قصة للتفاؤل :) :) :)

السلام عليكم ورحمة الله وبركاته..
كل عام وأنتم بألف خير وندعوا الله في هذه الأيام الفضيله أن يرزق كل وحده فينا مبتغاها ويقضي حاجتها عاجلاً غير آجل..
اليوم ابغى احكيلكم قصه تخلينا نتفائل ونجتهد في الدعاء وندعي لبعضنا .. عندي وحده من قريباتي وصلت لسن ال 35 تقريباً وما اتزوجت مع انو كثير اتقدموا لها بس سبحان الله ما كان يحصل نصيب اتخرجت من الجامعه وبعد فتره من تخرجها اتوظفت في مدرسه خاصه ويمر الزمن وهي ماتزوجت بس هي ماشاءالله انسانه خلوقه جداً وقايمه بأمها وأبوها لأن ماعندهم احد أختها الكبيره متزوجه من بدري وانسانه حكيمه دايما يرجعو لها الناس عشان ياخدوا برايها وماشاءالله كل من يدعي لها دايماً أسمع الناس يدعوا لها ..
طيب وايش اللي صار؟.. ماشاء الله قبل فتره اتقدم لها واحد اكبر منها بس قريب منها في العمر جداً وخلوق جدا ًوماسبق له الزواج قبل كده وعلى طول حملت ماشاءالله وقبل كم شهر جابت لها ولد زي القمر ماشاءالله حتى اني دايم افتح جوالي على صورو واجلس اتفرج فيها من جمالو لا قوة إلا بالله الله يحفظو لهم ويرزقهم بره..
ومو كده وبس .. كمان عندها اخوها مقتدر اشترى بيت جديد وقام عطاهم بيتو هي وزوجها يسكنوا فيه لغاية مايعمروا بيت بدل مايجلسوا ف بيت اهل زوجها ..
وآخر شي ماشاء الله جاتها وظيفه حكوميه وهي دحين مبسوطه يارب لك الحمد الله يديم عليها يارب..
يعني سبحان الله ربي لما يعطي يدهش عباده بعطائه واحنا لازم ندعوه ونطلب منه ونلح في الطلب والمسأله وننتظر كل جميل ومفرح من الله سبحانه وتعالى..
يلا نشد الهمه وندعي في يوم عرفه وكمان يوم جمعه يعني الدعاء مستجاب لا محاله ( وقال ربكم ادعوني استجب لكم ) ولا تنسوني من دعواتكم وأنا بعد راح ادعيلكم لأن الملك يقولك ولك مثلها..
ادعوا لي بالزوج الصالح عاجلاً غير آجل..