قصة مريت فيها.. الشي اللي ندمت عليه .. الكل يدخل

السلام عليكم ورحمة الله وبركاته.. اول مرة اكتب في المجلس العام بس حبيت الكل يستفيد من تجربتي ..

بنات انا متاكدة انكم راح تلموني بس انا مابي لوم لاني لمت نفسي بما فيه الكفايه..
اسمعو قصتي..

تزوجت قبل سنه وثمان شهور ..اخذت حبوب منع الحمل لمدة شهرين وتركتها من كثر امي ماخوفتني منها..وماكان في بالي احمل ولاابي احمل قبل مرور سنه .. المهم حملت على طول.. سبحان الرازق ححلت يوم 10 رمضان كان يوم اربعاء قعدت ابكي وتنكدت مرة..
تدرون شسويت كنت انط من فوق السرير عشان اسقط الحمل.. مادري شلون سويت كذا... بيتي دور علوي وكانت غرفة الغسيل فوق يعني بالسطح كنت اطلع لها وانا انط..عشان اسقط حملي وماعلمت احد لا امي ولا زوجي المهم مشيئة رب العالمين كانت فوق مشيئتي...
حبيته وهو في بطني.. حسيت بحراكته وكنت اتتبعها كل ماكبر حبيته اكثر .. ندمت على اللي سويته .. اول مرة شفته بالاشاعه بكيت من قدرة الله سبحانه كيف قدر لي احمل هالبذرة داخلي حسيت فيه قبل مايحس فيه ابوة حملته قبل لايحملة ابوة ...وكملت الحمل تسع شهور وانا في تعب مايوصف..
اول الصيف ولدت اول الصيف وجبت ولد زي القمر سميناه محمد الله يفظة يارب.. تدرون بعد ماجبته عرفت معنى الحب... احبه يابنات واموت فيه عمره الحين تسع شهور اعشقه احبه اموت فيه اخاف عليه من كل شي علمت امي وش سويت .. وانا في الاربعين عندهم زعلت علي وهاوشتني... فعلا يابنات مدري ليه سويت كذا ماتخيل حياتي بدونه كيف صار في بيتنا طعم وحياة فرحت وطرت من الفرحه لما شفت يضحك وهو ابو شهرين وكيف يستجب لي لما العبه.. وكيف فرحت وتشققت لما مشى اول مرة في المشايه ..كيف طرررررررت من الفرحة لما نطق اول كلمة وكانت بابا.. زعلت كنت ابيه يقول ماما بس للحين ماقالها.. لما شفت اول سن ......ز يالله كنت مرة مبسوطة..
سريرة جمب سريري كل شوي اصحى اطمن عليه.. ابوس يدينة ..ابوس خدودة يقوم هو يفكرها رضعه يدور يمين يسار ... يالله ماتخيل بكرة ابي ازوجة وتجي حرمة ثانيه تاخذه مني وينام بحظنها بعد ماكان ينام في حظني..ماتخيل انه ممكن يخليني او يبعد عني...ماتخيل احد من العيال يطقه او يسوي له شي ابي اشوفه متعافي مبسوط ... والضحكه ماتفارق وجهه


سبحان الله هذا اللي كنت وانا اطلق اصرخ اقول مابيه.. هذا اللي كنت ابي اسقطه وانا حامل فيه....

سبحان الله سبحان الله

لما اشوف وحده من بنات المنتدى تبي الحمل والله اني ادعي لها من قلب واقول الله يرزقها.. عشان تجرررررررررب الحب الحئيئي

الله يرزقهم بالذرية الصالحه

اللهم امين اللهم امين