رده تأكدت انه خلاص يبي يتركني وهنا كانت الصدمه!! وأرسلت مسجات عتاب انه ليش يرجع لي وهو يبي يتركني. ومارد بعد ولا برر موقفه لو بكلمه!! وواكتئبت حتى ان سالفه المس رجعت تسيطر على تفكيري كنت احس بضيقه وحزن الكل كان يسألني وشفيك وما مر فتره بسيطه الا وانخطبت شفت العريس ما عجبني ولا كنت ابيه بس شفت اهلي متحمسين مره ووافقت علشان أفرحهم وقلت يمكن احب زوجي وأنسى هالشخص وتزوجت زوجي كان طيب وكريم بس ماقدرت احبه وما فرحت بزواجي مثل باقي البنات كنت منكسره من جوا وحزينه من اللي صار ومهمومه مشغلتني سالفه المس وهو كان شخص عملي كل تفكيره شغله والبزنس والسفر جبت بنتي الاولى ورغم انشغالي فيها وكذا بس مانسيت اللي احبه وكنت ادق على رقمه بس اسمع صوته واقفل من غير مايعرف من انا وكل فتره ادق ومرت حول السنتين تقريبا وانا زي ما انا لا حبيت زوجي ولا نسيت حبيبيولما اجلس مع الناس اقول لو يدرون ان فيني مس كان ماحد جلس معاي وهالسالفه كانت مره مضايقتني وبيوم كنت جالسه عالنت قمت كتبت إيميل حبيبي بقوقل الا ولقيته مسجل بموقع زواج جن جنوني ومانمت يومها واروح أسجل بالموقع وكلمته من غير ما يدري لقيته يسألني وش مواصفاتك وكان يبي زوجه مسيار على حد كلامه كنت أراقبه كل يوم دخوله وخروجه وأفكر ياترا لقى وحده وادخل ملفات البنات اللي بالموقع والغيره ذابحتي عليه لين قررت ارجع ادق عليه وقلت لازم يرجع لي<<مافيه مخ وكلمته وعرفني الرجال انهبل قال انتي باقي ما مسحتي رقمي!! وقلت له كل كلام الحب اللي بقلبه وأني انا مانسى الناس اللي احبهم ولا علمته اني تزوجت وكلمني كم يوم ورجع يطنشني وكنت ارسله عالواتس ألقاه متصل ولا يرد علي💔 قلت ياربي لمتى بإجلس انا على هالحال وكنت أدور بالنت ابي علاج نفسي لان نفسيتي ماعاد تتحمل وراسلت طبيب عالنت قالي شوفي طبيب تجلسين معاه افضل وزاد الوضع عندي لدرجة اني قمت احس ان فيه شخص نائم جنبي واسمع صوت نفسه واصحى على أصوات بالغرفه حولي وأقوم مفجوعه حسيت الوضع ما يحتمل وأني شوي وبنجن انام وانا خايفه واصحى مفجوعه وقررت أزور طبيب نفسي خلاااااص رحت للعيادة قالو لي لازم يشوفك اخصائي بالأول ويقرر تحتاجين دوا او لا كنت ابي اخصائيه بس مالقيت الا رجال واضطريت يشوفني طبعا اول ماشافني قالي يابنتي وش فيك اللي بعمرك لسى يبدو حياتهم وانتي كذا وحكمت له عالمس اللي فيني والأصوات وما دري ليش حس اني أخبي شي قال تحبي زوجك قلت عادي قال تحبي غيره وبس سألني وقمت ابكي وعرف كل شي قالي انتي تحتاجي لدوا وحولني على طبيب دوائي وبديت علاج مع العلاج تحسنت نفسيتي حتى الأصوات اللي كنت أسمعها اختفت كنت احسب مصدرها الجن بس طلعت نفسيه لانها راحت من الادويه وتناقشت مع الأخصائي عن مسالة المس وأقنعني بأسلوبه ان مافيني وصدقته حتى صرت اسمع البقره وما احس ودي ابكي زي اول !! قلت يمكن راح المس وانا مدري وقلت اجرب نفسي واسمع الرقيه والحمد لله ماحس اني اتاثر وأسمعها اكثر من مره وأول كنت لما اقرأ الأذكار كنت بس احس اني اتثاوب وأنام الحين الحمدلله عادي واستغربت من حالي هل انا كنت موهمومه والا ماكان فيني وراح ومتى راح وكيف ؟؟ واستمريت أراجع يمكن سنه ونص وبالاخير صارت الجلسات متباعدة يعني من وقت للثاني ،، وببداية علاجي سجل اللي احبه بأحد مواقع التواصل وجتني رساله على الايميل دعوه لي ورحت سجلت قلت يمكن غير رأيه ويبيني <<<😬 كلمته ًع البرنامج قال ماعرف ان البرنامج يرسل دعوات وفهمت قصده وكنت ادخل من وقت للثاني ألقاه موجود ولا عمره فكر يرسلي الين حذف ملفه بعد كم شهرررر بس انا ماحذفت واستمريت بالبرنامج وانا واصلت ًع العلاج والحمد لله وجلس ينصحني الأخصائي وقالي كلام مقنع عن زوجي وعن صاحبي مدري حسيت انه فتح مخي على اشياء كثير ومن جد ما ندمت اني رحت له وحسيت انه نعم الأب الناصح وبعدها شفت رؤيا وسالت شيخ قالي هذا هم او شي اشغلك وبيزول صاحبي لما يئست منه خلاص قررت اني انساااااه وكان قرار جاد بعد كلام الأخصائي طبعا ماصرت احس اني ابيه زي اول او مدري هو ملل او ياس المهم فيه شي تغير فيني جلست سنه وعليها مادق ولا أرسل وماني ناويه ادق خلااااااااص بس مايمنع اني كنت أفكر فيه لسى وبتصرفه معي وقهري منه ماصرت انظر له زي اول انه حبيبي وكذا كنت انظر له انه الشخص اللي أساء لي وقهرني سنين وكل ذنبي اني حبيته من قلب!! عاد بيوم كنت توني صاحيه من النوم الا واتذكره فجاه وأتذكر تصرفاته قمت دعيت وقلت يارب ان شاء الله ما يتهنى ولا يذوق فرح في بعده عني وكانت دعوه قهرررر والله العظيم اني قمت صَلَّيْتَ وفتحت الايميل آلو ولقيت مسج ان فلان زار صفحتك الشخصيه😱تفاجأت مره وقلت وش رجعه !!!!!!؟؟؟؟؟ ودخلت صفحته لقيته منزل كم صوره له جلست أتفرج عليها وكذا وطلعت جلست يومين أفكر كيف أتصرف ورجعت حذفت ملفي الشخصي وطلعت من البرنامج وبكذا حسيت اني حققت انتصار عليه 💪 كنت دايم احس اني انسانه ضعيفه وهشه وانا حبه كان مقيدني ومعميني صدق من قال الحب أعمى وما اخفيكم انه كثير يجئ ببالي لانه كان اول شخص بحياتي بس كرامتي والله اهم وفوق كل اعتباااااار والتفت لبيتي وزوجي وجبت بنوتي الثانيه والحمد لله على كل حال تمت،،،>
18
6K

يلزم عليك تسجيل الدخول أولًا لكتابة تعليق.

تسجيل دخول

لوولو لوولو
لوولو لوولو
والله ياقلبي ماعرفتي الحب !
هذا لا حب ولا يقرب للحب لا من قريب ولا من بعيد




من اول قراءتي لاعراضك
كنت بقولك زوري طبيب نفسي
اعراضك نفسيه


فرحت لما قرأت انك رحتي لطبيب




الحمدلله اللي سترك ووفقك بأسره صغيره جميله و زوج طيب




الله يحفظ لك بنوتاتك ويستر عليك دنيا واخره 💜..
بنت-عز
بنت-عز
الحمد الله انج عرفتي الطريق الصح في النهاية
dbdooba
dbdooba
سبحان الله
كان ودي لو زوجك يسوي سواتك ويعرف حريم ويدورهن زي ماانتي تدوري صاحبك ويفكر فيها زي مااناي تفكري فيه الليل والنهار وش كان بيكون ردك


عتبي عليك مااخذتي الموضوع من ناحيه دينيه ان الشي اللي تسويه يعتبر حرام وخيانة زوجيه
وياليتك تركتي صاحبك عشان رضا رب العالمين تركتيه ترضي نفسك وغرورك
لكن الله يثبتك ويهديك ويبعد عنك عيال الحرام
الاخت الرابعه
الاخت الرابعه
الحمدلله انك عرفتي الصح وخرجتي من الدوامه الي كنتي فيها والله يستر عليك أن شاءالله
ميوووم
ميوووم
  • الحمدلله جت على كذا بس
  • انتي شجاعه وأهنيك على شجاعتك