قصة طحين الصدقه

السلام عليكم ورحمة الله وبركاته

آبارك لكن أخواتي حلول شهر الخير وارفع لكن أسمى واجمل التهاني
احترت في أول موضوع اطرحه في هذا المنتدى الرائع حتى توقفت00عند حديث الرسول صلى الله عليه وسلم(يا نساء المسلمات لاتحقرن جارة جارتها ولو فرسن شاة ) وفرسن هو ما تلي الأرض من أطراف الشاة .
ولان شهر رمضان شهر الخير والعطاء والتواصل أحببت أن أروي لكم قصة واقعية عن البذل و فضل الصدقة للعبرة وذكر فان الذكرى تنفع المؤمنين

كلكم تعرفون انه من زمان كانوا الناس ضعفاء أن تغدوا ما تعشوا وراس مال الواحد منهم من الثياب ثوبين ثلاثة ان ما كان واحد بعد .
وكان الجهل والفقر والمرض ملازمة لها الضعوف ( فسبحان من بدلنا من بعد جوع وخوف رزق وأمن ) ورغم ذلك كان انفس الناس طيبة 00 الخير سمة الجميع والبر طبع منهم وكان فيه واحد من الفلاليح معروف بيته بالخير عاونه في هذا زوجته قبلها تعطي المحتاج وما ترد من يطلبها يعني راعية خير فلين صار وقت الصرام تصدقت بتمر ولي صار موسم دقيق وشعير بعد ماقصرت عطت الفقراء منه .
ويوم من الأيام بغى جارهم يعزل من البيت وشال عفشه وبقي كيس طحين ما لقوا له محل على الدواب اللي شالت العفش قام الجار وجاء لرفيقنا الفلاح وقاله خل الطحين عندك وأبعود عقب شهر أخذه .
عاد الرجال خوينا نسى يعلم مرته عن هالكيس وحطه بمخزن البيت وراحت الأيام وجت الحرمه وشافت الكيس ووافق شوفتها له جية عدد من الضعوف والحرمه ما عندها شيء راحت عطتهم من كيس الطحين الأمانة وكل ما جاها ضعيف عطته من هالكيس .
وبعد مدة جاء الجار وخبط على الباب وردت عليه الحرمة 00 فلان موجود قالت لا والله ماهو فيه رد عليها وقال قولي له أني أبصلي العشاء معه .
وفعلاً جاء العشاء وبعد الصلاة طلب الجار كيس الطحين وجاء الرجال يسأل مرته وين كيس الطحين 00 وشو كيسه ردت عليه مرته قال اللي في المخزن حق جارنا حاطه عندنا أمانة 00 الحرمه ماتت عظامها 00 وش تقول لرجلها .
مالقت غير الحقيقة تنجيها وقالت له وحلفت له بالله أن ما فيه شيء من هالطحين دخل جوفها أو جوف احد عيالها كل اللي راح منه في وجه الله .
وش السواة اللحين الرجال في المجلس والطحين معد بقى فيه الا شوي وش يقول له قام الفلاح وراح وسال الرجال يابوفلان كم صاع طحين في كيسك قال له : الظاهر خمسة 00 لا أكيد خمسة لأني شاريه .
رجع الفلاح لمرته وقال الكيس فيه خمسة اصواع روحي جيبيه نشوف كم باقي ونغلق عليه من الجيران لين يكمل حق الرجال .
جابوا الكيس وبدوا يوزنون صاع 00صاعين 00 ثلاثة 00 اربعة 00 خمسة وزود بعد !!!!!!!!!!! معقوله الكيس ما نقص منه شيء 00 سبحان الله إذا اراد أمراً فإنما يقول له كن فيكون 00 على قد ماتصدقت به هالحرمه الا ان الكيس مانقص .
ممكن وحده منكن تقول هذي ما هي حقيقة وارد عليها واقول فضل التصدق ثابت وقدرة الله واضحة وضوح الشمس والدعوة من خلال هذه القصة لكل أخواتي بأخذ العبرة والعظة " يا معشر النساء تصدقن ولو بشق تمرة " صلى الله على نبينا محمد بن عبد الله الرحمة المهداة لهذه الأمة .
وقبل علينا شهر الخير والبذل والعطاء 00 فالله الله بالاحسان والصدقات فأنتن في شهر تضاعف فيه الحسنات الى مئة ضعف والف ضعف ومئة الف ضعف 00 تقبل الله مني ومنكن صالح الأعمال وسلام على المرسلين والحمد لله رب العالمين .