قصة ولادتي

سامحوني بنات انا وعدتكم اكتب قصة ولادتي بس اتاخرت ..

اتعرفون عاد منشله ويا البيبي ...

أول شي انا بالشهر التاسع كنت كل يوم امشي تقريبا ساعه ..
واكل تمر وعسل على الريج ...
كنت مجهزه ماي زمزم وقاريه عليه

سورة الزلزله
الرعد اية8
فاطرايه11
النحل ايه78

سورة الشرح سبع مرات مع تكرار اية ان مع العسر يسرا فان مع العسر يسرا ثلاث مرات والمعوذات سبع مرات واالفاتحه وسورة الزلزله

وهذا الش اتعلمته من موضوع بالمنتدى لاحدى الاخوات الله يجزيها الخير .. بحيث اني اول ما اييني طلق الولاده اشرب منه و وامسحه ببطني ..

والحين عاد نبدى قصتنا .. (( وياااااهي قصه )) بس الصراحه كانت اقل بواايد من اللي توقعته..

يعني مثل كل يوم كنا يايين انا وريلي من المشى تقريبا الساعه 11 فليل ..
وقلت له يمر العطار ياخذ لي زعتر لانه اختي قالت لي اييب الطلق ويسهل الولاده لانه كان موعد ولادتي السبوع الياي والدكتوره قالت اذا ما ولدت بتسويلي طلق صناعي ..
وقلت بجربه مو مشكله يعني اذا ما فادني ما بيضر ..
وووصلت البيت تقريبا الساعه 11:30 والساعه 12 شربت كاس شاي زعتر بس انا يعني غليت قد كاس ماي وحطيت فيه كميه كبيره من الزعتر يعني يمكن اكثر من الماي .. وحطيت فيه شكر عشان اقدر اشربه ..

وشربته تقريبا الساعه 12 وكان ريلي يالس عالنت وقلت بدش ارقد .. وانا منسدحه عالكرفايه يالسه اقرا مسجات واسمع شي فقع ببطني .. يعني ما ادري مثل شي وانفجر وعلى طوول حسييت بماي يخر .. الصرااحه اخترعت .. تميت صااخه .. واشوف الماي ايي ويزيد .. بغيت اقوم اسير لريلي ما رمت من الخوف .. واتصلت به عالموبايل .. ((زين انه الموبايل وياي )) وياا علىى طوول شغلت الليت اشوف الماي اخضر .. على طوول عرفت انه ولاده من اللي اتعلمته وياكم ((الله لا يحرمني منكم ))
ريلي ايشل الجنطه اللي مجهزينها ويالله انسير المستشفى وانا ما راضيه عشان ما عندي اي وجع وخفت اسير ايلعوزوني والولاده مطوله ..
قلت لا بتريا اشوي .. ومره ثانيه مااي ينزل عندي ..
الصراحه خفت .. قلت اخاف يستوي شي للجنين او ينشف المي .. قلت امري لله اسير المستشفى ..
وسرت كشفت علي الدكتوره قاله مفتوح الرحم تقريبا 2 سم وبتولدين باجر الظهر .. وودوني فوق وانا ما عندي اي اوجاع وكات الساعه تقريبا 2 .. ويوم يت الساعه 3 بدت الاوجاع عندي اشوي اشوي .. ولييين الساعه تقريبا 7 الحمدلله انا والده ويبت حمد :21:

ومن تجربتي للولاده حبيت انصح اللي مقبلين للولاده انهم ياخذون نفس عند الولاده لانه وايد ايريح ..

وبعد الزعتر وايد مفيييد ..
والماي المقرا عليه الايت اللي قلتلكم عنها ..

والله يسهل عليكم انشالله :)