قصة ولادة دانه الشاطي قبل 3 شهور

مثل ماوعدتكم قصه ولادتي
اكيد فيه بنات يعرفوني ويعرفو الحاله اللي صابتني من دخلت شهري الثامن
عاد ابقول على السريع للبنات اللي مايعرفو عني
انا يابنات من دخلت اول يوم بالثامن صابني حالة خوف وهلع ولا انام ونفسي البطن ينزل باقرب فرصه فيه ناس تقول عين وناس تقول حسد والعلم عند الله بس الحاله اللي صابتن حاله غريبه ماهو خوف من الولاده لاوالله الحمد لله عندي 4 اطفال
المهم نووومي ان طولت ساعه بس باليوم والليله
المهم حاولت بالمستشفيات القريبه مننا انهم يولدوني ورفضو يقول كيف نولدك قبل موعدك واساسا شهرك مادخل
المهم زوجي يحاول يهديني وقالي بتولدي بمستشفى خاص علشان يهتمون بك وبالفعل رحنا لمستشفى خاص عندنا بالمدينه نفسه وقالولي فيه ابرة ظهر وفرحت قلت ولدوني هالحين ورفضو قالو اول ماتجيك اعراض الولاده تعالي ونولدك ومابتحسي بالالم واستانست شوي مع اني تعبانه نفسيا فيني شي غريب خوف وابي البطن ينزل وبس اناضر لبطني ابيه ينزل المهم في يوم الاثنين قمت الصبح معي مغص بس خفيف وقومت عيالي وراحو للمدرسه ورجع المغص ثاني وانسدحت على السرير تعبانه شوي والمغص كان معي بس خفيف مثل مغص الدوره وبعد مارجعو عيالي حطت لهم الغداء مع تعبي المستمر وتغدو وانسدحت شوي لاني ما انام من دخلت الثامن وهالحين لي 10 ايام في التاسع المهم
وزوجي تغدا ونام وانا معي مغص بس محتمل وعلى صلاة العصر قومت زوجي وقلت ودني للمستشفى معي مغص ووداني ولما دخلت جاء الاستشاري وكشف علي وقال مفتوح الرحم 3 سم قلت يعني ولاده قال ايوه واستانست لاني ابتخلص من بطني اللي ما انام وتعب وارق من دخلت الثامن وقالي الدكتور راح نحط طلق صناعي ونعطيك الابره وودوني لدور الرابع وحطو الطلق وذبحني الالم قلت يالله وين الابره قالو لسى لين مايكون الرحم فاتح 4 واناظر وانا اتحمل الالم الفضيع واخيرا صار 4 سم وجلسوني وخلوني امسك مخده وقامو يعقمون ظهري وحطو الابره ورجعت انسدحت بس والله الالم مستمر ورجليني ماتخدرو ابدا وانا اتحمل واقول يمكن شوي ويجي المفعول اخر شي عجزت لا اتحمل وفني التخدير عند راسي قلت يا اخوي الالم فضيع معي ويروح وانا اشوفه قدامي وياخذ بالابره من الفونتلين ويحطه بابرة الظهر ويجيني الم ودوران براسي واحس بيغمى علي واتحمل وكرر العمليه 3 مرات كل ما اقوله ابي شي يخفف الالم ولا فيه شي يخفف الالم وين ابرة الظهر اللي تقولو يروح ويحط من الفونتلين اخر مره حط فيها فونتلين صحت صياح كل المستشفى يمكن سمعوني لان احس عروق راسي تفجرت واصيح وابكي من قوة الالم والطلق ومن الدوران اللي صابني واصيح قلت لازم الدكاتره يجوني انا انتهيت مت خلاص ابي عمليه بس انتم كذابين ماحطيتو ابره ظهر ولا حسيت بتنمل ولا شي حطيتو الطلق الصناعي وتركتوني واصيح وفجاءه جوني الدكاتره كلهم ومن ضمنهم الاستشاري اللي جيته العصر تحت ووعدني انه يحط الابره وماحس بش قلت ليه يادكتور تكذب علي الالم معي وانا تعبانه حولني بس عمليه واصيح قال ولا يهمك ويكشف علي من تحت قال الرحم فاتح 7 ونص وانا صياح والم فضيع ليتو كان مثل ولاداتي بعيالي والله ولاداتي اللي قبل ارحم اقل شي ماهو طلق صناعي المهم وانا اصيح قال هالحين نعيد ابرة الظهر ولا يهمك ويحاول يهدي بي وقال اجلسي واجلس ويعطوني مخده ويعطوني ابرة الظهر للمره الثانيه بعد مافتح الرحم 7 ونص وسبحان الله تخدرت رجولي ولا حسيت بالالم الطلق الحمد لله بس بعد ماكنت خلاص ابموت
وقالي الاستشاري هالحين انا اولدك والرحم فاتح 8 وانا احس بس بحكه في كل جسمي وبس احتك وياخذ شوي قال الرحم فاتح 10 يالله خوذي نفس وكحي وانا اكح واكح واكح والحمد لله ويطلع البيبي ولا حسيت بطلعته الحمد لله ويخيطوني وانا ما احس باي شي وبعد ماولدوني بساعتين حسيت برجولي الحمد لله وودوني قسم التنويم وكنت فرحانه اني ولدت الحمد لله بخير
بس سوالي يابنات للي جربت ابره الظهر هل يعطونك الابرة مرتين الغريب انا اول ماعطوني كان فاتح 4 سم ولا حسيت بمفعول الابرة والالم فضيع لين صار 7 ونص بعده الحمد لله
والغريب بالامر ان الفونتالين اللي ياخذه فني التخدير ويحطه بالابره كل ما اقول ذبحني الطلق هذا وشووووو نفس علبة الفونتالين هذا خلى عروق راسي بتنفجر يعني معقوله ابرة الظهر كذا والله ماتوقعت انه كذا ابدا توقعت يعطوني اياه ولا احس بالالم لين ما اولد انا خلوني اموت من الطلق لين مافتح 7 ونص
وبالاخير الحمد لله ثم الحمد لله ثم الحمد لله لايحمد سواه وهذي قصة ولادتي المريره والعجيبه