بصراحة انا ماعرفت وين احط الموضوع بأي قسم لكن اتمنى مساعدتكم
الموضوع مهم جدا واتمنى تردون علي وتساعدوني بأقرب فرصة
بنات أنا ابي استشيركم في قصة صارت لأمي
أمي جاءت عندي أنا واختي زيارة في الدمام وهي اصلا في الرياض في خلال الزيارة كنا مجتمعين ببيت اختي راحت امي السوبر ماركت ومحل قريب من البيت يعني تمشي مشي المهم قابلتها وحده في الشارع ومسكتها وقالت لها انها تحتاج مساعدة لأنها تبي تسوي عقيقة وماعندها اللي يكفيها وقالت لأمي بادعي لك بأي دعوة تبينها في يوم العقيقة ايش تبين ادعيلك قالت امي اي دعوة طيبة و بعدين تركتها أمي ومشت قامت الحرمة ونادتها وقالت لأمي انت عندك عين ولون بشرتك هذه ماهو لونها الطبيعي والإجهاد باين على بشرتك بسبب العين واللي عانتك وحده تعرفينها وتزورينها وتزورك وتسولف معاك وتضحك وبس تروحين من عندها تبدأ تتكلم فيك وهي منكم وفيكم واعطتها تفاصيل عن حياتها اكثر مثل انت عندك بيت كبير وعندكم ولد عصبي وانت جايه زيارة ماانت من سكان البلد وانت لما تنامين في الليل تتألمين في يدك وتنمل عليك وهذا سبب العين
والعين اصلا مأثره على عيالك اكثر وعندك بنت محيره تقصد انو ماحملت إلى الآن وبسبب العين صحتك قاعده تروح منك شوي شوي وإذا تبغين افك العين الآن قدامك اعطيني إللي فيه النصيب حتى مااشترطت واقرأ عليك الآن وطريقة العلاج اني اقرأ آية وانت ترددينها بعدي بس ولازم تبخرين البيت من اي بخور المهم ريح طيب في البيت بعدين تقرين سورة البقرة ثلاث مرات كل جمعة لمدة خمس جمع وبكذا بتنفك العين وتنحل كل مشاكلكم
امي خافت وقالت لها لحظة وبأرد عليك واتصلت علينا وسألتنا قلنالها لا لانها ماهي مضمونة وإذا فيك عين فعلا نوديك عند شيخ مصرح له بالقراءة فقالت لها امي لا راحت ولا تمسكت بأمي كثير
على فكرة قالت لها الحرمة انها من سيهات من الشرقية وان امها مغربية
المهم في الموضوع ان كل كلامها صح حتى الالم اللي في يد امي وحتى المشاكل المتوالية مثلا اختي الكبيرة تطلقت والحمد لله تزوجت غيره واللي بعدها كانت مخطوبة لمدة سنة وفسخت خطوبتها والحين متزوجة وظروفهم المادية صعبة جدا واختي اللي اصغر مني تطلقت بعدين رجعت لزوجها الحمد لله على كل حال واخوي توظف بعدين فصل وله سنتين الحين قاعد واصلا امي وابوي منفصلين عن بعض يمكن من18 سنة وانا كنت متزوجة ولد عمي بعدين توفى الله يرحمه ويسكنه الجنة بعدين تزوجت الحمد لله وإلى الآن ماحملت يعني كانت تقصدني
الحين ابي اسألكم اولا ايش رأيكم باللي صار
وهل تتوقعون ان ظروف حياتنا بسبب العين و إلا ايش بالضبط
وبعدين ايش رأيكم بطريقة العلاج
وهل يمكن لأحد الناس اللي يعالجون يعرفون ظروف الشخص من دون ما يسألون ولا سؤال
كيف يمكن نعرف الحرمة اللي عانت امي
وآخر شئ ايش تنصحوننا نسوي إلى الآن ما سوينا شئ والموضوع شاغل بالنا جدا
وشكرا جزيلا لكم
وآسفة جدا على الإطالة
