بسم الله الرحمن الرحيم
والحمدلله رب العالمين على مايعطي وعلى مايأخذ............
اكتب لكم قصتي بعد معناة دامت شهرين........... 60 يوماً لم اذق فيها طعم الراحه ......
في البدايه اعرفكم على حالتي لي سنتين متزوجه ولم انجب وقررت أنا وزوجي رحلة العلاج قبل اربعة اشهر من منشطات وغيرها من علاجات لحد مازوجي تعب نفسياً وقال اتركي المنشطات مااستفدنا منها بشي المهم قلت له خلاص بس ابأخذها هذا الشهر وإن ماجابت نتيجه تركتها...من هنا تبدأ معناتي الجسديه والنفسيه بتاريخ 21 فبراير يوم التبويض رحت أنا وزوجي المستشفى وسويت إشاعه ولقت الدكتوره فب المبيض اليمين بويضه حجمها زين قالت لازم اعطيك ابره تفجيريه اليوم وبكره والجماع بعد 12 ساعه...طبقنا كلام الدكتوره....
وبعدها بدأت رحلة ترقب النتيجه...
ومضت الايام وجاء ميعاد الدوره ونزل علي دم قلت لزوجي إن الدوره شرفت طبعاً تحطم..بعدها بيومين وقف الدم وصار لونه بني مع تعب شديد قلت لإبو الشباب ابي اروح المستشفى اخاف يكون حمل وهذا إنذار بإجهاض قال مستحيل
قلت يمكن مو اكيد.........
وبعد إلحاح وافق ورحت وسويت تحليل دم وطلعت حامل بس الحمل ضعيف نسبته58 قالت الدكتوره هذا الاسبوع إرتاحي وعطتني مثبتات ورجعت للبيت وأنا محطمه لإني مابي افقد جنيني واستمر الدم ينزل معي بكثره لونه تحول إلى احمر سايل...
احسست في تلك الفترة إني خلاص راح افقد جنيني وبعدها بيومين رجعت سويت تحليل عشان نشوف هل الحمل قاعد ينمو طبيعي لكن لقينا إنه إرتفع شي بسيط 88 قالت الدكتوره إتركي المثبتات وخليه يطيح واضح إنه ضعيف وماراح يستمر وتعالي بعد يومين سوي تحليل نشوف نزل...
رجعت البيت أنا وزوجي وإحنا محطمين بعد سماع كلام الدكتوره..ومرت اليومين ورجعت سويت التحليل وكانت النتيجه87 نزل الهرمون شي بسيط ..قالت الدكتورة خلاص الجنين نزل والدم راح يستمر معك لحد ما يطهر الرحم...رجعنا البيت وحولت انسى والدم إلى الان مستمر ينقطع ويرجع مع الالام شديدة وكنت احسب إنها اعراض مابعد التسقيط وطنشت بعد مضي إسبوعين.. تعبت نفسياً وطلبت من زوجي إنه نعتمر لعلى وعسى ربي يسهل علي وانسى التسقيط وافق على الفكرة وقال تجهزي .............وأنا اجهز الأغراض تبع العمره احسست بتعب فظيع دوخه إسهال وتعب شديد في جسمي حتى والله بنات مااكذب عليكم قمت الله يكرمكم اتبرز دم...ونزيف...خبرت زوجي قلت له ما فيني اعتمر ابي اروح المستشفى... رحت وكانت المفأجاه قالت الدكتوره ابي اسوي لك تحليل حمل قبل كل شي عشان نتأكد إن رحمك نظف سويت التحليل وطلعت حامل ونسبة الحمل850سبحان الله استغربنا أنا وزوجي قلنا مستحيل كيف أنا قاعده انزف لي إسبوعين قالت ولا شي مستحيل قالت لازم ترتاحين هذي الفتره وابعطيك ابر تثبيت وتعالي بعد إسبوعين نسوي إشاعه... رحت البيت ومازلت غير متطمنه ...والحمدلله إني ماسمعت كلام الدكتوره قلت لزوجي ابي اروح لمستشفى ثاني عشان اتطمن قال زوجي إذا رجعت من السفر لأنه كان عنده شغل برا المملكه قلت خلاص...وعلى فكره أنا بعيدة عن اهلي..
وصباح يوم سفرية زوجي قبل مايمشي جاني الم فطيع في جنبي اليمين الله لا يجعل احد يحس فيه... والحمدلله ياربي إنه جاء قبل مايمشي زوجي ولا كان الحين تحت الأرض..
وداني زوجي المستشفى ومن تحاليل في تحاليل ومن ابر في ابر تخيلوا رحنا المستشفى الساعه8 الصبح ولا طلع التقرير الطبي إلا الساعه 6 المغرب
وكان التقرير بأني حامل خارج الرحم
كان ودي لحظتها ابكي بس ماكان فيني حيل حتى وأنا اناظر زوجي ودي ابكي لإني اعرف إنه تحطم حسيت إني خيبت ظنه مدري ليه الله يعوضنا..
المهم تنومت في المستشفى وقالوا ماراح نسوي عمليه بننتظر لبكره وإذا حالتك مستقرة عطيناك ابره تنزله
إحساسي في ذيك الفتره كان مابين ابيهم ينزلونه لإن الخطر علي وفي نفس الوقت حزينه لإني انتظرت هذا الحلم سنتين وفي الأخير بيقتلونه...
المهم جاء اليوم الثاني ومعه حسيت بألم اقوى جاتني الدكتوره قالت ياله على غرفة العمليات ترجيتها مابي عمليه قالت أنتي الحين في خطر لازم عمليه...الحمدالله على كل حال الحين لي3 اسلبيع من سويت العمليه والنفسيه زفت اناظر اللي حولي اللي حملوا معي مستأنسين وأنا الله اعلم بحالي جاني رعب من الحمل وكرهته حتى صارت تجيني كوابيس من اللي شفته بس في نفس الوقت اتمنى الطفل...
استغفر الله بعض الأحيان اقول وش معنى أنا ليه موغيري ليه اول تجربه لي بالحمل تصير كذا...استغفرالله اللهم اجرني في مصيبتي واخلف لي خيراً منها...............