قصة ولادتي

السلام عليكم و رحمة الله و بركاته
مساء الخير يا بنات حواء
حبيت اكتب قصة ولادتي لاني حابه تبقى ذكرى ارجع لها هنا كل ما حنيت لها في زمن الزهايمر كفانا الشر 😩😔
/
أنا الحمدلله كنت انتظر الحمل من مده يعني ماتفاجأت بحملي او صار وانا ماادري
طبعاً مو بكريه
بعد ما عرفت اني حامل بشهر بدأ معي الوحام المعتاد
الوحام القرف
الوحام الشبح
مااقدر اوصفه بكلام لطيف لانه من جد ابشع المشاعر اللي متواجده داخل حواء وانا بزياااااده
استلمني الوحام خمس شهور
وحم و قولون و نفسيه و مدارس واختبارات
الحمدلله الذي لا يُحمد على مكروهٍ سواه
/
عدت الايام و وصلت للشهر الثامن
مره نزل معي دم بسيط و خفت لانو معاه الم مغص خفيف
رحت لدكتورتي في مستوصف جنب بيتنا
كشفت علي نسائي بسيط وقالت مفتوح واحد س
بس عندك افرازات و طراوة رحم
/
اضطريت ابدأ اراجع عند المستشفى اللي بولد فيه
مستشفى الحبيب الريان
انا بكل عيالي اراجع عند الدكتوره ماجده ملكاوي اردنيه
حبيبتي هذي الدكتوره وروحي وقلبي كأنها ام واخت مو بس دكتوره
تابعت معها
خبرتني ان واحد س او حتى اثنين س هذا شيء طبيعي للي مش بكريه
ورفضت تكشف نسائي
و طمنتني اخر طمأنينه
قالت لا تمشين ولا تجهدين نفسك الين نعدي الثامن
وعدينا الثامن بسلام
و عدينا نصف التاسع بسلام
و بديت اخاف من كثر التفكير بالولاده
لاني اخر اولادي خمس سنوات
وجاء رمضان وتعرفون زحمةالشوارع
صرت قلقه اكثر
ياترى متى اولد
الصباح او وقت الزحمه وخاصه ان الرحم فتح 3س بس الراس بعيد و العنق قاااااسي
في الاسبوع التاسع والثلاثون 39
قررت امشي عاد خلاص مافي مشكله لو ولدت الان والحمدلله ولدي اخذ حقه في بطني
اول شيء سويته قررت اروح اسوي كشف واشوف كم مفتوح وعلى اساسه اتصرف
قالت لي دكتورة الطوارئ ان الرحم مفتوح اربعه س بس الراس شوي بعيد و القساوة برضو ماهي بذيك الدرجه
قالت تنويم هذا الساعه 9مساءاً
قلت لها لا بطلع على مسؤوليتي
طلعت
ورحت مشيت ساعه متواصله
امشي وادعي امشي وادعي
وادعي ربي يسهلها وماارجع لبيتي الا والده وخالصه
بعد ساعه ونص رجعت للطوارئ و طلبت تنويم
المهم رجعت الدكتورة كشفت قالت ماشاءالله سته س
توكلنا ع الله و طلعوني تنويم و ركبوا لي جهاز الطلق اللي لو صنم يتحرك هو ما تحرك ولا سجل لي و لا نص طلقه
بديت اخاف
رحم مفتوح بدون طلق وش بيكون مصيري؟
اخذت جوالي وقعدت اقرأ سورة الزلزله ههههه لاني نسيتها من الخوف
تخيلوا نسيت سورة الزلزله يالله سبحانك كيف الوحده تضعف بهالمواقف 😔
المهم كانت الساعه 11 ونص وقلت لهم انا اراجع عند ماجده ملكاوي نادوها لي و جت القمر و هي تبتسم وسلمت علي
قالت مالقيتي تولدي الا الان
باقي ساعه ع دوامي اذا انتهى بتركك لدكتوره ثانيه واستئذن لاني حاجزه على مكه عمره
هنا قعدت ابكي بصمت نعم بصمت ابيها تكون جنبي و ماابي انها ماتروح عمره
المهم كشفت علي نسائي قالت مفتوح معك سبعه س
بس المويه مانزلت والطلق عددددددم
اول شيء نسويه نفتح المويه ياناديه و بعد مانفتحها بعشر دقايق نرجع نقيس و نقرر
قلت لها توكلي ع الله
فتحت المويه وتألمت جداً لان عنق الرحم بعيد شيء بسيط
وتركتني عشر دقايق
وانا اقرأ الزلزله
جات بعد عشر دقايق قاست مره ثانيه وقالت سبعه ونص المفروض خلاص فيه طلق
بس للاسف مافي طلق على الجهاز ولا انا احس بشيء
ناظرتني وقالت صناعي؟
قلت انا متوكله ع الله ومسلمتك اموري
توكلي ع الله
عطتني طلق ابره بالمغذي
عشر دقايق وبدأ الطلق وتذكرته على طول هههههه لي خمس سنين من اخر ولاده
كل طلقه تجي الف يمين او يسار من الوجع و ادعي واقول اللهم اجعلها بردا وسلاما
اللهم احفظ لي عيالي
وتروح الطلقه واقول الحمدلله راحت
وترجع بعد ثلاث دقايق😓😩 شيء موووووجع فوق الوصف ماهو زي الطبيعي ابداً
اربع طلقات بعشرين دقيقه تقريباً وبدأ الدفع
جات السيتر قاست قالت لاتدفعين مدام انتي لسى 8 س لان دكتورتي راحت تشوف وحده ثانيه تولد
قلت للسستر مو بكيفي ادفع هو بيطلع
دخلت دكتورتي وقالت خلاص اشوف الراس
و طولت بالدفع تعبت و اخر شيء صاااارخت قلت لها دكتوره طلعي هذا الشيء مني خلاص طلعيه و طلع ولدي
هو طاح من هنا وانا ارتحت من هنا
راحه عجيبه يالله
وعلى طول اخذته السيستر تنظفه و الدكتوره خلتني ادفع مره ثانيه علشان المشيمه والحبل السري
والخياطه استمرت نص ساعه و ساعتين خلوني لاني يراقبون اموري
وبعدين نظفوني وطلعوني الغرفه
طبعاً تعبانه والنفسيه زفت كالعاده بعد كل ولاده لي
/
ثاني يوم قالت لي السستر بتجي الدكتوره اشوفك تجهزي
تفاجأت انها نفس دكتورتي
باركت لها بالعمره
قالت اي عمره فاتتني الطياره
لبى قلبها الله يعوضها بعمره ثانيه ان شاء الله
الله لا يحرم كل متزوجه من الاولاد
الله يسخر لكل حامل ساعة ولاده مباركه ى دكتوره حنونه متفهمه
الله يشفي كل مريض و يعطي كل محروم سؤله
الله يكتب أجرنا على التعب اللي نشوفه بالولاده و يجعل اولادنا وبناتنا من البارين الصالحين المصلحين
اللهم امين