قصة ولادتي . . .

بسم الله الرحمن الرحيم

قصتي حبيباتي باختصار ..
كنت حامل بالاسبوع الـ 25 و داخلة الاسبوع الـ 26 اي في اخر اسبوع من الشهر السادس و كان أول حمل لي ..
كانت آخر دورة عندي بتاريخ 2014/10/9 و موعد ولادتي المتوقعه 2015/7/16 ..
و لكن - سبحان الله - قدر الله و ما شاء فعل - جاني الطلق بعد نهاية الاسبوع الـ25 ..
كانت فترة حملي جدا طبيعية و البيبي صحته ممتازة و التعب خفيف ..
و لكن بداية حملي كان ينزل مني دم واخذت مثبتات والحمدلله وقف . .
بدأ معاي شد في البطن وبدأت اتعب في نهاية الاسبوع الـ 24 و رحت لدكتورتي و عملت سونار و قالت الوضع زين !
و ماصدقتها ورحت لمستشفى ثاني خاص وكشفت علي سونار وقالت كل شيء تمام بس المويه ناقصه وماشددت في هالشي وانا على بالي اكثر شرب ماء . . .
و بعد اسبوع كانو اهلي جايين من الرياض لبريدة زياره والحمدلله انهم كانو موجودين . . .
قمت يوم الجمعة ساعة 10 صبح حسيت نفسي باردة وكنت وانا في نومي احس بمغص خرب علي نومي قمت ورفعت مفرشي تفاجأة بماء الجنين كلها نازله غرقتني !
من الخوف بكيت ودقيت على امي ورحنا لمستشفى النساء والولادة في بريدة وكشفو علي وقالو ماء الجنين نزلت لازم تنويم لكن الرحم مافتح ورفضنا التنويم ومشينا لرياض عشان اهلي ساكنين وابي يكونون عندي . . .

مشيت لرياض وانا قلبي ذابحني تفكيري كله بطفلي لو اموت بس هو يعيش . . .


وصلنا لرياض ورحنا على طول لمستشفى العلي وكشفت علي دكتورة حسبي الله عليها يدها كبيره عورتني وتقول انتي دلوعه كشفت والرحم مازال مقفل وقالت لازم اكشف عليها بالمنظار وافقت بعد ما بغيت اموت لانها خبقه يدها ثقيله دخلت المنظار ومن الألم دفيتها وزعلت المهم طلعت على مسؤليتي وامي كانت تضغط علي وتهاوش وماالومها تعبتها معي . . .


رجعنا البيت تغدينا وطلعنا لمستشفى الإمام وقالو مافي سرير ورحنا للإيمان وبرضو الحضانه مليانه ورحنا لمستشفى الملك خالد وقالو أن الدكتور في إجازة تبهذلت انا خيالي وتفكيري الجميل والي كنت انتظر واعد الايام والشهور عشان اشوف ولدي بكامل صحته بجهزه وقت ولادتي والحركات والدلع كله تبخرررررر . . .
ورحنا لشميسي و دخلنا ولقيت دكتورة دبه ويدها كبيره خفت مره ورفضت تدخل يدها وكانت اخلاقها زفت وقعدت ابكي عند امي ولكم ان تتخيلو كيف كنت وكيف كان شعوري وكيف كان موقف امي امي زعلت علي ورجعت وقالت مالي دخل فيك لو تموتين تعبتيني معك وامي تعبانه من نفسها وانا اتعبتها زيادة بس والله يابنات خفت من بعد دكتورة العلي بغت تشقني كنت اتمنى الموت كلن ضاغط علي عشان مصلحتي ومصلحت البيبي وانا عارفه هالشي لكن جاني رهاب من الكشف تحت . . .

و طبعن قلب امي طيب وهدت ورجعنا لمستشفى الشميسي مره ثانية وكانت معنا خالتي وانا كنت متخوفه من الدكتورة اخلاقها زفت ويدها كبيره وكنت ادعي واستغفر وابكي بحرقه في السيارة واهلي يشجعوني حسيت إني بواجه ربي . . .

وسبحان الله رجعنا لشميسي ساعة تقريبا 2 فجرا وكان دوام رجال الدكاتره رجال والحمدلله الله سخر لي رجال اخلاقه روعه وهدء علي وريحني وانا ابكي . . .

وسبحان الله كشف بيده وبمنظار ويشهد علي ربي ماحسيت الا بشي بسيط الحمدلله وقالو لازم تنويم والحمدلله أخيرا برتاح جلست في الشميسي 3 ايام وكانت حالتي تزداد سوء وكنت متحطمه وابكي طول يومي ووقت الزيارة بس 3 ساعات وكنت اداوم على قراءة سورة البقرة والأذكار والصلاة الحمدلله وادعي من قلب وابكي بحرقه والله مايخيب الداعي . . .


وبعده جوني قالو سارة 3 حالات ولادة والحضانة مليانه قالو بننقلك للالماني أو الحبيب وفعلا الحمدلله نقلوني بسيارة الإسعاف لمستشفى سليمان الحبيب التخصصي وسبحان الله الله مايخيب دعاك وجت عندي دكتورة عسسل ويدها خفيفه خف الريشة كشفت علي وسوت كل شيء ورقوني لغرفة ماقبل الولادة جلست تقريبا 5 ايام ونفسيتي تعبت وبدت تنزل معي ماء زيادة وفي الصباح قاسو نسبة ماء الجنين وكانت بسس 5 ب الميه !!!!

وقالو اليوم الثاني نشوف نقرر لك ولادة ولا ننتظر . . .

بعده النوم ماعاد جاني من كثر التفكير اهلي وزوجي ماقصرو معي لكن انا معدومه احس كانت ابغض ايام حياتي اللهم لك الحمد . . .

والساعة 3 فجرا يوم الخميس جاني طلق بس كان خفيف وكل دقيقة يزيد الألم واختي كانت عندي ودقيت على امي وجت مع زوجي واخوي الله يخليهم لي . . .

جات الدكتورة وكشفت علي وكان الرحم مفتوح 2 سم وقالت خلاص بننتظر ساعة ونولدك انا قلبي ماعاد أحس فيهه من كان يتوقع أن ولادته بتجي فجأة وماشلتي هم الولادة ولا حتى شريت شيء لطفلي ماكنت مستعدة ابدااااا . . .

وجلست ساعة ونص اتمغص وجات الدكتورة كشفت قالت الرحم نفسه ماتحرك لازم طلق صناعي لأن البيبي بدون ماء وسبب لي اللتهاب في الرحم والبول وانتم بكرامه واعطوني الطلق وقلبي بغى يوقف من الخوف وامي عندي وزوجي كنت ابكي لدرجة ماعاد اميز اذا انا ابكي ولا لاء !!!!
وبدأ الطلق يشتد إلى ان ظهري من الألم ماعاد احسه موجود صوتي اختفى من كثر البكاء والصراخ الطلق بغى يقطع ظهري نصين الحمدلله على كل شيء . . .

وجلست لينن ساعة 4 العصر وسوو لي قسطره ذبحتني وبعد عناء طويل جدا جدا نزل للحوض وصوتي كان مختفي من الصراخ والبكاء واذني مسدوده من التعب الي عانيته والحمدلله تم بفضل الله تعالى ولادت ابني < فهد > يحفظه ربي من كل شر يوم الخميس تاريخ 2015-4-2 كان وزنه 640 غرام وكان اسووود كان بيموت في بطني واخذوه على طول بدون ماشوفه وجتني راحه بعدين جتني الدكتورة قالت المشيمة بنطلعها وقامت تضغط على بطني وتسحب وانا ماعاد تحمل الألم دفيتها برجلي وسحبت المشيمة وانقطعت نصين النص الي في بطني رجع ضرب معدتي حسيت روحي طلعت وبعده عطتني مخدر حسبي الله عليها بدري وعلى طول رحت في غيبوبة وجلست يوم كامل نايمه من التعب لدرجة خواتي يأكلوني وانا نايمه بدون مااحس . . .
بعده قمت على طول قلت وين ولدي ابي اشوف حبيبي طبعا قمت من سريري جتني دوخه وجلست تقريبا ساعتين واكلت وارتحت ورحت اشوف حبيب قلبي والله يابنات يوم شفته تحطمت جاني شعور بتأنيب الضمير كان صغير مره والأجهزة كلها عليه 💔 ماقدر اوصف شعوري ذاك الوقت المهم جلست يومين وطلعت من المستشفى بدون طفلي الغالي حسيتني مكسورة والناس يجون يباركون لي وأنا حضني مافيه بيبي مدري يباركون على سلامتي ولا سلامة ابني احس اتحطم اذا جونا ناس وأقول ليه يجون انا ولدي تعبان يباركون لي على ايش !!!!

يعلم الله كم عانيت كم عانيت يالله ياربي لك الحمد على كل شي . . .

الحين له 3 شهور في الحضانه والحمدلله صحته مستقرة اللهم لك الحمد والشكر على كل شيء الخير فيما اختاره الله لنا . . .


خواتي .
احتاج دعائكم لطفلي الاول ..
فالدعاء من ظهر الغيب مستجاب بإذن الله ..

و احتاج خبراتكم و تجاربكم في هالموضوع ..
و هل مرت احدى الاخوات بمثل هذه التجربة ؟!
و من ولدت في الشهر السادس أو السابع ؟ و هل ظل طفلها في المستشفى ؟ ياليت كل وحده تكتب قصتها وتهون علي .. انا انتظر متى يقولون تعالو خذو ولدكم ابي أشبع منه ابي اعوضه الي فقده ......

احتاجكم و اتمنى انكم تفيدوني بارك الله فيكم ..

اختكم : هديل..