قصة ولادتي

في يوم الثلاثا الي طاف كنت احس انه في عوار في بطني بعدين قلت يمكن قاعده ادلع الكلام هذا كان الساعه 8 بليل
اتصلت علي خالتي تبيني اقعد معاها و انا قاعده عندها احس بعوار اييني و يروح قلت هذا مثل كل مرة طلق كاذب
بعدين حسيت انه العوار يزيد قلت لها بروح اسوي عشا لـ :arb: و انحشت و قعدت مع زوجي و قاعدين نتعشى احس العوار يزيد قلت لا ادلع رحت شربت دارسين مع زعفران و حليته بعسل تالي قمت و سبحت و عينكم ما تشوف الا النور صارت الساعه 1 بليل قالي زوجي ها يمديني انام قتله اي تو الناس صارت الساعه 1 وربع خلااااااااااااص مو قادره حتى مو قادره البس انطر الطلق يروح مني عشان اقدر البس و طيران على المستشفى فحصتني الدكتورة تقولي الرحم مسكر ضاق خلقي سولي تخطيط لا مبين انه فيه طلق حطوني بغرفة الملاحظة و رجعت تفحصني لقته فتح سم
على الساعه 2 تالي حولوني على الولاده و ركبولي جهاز الطلق و الابرة الشرجية و عوار قالتلي الدكتورة احطلج ابرة الظهر قتلها لا ما ابي و عطتني ابرة مسكن قامت ما احس بالطلق الخفيف بس الثقيل اي احس فيه صارت الساعه 9 و الرحم فتح 2 سم هني استسلمت للواقع و طلبت ابرة الظهر و يات الدكتورة بطتلي ماي البيبي و الم صار موطبيعي قمت اصرررررخ و وراها حطولي ابرة الظهر بس وقتها ارتحت و نمت يمكن ساعه بعدين قمت من النوم على الدكتورة تقول ركبي لها اوكسجين هني اخترعت قتلها ليش قالتلي الاكسجين نقص و نبي نحطلج اكسجين نقي بحيث يوصل للبيبي اسرع بديت احس هني بالخوف و السستر الي عندي حامل اقول بقلبي انتي شايفة البلاوي هذه كلها و تفكيرين بالحمل الله يعينج صارت الساعه 1 الا ربع شفت الدكتورة تنادي دكتورة ثانيه و بعدين راحو نادو دكتور استشاري
و صار فوق راسي 5 دكاترة هني حسيت انه في شي و بديت اخاف قحصني قالي الرحم فاتح 3 سم و البيبي تعب نبضة فمضطرين نولد قيصري
ما استوعبت الكلام فكرته ينكت ما وعيت الا حطولي ابرة بالدرب و شربوني شي طعمه ملح على ليمون و نقولوني على الترولي هني قعدت ابجي و حالتي حاله دخلوني غرفه العمليات جان اهستر و حطو الستارة و دكتورة البنج و دكتور و سستر فوق راسي و الي شغالين بالعلملية دكتور و دكتورة و زادولي البنج و قاعده بس اصيح بعدين قالتلي الدكتورة ليش تبجين قتلها خايفه جان تقولي السستر اقولج على شي قتلها شنو تقولي ترا هم شقو بطنج خلاص
و ثانية و راح تسمعين صوت البيبي و فعلا ثانيه و سمعت صوتها و خذوها و ركضو فيها قعدت اصرخ وقتها ابي اشوفها جان الدكتور قال للستر خليها تشوف وروني اياها ثانيه و ودوها لدكتور الاطفال و قتها نمت و قعدت و هم توهم مخلصين من العلمية قتلهم شكثر طولت قالولي 45 قيقه الكلام هذا كان الساعه 2 الا ربع
و ودوني الافاقة قتلهم متى بطلعوني قالولي لما تقدرين ترفعين ركبتج طار البنج مني الساعه 4 و العوار اشتغل عطوني ابرتين مسكن ولا في فايده تالي طلعوني الجناح و مو قادره اتكلم و زوجي مصورلي البنت ورواني صورتها تالي يابوها لي قعدت ابجي بجي
و طبعا ما بديت احس فيها الا رابع يوم العملية و قعدت بالمستشفى 6 ايام و طلعوني بس لازلت تعبانه من الجرح

و توته توتا خلصت الحتوتا