قصة ولادتي

السلام عليكم ورحمة الله وبركاته
عيدكم مبارك وايامكم سعيدة
حبيباتي بنات حواء حبيت ابشركم ان ربي سهل علي وولدت ولله الحمد والمنة
ولادة طبيعية يوم الاحد 12 ذو الحجة بعد ما اخذت 11 يوم من الشهر العاشر
هذا سلمكم الله يوم الجمعة صحيت من النوم وكان فيني مغص لكن مو مغص طلق لا كان مغص اسهال
وظليت طول هذاك اليوم اعاني من الاسهال يمكن دخلت 10 مرات الحمام وانتو بكرامة
وبعدها بديت احس اني مو طبيعية تعبانة واحس بثقل وما اقدر اقوم واقعد الا بصعوبة
المهم اهل زوجي قررو انهم يطلعون على الكورنيش بما انه يوم عيد المهم قالو لي سوي شاي واحنا بنتكفل بالباقي طبعا بما اني حامل عطوني اسهل شي اسويه المهم لما جات الساعة 8 بالليل قالي زوجي يلا نطلع
قلت له لا ما اقدر اروح معكم اخذ العيال وروح معاهم انا ما اقدر تعبانة بس لا تقول لهم اني بديت في الطلق
وفعلا طلع مع العيال وطبعا لما وصل ينتظروني انزل من السيارة وما شافو احد وبدات التساؤلات وين زهر الرمان ليش ما جات قال لهم تعبانة قالو ها ولادة قال لهم لا بس شوية تعب ويعدي المهم هنا ام زوجي الله يعطيها العافية ما مشى عليها الكلام قالت له تقوم توصلني عندها اشوفها يمكن طلق المهم اقنعها ان ما فيني شي نسيت اقول لكم انا في منطقة واهلي ساكنين في منطقة ثانية المهم بعدين خلاص زوجي وعيالي ارجعو البيت بعد السهرة وقعدنا الى صلاة الفجر صلينا بعدين نمنا عاد ام زوجي اتصلت وقالت لنا انا بطبخ الغدا وبجي عندكم ولا تطبخون تعرفون قلب ام وتحاتي ومجربة الولادة جا اليوم الثاني وانا كان عندي طلق لكن خفيف يروح ويجي صحيت من النوم الظهر وصليت وقعدت زوجي وراح يجيب امه وجات وتغدينا وظلت عندنا الى الساعة 11 بالليل وانا طول الوقت يجيني طلق لكن متحملة
وبعدما طلعت قلت لزوجي انا بدخل انام يمكن يشتد علي الالم وتجيني الولادة قالي طيب انا بشتري عشا وش تبين قلت له ما ابي شي مالي نفس اكل بقى من الغدا واكلت منه ودخلت نمت وانا استغفر واصلي على محمد وحسيت ان الطلق زاد كل نص ساعة تجيني طلقة وكان قوي
المهم على الساعة 3 قمت ما قدرت انام رحت عند زوجي وعيالي قلت يسلوني وانسى الالم شوي وفعلا تسطحت على الكنبة وتلحفت وقعدت اقرا قران وزوجي قعد يقرا علي بعدين تبخرت وفعلا زاد الالم اذن الفجر صلينا وقلت له قوم ننام يمكن اصحيك الصباح
وفعلا تمددت على السرير وحسيت ان الالم بدا يشتد اغفي شوي من التعب واصحى على الطلقة ومسكين زوجي ما نام قعد يحسب كم بين الطلقة والثانيةعلى الساعة 7 خلاص ما عاد اقدر اتحمل قلت له خلاص نروح المستشفى خايفة :( لكن خلاص تعبت يومين وانا عندي طلق استعديت واخذت الشنطة وطلعنا قالي بشتري لك شي تاكلينه لا تهلكين وقت الولادة والدفع قلت له ما اشتهي قال مو على كيفك
المهم شرى لي بيض بالجبن وشاي حليب واكلته وحسيت ان المغص زاد والطلقة صارت اقوى وصلت المستشفى الساعة 8 وقاست لي الرحم طلع فاتح 5سم ما شاء الله حسيت بانجاز قالت لي تنويم خلاص ولادة صعدوني غرفة الولادةوحطو لي التخطيط بعد ساعة قالت الممرضة قومي امشي عشان يشتد الطلق قمت مشيت قالت يلا رجعي الدكتورة بتكشف كشفت وفتحت الموية عاد انا حسيت بالم اتوقع انه سوت تحريض موكشف عادي قالت فتح 6 تحطمت قلت كل هالالم بس 6 هذا الكلام كان الساعة 10 تقريبا بعد الكشف زاد الالم كان شي مو محتمل بديت اصرخ من الالم وهم يقولون لي حطي كمام الاكسجين وتنفسي وحطو لي مسكن لكن ما حسيت انه نفعني المهم الساعة10 ونص قلت لهم خلااااااااااااااص ولادة وجات كشفت وفعلا بسرعة جهزت السرير وانا اصرخ وادفع بكل قوتي الا وتطلع بنتي للدنيا واسمع صرختها والحمد لله ارتاح وبعدين نزلو المشيمة وانا اقول لهم عطوني الجوال
ابي اكلم زوجي وامي وهم صبري اول خياط:angry2: ويحطولي الكمام واروح في عالم ثاني احس فيهم لكن ما احس بالم ربع ساعة وخلصو الخياط وشالو عني الكمام وصحيت شوي وعطوني الجوال وقالو لي مبروك بنت طبعا انا كنت ادري انها بنت لان قالت لي الدكتورة بالسونار ووقت الولادة شفت البنوتة
كلمت زوجي وامي ورسلت لربعي وباقي الاهل رسايل طبعا كنت مجهزتها من قبل مع القائمة بس سويت لها ارسالوشالوني من سرير الولادة وحطوني على سرير ثاني ولحفزني لاني كنت ارجف من البرد مع ان الغرفة كانت من غير تكييف لكن تعرفون بعد الولادة يصير لخبطة
بالنسبة للمستشفى كان خاص مو حكومي عندنا تامين صحي تبع شغل زوجي ولدت في مستشفى اسطون
عند الدكتورة فريحة باكستانية صبورة الله يعطيها العافية كنت اصارخ وهي عادي حبيبتي تقول لي خذي نفس وقعدت بالمستشفى يومين في غرفة خاصة وكانو يجيبون لي البنت وقت الي اطلبها وبس اقول لهم اخذوها ياخذونها ارتحت الحمدلله في المستشفى
عقبال كل الكروشات يولدون بالسلامة ان شاء الله وربي يرزق كل محروم
بالذرية الصالحة
نسيت اقول لكم سميت بنتي زهراء
الله يحفظها من كل شر و يخلي لكم عيالكم
:27: