قصة ولادتي ....

بسم الله الرحمن الرحيم
تذكرون اخواتي اني عديت موعدي وكان يجيني مغص طول الشهر يجي ويروح وفي يوم الجمعه قمت على صلاة الفجر على نفس المغص بس اشد شوي عن مغص الدورة رحت الحمام اكرمكم الله لقيت ملابسي كلها دم عرفت على طول انها علامة ولادة كنت عند بيت اهلي طلعت خبرت امي وفي خلال 10 دقائق لقيت امي وابوي جاهزين يلا يلا بنروح المستشفى وهم خايفين اكثر مني واتصلنا على زوجي وانا اعصابي هاديه ترى بكريه مب داريه عن اللي ينتظرني اقول لهم قالوا لنا في الدروس لاتجون المستشفى الا في حالة الطلق كل 5دقايق او نزل الماي المهم جلست اشرب قرفه وحليب واحضر اشيائي وذهبنا المستشفى حوالي 8صباحا شافتني الدكتورة قالت الرحم مفتوح 3 سم والطلق منتظم لازم انام مستشفى ذهبنا الى الغرفه وجت بعد كدا صلاة الجمعه راحوا زوجي وابوي فضلت امي معاي وبدأ الالم الفظيع كل 5 دقايق وكنت اروح اتمشي شوي ولما تقرب الطلقه اجلس واستمر الحال لين الساعه 6 مساء وكنت خلااااااص تعبت واقول لامي خلاص ماقادرة اتحمل خلهم يسوون لي عملية راح زوجي للمرضات قال لهم زوجتي تتالم وايد وما في دكتورة جت شافتها من الصبح قالت خلاص انا بجي بشوفها يوم جت سوت لي فحص داخلي وعلى طول رنت جرس الطواري وجوا السسترات يركضون تخيلوا لقت الرحم مفتوح 9 سم يعني كنت بولد على سريري وطاروا بي طيران على غرفة الولادة والالم فظيييييع ركبوا لي التخطيط وسبحان الله من ثاني طلقة بديت ادفع والسستر ماشاءالله شاطره قالت لي نص ساعه بتكوني والدة لان الراس بدا ينزل والحمدلله مرت النصف ساعه مع اخر ساعة في يوم الجمعه وبعدها طلع " عبد الرحمن" للدنيا وحطوا على صدري وانا ميته تعب والحمدلله على نعمائه .
اللهم ارزق كل من تتمنى بالذرية الصالحة
ما ابي اخوف البكريات بس بصراحة ترى الولاده مب هينه ابدا والله شاطره اللي تولد طبيعي الله المستعان
اللهم ربي كل الف حمد وشكر