قصة ولادتي..

السلام عليكن خواتي..
اولا احب اشكر كل وحدة دعت لي وانا اطلق.. ثانيا بخبركم عن تجربة ولادتي في مستشفى النور..
الوقت: الساعة 9 من صباح السبت تاريخ 2/12/2006
انا كنت متفقة مع اختي اننا نروح الصالون عشان اسوي مانيكيور و باديكيور.. و كان الجو يجنن في بوظبي.. و المطر ينزل بغزارة.. اول ما قمت من السرير حسيت ان شي نزل.. انا تحسبته عزكن الله بول.. لان الياهل كان مسوي لي ضغط على المثانة و كنت احس اني اروح الحمام عزكن الله 10000 مرة باليوم:09: .. بس حاولت اني احبس البول و ما قدرت عرفت ان الماي نزل عندي.. بس كان على خفيف.. طبعا ما كان في اي الم.. و اعرف ان الطلق لازم بيبدا في خلال 24 ساعة .. قلت في نفسي اقدر اروح الصالون و ارجع البيت وانا لسة ما فيني طلق.. وصلت اختي على الموعد 10:30.. و ركبت معاها.. و اول ما تحركنا .. نزلت كمية كبيرة من الماي خفت اوسخ لها السيارة.. قلت لها خلنا نرجع البيت.. المشكلة اني ما كنت مسوية حسابي و ما اشتريت حفاظ كبير من النوع اللي يعطوننا اياه بالمستشفى.. و دكتورتي قالت اذا نزل عليج ماي تعالي المستشفى عشان نعطيج مضاد حيوي عشان ما يصير اي التهابات للبيبي..
معلومات مهمة:
اذا نزل الماي بغزارة لازم تجلسين بسرعة.. عشان ما ينزل الحبل السري في قناة الولادة.. و طبعا الطلق بيبدا في غضون ال24 ساعة اللي جاية.. اكتبي عندج الوقت اللي نزل فيه الماي عشان بيسألونج عنه في المستشفى..بعض المستشفيات بتقول لج ما في داعي تجين المستشفى الا اذا بدا الطلق عندج و كان كل 5 دقايق من بداية الويعة الاولى لين بداية الويعة الثانية.. و الويعة تكون على الاقل 60 ثانية.. تاكدي ان الماي شفاف او على بياض شوي.. اذا كان اخضر مثل شوربة البازيلا لازم تروحين المستشفى على طول لان الطفل قضى حاجته في الماي و الخوف انه يشرب هالماي الملوث.. او اذا نزل دم كثير مرة وحدة معناته ان المشيمة بدات تنفصل عن جدار الرحم و فيه خطر على الجنين لان ما بيقدر ياخذ اكسجين.. فلازم تروحين المستشفى على طول..

نكمل..:42:
المهم رجعت البيت و اخذت شنطة المستشفى و فوط كبيرة اجلس عليها لحد ما اوصل المستشفى.. وصلت مع اختي و زوجي الساعة 11:30 الصبح.. سالوني عن لون الماي و متى فتح عندي.. خذوا مني فحص بول عزكن الله و الحرارة و الضغط و سوا لي تخطيط للطلق و النبض البيبي..
فحصتني الدكتورة و قالت ان العنق فاتح 2 سم.. و في هالوقت حجزت الغرف اللي كنت اريدها.. و قعدت ادعي الله ان يسهل ولادتي و تكون طبيعيه..
رحت مع زوجي و اختي الغرفة اللي حجزتها.. و كانت الممرضة تسوي لي تخطيط كل ساعتين لمدة 20 دقيقة.. طبعا ما كان عندي طلق لحد العصر.. و نبضات الياهل كانت في الحدود الطبيعية.. يعني بين 120-170 و كانت منتظمة على ال 140 تقريبا لان مافي طلق..
دكتورتي فحصتني 3 مرات و قالت لي عنق الرحم ما فتح عندج الا 2 سم و نبضات الطفل ما تتحرك منتظمة في خط واحد احسن تسوين عملية قيصرية" شوفوا اللواته كيف.. يستغلون جهل الحريم بالاجهزة و الارقام عشان يستغلونها و يدفعونها فلوس على العملية القيصرية.... و طبعا لاني اعرف ان الطلق يحتاج 24 ساعة على الاقل.. قلت لها اريد اصبر 24 ساعة على الاقل.. و ثانيا اكيد ما بيفتح عنق الرحم لان مافيه طلق.. و ثالثا.. الطفل ما يحس بالطلق و نايم.. اكيد نبضاته ما بتتأثر.. مثل الشخص البالغ.. ما تتسارع النبضات الا اذا فيه مجهود على القلب مثل الجري او رفع الاثقال... الدكتورة ما قدرت تجادلني لان كل شي كان مدون عندي في كتاب.. حتى زوجي كان مقتنع..
المهم.. بعد صلاة العصر بداء الالم عندي مثل الم الدورة.. كنت اسوي تمارين التنفس عشان ابعد تفكيري عن الالم.. صليت و كنت ادعي ربي.. و كنت ماخذة معاي كرة الولادة و كنت استرخي عليها و اتحرك وراء و جدام و كان هالشي يخفف من الم الظهر .. كنت هالمدة اكل تمر و عسل مع حبة سوداء و اشرب ماي و كف مريم و شاي الطلق.. بدون علمهم :22: .. لاني كنت احتاج للطاقة عشان الدفع بعدين..

سوت لي الممرضة تخطيط.. كان خط التقلصات مستوي.. ما يرتفع و ينزل في المرات الاولى.. بس هالمرة كان يرتفع و ينزل.. و حتى دقات قلب الياهل بدأت ترتفع مع كل طلق.. كنت مستانسة و انا اشوف التخطيط.. بس الالم كان قوي و ما كنت اقدر اتحمله كنت احس اني متوحشة و اصارخ على اختي و زوجي بعصبية..و من بدا الطلق ينتظم.. حطت لي اختي الجهاز.. و هو عبارة عن 4 لصقات تنحط على منطقة الظهر و تتوصل في الجهاز اللي يسوي مساج بطريقة قوية تخلي المخ يزيد من مادة الاندورفين Endorphins اللي تخفف من الم الطلق.. كنت احس كان حد يدق ظهري ببروش الشعر Hair Brush و لما كنت اشوف جهاز التخطيط و اشوف ان الطلق بدأ اشغل خاصية ال Boost .. و فعلا يا بنات ما حسيت بألم الظهر و لا احتجت ابرة الظهر.. و فعلا الجهاز روعة و فوق ما كنت اتصور.. و من بديت استخدمه حسيت اني رجعت انسانة و هدأت اعصابي لاني كنت اقدر اتحكم بالالم و قدرت اتحكم بالعصبية بعد و اعتذرت من زوجي و اختي..:22:
و الجهاز اسمهElle Tens Machine و اشتريته من هالموقع من بريطانيا..
http://www.mothersbliss.com/index.asp

المهم صارت الساعة 3 الفجر و كنت احس ان الالم صار في منطقة البطن.. و لما فحصت علي القابلة.. كان الرحم فاتح 10 سم .. و خذوني على غرفة الولادة.. و بديت اسوي بوش Push ساعة كاملة.. و كانت دقات قلب الطفل ارتفعت فوق ال 170 و كانت توصل 190.. قالت لي الدكتورة ان الراس ينزل شوي و يرجع يطلع فوق.. و انا الطفل في مرحلة خطر:( .. و عطتني ربع ساعة زيادة.. بس ما قدرت اطلع البيبي.. و تعبت من الدفع :09: في هالمرحلة كانت دقات الياهل توصل 200 مع كل طلق.. يعني كانه يركض فوق طاقته.. و قلبه يحاول يضخ الدم بسرعة عشان يوصل الاكسجين لاعضاءه.. عرفت في هاللحظة ان ولدي ممكن يموت اذا ما طلع الحين.. و هو ما تحرك سم واحد من بديت ادفع لين آخر شي.. معناه ان الحبل السري لافف عليه بقوة.. حسيت ان الدنيا اسودت في ويهي.. و اني فشلت.. بس زوجي كان معاي.. و كان يشجعني اني ادفع اكثر.. بس لما شاف ان وضع الطفل صار محرج.. قال لي : انتي سويتي اللي عليج.. بس الله ما يبالج ولادة طبيعية.. و لحظتها قررنا اني لازم اسوي قيصرية ..

دخلت غرفة العمليات ومعاي الدكتورة و للاسف ما كانت دكتورة التخدير موجودة.. فسلمت امري لله و رضيت بالدكتور بشرط انه ما يشوف اي شي فيني الا وجهي و منطقة الظهر اللي بيحط فيها ابرة الظهر.. بس للاسف ما قدرت اصمد 5 دقايق لين ما يعطيني الابرة من شدة الالم.. فطلبت تخدير كامل..
و هم يجهزوني للتخدير كانت الممرضة ناوية تشيل عني لبس المستشفى عشان تغطيني بشرشف العملية القيصرية جدام دكتور التخدير و دكتور ثاني كان حاضر معاه.. ساعتها نسيت الالم.. و صرخت باعلى حسي للممرضة عشان تغطيني.. حاول الدكتور يهديني و يقول لي انه هالشي عادي عندهم و ان هو مثل اخوي!!! :44: .. رديت عليه.. اذا انا كنت فعلا اختك ما كنت بترضى ان حد يكشف عورتي جدام الريايل.. و ان لو زوجته او امه في هالموقف كان ما بيكشف سترهم جدام الناس.. حس الدكتور بالاحراج و خلاني مغطاية و نزلت الممرضة اللبس من تحت الغطاء..
بس هالتجربة تخليني اتسال ليش دكاترتنا المسلمين ما عندهم غيرة على اعراض الناس؟؟ ليش ما عندهم ضمير.؟؟ فعلا شي يحز في الخاطر..

نكمل..
بدات العملية الساعة 4:30 و انتهت الساعة 5:30 الفجر تاريخ 3/12/2006 يوم الاحد.. و لما طلع ولدي عبدالله كان في حالة خطيرة الحبل السري كان لاف مرتين و مشدود.. كان لونه ازرق و ما يتنفس.. سوا له انعاش.. كان بالع قطع كبيرة من الماي اللي في بطني و هالشي خنقه اكثر.. و الحمدلله بعد الانعاش صارت حالته احسن.. طلبت من زوجي ان المستشفى ما يعطي الياهل اي شي بالمرضعة.. و اذا جاع يعطونه حليب بملعقة او حقنة.. لاني كنت ناوية ارضعه رضاعة طبيعية و اي رضاعة صناعية قبل ما يكمل الطفل 6 اسابيع بتخرب طريقة مص الياهل للصدر و ممكن يترك الصدر و يفضل الرضاعة الصناعية لانها اسهل..
لما قمت من المخدر.. لقيت اختي معاي بالغرفة.. و قالت لي اني كنت اهاذي..:22: بس الحمدلله اول ما صحيت الساعة 10 الصبح تقريبا طلبت اشوف ولدي و كنت متشوقة اضمه لصدري.. لاني كنت وايد خايفة عليه.. زوجي كان تعبان و رجع البيت بعد ما تطمن علينا.. اختي كانت تبات معاي و تضيف الناس اللي كانوا يزوروني.. و الحمدلله كانت قد الموقف.. الله يعطيها الصحة و العافية و يسخرها ولد الحلال اللي يسعدها و يهنيها قولن ىمين..

قعدت 4 ايام في المستشفى.. كانت الدكتورة تمر علي الصبح و المساء و تبدل لي على الجرح.. و خدمة الممرضات و العناية كانت ممتازة و تعاملهم راقي.. و انا كنت مرتاحة لاني خذت 3 غرف مع بعض.. وحدة تبات فيها اختي.. و الثانية لي و للبيبي عشان ابعد الياهل عن الدخون و الورد اللي يسبب ربو.. و الثالثة خليتها صالة لاستقبال الضيوف.. الصراحة كانت تجربة حزينة:( و حلوة:42: في نفس الوقت.. بس احمد الله كل يوم ان ولدي عبدالله بخير و في حضني.. و احمد الله ان عندي اخت تتحملني و تساعدني.. و احمد الله على الصحة و العافية..



واي استفسار راسلنني على الخاص..