قصة كتبتها وحبيت اشاركم فيها وتعطوني رايكم

قصة / تسأليني من أكون ؟؟؟


للكاتبة / عـــ الجروح ـــذب
جميع الحقوق محفوظة … ولا اسمح بنقل القصة بدون كتابة اسمي ...


عايلة سالم
الاب : سالم (55 سنة )
الام : مريم (48 سنة )
يوسف (29 سنة ) متزوج من برا العايلة خلود ( 25 ) وعندهم بنت ( الماس 3 سنين ) وولد ( سالم سنة )
خالد (25 سنة ) متزوج بنت خاله ( هدى 23 سنة )
ريم (22 سنة )
عبدالله ( 18 سنه )
اريام (14 سنة )

عايلة ناصر اخو سالم
الاب : ناصر (62 سنه)
الام : عايشة (59 سنه )
فهد (30 سنه ) متزوج منى (28 سنه ) وعندهم ثلاث بنات وولد
شذا (10 سنين) شيما (6سنين) وناصر (2سنه) وشروق (شهرين)
بدور (28 سنه ) متزوجة وعندها عيال
سعد ( 25 سنه )
منيرة (18سنه)

قصتي باختصار راح تتكلم عن قضايا مختلفة تواجهنا مو بس بالكويت بالخليج كله وبالذات بالسعوديه لانهم قريبين منا وحبايبنا : ومن هالقضايا زواج البنت من رجل اكبر منها بكثير و بعد زواج الرجل على زوجته واللي تعتبرها المرأة خيانه حتى لو كان عنده اسباب وجيهه وبعد قضيه الاختلاط في اماكن العمل وراح اتكلم عن امور كثيرة اللي راح يتابع القصة معاي راح يعرفها اتمنى تقرونها لحد النهاية وتعطوني رايكم فيها وتنتقدون اللي تبون وراح تلقون صدر رحب يتقبل منكم اي شي : اترككم مع القصة



الجزء الاول :



ريم وهي تنزل من الدرج بسرعه وعيونها على ساعتها وتكلم امها : اليوم اول يوم لي بالدوام ليه ما قعدتني مبكر
مريم ( امها ) وهي على طاولة الطعام مع سالم (ابوها ) واخوانها وحريمهم : وليه ما تقعدين بروحج ...
ريم معصبة : والله ما يمدي على ما اتمكيج واتعدل .......
قاطعها خالد وهو عاقد حواجبه : نعم ... وليش حضرتج بتحطين مكياج . والله ياويلج
ريم بتودد وتحاول تكسر خاطره : خللللودي اول يوم وناس توني متعرفة عليهم لازم يعرفون اني بنت سنعة وبنت ناس
خالد بجديه : بنت الناس السنعة تبين بأخلاقها مو بشكلها وبعدين بنات الحمايل ما يتمكيجون للدوام خصوصا وانتي معاج رياجيل بالشغل
ريم تلف على ابوها : يبه شوفه ما يصير اروح جذي واخرع خلق الله
بو يوسف شرب من كوب الحليب اللي بيده وطالع ريم : ريم لا تعاندين واسمعي كلام اخوج اللي اكبر منج
ريم : وجهي ولا وجهه انا اللي بحط مكياج والا هو ... ( تلف على اخوها الكبير ) يوسف قول شي انت اعقل واحد بهالبيت
يوسف : اخاف اقول وتزعلين
ريم : خلاص لا تقول شي
يوسف يبتسم : عيب تحطين مكياج وتروحين الشغل انت بمكياج وبدون مكياج حلوة
مريم : ترا تأخرتي بسرعه روحي البسي
طقت ريم رجولها بالارض ( يعني معصبه ) وصعدت ريم لغرفتها وهي معصبة بدلت ملابسها البست تنورة زيتي وبادي بيج واكشخت بعباية راس جديدة توها مفصلتها وضبطت النقاب شحلاته عليها خصوصا عيونها كبار وحلوة ( ريم بنت مملوحة احلى ما فيها عيونها لانها كحيله وكبيرة شعرها لحد كتوفها اسود وناعم وطولها وسط بس شكلها رزه مع انها شويه ضعيفة ) وحطت الكحل والماسكرا بالجنطة عشان اول ما توصل تروح الحمام ووتتزين ... نزلت لقت الصالة مابقى فيها الا خالد معصب عشانها اخرته لانه هو اللي بيوديها ...
خالد : لو انج عروس يمديج خلصتي
ريم : لا تسوي سالفة كاني خلصت بعدين لو اني هدى جان نطرتني ساعتين وانت تضحك
خالد قام يضحك وتغير مزاجه من جابت طاري الغالين : يا حلوة ناس عن ناس تفرق
ريم : افا والله انا اختك من 22 سنة واهي توها عارفتك قبل سنتين وتبديها علي
قاطعهم صوت هدى ( زوجة خالد ): وانت شحارج يحبني ياربي انت شكو
ريم : انت اللي شكو لابسه وجايه
هدى بدلع لايق عليها: خلودي حبيبي بيوصلني الدوام سيارتي خربانة
ريم : عشان جذي معصب يدري اني بخرب الجو وبصك عليكم
خالد : بس يالله كملوا سوالفكم بالسيارة
خالد وهدى كانوا مثال للزوجين المتحابين كان كل واحد عاشق الثاني لحد الجنون يشتاقون لبعض لما تعدي نص ساعة من غير ما يشوفون بعض بس للاسف حبهم لبعضهم ظلمهم حيل ودمر حياتهم ( لا تستغربون اللي راح يتابع قصتهم راح يعرف شلون حبهم ظالمهم وراح يعوره قلبه عليهم )
طلعوا بالسيارة ونزلوا هدى اول لان شغلها اقرب من ريم ولما وصلوا للوزارة اللي تشتغل فيها ريم بطلت ريم باب السيارة بتنزل وطاحت جنطتها واللي نست تسكرها وطلعت الماسكرا منها وطاحت عند رجل خالد ... ريم بسرعة سكرت جنطتها وطلعت من السيارة بسرعة ... خالد اخذ الماسكرا وهو مو مستوعب شنو هاذي لما انتبه بطل باب السيارة وقعد ينادي ريم بصوت عالي لانها توها ما ادخلت
ريم تلف على خالد وهي ميته من الرعب حدها خايفه منه لانه اذا عصب يخرع
خالد اشر بيده يعني تعالي ... قربت ريم وهي شوي واتموت من الخرعة رجولها مو قادرة تشيلها ... لما وصلت عنده طالعت فيه واهو رافع الماسكرا جان يقول :
ليش خذيتيها معاج ؟؟؟
ريم : ................
عطاها خالد الماسكرا : حطيها بجنطتج وخليها معاج وانا واثق انج ماراح تكسرين كلمت اخوج وتحطينها على عيونج الحلوة ... صح ؟؟؟
ريم انصدمت من اخوها عيونها دمعت ما توقعت هذي ردة فعله توقعته يكفخها ويردها للبيت .. مسحت دمعتها وقربت منه وباسته على راسه وقالت : صح
دخلت ريم الوزارة و هي فرحانة وشوي وتطير من الوناسة لأنه أول يوم لها بالدوام اللي الكل كان معارض عليه لانه بمكان مختلط بس مع الوقت بدوا اهلها يوافقون ...
دخلت ريم مكتبها وكان معاها موظفة وموظف بنفس الغرفة
ريم : السلام عليكم
محمد وساره : وعليكم السلام
ريم : انا ريم سالم الموظفة الجديدة
سارة تتطنز : ما شالله توج توصلين المدير قلب الدنيا عشانج متأخرة من اول يوم
ريم : آسفة بس انا ...
قاطعها محمد وابتسامته شاقه وجهه : ولا يهمج هذا مكتبج واحنا زملاؤك محمد وسارة حياك الله
ريم بقلبها ( سبحان الله فرق بين المره والرجال )
ريم تطالع بعيونه وكان مبين عليه انه قمة في الاخلاق : مشكور اخوي
سارة وهي تكمل شغل وتكتب : انا اقول روحي اعتذري للاستاذ احمد لانه من الصبح ينطرج
ريم متنحة : منو الاستاذ احمد ؟؟؟
محمد : هذا مديرنا هنيه اكيد ما تدلين مكتبه اذا تبين اوصلج عنده
وقاطعهم دخول شخص لفت نظر ريم وكانت تطالعه بأعجاب لانه حيل حلو وجذاب طول وعرض ولابس دشداشة بيضاء وغترة بيضا وحاط قفل يجنن وفيه شويه شيب ريم قامت تخزه وهو يخزها وهي بقلبها ( عفية مراجعين اذا بشوف هالاشكال كل يوم عز الله ماني بخير )
لما التفتت ريم حق محمد وسارة لقتهم واقفين وبقلبها تقول ( خوش معاملة لا ويشتكون الناس من سوء معاملة موظفين الحكومة لهم وهم أول ما يدخلون يوقفون لهم )
قاطع افكارها صوت
سارة : استاذ احمد هذي ريم الموظفة الجديدة
ريم انصدمت هذا مديري ياسلام شكله شي وليش دايم المدير بالمسلسلات شايب ... صراحة خوش دوام ...
وقف الاستاذ احمد وكتف يدينه وهو يطاعها ومبتسم ... وريم طايره من الفرحة (اكيد معجب والله اني مو شويه)
احمد : شرفتي حضرتج ليش ما كملتي النومة بالبيت مو احسن
ريم تغير مزاجها بعد الزفة المحترمة ( اكيد يكابر بيسوي يعني شخصية جدامي عشان يعجبني )
ريم : بصراحة كان الطريج زحمة وما ....
قاطعها احمد : والله ... شلون زحمة واحنا وصلنا من زمان والا انتي مو بالكويت وبعدين طول عمرها الكويت زحمة ونوصل لدواماتنا بالوقت المحدد
ريم : لا بس انا ساكنه بعيد و ...
احمد : وين بعيد يعني الرياض مثلا والا الدمام
ريم انبطت جبدها لا ويتطنز الحمار ماعليه ماراح ارد عليه خليه يا ريم يكلم نفسه لين يمل ويصير جنه خبل بس صراحة مزيون
احمد : شوفي يا ..... شنو اسمج ؟؟؟
ريم : اسمي ريم
احمد قام يضحك وتغير مزاجه : مو لايق
ريم انصدمت : ليش ؟؟؟ شنو اللي مو لايق ؟؟؟
احمد : ما ادري شكلج اسمج شقحة سبيكة رقية مو ريم ..
ريم بينها وبين نفسها (ياحيوان واتجرأ بس مضطره اتحملك اكيد قلت علي جذيه عقب ما شفت البنات اشكال والوان ومسوين عرض ازياء والوان ومكياج ترس الوجه بالوزارة وانا لاني مستترة مو عاجبتك تبيني البس جنيز وبادي وافك شعري عشان تقول اهلين ريوم بس ماعليه مردودة )
ريم : مشكور استاذ مناحي ما قصرت
هنيه كل اللي بالمكتب ماتوا ضحك شلون تجرأت ونادته مناحي ( يستاهل )
احمد : حلللللللوة ... يعني ما تعرفين اسمي ؟؟
ريم انحرجت ( والله لساني طويل زين ما طردني ) لف احمد لما وصل عند الباب على ريم وقال :
لا تتأخرين مرة ثانية يا شقحة واذا احتجتي أي مساعدة عندج اخوانج سارة ومحمد ماراح يقصرون
ابتسم وهو يطالع ريم ويأشرلها ((بااااي))
اول ما طلع قعدت ريم عالمكتب :اووووووف شفيه هذا ؟؟
سارة : لا انتي ما تعرفينه الاستاد حيل طيب بس اكيد كان بيخرعج عشان ما تتأخرين مرة ثانية
محمد : الدليل انه ما قدر يعصب عليج لما قلتي مناحي لانه هو دمة خفيف وكل الموظفين يحبونه
ريم ( تكابر): الا انا
سارة : والله نص بنات الوزارة معجبات فيه ويوميا لازقات عند مكتبه واحلى كشخة جنهم رايحين عرس .. تشوفينهم انشاالله وراح تلاحظين
ريم : نشوف



طلعت ريم من المكتب بعد ما علمها محمد كل شغلها لان سارة قعدت تتهرب منها اما محمد عرض خدماته بدون ما تطلب بعدين راحت تتمشى على مكاتب الموظفين وهي عيونها على اللوحات تدور مكتب الاستاذ احمد .
مرت على مكتب فيه ثلاث موظفات صج على آخر كشخة شي وهي تسمع سوالفهم
الموظفة الاولى : بنات شرايكم شكلي عدل ... حمرتي حلوة ... كحلي زين ..
الثانية : كلج حلوة يالله روحيله قبل لا تروح قبلج شريفة وتسبقج عليه
الاولى : يارب توفقني يالله بروح للمدير ادعولي باااااي
ريم حقدت عليها جنها شريكتها ( يالله فرصة الحقيها عشان تعرفين وين مكتب المدير )
الحقتها ريم لما وصلت عند باب المدير كانت تبي تطق الباب بس الاستاذ احمد فتحه وطلع ولما شافها ابتسم
احمد : اهلا سعاد شلونج ؟؟؟
سعاد بنعومة : زينه انت شلونك ؟؟؟
احمد : مدام اشوفكم زينين اكيد انا تمام
ريم كانت تطالعهم وتسمعهم لانها كانت قريبة بس ما حسوا فيها
احمد : ما قلتيلي شلون الاهل والوالد
ريم بقلبها ( زين طلعت من اهله يعني مو مغازلجي بس ما يصير هو شكله بدوي وهاذي حضرية وفري )
سعاد : كلهم بخير ويسلمون عليك
احمد : الله يسلمج ويسلمهم ( سكت شوي لما لمح ريم وكمل ) تامرين على شي انا بروح امر على مكاتب الموظفين
سعاد ضاق خلقها : لا سلامتك انا بس جاية اسلم عليك يالله باااااي
راحت سعاد ولف احمد على ريم اللي كانت ميته من الحره واشر لها يعني تعالي .. جت ريم ووقفت عنده بدون أي كلمه
احمد : هاا شرايج بالدوام عندنا انشالله يكون عاجبج ؟
ريم : الحمدلله زين
احمد : اوكي شعندج جايه هنيه بعيد عن مكتبج اكيد رحلة استكشاف
ريم اضحكت : هههههه ايه ... الوزارة حيل كبيرة تعبت وانا افر فيها
احمد بجديه : مدامج وصلتي هنيه شوفي ( اشر على باب قريب ) هذا مكتبي اذا احتجتي أي شي ... والحين انا رايح اسوي جوله على مكاتب الموظفين ( طالعها بابتسامه ذوبتها ) تحبين تجين معاي اعرفج على زملائج ؟
ريم بعد تردد : مو مشكلة
راح الاستاذ احمد يتمشى مع ريم بين المكاتب وكل ما وصلوا مكتب فيه حريم قعدوا يطالعون ريم بحقد مثل ما قالت سارة وريم تفكر ( منو هذي سعاد اللي كانت تسولف معاه عند المكتب .... وليش هو يعاملني غير بعدين يمكن هو جذي مع كل الموظفين مو بس معاي بس هو حيل طيب مثل ماقال محمد )
وقف معاها عند باب مسكر وداخل ازعاج
احمد : هذا المكتب فيه موظفين داجين ورايحين فيها بس بشغلهم ماكو احسن منهم دايم يسوون مقالب ببعضهم بصراحة الوزارة بدونهم ولا شي
ريم : ليش مسكرين بابهم
احمد : اكيد يسوون بلوة داخل ... شوفي بسوي كبسه عليهم بس انت لا تتخرعين اذا شفتيهم ترا داجين
ريم : اوكي ... واحد ... ثنين ... ثلاثه
بطل احمد الباب شاف شي عجيب ... ريم شهقت من اللي شافته ... الموظفين انحرجوا
لف احمد على ريم : ما قلت لج رايحين فيها
كانوا اربع شباب قاعدين على الارض على شكل دائرة ومخلين مكاتبهم فاضية ويلعبون جنجفه ( ورق)
الشاب الاول ( سعود ) : خرعتنا يا استاذ مو جذيه يبطلون الباب
احمد : والله ... اسم الله على قلبك تخرعت
الشاب الثاني ( راشد) : حياك استاذ تبي نوزعلك ورق ؟؟
احمد : عيب جذيه فضحتونا جدام ضيوفنا طلعتوا اسراري وانا موصيكم ما تقولون لاحد
راشد : آسفين ... بس ما عرفتنا منو ضيوفك ؟؟
احمد : هذي اختكم شقحه قصدي ريم موظفة جديدة ... الله الله عليها
ريم تطالعه وهي مقهورة شلون تجرأ وقالها مرة ثانيه
سعود : بعيونا كل الموظفات بعيونا
احمد : خل اعيونك لك واحترم نفسك تراها من الاهل
ريم انصدمت ( ليش يدافع عني وما خلاهم يتغزلون فيني ياربي اول مرة احد يعطيني وجه وعلى طول سكتهم هالغثيث ... بعدين ليش قال من الاهل وانا اول مرة اشوفه )
الشاب الثالث ( مشاري ) وهو يغمز : علينا استاذ احمد انت ثلاث ارباع الموظفات من اهلك
( عرفت ريم ان سعاد مو من اهله بس هو يعاملها جذيه وانه يقول على اغلب الموظفات جذيه )
احمد : جب زين أصلا أي بنت تشتغل عندي اعتبرها بنتي ولا ارضى أي انسان يضرها
الشاب الرابع ( حسن ): والنعم فيك عشان جذي كل البنات يحبونك
الاستاذ احمد انحرج ووجهه صار احمر اما ريم ماتت من الضحك وحتى الشباب قاموا يطقون حسن وهم يضحكون
احمد بعد ما جمع وجهه : بس خلاص شيلوا لعبتكم وقعدوا على مكاتبكم لو يجي احد المراقبين ويشوفكم عز الله قعدنا ببيوتنا
سعود : شدعوه ذاك اليوم لما جبنا بلاي ستيشن ما قلت شي والحين على جنجفة سويت سالفة
احمد : بس فضحتونا ... خلاص كملوا بس بدون ازعاج
ريم تفكر ( والله خوش مدير )
طلعت ريم مع احمد اللي وصلها لمكتبها وراح مكتبه



ولما انتهى وقت الدوام طلعت ريم و لقت خالد ينطرها برا بطلت الباب وباسته على خده ( صارت تحبه اكثر عقب سالفة الماسكرا اللي فعلا ما حطت منها شي )
خالد : بشري شلون الدوام ؟
ريم : يااااي روعه حيل حيل حلو
خالد : زين هذا اهم شي انه يعجبج
وحرك السيارة ( خالد ما شاء الله عليه مزيون حيل وهالشي معذب هدى لانهم كل ما يطلعون مكان يجون البنات حواليه ويتلزقون فيه )
وردوا للبيت وقعدت على الغدا تسولف عن دوامها لما لاعت جبد اهلها منها ومن دوامها
عبدالله (اخوها ): ريم مايوظفون عندكم طلبه ؟؟
ريم : ليش لا يكون بتوظف ؟
عبدالله : بصراحة لاعت جبدي من الدراسة متى افتك
سالم : والله ان ما شديت حيلك وجبت معدل يا ويلك
عبدالله : بحاول
مريم : تحاول !!!
عبدالله بقلبه (هذي والله النشبه ) : يمه افا عليك بس يالغاليه اتغشمر معاج انا الحمدلله شاد حيلي
اريام : دير بالك لا ينقطع هههه
الكل : هههههه
عبدالله : يا ربي عذال بس ميخالف تمونون
ام يوسف : انتبه لا تغلبك منيرة بنت عمك ناصر عاد ياشينها لا غلبتك
عبدالله : تخسي البنت تغلبني وانا ولد سالم
ريم : نشوف
وعقب الغدا راحت ريم للمطبخ لقت هدى مرت خالد
ريم : هدى عفيه بعد شوي العصر ابيج بقولج شصار بالدوام
هدى : من صجج ما خلصت سوالفج للخين
ريم : لا في شغلات ما قدرت اقولها لان الرقابة موجودة
هدى : اوكي متى ما طلع خلللودي جيتج
ريم وهدى علاقتهم حيل مع بعض لانهم ببيت واحد وتقريبا نفس العمر وهدى طبيتها وقلبها الابيض يخلي الكل يحبها ويفتح له قلبه
وراحت ريم لغرفتها بعد ما جا خالد وقعد عند هدى بالمطبخ
خالد : هدى حبيبتي خلي الصحون تجي الخدامة وتنظفهم
هدى : ما عليه انا بنظف صحني وصحنك وهي تنظف الباقي
خالد : يالله بنصعد شقتنا عندي لج مفاجأة
هدى فرحانه : صج
خالد وهو يغمز : طبعا صج بس مو هنيه بالغرفه
هدى من غير تردد : اوكي يالله
صعدوا الشقة اول مادخلوا
هدى : يالله وين الهدية ؟؟
خالد مستغرب : هدية ؟؟
هدى معصبه : لا تستهبل انت قلت عندي لج هدية
خالد يضحك : يا قلبي انا قلت مفاجأة مو هدية
هدى : اوكي وين ؟
خالد : انت ليش ما تقولين كلام حلو مثل كل الناس
هدى حست انها مصختها : بس ... ماطلبت شي غالي والطلب رخيص
وباسته من خدة ودخلت غرفتها معاه ^_^ ( اتوقع عرفتوا شنو المفاجأة حقت خالد )




بغرفة ابو يوسف
مريم متوترة : والله اني خايفة على ريم
سالم لايعه جبده : يابنت الحلال كل البنات توظفوا ما صار لهم شي
مريم : بس بنتي متوظفه مع رياجيل وهم بصراحة جلاب و ذيابه وهي صغيرة وما تعرف الدنيا
سالم : ريم بنتي وربيتها عدل وما اظن ينخاف عليها لانها بنت رجال
مريم : ما ادري الله يستر
سالم : ارتاحي يا بنت انشاالله مو صاير الا كل خير


بغرفة يوسف
خلود : بصراحة اختك جريئة شلون قدرت تتوظف مع رياجيل
يوسف : شفيها مستترة ومحترمة ما فيها شي
خلود : شفتها لما تسولف عن مديرها شلون تجرأت وقعدت تتمشى معاه جنه اخوها
يوسف بعد تفكير : مديرها يعني شايب كبر جدي
خلود : مو شرط
يوسف : ياعمري ابي انام يصير ؟؟
خلود : سوري حبيبي ازعجتك




بعد صلاة العصر حطوا قهوة وجاي بالصلاة وقعدوا كل العايلة يسولفون
ريم اشرت حق هدى : هدى ابيج شوي بغرفتي
خلود وهقتهم : خلكم معانا شحلات القعدة
عبدالله : روحوا ما عليكم ماتشوفون شر
ريم ترقع : وجعه ما تبينا ؟؟؟
عبدالله يستهبل : لا تغلطين ... ما ابيج مو ما ابيكم لاتدخلين هدى بالسالفة وتجمعين ويجينا خللود يلعن خيرنا
ريم : هين يا عبود ... ( لفت على هدى وكملت ) مايخالف هدى عشر دقايق وننزل لكم
هدى : اوكي
خالد يسوي نفسه زعلان : والله تروحين وتخليني بروحي يا هدهودا
بو يوسف مقهور : وجع تخليك بروحك وليش حنا مو تارسين عينك عساها للبط
هدى : عمي حرام عليك لاتدعي عليك صدقني ما يقصد
خالد : يابعد جبدي والله محد يدافع عني غيرج ( لف على ابوه وكمل ) يايبه انا اقصد انها اول ما تروح احس الكهربا تطفي يصير حر وظلمه ما ادري ليش ؟؟\
يوسف : هذا وانا اخوك اللي يسمونه ... الحب
خالد غلط وقال له وزوجته خلود قاعده : يا سلام وانت شعرفك بالحب
خلود عصبت وكمل خالد يبي يحرها زيادة : يوووه !!! نسيت بنت جيرانا اللي كنت تحبها وكل يوم تنطرها عند الباب
الكل قعد يضحك باستثناء خلود ويوسف اللي توهق وعرف انه فيه استجواب ناطرة
وقعد يدعي على خالد اللي وهقه وهقة عدله وفضحه





صعدت هدى مع ريم لغرفتها
ريم : بصراحة قاهرني وما يناديني الا شقحة
هدى تضحك : خوووش اسم
ريم مستغربة : يتطنز علي وفي نفس الوقت يعاملني احسن معامله
هدى تسايرها : اكيد انه حب يتغشمر معاك بالعكس شكله محترم وخلوق موتقولين سكت الشباب وقالهم انج من الاهل
ريم ما تبي تقتنع : يمكن يسوي نفسه ثقيل جدامي
هدى بجديه : ريم اهم شي انت تكونين ثقيلة ولا تتكلمين معاه مرة ثانية عشان يعرف انج بنت ناس
ريم : زين هدى شلون اعرف اذا كان متزوج والا لا ؟
هدى مستغربة : وانت شعليج منه ؟
ريم : شكله صغير
هدى : اسألي اللي معاج بالمكتب
ريم مستانسه : والله فكرة بس اخاف يشكون فيني خصوصا ان معجباته واجد
هدى غيرت الموضوع : سولفي عن محمد اللي معاج بالمكتب بصراحة عجبني لما قلتيلي عنه
ريم : محمد هذا شي ثاني شنو اخلاق ! شنو وجه يفتح النفس عالصبح ! شنو شخصية !
تمت ريم تسولف عن محمد لما قاطعهم طق الباب
ريم : تفضل
اريام : كل هذا عشر دقايق وننزل
هدى : سوري خذتنا السوالف ولا حسينا بالوقت
اريام : اكيد قالت لج هالخبلة عن محمد واحمد وراشد وحسن ومشاري وسعود …
شفتي شلون بنت الحمايل صار عندها ربع ؟؟؟
ريم : وجع انشاالله …. هذيل مو ربعي بس عرفتهم بالدوام ولا لي شغل فيهم
اريام : زين لا تعصبين … تعالوا تحت خالد مطرشني يقول قولي حق هدهودا حياتي تنقذني وترحمني وتنزل
هدى : يا قلبي قلبك يا خالد … يالله بااااااي بالحق عليه
ريم : يالله بروح معاج









قعدت ريم الصبح وبسرعة راحت تلبس لما وصلت للمنظرة كانت بتحط مكياج بس تذكرت خالد وثقته فيها ولا حطت شي وهي تفكر( اصلا انا حلوة بمكياج وبدون مكياج ) لما نزلت لقت الكل قاعدين يتريقون
ريم : صباح الخير
الكل : صباح النور
ريم : خالد خلصت يالله
يوسف من غير ما يطالعها وقاعد ياكل : انا اللي بوديج مو خالد
ريم بذهول : ليش ؟؟؟
يوسف لف عليها : ليش انتي ما تبيني اشوف مكتبج وشغلج
ريم : لا حياك بس اخاف بعض الناس فروا راسك ( وتلف على خلود )
يوسف : شقالولج جاهل عشان يفرون راسي
ريم : اسفة اخوي بس انت تدري ان زوجتك ما تحبني ما ادري ليش
خلود تسوي نفسها طيبه : بالعكس انت مثل اختي هذي تخيلات يعني عشان اخاف عليج صرت ما احبج
ريم : خلي خوفج لنفسج وعيالج مالج شغل فيني
خلود زعلت وقامت من الطاولة وصعدت دارها
يوسف : ريم وبعدين معاج وطولت لسانج هذي ما تحشمين احد
سالم : ريم يبه مايصير جذي عيب مرت اخوج تحبج
ريم : لا ما تحبني ولا تحب امي ما تحب غير نفسها وهالاسد لاعبة براسه
ريم ما استوعبت اللي صار طاحت عالارض لما طقها يوسف طراق ( تستاهل لسانها طويل )
ريم تصارخ : يبه يوسف يطقني وانت موجود
سالم : خليه يربيج
يوسف : انتي صاير ماتحشمين احد وتستاهلين اكثر من طراق ... يالله اذلفي فوق اقلبي وجهج مابي اشوفج ..

ريم اصعدت غرفتها معصبة وزعلانه وقاعدة على سريرها ولامه رجولها عند صدرها وتبكي منهارة شلون اخوها الكبير يطقها عشان زوجته والله قهر اول مرة يمد يده عليها ... بس هي زودتها شوي وكان لسانها طويل حبتين
دخل عليها خالد بعد ما طق الباب : افا والله يا ريومه ليش قطيتي عباتج يالله تأخرتي عالدوام
ريم مازالت تبكي : ماني رايحة
لمها خالد لصدره وحاول يهديها : يا خبلة هم يسوون جذي عشان ما تداومين اقهريهم وداومي
ريم : يوسف اول مرة يطقني وعشان هالخايسه خلودوه
خالد يحاول يغير مزاجها : خليهم يولون ... كلهم ما يسوون دمعتج الغالية ... وبعدين وعد مني ماراح اخلي السالفة تمر بسهولة وراح اخذ لج حقج منهم اساسا ابوي راح له غرفته وزفه زف محترم وامي نفس الشي بس هم مايبون يزفونه جدامج
ريم وهي تبجي : قاهرني ... حيل قاهرني
خالد : ماعليج منهم ؟؟؟ عطيهم طاااااااف
ريم : محد يحس فيني غيرك
خالد بحنان الدنيا : عشان جذي ابيج تقومين بسرعه وتلبسين عبايتج
ريم ردت لبست بسرعة ونزلت حق خالد اللي كان ينطرها بالسيارة





وصلوا للوزارة استغربت ريم لما شافت خالد طفى السيارة ونزل معاها لحد ما وصلها مكتبها
خالد : السلام عليكم
سارة ومحمد : وعليكم السلام
ريم قعدت على كرسيها بعد ما سلمت وقعد خالد مقابلها ... بعد خمس دقايق ماراح خالد ... وظل قاعد عندها استغربت ريم هذا شسالفته قاعد ما عنده شغل ..
ريم تطالع خالد ومستغربة : خالد ماعندك دوام ؟؟؟
خالد وهو يلعب بتلفونه : اجازة
ريم تستفسر : ليش ماخذ اجازة ؟؟
خالد وهو للحين يلعب بالتلفون : مو اجازة بس ساعتين ... وديت هدى للمستشفى وبنطرها عندج لما تخلص وتدق علي عجزان اروح البيت وارد مرة ثانيه
ريم متخرعة : سلامتها شفيها ؟؟
خالد يضحك : ههههههههه تصدقين ما ادري !!! مارضت تقولي ولا خلتني انزل معاها !!!
ريم استانست : ياسلام !!!!!!!!!! اكيد حامل وبتسوي لك مفاجأة لما تتأكد
خالد راحت ابتسامته الحلوة : انشاالله الله يسمع منج ... انتي لو تشوفينها شلون تحب الاطفال
ريم تلعب باعصابه : وانت ما تحبهم ؟؟؟؟؟؟
خالد رد يبتسم : امووووت عليهم واذا من هدى اموووت عليهم زود
ريم : الله يرزقكم بكل اللي تبون انتوا تستاهلون ... مو خلود ويوسف اللي يجيبون عيال ويقطونهم عالخدم


قام خالد ووقف عند الباب : ريوم حبيبتي تبين شي من الكافييه ؟؟؟
محمد طارت عيونه بخالد ( اكيد زوجها )
ريم : مشكور مابي شي ... لا تتأخر ترى اشتاق لك
ريم تعمدت تقول هالكلمة لما شافت ردة فعل محمد ؟؟؟ لما طلع خالد تم محمد يطالع بريم وهي حست انها غبية بهالحركة
سارة : ريم منو هالمزيون اللي وياج ؟؟؟
ريم بترفع ضغطها : لا تقولين جذي اغار عليه
محمد بلقافة : زوجج ؟؟؟
ريم ابتسمت ولفت من غير أي رد
محمد بغى يموت وهو يفكر ( شفيك جذي اول مرة تشوف المرة انجنيت عليها وسارة ميته عليك وكل يوم تلمح لك ومو معطيها وجه ... بس فرق وحدة عارضة نفسها ومطلعة مفاتنها للي يسوى واللي ما يسوى ووحدة محترمة وساترة نفسها وحلوة )
لف محمد وكمل شغله


مثل عادته قاعد يفرفر بين مكاتب الموظفين ودخل على ريم اللي ما حست بدخلته
ووقف قدامها وللحين مو حاسه كانت تكتب ومنشغلة عشان جذيه مارفعت راسها
طق المكتب بإيده حيل وطلع صوت خلى ريم تفز من مكانها وتصارخ ... وجا خالد ركض بعد ماسمع صراخ اخته ومسك الاستاذ احمد من دشداشته ولف على ريم
خالد بعصبية : ريم شنو سوا لج هالحيوان ؟؟؟؟؟؟
ريم انحرجت حدها : خالد هذا مديرنا
خالد برد وجهه وهد دشداشة احمد : اسف بس انا سمعت ريم تصارخ حسبت احد مزعجها
احمد عدل دشداشته وغترته : لا عااادي ... انا لو مكانك سويت نفس الشي ( لف على ريم ) آسف حيل حيل اذا خرعتج
ريم وهي للحين منحرجة : عااادي
خالد : ماشاء الله شكلك صغير مولايق على مدير انا اخبر المدير شايب طايحه ضروسه
احمد يضحك : ههههههههههه شدعوه انا صغير حتى انا شايب بس ما طاحت ضروسي
ريم تفكر ( شلون شايب بهالجمال !!!! يعني كم عمره ؟؟؟؟ )
خالد منحرج : اسمحلي مرة ثانية انا آسف على اللي صار بس من غير تفكير صدقني ريم غالية علي ولا ابي أي شي يزعجها
احمد بلطف وذوق : ريم بنتي لا تحاتيها بس انا شفتها سرحانه حبيت اصحيها
خالد يتليعن : اووووف عاد ريم ام السرحان كله
احمد يطالع ريم ويبتسم : اللي ماخذ عقلها يتهنا به
خالد : أكيد اخوها وحبيبها خالد ؟؟؟ صح ريوم ؟؟؟
احمد منصدم حده وفاتح حلجه ( فمه ): انت اخوها ؟؟؟ والله على بالي زوجها ...
قعد يضحك ومحمد ارتاح لما سمعهم ( شكله يحبها ) وعرف انه اخوها يعني مو متزوجة ؟؟؟ وراح الاستاذ احمد وظل خالد مع ريم
وبعد تقريبا ثلث ساعة دقت هدى على خالد واضطر انه يستأذن





وصل خالد للمستشفى ولما ركبت ريم انصدم لما شافها تبجي
خالد : هدى حبيبتي شفيك ؟؟؟؟؟؟؟؟؟؟
هدى تبكي : ........
خالد خايف حده : شصاير خوفتيني ؟؟؟؟؟؟؟
هدى وهي تصارخ : ماكو شي ودني البيت بسرعه
سكت خالد وحط ايده على ايدها وطار بالسيارة لما وصلوا البيت بعد ماهدت زوجته شوي بالطريق
خالد برقه وهو حاط ايده على كتفها : هاااا يا قلبي بتقولين شفيك والا ازعل ؟؟؟
هدى تطالع الارض : اذا قلت راح تزعل واذا ماقلت هم راح تزعل
خالد يضحك : ههههه شنو هذا لغز ؟؟؟
هدى تشجعت : انا ...... انا ....... رحت اسوي تحليل كنت متوقعة اني حامل بس انصدمت لما طلعت النتيجة سلبية
خالد هدت اعصابه : الله يهداج خرعتيني على بالي صاير شي
هدى ردت تبجي : انا كنت فرحانه ومستانسة بس ....
خالد حط ايده وراها : عاااادي يا بنت الحلال تو الناس عالجهال خلينا نعيش حياتنا ومتى ما جاوا العيال حياهم الله
هدى تغطي وجهها بيدها : حنا صار لنا سنتين متزوجين وللحين ما عندنا عيال
خالد : عاااادي يا قلبي ؟؟؟ جذيه أحلى شوفي حنا بشهر عسل من سنتين ... عمرج شفتي ناس بشهر العسل وعندهم عيال
هدى تغير مزاجها وصارت تبتسم له : لا ما شفت
خالد : شوفي حياتي بقولج شي وابيج تفهمينه عدل ... انا تزوجتج لأني احبك وابيج انت سواء جبنا عيال او لأ ماراح اتخلى عنج ابد راح تكونين زوجتي طول العمر وسالفة العيال لا هي بيدي ولا بيدج هذي من رب العالمين هدية يعطيها اللي يبي ويحرم اللي يبي منها وانا ما ابي هالموضوع يكدرج ولا يضايقج لانج لي وانا لج دايم . اوكي ؟
هدى ارتاحت : توعدني يا خالد ؟؟؟؟
خالد : وعد
هدى : خلاص اوكي




مرت فترة وريم تشتغل وتقريبا كل الاحداث متشابهه كل يوم تشوف احمد وكل يوم محمد يحبها اكثر لدرجة ان سارة لاحظت حبه لها ومافيه يوم يمر من غير مايسوون الشله ( حسن وراشد وسعود ومشاري ) مقالب بربعهم بالوزارة بس ريم للحين ما سوووا فيها شي
اما خالد وهدى اتفقوا انهم يكملون شهر العسل اللي مو راضي يخلص ( ماشاء الله )
ويخلوون سالفة العيال على الله
عبدالله مسوي نفسه شاد حيله وهو لعب وسوالف بالنقال
اريام مثل روتينها اليومي دراسة وواكل وافلام



يوم الخميس كانوا رايحين للبيت عمهم ناصر ومعاهم هدى وخلود

ام فهد ( مرت عمهم ) : شلونج ياريم مع الدوام ؟؟
ريم : الحمدلله ياعمه
ام فهد : والله ان سعد كسر الدنيا يوم درا انج داومتي مع رياجيل
ام فهد تلمح لانها تبيها لسعد ولدها بس ريم ما تبيه وقايله لابوها لانه خطبها اول ما خلص دراسته ( هندسة ) وهي حطت عذر انها للحين ما خلصت واجلوا السالفة اللي شكلها بتنفتح من جديد
ريم : والله شسوي هذا المكان الوحيد اللي يقبلون شهادتي فيه .. وبعدين اذا ابوي راضي شعلي من الناس
فهمت ام فهد ان ريم تلمح ماتبي ولدها
ام فهد : بس ولدي مو أي ناس ولد عمج ومسؤول عنج
ام يوسف بتغير الموضوع : الا يا منى وين مزيونتكم الجديده شروق ما شفتها
منى ( مرت فهد ): والله نايمه فوق
ريم : يا حلوها ما كبرت
منى تبتسم لها : الا كبرت صارت مره
ام يوسف : وانت يا منيرة شخبار دراستج
منيرة : اوووف مليت متى اتخرج وافتك
ام يوسف : هذا انت وهذا عبدالله الدراسة بصوب وهو بصوب
منيرة : لا عاااد مو مثل عبدالله انا ادرس
ريم :عبود عجيب ذاك اليوم مقفل غرفته وقايل لحد يزعجني بدرس ولما رحت بوديله شاي طقيت الباب ما رد علي استغربت وطقيت الباب حيل والا يرد وصوته مبين كان نايم ههههه
الكل : هههه الله يقطع بليسك



وفي يوم كانت ريم قاعدة بمكتبها ... دخلت عليها سارة
سارة : ريم انا عازمتج بالكوفي شوب ... ابيج بموضوع
ريم مستغربه : خير شصاير
سارة : كل خير يالله تعالي
ريم : والله ما اقدر اطلع اهلي موصيني مااروح أي مكان برا الوزارة
سارة : ريم شفيج الكافييه تحت مو برا
ريم : مدام جذي اوكي



نزلوا الكوفي شوب وقعدوا يسولفون شوي بعدين ....
سارة متردده : ريم شرايج بمحمد ؟؟؟؟
ريم دايخة : منو محمد ؟؟؟
سارة : شفيج !!!!!!!!!! زميلنا اللي معانا بالمكتب .
ريم تذكرت : ايه !!!! بصراحة خوش رجال خلوق ومحترم وما عمره قصر معاي كل ما احتاجه القاه قدامي ..
سارة للحين متوتره : بصراحة ريم ما ادري شقول لج ..
ريم : شفيج سارة قولي ولا تستحين
سارة : ريم انا احب محمد من اربع سنين واحنا مع بعض ولما يجون ناس يخطبوني كنت ارفض عشانه بس انا ....
ريم : كملي سارة !!!
سارة مترددة : انا لاحظت انه يحبج وفيه ناس قالولي انه ناوي يتقدم لج ... تكفين ريم انا اموووت عليه وراح انجن لو تزوج غيري
ريم : شوفي سارة انا بنصحج لوجه الله انت مثل اختي واحنا صارلنل مع بعض اكثر من خمس شهور وعرفنا بعض عدل ... محمد اذا كنت عاجبته فأنا ما فيني شي احسن منج بس الفرق اني متحجبه وملتزمة وانت كاشفة عمرج لكل الناس ... شوفي سارة انت بنت مسلمة والرجال الشرقي يحب المرة اللي يبي يتزوجها ملتزمة ومحتشمة ومحمد اوعدج اني ما آخذه لو كان آخر رجال في الدنيا لاني في بالي واحد ثاني ...
سارة بعد ما حاولت انها تبتسم : منو ؟؟؟؟؟؟؟؟؟
ريم : ما اقدر اقولج الحين ... يالله خلينا نصعد ترى تأخرنا




لما وصلوا المكتب لقوا الاستاذ احمد مرسل السكرتيرة تنادي ريم ... راحت ريم له وقلبها يقرقرع ( شكلها تحبه ما تدري ليش هو غير عن كل الناس عندها لما تشوفه قلبها تزيد دقاته ولما تسمع احد يتكلم عنه تفرح وتستانس ولا هي عارف ليش ودايم تسأل نفسها ( احمد بحياتي من يكون ؟؟؟ معقوله انا احبه خصوصا انها عرفت انه اكبر منها بعشرين سنه ؟؟؟ وهل هو يفكر مثل ما انا افكر ؟؟؟) وهي تمشي تفكر وفي بالها ميه سؤال شيبي فيها المدير
وصلت ريم عند باب المكتب وطقت الباب وهي ترجف لان الاستاذ احمد اول مرة يطلبها بمكتبه ... وهي ما تدري شنو يبي فيها ... طقت الباب مرة ثانية وسمعت الاستاذ يقول : تفضل
ريم : السلام عليكم
الاستاذ احمد كان معطيها ظهره ويشتغل عالكمبيوتر واشرلها تقعد : وعليكم السلام
وخلاها عشر دقايق وهي قاعده تتأمله ياحلاته مع انه كبير في السن بس جذاب وحلو ... تمت تطالعه وهو يشتغل وعيونها ما ملت وودها تطالع اكثر واكثر... بعد عشر دقايق سكر اللاب توب ولف عليها والابتسامه شاقه وجهه : حيا الله الريم
ريم : الله يحييك احمد : شلونج ابوي ؟؟؟
ريم انصدمت ( احبه وناويه اتزوجه ويقولي ابوي ) سكتت شوي بعدين : الحمدلله
احمد : شلونج مع الشغل ؟؟؟ اسمحيلي من زمان ما سألت عنج بس والله كنت مشغول
ريم تجامله : مو مشكله عااادي
احمد مبتسم : شلون اخوج اللي ما يغشمر ؟؟؟
ريم تضحك : ههههه خالد !!! زين
احمد تحول لشخص جدي و( عاقل ): ريم انا بكلمج بموضوع خاص
ريم خااايفة : تفضل
احمد : عاااادي عندج تتزوجين واحد من برا قبيلتكم ؟؟؟
ريم ( ياااااي اكيد بيخطبني ) : اذا كان ولد ناس ومحترم ليش لا ..
احمد : بصراحة محمد كلمني عنج ومحمد عندي مثل ولدي وقالي اشوف رايج بالاول واذا كنت موافقة يتقدم لج رسمي
ريم تفاجأة ( لهالدرجة يهتم بموظفينه ) ( وانا كنت اتوقع انه بيخطبني لنفسه طلع ما يفكر فيني ولا بيزوجني بعد يا ربي شلون اخليه يحبني ؟؟؟؟؟)
احمد شافها ساكته : تبين وقت تفكرين وتردين علي ترى عااادي اهم شي تفكرين عدل
ريم : لا ... بس انا ما اقدر اتزوج محمد
احمد : ليش يا ريم محمد محترم ومن عايله معروفة و ...
قاطعته ريم : وسارة تحبه !!!!
احمد : سارة اللي معاه في المكتب
ريم : بس اهو ما يفكر فيها
احمد : ليش ما يفكر فيها ؟؟؟
ريم : ما ادري بس انا اشوف انهم مناسبين لبعض
احمد : شوفي ريم بقولج شي .. الرجال فينا اذا بغى يتزوج ما يدور وحده عارضة نفسها للكل اكيد يبي وحدة ما يشوفها غيره عارف اخلاقها و واثق انها راح تربي عياله احسن تربيه
ريم : بس سارة ما فيها شي يعني عشانها تلبس لبس ما ادري شلون صاير ... لا انت ولا محمد تقدرون تتكلمون عليها ولا تغلطون فيها ومو ضروري اللبس يكون دليل على الاخلاق
احمد : ما شاالله عليج يا ريم .... بس صدقيني اللبس جزء كبير من الشخصية
...
سكت شوي بعدين كمل : خلاص يا ريم انا ببلغ محمد وبحاول المح على سارة
ريم : تكسب اجر في سارة المسكينة
احمد : اوكي مشكورة يا ريم على وقتج
ريم : العفو



بعدها بيوم انصدمت ريم ومحمد لما دخلت عليهم سارة ... ما صدقوا عيونهم هذي سارة اللي دايم بنطلونات ضيقة وباديات عارية وفل ميك اب
كانت لابسة عبايه كتف وملفع اسود ومو حاطه مكياج وكانت احلى منها كل يوم
محمد : سارة شنو هالتغيير ؟؟؟
ريم : يااااي سارة ما عرفتج ....
سارة : للأحسن ولا للأسوأ ؟؟
محمد : طبعا للاحسن
استانست سارة من قلب عدها تطير من الفرحة ...
ريم : شكلج رووعة
سارة : مشكورين

وقعدوا وهم كل واحد مو شايلته الارض من الفرحة عقب سارة والتزامها اللي كان لريم دور كبير فيه مع انها ماكانت متوقعة ان سارة راح تتقبل نصيحتها بهالسرعة بس هذا دليل على انها تمووت على محمد


بعد ربع ساعه غمزت ريم لسارة وفهمت سارة معنى الغمزة ... ولفت ريم على محمد : محمد ممكن اتكلم معاك شوي
محمد مستغرب : طبعا ممكن
سارة قامت عشان ما تخرب عليهم : عن اذنكم عندي شغل برا

طلعت سارة وكملت ريم : بصراحة انا ماني عارفة شلون ابتدي معاك بالموضوع؟؟؟
محمد سهل عليها السالفة : الاستاذ احمد كلمج بالموضوع ؟؟؟
ريم منحرجة : ايه !!!
محمد : شرايج ؟؟؟
ريم استجمعت قواها : محمد انت رجال والنعم فيك بس انا مستحيل اتزوجك لاني عرفت ان سارة تحبك ... وسارة بنت ماشالله عليها الحين
محمد : ادري ان سارة تحبني وانا بعد اعزها واحترمها بس ما افكر فيها كزوجة
ريم : بالعكس انت وسارة لكم مده طويله مع بعض وكلكم من نفس العايله يعني حيل لايقين لبعض ... انت يامحمد اخوي ولو انك طلبت مني اني اختار لك عروس من غير تردد راح اختار سارة
محمد : انا ما اكره سارة بالعكس سارة حيل تفهمني وتحس فيني لما اكون متضايق ..
قاطعته ريم : خلاص بعد ليش ناطر روح بسرعة وتقدم لها الزواج مو شرط يكون عن حب لان الحب يجي بعد الزواج ومدام انتو متفاهمين وتحسون ببعض تزوجوا
محمد بدا يقتنع : ما ادري ... يبيلي كم يوم افكر
ريم : اكيد لازم تفكر هذا زواج بس لا تطول ترى الحلوين ينتظرونك





في البيت ريم قاعدة مع هدى واريام بالصالة وقالت لهم سالفة محمد كلها
هدى : يا خبله محمد روعه ليش ما وافقتي ؟؟؟
ريم : ياربي اقولج سارة تحبه
اريام : انت شكل عينج على احمد قصدي الاستاذ احمد
هدى : لا ما اظن احمد قالت لي اكبر منها بعشرين سنه يعني اكيد متزوج وعنده عيال
ريم : لا مو اكيد يمكن مضرب عن الزواج
اريام عالخط مع ريم : او يبي يتزوج عن حب
هدى تتطنز : وانت اللي بيختارج بعد هالعمر
ريم معصبه : ياسلام وانا شنو ناقصني جمال واصل وفصل واخلاق
هدى : والله شكلج تحبينه يا ريوم
ريم تحاول ترقع : لا بس استلطفه يعني مو حب نفس الافلام
هدى : ايه الحب اول شي استلطاف بعدين جنون
ريم تطالع اريام : ريمو حبيبتي سويلنا نسكافيه من ايدينج الحلوة
اريام : يعني ضفي وجهج
ريم : بالضبط ... ماشاالله عليج
اريام قامت وهي معصبة : مالت عليج وعلى اللي يقعد معاج ياااا مدام احمد
ريم استانست ورفعت يدينها (آمين )
طلعت اريام وسكرت الباب ولفت ريم على هدى :
هدى انا بعترف لج بشي ....
هدى على طول فهمت : تحبينه ؟؟؟
ريم اعترفت اخيرا : ماحد يفهمني مثلج
هدى : بس ريم احمد مو مناسب لج بالمرة اكبر منج بواجد
ريم : والله يا هدى مو بكيفي .. انا اول شي كنت اكرها لما زفني اول يوم وقعد يناديني شقحة بس بعدين عرفت شخصيته وعرفت انه روعه بكل المقاييس وحبيت اسم شقحة منه
هدى : زين ... هو شرايه فيج ؟؟؟
ريم : هذا اللي ذابحني يعاملني مثل أي موظفة ولا بعد يعتبرنا بناته
هدى تتكلم بجد : هذا دليل انه ما عنده خرابيط ولا يفكر بشي عشان جذيه اقولج ديري بالج توضحين له أي شي ولا تتمادين ترا والله تخسرين
ريم : هدى مستحيل انزل نفسي لا له ولا لغيره
هدى : مدام جذيه خليج طبيعية واذا الله كاتبه لج بتاخذينه واذا طلع متزوج لا تفكرين تقربين منه
ريم : لا انشاالله مو متزوج




دخل خالد الشقة لقاها ظلمه باب غرفة النوم مطرف وطالع شويه ضوء دخل بهدوء لقى هدى متمددة على السرير بدون لحاف ولابسه شورت وردي فاتح وبادي كوكتيل ابيض وماسكة تلفونها ووتعبث فيه طلع خالد وراح للمطبخ اللي كان بعيد عن غرفت النوم وحط نقاله وكتب رساله وقعد ثانيتين وسمع صوت المسج عند هدى ... فتحت هدى المسج وشافت المرسل وكان خالد
" أ "
استغربت من المسج شنو قصده اكيد دزه بالغلط وقعدت شوي وكان يوصلها مسج ثاني من خالد
" ح "
وبعد دقيقة مسج ثالث " ب" وشوي مسج رابع " ك "
هدى لمت التلفون على صدرها لما عرفت قصده وكتبت له مسج " وانا امووووت فيك " وبعد ثانيتين اسمعت صوت المسج بالمطبخ وراحت تشوف بالمطبخ والا تلقى
خالد وكان حيل فرحان بس تفاجأ لما تبطلت اللمبه ( الليت ) وطق على راسه لانه غبي ما حط تلفونه على الصامت عشان يلعب باعصابها عدل رفع راسه وشاف هدى واقفه عند الباب وتبتسم
خالد انحرج لانه كان متربع فوق الطاوله اللي بالمطبخ وشكله غلط ... نزل بسرعه ووقف عدل
خالد يرقع : مرحبا !!!
هدى تجاريه : مراحب !!!
خالد يكمل : شلونج ؟؟
هدى : بخير عساك بخير !!!
خالد يستعبط : شلون الوالد والاهل ؟؟؟
هدى : يسلمون عليك
خالد : الله يسلمهم والله اني مشتاق لهم وودي اروح اسلم عليهم ... ( طالع ساعته اللي بيده وكمل ) يا سلام فيه وقت اروح وارد ... يالله تامرين على شي
هدى عصبت : والله ... انا ما صدقت انك تجي صار لي ساعة انطرك بالاخير تبي تروح .. ليش ما اشتقت لي ...
خالد مات من الضحك
هدى للحين معصبه : شاللي يضحك استاذ خالد ؟؟؟
خالد يحاول يتكلم : ههههههههه انت ... ههه على طول بطيتي اللي بقلبج الحين عرفت ليش قاعده على السرير وتقرين المسجات بولهه ... اثاريج مشتاقه لي
هدى استحت وتحاول ترقع : لا مشتاقه ولا شي اساسا كنت اراسل رفيجتي من زمان ما كلمتها
خالد يستعبط : اهاااا ... يعني خلاص اروح
هدى تتودد : لأ ..
خالد استانس : ليش ؟؟؟
هدى بنعومه : بس جذيه !!!
خالد يحاول يسحب اعتراف : جذي بدون سبب ؟؟؟
هدى : لا في سبب بس .... ( تبي تحرق اعصابه ) استحي اقول
خالد بدا يستمتع وينطر الاعتراف : لا عااادي يا عمري قولي
هدى تماطل : لا ما اقدر
خالد بابتسامه شيطانيه : هدهودا انا زوجج عااادي قولي ياقلبي
هدى : يعني اقول عااادي ما تفهمني غلط ؟؟؟
خالد بدا يوصل للي يبيه : سمي
هدى بابتسامه حلوة وهي تلف خصله من شعرها : خللودي بصراحة ... انا ...
خالد فرحان حده : كلي آذان صاغيه قولي !!!
هدى : بصراحة فيه فيلم رعب عطاني اياه عبود وخايفه اشوفه بروحي وابيك تشوفه معاي !!!
خالد انصدم وخابت آماله : ........!!!!
هدى : هااا حبيبي شقلت ؟؟؟
خالد : .........!!!!
هدى : خلللود شفيك ؟؟؟
خالد جمع حطامه وخيبه اماله وطموحاته اللي تكسرت : يعني انت تنطريني بس عشان الفيلم ؟؟؟
هدى : بس ... شفت شلون انا احبك وما ابي اتعبك ؟؟؟
خالد بابتسامه صفرا : شفت وياليتني ماشفت !!!!
( مسكين خالد )



ريم قاعدة بغرفتها عاللاب توب تلعب لابسه بيجامه اصفر ورافعة شعرها بطريقة عشوائيه ... شوي والا يطق عليها الباب
ريم تسأل : منو ؟؟؟
طلع صوت ما توقعت تسمعه او انه يجي لغرفتها : انا يوسف ... ممكن ادخل
ريم ارتبكت معقوله : حياك تفضل ..
دخل يوسف وقعد على صوفا قريبه من طاوله الكمبيوتر
يوسف : ريوم انت للحين زعلانه ؟؟؟
ريم : لا ليش ازعل انت ما سويت شي بس طقيتني جدام الكل
يوسف بطيبته الطبيعية : افا ما تتحملين مني شي ... انا اخوج يسوف
ريم تمشي السالفة : اوكي خلاص حصل خير
يوسف يقلدها اوكي خلاص حصل خير ... انا ابيك تسامحيني من قلبج
ريم : ............
يوسف : عشان جذيه انا بطلع معاج انت والماس وسلوم ونروح نسهر برا واذا تبين نروح السينما ماعندي مانع باجر خميس عااادي ... ماراح نرد الا الساعة 3
ريم تموت بالسهرات وهي طايرة من الفرحة : يااااااي والله
يوسف : طبعا كم ريم عندي
ريم : زين ابي اريام تجي معانا
يوسف : مايخالف



طلعوا سهروا برا واستانسوا بس ردوا البيت الساعه 1ونص لانهم طفت بطارياتهم وخلص شحنهم من التعب
ردوا على طول وكل واحد لفراشه وناموا بسابع نومه





يوم الخميس الساعة 10 ونص
هدى نايمة وخالد يحاول يقعدها وبنفس الوقت يتأملها وهي نايمه ... الوجه اللي حبه وكل يوم يحبه زود
خالد يطق على كتفها بشويش : هدهودا يالله قومي الساعه عشر ونص
هدى تلف الجهه الثانيه وتعطيه ظهرها : يووووه ابي انام
خالد يلفها مره ثانيه جهته : عمري قومي ابوي ينطرنا تحت
هدى تكسر الخاطر: حرام عليك امس سهرانه خلني انام ما فيه شغل ولا شي
خالد : ادري حبيبتي بس ابوي عازمنا على الغدا يبي يطلعنا البر يقول من زمان ماراح
هدى تتثاوب : اوكي مدام عمي اللي عازمنا بقعد
خالد : يالله انا بروح اسويلج نسكافييه عشان تصحصحين
هدى ارسلت بوسه لخالد بالهوا
خالد يضحك : ههههههههه بدينا ؟؟؟



يوسف : ها حبيبتي جهزتي العيال
خلود : شوف ماس مو راضيه تلبس هذي البدله
يوسف يكلم بنته الماس : ماسو حبيبتي ليش ما تلبسين البدله ؟؟
ماس : بابا هادي عديمة كل ناس سافوها ( هذي قديمه كل الناس شافوها )
يوسف متعجب : ياويلي حتى انت تعرفين كل الناس شافوها ... خلاص البسيها اليوم وباجر نروح السوق ونشتري بدلات واجد ... زين ؟؟؟
الماس : دين !!
يوسف يلف على خلود : وانت خوختي لبستي ؟؟؟
خلود : ايه حبيبي بس البس عباتي
يوسف : كفو يالله انا باخذ العيال وانزل وانتي البسي والحقينا ما نبي نتأخر عالوالد
خلود : من عيوني


بالصالة الكل كان جاهز وقاعدين ينطرون هدى وخالد وابو يوسف معصب عليهم
بعد شوي نزلوا مع بعض ماسك ايدها ويضحك
بو يوسف ماقدر يتحمل : ماشاالله معاريس
هدى وخالد انحرجوا ما دروا ان الكل ناطرينهم
مشى خالد بسرعة وباس على راس ابوه : سامحنا يالغالي
سالم : لا عا اتعودها
خالد : ابشر



راحوا للبر وحطوا خيمتين وحدة كبيرة يقعدون فيها ووحدة صغيرة للخدم والجهال
سالم كان حيل مستانس وقاعد يسولف لعياله عن قصص الشيبان قبل
سالم : تذكرين يام يوسف يوم يضيع يوسف في البر
مريم : ايه اتذكر يوم انك طقيتني عشانه
يوسف منصدم : انا ضايع ؟؟؟
سالم : انا طقيتج ؟؟؟
مريم : ايه تقول ليه ما انتبهتي له
سالم حط يده على كتف مريم : عورتج ؟؟
مريم : ايه ... بس عااادي نسيت
سالم : الله يقطع اليد اللي تنمد عليج
مريم : اسم الله عليك ... كل اللي يجي منك حلو
الكل ضحك بس خالد الوحيد اللي ما قدر يمسك نفسه من الضحك
خالد :هههههههه اشوف يبه طيحت الميانه ... وتتطنز علينا بعد ... يبه كلنا في الهوا سوا
سالم : وجع انت ما ينقال شي قدامك
خالد : لا بس لا تسوي نفسك ثقيل وانت ..... من تحت لتحت !!!
حذف سالم علبه الكلينكس ( المناديل ) على خالد والكل قام يضحك
عبدالله : يبه زوجني ..
سالم : انت خلص درسك بعدين فكر بالزواج
عبدالله : انت اصرف علي وعليها لما اتخرج
سالم : شاللي معجلك ؟؟
عبدالله : انت وامي صراحة تفتحون نفس الواحد عالزواج
الكل باستثناء الام والاب : ههههههههه
وطق خالد كفه بكف عبدالله ( يعني كفو غلبناهم )
وبعدها حطوا البنات الغدا وتغدوا وهم مستانسين وعدت فترة العصر وهم يسولفون ولما بدت تظلم راح خالد يتمشى مع هدى
خلود : شوف شلون يحبها ... ليش انت ما تحبني مثله ؟؟؟
يوسف : جهال
خلود : يا بختها
يوسف : عشان احبج لازم افضح نفسي جدام الكل ... انا احبج بس بطريقتي .. اما خالد باايعها ما يستحي
خلود : زين ... قوم خلنا نتمشى
يوسف : لا انا بقعد مع ابوي بتروحين روحي بروحج
خلود : مالت علي وعلى حظي


ريم دق تلفونها لما شافت اسم المتصل استغربت ( سارة شعندها داقة )
ردت ريم : الو
سارة بلهفه : قوه ريم شلونج ؟؟؟
ريم : هلا .. الحمدلله انت شلونج ؟؟
سارة : انا باحسن حال ... ريم بصراحة انا ماني عارفة شلون اشكرج على اللي سويتيه معاي ... تصدقين ان محمد جاي اليوم العصر يخطبني
ريم فرحانه : واللـــــــــــــــــه ... الف الف مبروك تستاهلين
سارة : الله يبارك فيج ... مشكورة يا ريم لولاك ما صار هالشي
ريم : لا تشكريني انا ما سويت شي وبعدين الاستاذ احمد ما قصر
سارة : يالله ريم اخليج الحين بااااي
ريم : بااااي
ريم فرحانه اليوم ومحد قدها شي حلو انها توفق بين راسين وتجمع اثنين يحبون بعض بقفص ذهبي ويكملون باقي حياتهم مع بعض


هدى تتوسل : خالد تكفى خلنا نرجع ترا حيل بعدنا ..
خالد يتحرش : ليش خايفة ؟؟؟
هدى : لا بس ..
خالد جننها : خااايفة صح ؟؟؟
هدى تبي تقنعه : لا بس والله ظلمه
خالد مصر على رايه : يعني خاايفة ... اعترفي ؟
هدى معصبه : انت شفيك ؟؟؟ مو خايفة من الظلمة انا خايفة منك .. خايفة تفضحنا عند اهلك ..
خالد يتمسكن : انااااا !!! افا يا هدهودا افا
هدى تلف وجهها عنه بدلع : ما تكسر الخاطر
خالد يلف الجههة الثانيه ويصير مقابلها ويمد بوزه : متأكدة ؟؟؟
هدى بدلع : خلللود زعلت ؟
خالد مسوي نفسه زعلان : ايه
هدى : اسفة
خالد مقهور : بس جذي اسفة حاااف
هدى ناوية تجننه : تبي بوسه ؟؟؟
خالد مستعجل : وهذي فيها سؤال ؟؟؟
هدى بمكر : ردني للخيمة اول
خالد عارفها : ههههه العبي على غيري
هدى : افا والله افا
خالد ما نطرها تكمل جملتها وخذا منها اللي يبي ^_^ بعدين ردها للخيمه


كملوا سهرتهم لحد الساعة الساعة 2ونص ردوا عشان يمديهم يعقدون مبكر يوم الجمعة ويتسبحون ويروحون للصلاة
والكل كان مستانس ماعدا خلود المسكينه

ريم مستانسه : لان محمد خطب سارة وقدرت تسوي شي حلو بين الاثنين
خالد : قدر يسعد هدى ويعطيها من حبه اكثر واكثر
هدى : عرفت شكثر خالد يحبها وهي تحبه
يوسف : قعد مع امه وابوه وقالو له قصته لما ضاع وشلون ومتى لقوه
اريام : تلعب كره شويه مع اخوها عبدالله
مريم : فرحانه لما شافت عيالها فرحانين
الماس وسالم عيال يوسف : لعبوا بالتراب لما قالوا بس
سالم : اكثر واحد استانس بلمه عياله وانهم مع ببعض
عبد الله : قدر انه يمسك شي على ابوه عشان وقت الحاجة



انتظروني في الاجزاء القادمة واللي راح تعرفون فيها :
سبب المشكلة والمصيبة اللي صارت لخالد وهدى وشلون دمرت حياه الاثنين وذبحتهم قهر
اما ريم واحمد راح تتطور علاقتهم وراح تنعدم كل الحواجز وراح تتزوج ريم من شخصية اتوقع كلكم تعرفونها بس شلون راح تكون حياتها بعد الزواج خصوصا انها تحب احمد واعترفت جدام نفسها بهالشي
اما خلود ويوسف راح يصير لهم سالفة تبين معادنهم ويطلعون على حقيقتهم
كل هذا واكثر بالاجزاء القادمة انشاالله
مع تحياتي : عـــ الجروح ـــذب