قصة وفاة امي الغاليه/ قديم

السلام عليكم ورحمة الله وبركاته
الموضوع قديم من 6 سنين بس الام ما نقدر ننساها طول عمرنا
كانت تشتكي رحمة الله عليها من الانيميا اللي هو فقر الدم الشديد وكانت دايما تشتكي من الصداع
المهم في يوم تعبت وخذوها للمستشفى قالو دمها نازل كثير ولازم فورا نقل دم ولانه ما في وقت التبرع يكون مننا عطوها من المستشفى كيس ويوم كلمتها عشان اتطمن عليها قالت بعد ما خلص الكيس تعبت وما اتحمل
المهم ثاني يوم نفس الشي تعبت بعد ما عطوها كيس ثاني وانا لاني من اماره ثانيه كان زوجي بالدوام وكلمت امي ويوم عرفت انها تعبانه من نقل الدم قلت بنتظر زوجي يرد من الدوام وبقوله يوديني لها ويوم رجع زوجي هو بنفسه قالي اول ما دخل يلا قومي نسير المستشفى عند امج لانها تعبانه ودخلوها العنايه
انصدمت لاني كلمتها قبل ساعتين او 3 وقالت انها تعبانه من نقل الدم وتبغي تنام
المهم رحنا المستشفى وكانو ابوي واخواني واختي وزوجها هناك قالو انه ابوي واخوي كانو عندها وتعبت ودخلوها غرفة الاشعه المقطعيه والله ما اعرف كيف اشرح بس اللي تكون مثل فتحه دائريه بالجار ويدخلون المريض فيها
المهم يوم دخلوها في هالمكان بدت ترتجف وتنتفض بقوه ومسكوها الممرضات وما قدرو يسيطرون عليها وطلبو ابوي واخوي يمسكونها بس اخوي انصدم من مظهرها وطلع من الغرفه يبكي
لانهم قالو انها حالة صرع فجائيه
وامي الله يرحمها عمرها ما اشتكت من شي
وعلى طول بعد هالحاله دخلت في غيبوبه ودخلوها العنايه ومنعونا من دخول الغرفه
بس اختي الاكبر كان مسموح لها تدخل من وقت لوقت وتتطمن
وما بقى احد من الاهل ما زار امي واي حرمه تسلم عليها كانت امي تنزل دموعها بدون اي حركه ثانيه
وتمت على هالحال لين المغرب وقامت ترجع دم وقالو انه دم فاسد
وبعدين الدكتوره انصدمت انه من بعد الدم الفاسد قامت ترجع دم نظيف بغزاره وما قدرو يوقفونه
وطلبو دكتور بروفيسور وشاف امي ويوم طلع من الغرفه قال اللي علينا سويناه وما عندكم غير الدعاء لها
طلع عندها نزيف في المخ
انا كنت حامل في الشهر السابع وواقفه في المستشفى من العصر لين بالليل فاختي قالت انتي روحي البيت وارتاحي خصوصا اني عندي بنت عمرها سنه تركتها بالبيت مع عماتها
المهم ما صحيت الصبح الا على موبايلي يرن اختي تقول تعالي بسرعه امي تعبانه
قومت زوجي من النوم ودخل يتسبح وتاخر اختي اتصلت مره ثانيه وهي منهاره تقولي وينج ليش ما ييتي امي خلاص بيودونها تعالي امنا ماااااااااااتت
انصدمت وما نزلت مني ولا دمعه
وطلع زوجي من الحمام وقلت له بكل برود امي ماتت
حضني وقالي اعرف لانه زوج اختج خبرني بهالشي بس ما بغيت اصدمج
ودخلو اخوات زوجي يبكون ويعزوني ويقولون لي لا تكتمين في قلبج صيحي وطلعي اللي فخاطرج
بس انا ما صحت الا يوم وصلت المستشفى وشفت اختي وبعدها صحت بنواح وصوت عالي يوم كشفو وجه امي عشان اشوفها وخالتي واختي ما قدرو يبعدوني عنها ونادو زوجي وهو قدر يسيطر عليه وياخذني بعيد عن امي
اذكر كنت امسح على جبهتها واكرر امي امي امي وانا اصيييييييييييييح بصوت عالي
وقلبي تقطع اكثر يوم شفتها ملفوفه فبطانيه والرجال من عايلتنا يدزون السرير لسيارة الاسعاف
ويوم غسلوها وكفنوها وطلبو مني ادخل واستسمح منها مع اني ما طولت لانهم قالو انا حامل وريحة الكافور مب زينه للحامل وطلعوني وانا ما ودي اترك امي
اخوي الصغير كان عمره سنه وسبع شهور في يوم العزى يدور بين الحريم يدور امييييييييييييي
وكلنا نصييييييييييح
الحينه امي كملت ست سنين بس هي في قلوبنا للابد
الله يرحمها ويغفر لها وكل اموات المسلمين
بعدها بسنتين توفى اخوي عمره 23 كان من المعاقين المنغوليين اللي يقولون عنها متلازمة داون وكان عنده تضخم في القلب
وبعده بشهرين توفت جدتي ام امي وبهعدها بسنه خالتي وكانت تعاني من السرطان
قبلهم كلهم توفى جدي الله يرحمه ابو امي
تقريبا خمسه راحو عنا في خلال 5 سنوات
والحمد لله على كل حال
الله يجمعنا وياهم في الفردوس ان شا الله